Read Angguruk Yali 2 SAMUEL 2 Bible Online

2 SAMUEL 2 - Angguruk Yali bible

2 SAMUEL 2

¹Welatfareg Daud inowen NINIKNI Allah fam ele uruk lit, ”Yehuda kinang fam o pumbuk misig eke senerik lahuk ano?” ulug kapal hibagma Allahn te, ”Lahun,” ibagma Dauren, ”O kema lahuk?” ulug umung hibagma Allahn te, ”O Hebron lahun,” ibag.

²Ari ibagma Daud uhesi pirenet misig Yizreel hiyap unuk te Ahinoam men misig eke Nabal o Karmel ahunen lin isibahon unuk Abigail men ambiyeg o Hebron libag.

³Laruk lit otsi oho unuhesiyet unumalikisiyet hondog eneplug libareg o Hebron men o pumbuk walinggoho welatfahon men fam welatfag.

⁴Welatfagma Yehuda inap ambeg watfareg Yehuda ninap fet nenesug laruhun ulug ahaluwe amben fanowon unggul ke are reberuk lit Daud ap suwon lahapfag. Welatfareg Yabes-Gilead inaben Saul wareg angge kinangma saltusa ulug Daud hiyag itfagma

⁵o Yabes-Gilead kinang fam ap mon eneptuk lit, ”Hiren hinikni Saul hinindi haruk lit kinangma sale feserikip angge re NINIKNI Allahn fet henesug laruhu.

⁶Aren inggik kobog hisa fug angge indi henesugmen eneg welamuhup. Hiren fano ane tirikipmu anden oho fano ane eneg hit hunubam turuk laruhuk.

⁷Hit hinikni Saul war atisimu hinindi wirik toho wereg lit hinine roho turuk lamuhup. Ketiya Yehuda inaben fet nenesug laruhun ulug an Daud ap suwon unduhuk nubaharusa ulug hiyag isa lalihip,” ulug ap mon enepfag.

⁸Saul otsi sehen senehon onowe Abner hun Ner amloho inowen Saul amloho Isboset hondoholug ik Yordan paloho o Mahanaim libag.

⁹Libareg Israel inap obog toho onowe suwon welaruhun ulug unduhuk fibagma hun Isboset inowen o Gilead, Asyuri, Yizreel, Efraim, Benyamin men seneg latfag.

¹⁰Isboset indag tibag sali mo ilig am wirig am turukmen teng misigmen nubam hilag nuwalen 40 atfagma ap suwon lahibareg Israel inap fet enesugmen eneg mo piren libag. We Yehuda inap arimanowen eneg Daud ombolim laruk latfag.

¹¹Hun Daud ino o Hebron wereg lit Yehuda inap fet enesugmen eneg mo sabiren, pikalem falfaliken libag.

¹²Isboset ino ap suwon atfagma Abner inowen hun Saul amloho Isboset otsi hondog eneplug o Mahanaim embeselug o Gibeon libag.

¹³Libagma hiyap Zeruya amloho Yoab men Daud otsi menen unusik lul ulug wilip atlug enembeg libareg ik yenggelehon unuk Gibeon ayegma weregma Abner men Isboset otsi men ik yenggelehon ino fuma fil welatfag.

¹⁴Wereg lit Abner inowen Yoab fam, ”An notsi men hat hotsi menen nit nonolohotman tog fam wal-wal amusan hiyag usul,” ibagma Yoab inowen, ”Fano ehen,” ibag.

¹⁵Ari ibagma ununggul unuk Benyamin inap enebe nisanggowen Saul amloho Isboset fahet in arik libagma Daud otsi enebe nisanggowen oho it enelukema in arik libag.

¹⁶In arik libareg it-it onoruk kani roho seneg lit karog unumbantumu kilabeg latfahon fam hak toho wat-war atuk latfag. Wat-war atfag ane ino fahet o Gibeon horogma ino unuk salikap toho Helkat-Hazurim suwalfag.

