Read Angguruk Yali 2 SAMUEL 22 Bible Online

2 SAMUEL 22 - Angguruk Yali bible

2 SAMUEL 22

¹ NINIKNI Allahn Daud ino Saul inggikmuwen windatfareg ap seliyon obog toho ininggikmuwen oho telfagma Daud inowen sini fam Allah wel turuk lit,

²”NIKNI Allah, Hat an nubahet helep ubule hag toho welahen. O yaron uwag ineyon hag toho wereg lit ili og naptuk lahen.

³Hat helep suwon hag toho welahenma an hapma yuwag toho welahi. Hat tog piyabangge hag toho wereg lit mapmu nasug lit windat naptuk lahen. Hat elehet yaron hag toho welahenma an halukema welahi. An nakol tulug laruk ambeg oho Hat wereg lit let naptuk lahen. Aben nubam onolok ane turukmu oho tel naptuk lahen.

⁴Nele ine roho Hat NINIKNI Allah wel haptuk lahimu ap seliyonen oho nuwabuk fug teg.

⁵Ik fu waharuk hag toho war atuk aneyen waling nasugmu war am hag toho welatikik. Ik fulungnu ruruk hag toho onolok ane nubam atisi.

⁶Hele war atuk aheleyen walinggoho pug nasug latisi. Luhur amag ulug norohole fil yebangge reg latisi.

⁷Siyag ane nubam atukmu anden nele ine roho NINIKNI Allah fam heng uruk latikik. Let nabin ulug Nikni Allah fam nele hi roho uruk latikik. Ari urukmu Allah ibamen nele holtuk latisi.

⁸Allahn holtisireg itano o mek turuk lit kinang yuk turuk latisi. Allah olok indok ambulpul hag toho turukmu pohol ahongge yuk elek turuk latisi.

⁹Indok hubu At ambiyang ele keyen wilip atukmu ambilik ele keyen indok ambulpul mililang turuk lit indok anggen Allah famen wilip atuk latisi.

¹⁰Allahn pohol kinang horogma pilabe fik waharisireg At inggareg pohol singon fam uyug sobig lit wambik waharisi.

¹¹Ot malaikat[11] aherabul palimu Allah heriyeg lit larukmu homhomowen walug wambik waharisi.

¹²Osit humon men hina singon menen hililip toho hirako wambik waharisi.

¹³At olohotma lebeglu rurukmu indok anggen umbagpag turuk hag toho turuk latisi.

¹⁴NINIKNI Allah ele poholman ululu ruruk lit At palimu werehonen ele uruk latisi.

¹⁵Allahn tog pising-pasang isaruk lit ap seliyon hik-hak isaruk latisi. Lebeglu fam unusuruk lit seli inap ilte-kalte isaruk latisi.

¹⁶Allahn ambiyang ahe ine roho fu haruk lit ele pararag turukmu itano helep tuwaliyen ik humon yenggelehon apma werehon inam atikim kinang ahongge oho ebenam atisi.

¹⁷NIKNI Allahn inggik poholman pilabik waharisireg ik fu waharuk ambehen an lisoho og naptisi.

¹⁸Ap seliyon onolokon ininggikmuwen windat naptisi. An fahet ninirim perukon arimanowen apmayap naptukmu ininggikmuwen tel naptisi.

¹⁹Siyag toho welatikik sambil nuwabul ulug waharusama Allah an nandimi angge atisi.

²⁰Allahn indi niyarisireg windat naptuk lit koloma numbahik larisimu nindi yuwag toho welahi.

²¹Anden fano ane turuk latikikon fahet NINIKNI Allahn fano ane nubam turuk. An ninggiken pikir ane turuk latikikon wirim toho nubam turuk.

²²NINIKNI Allahn uruk ane roho eneg laruk lit At embeselug un ke larikik fug.

²³Allahn komo neneptuk ane holtuk lit Aren nit nunubahet haharoho imbibahon umbusuhuk fug.

²⁴Anden Allah olohotma un ane tuk fug angge indi siyahap tihi ha nowen ulug nindi anggat toho welahi.

²⁵Anden fano ane turuk lahiyon wirim toho Allahn hebeloho fanowap naptuk. At olohotma pikir ane eneg turuk lahiyon hikit toho nubam turuk.

²⁶Ap inindi hasuhon Haren oho hindi enesug lahen. Un ane turuk elehon unubam Haren oho un ane turuk lahen fug.

²⁷Ap pikir ane turukon unubam Haren oho pikir ane turuk lahen. Ap hare ane turuk inap unubam Haren oho hare ane turuk lahen.

