Read Angguruk Yali 2 SAMUEL 20 Bible Online

2 SAMUEL 20 - Angguruk Yali bible

2 SAMUEL 20

¹O Gilgal ap ubabut olokon unggul unuk Benyamin ahun Bikri amloho unuk Seba welatfag. Seba inowen pinggong ele hum toho kong tibareg ele hi roho uruk lit, ”Nit Daud umalikisi fug. Isai amloho Daud inowen nungge-nungge nit fahet nunumbaharisi fugmu at men nininggik ahandip toho welamuhuk fug. Israel hinap nori, ninibam luk ohon maniyek!” ibag.

²Ibagma Israel inap obog toho Daud embeselug hun Seba ombolim larukmu we Yehuda inap arimanowen Daud apma welamuhuk ulug Daud ino Yordan ikman hondoholug o Yerusalem watfag.

³Watfareg Daud ino ibam libareg hiyap numen aren uhesiyap enepfahon Daud o Yerusalem embeselug libagma at ibam foroho latfag hiyap itano hondog eneplug o eke fam kilap enesug latfag. Kilap enepfag ambehen wilip amuhup tohon ulug hiyap itano sok laroho olma weregma Dauren eneseher angge obog toho og isaruk latfag angge famen it men nohoruk latfag fug. Nohoruk latfag fugmu hiyap yuwohon hag toho weregman eneg war atfag.

⁴Hiyap itano o ino kilap enesug latfareg ap suwon Daud inowen hun Amasa fam ele uruk lit, ”Yehuda inap sehen senehon palu arik wamuhuben wol enepmihinteg o ha it men ambiyeg nambeg wamuhup,” ulug hiyag itfag.

⁵Hiyag itfagma Amasa inowen Yehuda inap wol enepfag angge famen amusun turuken o ha wamuhup ulug imbibag sambil ino watfag fug.

⁶Watfag fugmu Daud inowen Abisai fam ele uruk lit, ”Absalom inowen nenele ying neneptisi ane we tot apma regma ketiya Seba inowen nenele ying neneptukon palimu reg. Seba folo-folo laruk lit o pumbuk elehet yaron walinggoho kilabehon ilmig til larukmu niren at senebuk fug teg lamuhuk tohon! Ari fahet haren an notsi hondog eneplug at muko lalihip,” ulug hiyag itfag.

⁷Hiyag itfagma Abisai inowen Yoab otsi men Daud ebe foroho latfag inap men enehako roho turuk inap obog toho hondog eneplug o Yerusalemen wilip atfareg hun Seba ino muko libag.

⁸Muko laruk lit helep humon o Gibeon werehon iraham libareg yet harukmen Amasa tam libareg o ino welatfag. O ino sambil hun Yoab inowen sing wan teg lit karog eke hililip angge fam kilaboho hele alunggumu pug tehon fam ililoho wan teg latfag. Wan teg lit aluke fil larikim karog inggarehen hililip angge ino famen wilip atukmu inggik hareyon fam senebuk teg latfag.

⁹Ari reg lit Yoab ino Amasa iraham libareg at ubam, ”Nare, fano welahen?” uruk lit mako pug toho hi ruruk hag ane timin ulug inggik pikiron fam Amasa panisung seneg latfag.

¹⁰Senegma Amasa inowen karog Yoab inggik hareyonen seneg latfahon yet ha fug angge weregma Yoab inowen karog fam Amasa ahummu hak tibisibagma al pulaloho kinangma wambibag. Wambibagma Yoab inowen war aha ulug pirenam hak tibisibag fug. Ari roho Amasa ware fisibareg Yoab ot Abisai men wilip atug hun Seba muko libag.

¹¹Libagma Yoab ot misig hun Amasa wareg angge horogma in arik libareg ele hi roho uruk lit, ”San Yoab men Daud men inibil amul perukon arimano Yoab ombolim lulen maniyek!” ibag.

¹²Ibareg yet harukmen Amasa ware fisibagma amep kinangma wambibag ambeg kebunggalem pulmu yinggig lit weregma ap obog toho iraham unduhukmu yet isibareg Yoab ot inowen wareg angge ino oko walug anggenma imbibag. Imbibareg ap Amasa warehon iraham keyen larukon arimanowen kim hul ulug unduhuk lam nowen ulug sum fam hondo ribibag.