¹⁷Wat-war atfagma yet isibareg Daud otsi men Abner otsi Israel inap menen tog tahan tibil larukmen eneg Daud otsiyen Abner otsi Israel inap arimano apmayap enepfag.

¹⁸Tog aptuk lit hiyap Zeruya umalikisi ununuk Yoab, Abisai, Asael menen oho tog aptuk latfag. Asael ino wam rusa uyug ilaluwe roho laruk hag toho la reg latfag.

¹⁹At inowen hun Abner watmin ulug laruk lit at embeselug ilan fil la fug angge muko laruk latfag.

²⁰Larukmu Abner inowen orohole hebeloho at ubam, ”Hat Asael inowen an mug naplug wahen?” ulug kapal hibagma Asael inowen, ”Wahi,” ibag.

²¹Ibagma Abner inowen hiyag utuk lit, ”An numbahalug hinggik hare fil ano pikit fil ano lamihinteg ap winon eke senerik lalug tog aren tohon hilamihin,” ibag ane holfag anggeyen Asael inowen Abner muko laruk ane imbisibag fug.

²²Imbisibag fugmu Abner inowen nin eke Asael fam, ”Anden huwarihi ha nowen numbahalug lag! Anden huwatlereg fobik howe Yoab olohotma nangginoho lele,” ibag.

²³Ari ibag angge famen Asael inowen Abner embeselug libag fug. Libag fugmu Abner inowen fit seneg latfahon alem fil hebeloho Asael ahummu hak tibisibagma ahako folok atfag. Folok atfagma Asael ino kinangma fuk toho war atfag. At wareg angge kinangma yinggig lit weregma ap ambeg watfahon obog tohowen at yet haruk lit inindi enekol toho unduhuk latfag.

²⁴Asael war atfagma owesi Yoab men Abisai menen Abner wabul ulug muko libag. Muko laruk lit mo ubuk ik ohoma o Gibeon lekma laruk ke o pumbuk Giah yali fil hebe unuk Ama alma libag.

²⁵Libagma yet isibareg Benyamin inap arimano Abner ambeg libareg hebe ino atelma iraroho in arik lahibag.

²⁶Lahibareg Abner inowen Yoab fam ele hi roho uruk lit, ”Nit-nit tog aptukmen eneg obog toho war amuhuk ano? War amuhukmu ya nga uhubon hat hapeleg? Noenam welamuhukteg haren hotsi unubam honori mug eneplug laruk lahebon ari imbisiyek uhun?” ulug hiyag itfag.

²⁷Hiyag itfagma Yoab inowen ele uruk lit, ”Allah oluk werehonen holeg lit weregma anden iminon tu: Haren ehenon ari tam elen halug an notsi aruman hit nit nonori welahebon mug heneplug laruk laheyon o yoho likiya imbisila,” ibag.

²⁸Ari ibareg Yoab inowen pinggong ele hum toho kong turukmu itano at otsiyen Israel inap unusul ulug mug eneplug libag ane imbisibag.

²⁹Imbisibagma Abner otsi men hubanggo laruk lit Yordan tonggo keyen tulug ik Yordan paloho nindig atfareg o Bitron keyen tulug Mahanaim libagma o sakan tibag.

³⁰Yoab ino Abner otsi men embeselug hebeloho watfareg otsi obog toho palu eneplug winag isarukmen Daud otsi sehelimuwon Asael men ap enebe soho fumahen men tog elman unusibahon eleg latfag.

³¹Daud otsi enebe we tor angge unusibag angge famen Daud otsiyen hebeloho Benyamin inap hun Abner ombolim laruk latfahon enebe teng nuwalen 360 unusibag.

³²Unusibareg Yoab otsiyen Asael wareg angge o Betlehem walug libareg ikni kinangma salfag ambeg amloho oho kinangma salfag. Salfareg Yoab otsi o Betlehem embeselug hubanggo larukmen eneg ket sakan turukmu o Hebron libag.