Read Angguruk Yali 2 SAMUEL 19 Bible Online

2 SAMUEL 19 - Angguruk Yali bible

2 SAMUEL 19

¹Daud ino uba yatukmu aben Yoab hiyag utuk lit, ”Ap suwon inowen Absalom fahet piya sini yiko uba yatuk lit wereg,” ulug hiyag itfag.

²O ari sambil sehen seneg inap arimano ap seliyon mulangge unusehe ulug enehiyeg toho welalep angge famen ap suwon amloho fahet indimu siyag aha urukmu hol hibareg sehen seneg inap obog toho inindi siyag atfag.

³Inindi siyag atfagma sehen seneg inap tog aptuk ambehen linggik-longgo ulug ininggaliyen enele eleg angge suhuloho waharuk hag toho hirag-hirag o Yerusalem suhuloho watfag.

⁴Waharukmu ap suwon inowen sum fam orohole hililip tibibareg ele hi roho uba yatuk lit, ”Namloho Absalom, Absalom, namloho, namloho,” ulug uba yatuk latfag.

⁵Uba yatukmu Yoab ino Daud welatfag ambeg kibareg at ubam ele uruk lit, ”Nikni, nit humalikisiyen o yoho haret humalikisi ap umaliket hilani maliket huhesi yuhon oho ilamna og enesug lahenon oho windat henebehe angge famen o yoho re nit obog toho nininggaliyap neneptuk lahen.

⁶Hat huwabul ulug turuk inap hindi isaruk lit nit hat ninindi hasug laheyon fahet nirim peruk lahen. Haren sehen seneg inap onowesi men onotsi men apmayap eneptuk lahenon ari tehen ane ariyen o yoho inam aha. Absalom oluk welalepma nit obog toho o yoho nunuselep halug haren te fano pelen ane yoho an nindi anggar aha.

⁷Ari fahet in atlug wilip atmihinteg hotsi unubam hele fano roho hiyag isa lamihinmu inindi yuwag atmisi. NINIKNI Allah olohotman tik-tem toho uruk lahi: Hat wilip atmihin fug halug yoho hup aru famen ap misig oho hat min welamusa fug. Hat hebe totman alem siyahon hubam atuk latuson arimano se reg. Wilip atmihin fug halug alem mondabi angginon hubam aruhu rohon,” ibag.

⁸Ari ibagma Daud ino in atfareg elehet sok wirihon elma hur arik wambibag. ”Daud sok elma heriyeg lit wereg,” urukmu hol hibareg umalikisi obog toho ap suwon ambeg waharuk latfag. Israel inap Absalom ibilon arimano enekolen linggik-longgo ibareg inibam wal taneg libag.

⁹Welatfareg Israel inap ununggul unuk obog tohowen enele sahal paluluk uruk lit, ”Ap suwon Daud inowen ap seliyon ininggikmuwen windat neneptisi, Filistin inap ininggikmuwen oho tel neneptisi. Ketiya Absalom fahet akolen o aruwen wilip atisi.

¹⁰Absalom fet nenesug laruhun ulug ap suwon lahaptukukon ino tog elman war atisi angge re ketiya nungge fahet ap misihen oho ap suwon Daud ino suhuloho hondoholug watmin peruk eleg?” uruk latfag.

¹¹Israel inap obog tohowen uruk latfag ane ari Daud inowen hol hibareg ot eke imam Zadok men Abyatar men enembeg monde fibagma libareg hiyag isaruk lit, ”Yehuda inap onowesi suwon-suwon unubam ti roho ilihip, ’Daud ele tu: Ap winonen eneg Daud suhuloho ibam hondoholug wamuhuk ulug enele sahaltuk angge re hit it enembolma henele ehep ha nowen!

¹²Hit te an nori, an namep minggirig! Nungge fahet hit fobik amuhup?’

¹³Hun Amasa fam ti roho ilihip, ’Daud ele re tu: Hat te namep minggirig fug? Notsi sehen seneg inap onowe mondabi welaruhun ulug Yoab ubalmangge lahap haptuk lahi. Lahap haple fug halug Allahn nuwatep,’ ilihip ehek,” ulug hiyag isibag.

