Read Angguruk Yali 2 SAMUEL 18 Bible Online

2 SAMUEL 18 - Angguruk Yali bible

2 SAMUEL 18

¹Daud inowen sehen seneg inap ambiyeg welatfahon arimano luhalegma winag enepfareg su roho 1.000 luhal atfahon fahet onowesi enemu, tor angge 100 luhal atfahon fahet onowesi enemu wal toho lahap enepfag.

²Lahap enepfareg ap suwon Daud inowen Yoab men lalihibon tu, Yoab ot Abisai men lalihibon tu, Gat ahun Itai men lalihibon tu ulug asan hinahan minggiri fibareg it unubam hiyag isaruk lit, ”An oho hit men tog abik lul,” ibag.

³Ibagma sehen seneg inap arimanowen Daud fam, ”Hat ninikni nit men tog abik lul fug. Nit nenekolen pupu angge larukmu nit kim nisalusa fug. Nit fumag fil nunusuruk lit halug oho nit winon te fuki roho kim nisalusa fug. Iren te, ’Daud eneg wabul halug te ap teng-teng angge 10.000 men wirim am teg,’ pelusa. Ari fahet hat o Mahanaim wereg lit let neneptuk laruhun,” ibag.

⁴Ari ibagma ap suwon inowen, ”Hit hinindimuwen fano peruk ane roho anden turuk laruhuk,” ibag. Ari ibareg ap suwon ino elehet o pumbuk walinggoho ohowon sok elma unduhukmu it sehen seneg inap arimano obog toho asan su roho 1.000 luhalehon men tot toho 100 luhalehon men wal toho iraham keyen tulug wilip atuk latfag.

⁵Wilip atukmu ap suwon inowen Yoab, Abisai, Itai it hinahan unubam, ”An namloho angge re Absalom hinindi olokon fam wabuk fug!” ulug hiyag isibag. Hiyag isibahon ari it sehen seneg inap arimano obog tohowen hol hibag.

⁶Ari hol hibareg wilip atlug o Efraim farema libareg Israel inap it-it tog aptuk latfag.

⁷Tog aptuk lit Daud umalikisiyen Israel inap Absalom filon mulangge unusibag. O ari sambil pinggi unusibahon arimano ap teng obog sehelet obog 20.000 unusibag.

⁸Unusuruk lit linggik-longgo urukon arimano mug-mag eseheg unusil larukmu ohi ino fam ap eneg atfareg tog aptuk latfag. Sehen seneg inap tog fam unusibahon tor angge unusibag angge famen ohi ino famen war atfahon anggolo war atfag.

⁹Unusil larukmu Absalom Daud umalikisi men salkal ibag. Salkal ibareg itano Absalom wam kuda fam lahibareg larukmu wam kuda ino e suwon alem keyen larukmen e inggik seleyen Absalom oruk kani roho po-po urukmu wam ino pikit libagma Absalom pohol kinang honggolegma koloma po-po uruk latfag.

¹⁰Po-po urukmu ap ekeyen yet hibareg Yoab hiyag utuk lit, ”Absalom e seleyen oruk kani roho po regma yet hihi,” ulug hiyag itfag.

¹¹Hiyag itfagma Yoab inowen ap ino fam, ”Nungge ehen? Yet hehenteg ita haren pinggi ware feselen! Ware feselen halug anden onggo uang inggila numen men halunggu ke pug turuk angge men og hetle,” ibag.

¹²Ari ibagma ap inowen Yoab fam hebeloho ele uruk lit, ”Uang inggila teng-teng angge ninggikmu embelepma oho ap suwon amloho ino an ninggiken seneko ware fesele fug. Ap suwon inowen nit nonolohotman hat men Abisai oho Itai oho hit hunubam hiyag hisaruk lit, ’An namloho yuhon angge re Absalom wabuk fug,’ ehek ane ari hol hehereg imbisihi.

¹³Ap suwon inowen ehekon ari sobir isalug ware fesele halug ap suwon olohotman alem misig oho hiraho fuk fug teg angge re oluk alep. Oluk alepma haren an numbahalug lelen,” ibag.

¹⁴Ibagma Yoab inowen, ”An hat men we saplangge uruk laheyon aru nirim,” ibareg fit horohon hinahan wibareg Absalom e seleyen oruk kani roho po reg lit oluk weregma indimu yukuk toho kila fisibag.

¹⁵Kila fisibagma Yoab amingmingangge asehen walug norukon numen Absalom walinggoho unduhuk lit yik angge watukmu pinggi war atfag.

¹⁶War atfagma Yoab inowen numalikisi tog aptukon umbusukag ulug waruk tung esemek ibagma tung isarukmu Israel inap Absalom filon muko unusuruk latfahon arimanowen holfareg imbisibag.

¹⁷Tog imbisibareg Absalom wareg angge wibareg ohi ino fam kiling ele suwon elma hik isa wambibag. Hik isa wambibag ambeg palimu helep palu laha fisibag. Onowe ware feserukmu itano Israel inap Absalom filon arimano obog toho linggik-longgo ibareg inibam o sabo wal taneg libag.

