Read Angguruk Yali 2 SAMUEL 21 Bible Online

2 SAMUEL 21 - Angguruk Yali bible

2 SAMUEL 21

¹Daud ino ap suwon weregma suburu obok humon lahibareg weregman eneg mo hinahan libag. Mo hinahan libagma Daud inowen suburu obok ari fahet hiyag nitmisi ulug NINIKNI Allah ambeg libag. Libagma NINIKNI Allahn ele ubam uruk lit, ”Hun Saul inowen o Gibeon inap unusuruk lit at umalikisi menen alem angginon unubamap taruson ino fahet suburu obok ari laharisi,” ulug hiyag itfag.

²O Gibeon inap arimano Israel inap fug angge famen Amori inap sehelimuwon weregma Israel inap atam o Kanaan kinang fam kuruk lit Amori inap winon elehap enepfag hag toho ir oho elehap eneplep angge famen hunusuhuk fug ulug sali unubam imbibag. Sali unubam imbibag angge famen fobik Saul inowen an numalikisi Israel inap men Yehuda inap men iniraham welam fug tehen Gibeon inap arimano elehap enebuhuk ulug yami ruruk latfag. Ari roho turuk latfagma ap suwon Daud inowen o Gibeon inap arimano wol enepfareg it unubam ele uruk lit,

³”Israel ninaben siyag ane hunubam turuk lit alem nunubamap tarukukon ino eleg amag ulug yami ruruk lahi. Ari fahet nit nunubam timisi peruk lahebon hiyag nemek! Hiren nit NINIKNI Allah umalikisi welaheyon huluwap nenebehep ha nowen!” ulug hiyag isibag.

⁴Hiyag isibagma Gibeon inaben Daud hiyag utuk lit, ”Saulen ondohowonen ondohowon arimanowen onggo fano angge emas men perak men og nisahup peruk lahe fug. Israel ahun ayeg waroho ware fisila ulug oho wenggel haruk lahe fug,” ibagma Dauren, ”Anden hit fahet nungge ane timin, hiyag nemek!” ibag.

⁵Ibagma iren, ”Saulen Gibeon ninap nunusuruk lit Israel kinang atogman atogma welamuhup fug ulug mondabi elehap nenebuhuk peruk latfag.

⁶Ari fahet Saul umalikisi ap angge sabiren og nisalihip. Og nisalihipmu hun Saul NINIKNI Allahn mumal tibag ahun ibam o Gibean unusuhuk,” ulug hiyag itfag. Hiyag itfagma Dauren, ”Og hisamin,” ibag.

⁷Ari ibareg Dauren indam Saul amloho Yonatan ubam hat humalikisi siyahap enebuhuk fug ulug NINIKNI Allah olohotman sali imbibag ane fahet wenggel haruk lit Yonatan amloho Mefiboset og isamin fug pibag.

⁸Pibareg hun Aya ahaloho Rizpa inowen Saul indag itfahon ap angge ununuk Armoni men Mefiboset men, Saul ahaloho Merab inowen o Mehola ahun Barzilai amloho Adriel indag itfahon ap angge fuwaben men wol enepfareg

⁹Gibeon inap og isibag. Og isibagma Gibeon inaben malik sabiren itano NINIKNI Allah olohotman unusul ulug punumu e fam song unubahik lahibagma ambiyeg war atfag. War atfag ane ari roti anggen paltukon ak turuk li teko libag.

¹⁰Malik arimano war atfagma Saul uhe Rizpa inowen fong watuk lit wan teg asum eke oko walug helep suwon malik unusibahon saplangge hik isibag ambeg libareg sum helep ino fam tuwale felug hur atfareg amusun toho weregman eneg osit naruk li ak tibag. Helep ino fam hur atuk lit unukoho suweyen malik wareg angge arimano nahup tohon ulug yanggaleheg hubanggo wam eli men olomene men yanggal enebeheg turuk latfag.

¹¹Ari turuk latfag ane fahet aben Daud hiyag itfagma

¹²Daud inowen Saul men amloho Yonatan men unuwag wak lamin ulug o Yabes Gilead kinangma libag. Indam Filistin inaben Saul umalikisi men tom Gilboa famen unusibareg it wareg angge walug o pumbuk Bet-San silimu e fam tel enebik libag. Tel enebik libagma holfareg o Yabes inap arimano o ino libareg wareg angge itano yoholiyangge hilalug inibam walug watfareg foroho latfag. Forohoma Daud inowen Yabes inap unubam Saul men amloho Yonatan men unuwag foroho lahebon arimano og nitlihip ulug heng enepfagma og itfag.

¹³Og itfagma Daud inowen it unuwag walug watfareg malik sabiren unusibahon unuwag oho andog toho walug watfag.

¹⁴Walug watfagma Daud otsiyen unuwag arimano o Zela Benyamin kinang fam walug libareg Saul ikni Kis kinangma salfag ambeg unuwag arimano oho kinang habuloho salfag. Ari obog toho ap suwon Daud inowen hiyag isibag ane hikit toho tibibagma Israel inaben sembahyang urukon Allahn holfareg nin suburu og isaruk latfag.

¹⁵Welatfagma nin eke Filistin inaben Israel inap men tog abuhuk ulug waharukmu Daud otsi men it onolohotma libareg it men tog aptukmen eneg Daud ine eleg atfag.

¹⁶Ine eleg atfagma hun Yisbi-Benob ap unuwag yaronen ondohowonen endetfahon inowen fit ine angge tembaga fam wirihon anggin hinahan minggiroho reg latfahon seneko karog keron namil fam pug teg lit Daud ino ware fesemin ibag.

¹⁷Ari ibagma Zeruya amloho Abisai inowen Daud ibil atuk lit Filistin ahun ino ware fisibag. O ino sambil Daud otsiyen enele inine roho heng turuk lit, ”Hat Israel ninap fanowap neneptuk lahenon ino war aruhun tohon fobik nit men tog elma laruk lamuhuk fug,” ibag.

¹⁸Welatfagma Israel inaben Filistin inap men o Gob horogma tog abik libag. Tog aptuk lit o Husa ahun Sibkhai inowen hun Saf uwag yaron ino ware fisibag.

¹⁹Ware fisibagma Israel inaben nin eke Filistin inap men o Gob horogma tog aptuk lit o Betlehem ahun Yaare-Oregim amloho Elhanan inowen o Gat ahun Goliat inggikmu fit humon yaron seneg latfahon ino ware fisibag.

²⁰Welatfareg Israel inaben o Gat horogma tog abik libag. Tog aptuk ambeg inowen ap uwag yaron inggik uyug amlo pikit filonet hare filonet wal taneg falfaliken wereg latfahon Israel inap iniline in arik libag. Ap ino oho umbasi unuwag yaronen ondohowonen endetfahon welatfag.

²¹Aren Israel inap ininggaliyap eneptuken Daud owe Simea amloho Yonatan inowen pinggi ware fisibag.

²²Ari roho turuk lit ap uhan unumbasi unuwag yaronen ondohowonen endetfahon o Gat welatfahon itano Daud otsi menen misig-misig unusuruk latfag.