¹⁴Ari roho hiyag isaruk lit Daud inowen Yehuda inap obog toho inindi og enepfagma inindi misig atfareg Daud ambeg ap mon enepfagma libareg hiyag utuk lit, ”Ninikni, hat hamingmingangge men suhuloho watlihip ehesa,” ulug hiyag itfag.

¹⁵Hiyag itfagma ap suwon Daud ino o Mahanaim embeselug nibam lamin ulug ik Yordan ayegma watfag. Waharukmu Yehuda inap Daud olohotma lulteg ik Yordan paloho hondoholug wamul ulug o Gilgal libag.

¹⁶It larukmu Gera amloho Simei ibam o Bahurim ahun unggul unuk Benyamin ino oho folo-folo Daud olohotma lamin ulug

¹⁷Benyamin inap teng-teng angge 1.000 hondog eneplug laruk latfag. Larikim Saul umalikisi enemingmingangge Ziba ino umalikisi ap angge nuwal fumahen 15 men amingmingangge likin fumahen 20 men pupu angge Daud olohotma ik Yordan ayegma libareg

¹⁸Daud uhesi malik hondog eneplug waharuk lit fano pemisi ane tul ulug ik paltuk ke nindig atfag. Nindig atfareg Daud ik paloho watmin ulug turukmu olohotma Simei elenggen fam hur atfareg

¹⁹Daud ubam ele uruk lit, ”Nikni hat ap suwon, an nubahet nubam siyag ane tirisi ahun puk fug! O Yerusalemen wilip atikin sambil an hat hamingmingangge welahiyonen siyahap haptikik ane fahet wenggel ha fug! Aren ari roho tirisi ulug hirim puk fug.

²⁰Anden siyag ane tirikikon noluk. Israel inap ununggul unuk ik eleruk fil werehon winon obog toho uwan waharukmu an tam folo-folo nikni hat ap suwon holohotma wahiyon yet niyimin,” ibag.

²¹Ari ibagma Zeruya amloho Abisai inowen ele uruk lit, ”Simei inowen hat NINIKNI Allahn mumal haptisi hahun huluwap haptisi ane fahet war aruhu,” ibagma

²²Daud inowen hebeloho hiyag utuk lit, ”Hit Zeruya umalikisi welahebon an men il eleg angge famen nungge fahet o yoho an seliyap naptuk lahep? An Israel inap fahet yoho nin ap suwon in ahi sambil aru ap eke o Israel kinang fam war atmisi fug,” ibag.

²³Ari roho ibareg Daud inowen Simei fam, ”We tem toho hat war aruhun fug,” ibag.

²⁴Ari ibareg weregman Saul umbusag Mefiboset ino Daud olohotma libag. Ap suwon Daud wilip atfag sambilen uyug umabuk fug angge panisung filuk fug angge asum wan tohon umag ta fug angge weregman eneg Daud ino palimu atfareg suhuloho watfag.

²⁵Waharukmu Mefiboset ino o Yerusalemen wilip atlug Daud olohotma libagma Daud inowen kapal haruk lit, ”Mefiboset nare, nungge fahet hat an men larukuk fug?” ibagma

²⁶Mefiboset inowen, ”Nikni hat ap suwon, an nuyug siyag teg lahi angge re hat holuk. Ari fahet anden namingmingangge hiyag utuk lit, ’Wam keledai fam lahaminteg ap suwon men ambiyeg lulen wam keledai palimu embelug hur atuk angge imbik watmihin,’ ulug hiyag itikik angge famen at te hat nikni welatikin ambeg larisireg an nabug ele si ane hubam irisi. Hat Allah ot malaikat hag toho welahen angge re nikni haren fano peruk lahenon hikit toho nubam timihin.

²⁷

²⁸Nit Saulen ondohowon famen welaheyon obog toho fano nunuselen angge famen nikni haren te an ap haren suburu og isaruk lahenon enesehelimu numbaharikin. Anden hat holohotma nele uk fug tehen hat ap suwon hubam heng habihi ha fug teg,” ibag.

²⁹Ibagma Daud inowen at ubam ele uruk lit, ”Nungge-nungge hat hubam werehon hiyag nitmihin fug. Hat men Ziba men Saulen kinang lin isibahon minggir atlihip,” ibagma

³⁰Mefiboset inowen ikni Daud hiyag utuk lit, ”Nikni, hat ap suwon alem siyahon hat hubam atisi fugmu suhuloho wahen ulug nahiyeg toho welahireg yabuk ari Ziba eneg ngi reg laruhu,” ulug hiyag itfag.