¹⁸Absalom oluk wereg lit an namloho nubalmangge eleg angge re fobik welamuhubonen an nunuk onoluk teg lamuhup ulug o Raja tonggoma inggareg fahet enehangge helep fam wiri fibag. Witfahon ino inggareg unuk hikit toho suwalfagma aben helep ino fahet Absalomen inggareg fahet wiri fibahon tu ulug ketiya oho uruk.

¹⁹Absalom ware fisibagma Zadok amloho Ahimaas inowen Yoab fam ele uruk lit, ”Folo-folo ap suwon Daud ambeg laminteg fano ane hiyag utuk lit, ’NINIKNI Allahn hat hibil atuk lit ap seliyon ininggikmuwen windat haptisi,’ ulug hiyag irik lamin,” ibag.

²⁰Ibagma Yoab inowen, ”O yoho re alem teko laha ane aru haren te hiyag irik la fug teg. Wina sul eneg te haren hiyag irik lelen. Daud amloho ware fesehesa angge re o yoho re haren hiyag irik lamihin fug,” ulug hiyag itfag.

²¹Ari ibareg Yoab inowen Sudan ahun eke hiyag utuk lit, ”In atmihinteg haren yet hehen ane ap suwon hiyag irik lamihin,” ulug hiyag itfag. Hiyag itfagma ap ino elenggen fam hur atlug Yoab hi ribareg pupu angge libag.

²²Libagma Ahimaas inowen nin eke Yoab fam ele uruk lit, ”An nubam teko lamisi ane fahet nakol eleg peruk lahireg Sudan ahun ombolim folo-folo lamihin ulug hiyag nimin,” ibagma Yoab inowen, ”Namloho, nungge fahet folo-folo lamin peruk lahen? Fano ane walug laminmu onggo nowen og numusa peruk lahen?” ibag.

²³Ibagma Ahimaas inowen, ”An nubam tulusa ane fahet nakol eleg peruk lahireg folo-folo lamin,” ibag. Ari ibagma Yoab inowen at ubam, ”Ari ehenma lamihin,” ibagma Ahimaas wilip atfareg ik Yordan ayeg ke libareg Sudan ahun pisan isalug atam arik libag.

²⁴At libag li itano hun Daud elehet o pumbuk walinggoho ohowon sok selmon men undamon men pulmu heriyegma o sokolma kahaleg ahun ino elehet unggulmu lahibareg ilanggen pen harukmen ap misig eneg pupu angge waharukmu yet hibag.

²⁵Waharukmu yet hibareg o sokolma kahaleg ahun inowen ap suwon Daud ino hiyag itfagma ap suwon inowen, ”Ap misig eneg waharuk halug fano ane nambeg walug waharuk,” ibag. Ibagma ap ino horogma waharukmu

²⁶kahaleg ahun inowen nin yet harukmen ap winon eke pupu angge waharukmu yet hibareg sok foroho ahun eke fam ele hi roho uruk lit, ”Yet himin, ap winon eke amu eneg pupu angge waharuk,” ibagma Daud inowen, ”Eke ariyen oho fano ane walug waharuk,” ibag.

²⁷Ari ibagma kahaleg ahun inowen, ”Ap tam waharukon aru Ahimaas ino laruk hag toho waharukmu yet haruk lahi,” ibagma Daud inowen, ”Ap ari fanowon, fano ane walug waharuk,” ibag.

²⁸Ari ibagma Ahimaas Daud ambeg watfareg ele hi roho nikni ulug hi ribareg ap suwon olohotma orohole han sahun atfareg ele uruk lit, ”Nikni hat ap suwon, huwabul ulug ininggik leg haruk latuson arimano NINIKNI Allahn hik esehek ane fahet HIKNI Allah wel turuk laruhun,” ibag.

²⁹Ari ibagma ap suwon inowen, ”Namloho Absalom fano wereg ano?” ulug kapal hibagma Ahimaas inowen hiyag utuk lit, ”Yoab inowen an hat hamingmingangge welahiyon tu ap suwon ambeg lamihin ulug hiyag nerehekma itano anden yet isarukmen ap luhaleg lit ngik-ngog urukmu yet isihi angge famen alem nungge fahet turuk ulug napeleg toho wahi,” ibag.

³⁰Ari ibagma ap suwon inowen, ”Niraham tiya unduhuk lamin!” ibagma ap ino in arik libag.

³¹Unduhukmu Sudan ahun Daud ambeg watfareg hiyag utuk lit, ”Nikni, hat ap suwon, NINIKNI Allah o yoho hibil atuk lit huwabul ulug in atuson arimano ininggikmuwen Allahn windat habehekma fano ane walug wahi,” ibag.

³²Ibagma ap suwonen Sudan ahun fam, ”Namloho Absalom fano wereg ano?” ulug kapal hibagma Sudan ahun inowen, ”Hamloho ubam tehesa ane hag toho nikni hat men seli roho wereg inap siyahap habul ulug in atuson arimano obog toho unubam oho teko lelepma fano,” ibag.

³³Ari ibagma hol hibareg Daud yuk lagmag ibareg indimu siyag toho elehet sok kuruk ambeg palimu lahalug o toron wirig latfahon fam kibareg uba yatuk lit, ”Namloho Absalom, namloho, namloho Absalom. An war atlema hat welalen, Absalom, namloho, namloho!” ulug uba yatuk latfag.