¹³Ari tibagma ap obog toho unduhuk lam fug angge Yoab ombolim laruk lit hun Seba ino muko libag.

¹⁴Muko larukmu Seba ino Israel inap ununggul unuk obog toho enengginang walinggoho libareg o Abel-Bet-Maakha libag. Laruk lit ununggul unuk Bikri inap arimano obog toho at ombolim laruk latfag.

¹⁵O Abel-Bet-Maakha libagma Yoab otsi men o ino libareg walinggoho kilap enesug latfag. Kilap enesug lit elehet yaron pisan toho o ino pin kul ulug elehet walinggoho kinang fam hop til lahibag. Hop til laharuk lit elehet ino men ahandip tibik lahibareg Yoab otsi obog tohowen elehet ino halog tul ulug turukmu

¹⁶hiyap indi anggat tehon ekeyen o pumbukmuwen ele hi roho uruk lit, ”Holeg lamek! Holeg lamek! An men hun Yoab menen nenele ulen tiya wamag ulug hiyag irik lalihip,” ibag.

¹⁷Ibagma Yoab hiyap ino horogma libagma hiyap inowen, ”Hat Yoab wahen ano?” ibagma Yoab inowen, ”Wahi,” ibag. Ibagma hiyap inowen, ”Anden hiyag hitminon holeg lamin,” ulug hiyag itfagma Yoaben, ”Holeg lahi,” ibag.

¹⁸Ibagma hiyap inowen, ”Indam aben uruk lit, ’Alem wereg halug o Abel lahup. Lahupmu o Abel inowen komo henebuhup ane hikit toho tuhup halug mun ane man ane fano aruhu,’ uruk latfag.

¹⁹Ari uruk ane hikit toho nit Abel ninaben ninindi wirik toho wereg lit suwahal uruk lahe fug angge famen haren o tu halog timin ulug waharikin. O pumbuk tu Israel inap inisinga hag toho werehen siyahap tuk fug! Nungge fahet kinang NINIKNI Allahn ngi reg ambeg ino pil-pil namin peruk lahen?” ibag.

²⁰Ibagma Yoab inowen hiyag utuk lit, ”Ari fug! Allahn tohon pil isaruk lit o aru pin halog toho siyahap timin fug.

²¹We tik-tem toho ari peruk lit waharukuk fug, ap eke ibam tom Efraim famon fahet waharukuk. At unuk Seba hun Bikri amloho inowen ap suwon Daud pilabuhuk ulug palimuwap taruk. Palimuwap taruk ane fahet alem angginon ubam umbulen wilip nisa maniyek! Ap misig ari eneg wilip nisalihip halug an o aru siyahap tuk fug angge lamin,” ulug hiyag itfag. Hiyag itfagma hiyap inowen, ”Fano, at unggul kong toho hat elehet sel fil weregma hik isa wamul,” ibag.

²²Ibareg hiyap ino ap o pumbuk welatfahon luhaloho weregma libareg indi anggat toho wenggel hibag ane unubam hiyag isibagma fano pibareg hun Seba waroho unggul kong tibareg Yoab elehet selma unduhukmu hik isa watfag. Hik isa watfagma Yoab inowen pinggong ele hum toho kong turukmu at men watfahon o pumbuk ino embeselug libareg inibam wal taneg libag. Larukmu Yoab ino ap suwon ambeg o Yerusalem libag.

²³Daud inowen amingmingangge in enepfahon tuma ul: Yoab ino ap sehen senehon obog toho onowe welatfag. Yoyada amloho Benaya ino Daud ebe foroho latfag inap arimano onowe welatfag.

²⁴Ap ininggik lisoho yabuk eke hag eke hag wit nisaruk lamuhup ulug mingming eneptukon arimano hun Adoram inowen sen enesug latfag. Ahilud amloho Yosafat ino ap suwon komo rurukon onowe welatfag.

²⁵Hun Seya ino suwesingga hahatuk ahun welatfag. Zadok men Abyatar men Allah amingmingangge imam welatfag.

²⁶O Yair ahun imam Ira ino Daud ibam welatfag.