³¹Hiyag itfareg weregman Gilead ahun Barzilai ino o Rogelimen watfareg Daud Yordan ikma hondoko imbisik lamin ulug Daud men ambiyeg libag.

³²Barzilai indag tibag sali mo ilig am wirig am turukmen teng hinahan 80 atfagma mondabi sabal teg angge welatfag. At tung ahun wereg lit ap suwon Daud o Mahanaim weregma suburu og utuk latfag.

³³Og utuk latfag ane fahet Daud inowen Barzilai fam ele uruk lit, ”An nibam o Yerusalem lulteg ambiyeg wereg lit suburu og hutuk laruhuk,” ibagma

³⁴Barzilai inowen Daud fam, ”Mo noenam welaruhukteg war aruhuken nungge fahet hat ap suwon men o Yerusalem ambiyeg lul?

³⁵An indag atik iyag sali winag harukmen teng hinahan atisi angge re fanowon ano siyahon ano pihi ha fug teg. Naruk angge suburu men ik men unduk nek hihi ha fug teg. Aben sini urukon hol isa fug teg lahi. Nikni hat ap suwon anden hubam angginap habihi ha nowen.

³⁶An hamingminganggeyen ik Yordan paloho we il misig hondoko humbahik lamin peruk lahireg nungge fahet ayeg watuk angge ehenon og nitmin peruk lahen?

³⁷An nikni nisinga men kinangma sal eneptusa ambeg an oho nibam yugmuwen war aruhukmu sal nabuhuben hibam lamihin ulug an hiyag nimin. Namloho Kimhan aru eneg te nikni, Daud, hat men lalihip. Lalihipteg hat nikniyen ubam fano ane timin peruk lahenon hikit toho turuk laruhun,” ulug Barzilai inowen Daud hiyag itfag.

³⁸Ari hiyag itfagma ap suwon inowen, ”Ari fano, Kimhan an men lulteg haren fano peruk lahenon anden at ubam turuk lit haren an heng naptuk lahenon hikit toho hat fahet turuk laruhuk,” ibag.

³⁹Ari ibagma ap arimano obog toho ik Yordan paloho nindig atfag. Nindig atukmu ap suwon Daud inowen Barzilai fam lamihin ulug mako pug toho hi ribareg ar oho ik paloho libag. Larukmu Barzilai ino oho suhuloho ibam watfag.

⁴⁰Ik Yordan paloho libareg Daud ino o Gilgal larukmu Kimhan ino at men ambiyeg libag. Larukmu Yehuda inap obog toho men Israel inap minggiroho winon men Daud hondoholug laruk latfag.

⁴¹Larukmen Israel inap obog toho ap suwon Daud ambeg watfareg at ubam enele uruk lit, ”Nungge fahet nit nonori Yehuda inaben hat ap suwon hinggik lisoho og habehesareg huhesi malik men hotsi hat men werehon obog tohowet ik Yordan paloho hondog haplug wahasa?” ulug hiyag itfag.

⁴²Hiyag itfagma Yehuda inap obog tohowen Israel inap arimano unubam enele uruk lit, ”Ap suwon Daud aru nit nenere angge re hondoholug wahe. Alem aru fahet nungge ulug honolok atuk? Nit te suburu ap suwonen tohon naruk inap peruk lahep? Naruk lit nungge ininggikmu along atuk peruk lahep?” ulug hiyag isibag.

⁴³Hiyag isibagma Israel inaben Yehuda inap hebeloho hiyag isaruk lit, ”Hit Yehuda hununggul unuk we misig, nit nununggul unuk numen welahe angge re hit men wirim teg elehen at te nit nonowe suwon wereg. Nungge fahet nit apmayap neneptuk lahep? Tam-tam niren Daud suhuloho hondohik lul ulug nenele sahaltuk latukukon ino henepeleg?” ulug hiyag isibag. Ari roho suwahal uruk lit Yehuda inaben Israel inap onolok toho hiyag isaruk latfahon palimu regma Israel inaben enele uruk latfahon men wirim teg latfag fug.