²⁸Nit apma roho welahe perukon arimano Hat inibil atuk lahen. Ap enewelwel taruk inap arimano Haren apmayap eneptuk lahen.

²⁹An o hik tegma welahimu, NIKNI Allah, Hat iral hag toho wereg lit selehap naptuk lahen.

³⁰Hat an nibil atuk lahenma ap siyahap nabul ulug turuk inap unusimin ulug nambong se roho laruk lit elehet yaron it wereg ambeg walinggoho wirihon hik tombo suhan toho wamburuk lahi.

³¹We tem toho Hat Allah wereg lit fano ane eneg turuk lahen. Hat hele tik-tem toho uruk lahen. Hat tog piyabangge hag toho wereg lit ap Hat hapma larukon obog toho mapmu enesug lahen.

³²NINIKNI Allah Hat hahon winon eke wereg eleg. Hat helep ubule hag toho welahenon winon eke wereg eleg.

³³An nakol toho welahimu Hat Allahn laruk lahi abunggalem yag naptuk lahenma Hat hineyon hapma yuwag arik laruk lahi.

³⁴Meneyen folo-folo laruk hag toho Haren an nuyug nineyap naptukmu folo-folo laruk lahi. An punumu unduhuk nubahik laharuk lahen.

³⁵Haren tog aptuk ane fahet milal naptuk lahenma an ninggiken sehen suhunim ineyon lisuk teg lahi.

³⁶Hat an nubahet sing tog piyabangge hahon wan atuk lit windat naptuk lahen. Hat hele fano ane nubam uruk lahenon ariyen nine atuk lahi.

³⁷An nine roho lawag ulug kalem fano yaho ke numbaharuk lahenma nelenggen siyag atuk eleg.

³⁸Ap seliyon muko unusik laruk lit obog toho unusuruk latikik. Obog toho elehap eneptuk latikikteg suhuloho waharuk latikik.

³⁹Elehap eneptuk lit ilkal isaruk latikikmu onoluk am fug teg latusa. An nuyug alma waroho lin-lan uruk latusa.

⁴⁰Ine roho tog aptuk lamag ulug nineyap naptuk latikin. An nuwabul ulug in atuson arimano an napma embeseruk latikin.

⁴¹Ap seliyon an nuwabul ulug turuk latuson arimano Haren yanggal eneptuk latikin. Ap an nubam enelitno nasug latuson arimano anden elehap eneptikik.

⁴²Iren enele inine roho let nenebin urukmu ap it let eneptukon eleg latisi. Enele hum toho NINIKNI Allah fam urukmu holtuk latisi fug.

⁴³Anden it unusuruk lit lilibug-lalabug toho unusirikikmu ul hag atusa. Aben sabelep pisal-pasal isaruk hag toho anden ap arimano sobit-sabar isarikik.

⁴⁴Ap an men suwahal uruk latuson ininggikmuwen Haren windat naptikin. O pumbuk obog toho fahet inikni welaruhun ulug Haren an lahap naptikinteg numbaharikin fug. Ap o pumbuk anden yet isarikik fuhon arimano oho an namingmingangge atusa.

⁴⁵Ap yatma werehon oho an napma wereg lit hi naptuk. An nele hiyag isarukmu hol haruk li itano eneg hiyag isaruk lahiyon hikit toho iren turuk.

⁴⁶Ap yatma inap arimano an fahet enekolen yuk lagmag uruk lit inibam elehet yaron walinggoho wirig ambehen wilip atuk.

⁴⁷NIKNI Allah Hat holuk welahenon, Hat helep ubule an fahet welahen ulug wel haptuk lahi. Hat helep ineyon welahenma an Hat halukema wereg lit nindi yuwag toho welahireg Hat palimuwap haptuk lahi.

⁴⁸Nikni, Hat an nibil atuk lit ap seliyon apmayap eneptuk latikin. O pumbuk winon an napma welamuhup ulug hondog eneplug waharikin.

⁴⁹An men seli roho welatuson arimano ininggikmuwen tel naptikin. An nuwabul ulug in atuson arimano hat it palimu welaruhun ulug unduhuk nubaharikin. Onolok ane turuk inaben wabuhup tohon ulug ili og naptikin.

⁵⁰Ili og naptikinmu o pumbuk obog tohowen holukag ulug NIKNI Allah, Hat sini fam wel haptuk lahi. Hat hunuk su amag ulug yite sini fam yunggultuk lahi.

⁵¹Hat ap suwon welaruhun ulug an lahap naptikinteg hinggik kobog niya fug angge let naptuk lit palimuwap naptuk latikin. An Daud Haren mumal naptikinon men numalikisi men hindi nenesugmen eneg welaruhun,” ulug Daud inowen Allah wel turuk latfag.