Read Angguruk Yali 2 SAMUEL 23 Bible Online

2 SAMUEL 23 - Angguruk Yali bible

2 SAMUEL 23

¹Daud ele obog-obogma ibag ane tu, ”An Isai amloho Daud palimu welaruhun ulug Yakub Ikni Allahn mumal naptisireg ap suwon lahap naptisi. Sini milaltuk lit yunggultuk lahiyon fahet Israel inaben inindi niyaruk.

²NINIKNI Allah ahime fanowon inowen an feneyen ele urukon an nambilik famen wilip atuk.

³Israel ninap Ninikni Allah helep ubule hahon inowen ele hiyag nutukon tu, ’Ap Allah fahet akol toho wereg lit unggum fano roho haltuk lit ap fet enesug ahun ino

⁴o hubet hibi fanoma mo ket lahik waharukmu ahilhil turuk hag toho ar oho wereg. Osit obog nalug o hibi atukmu itano hoholangge fano roho wilip atuk hag toho aren oho fano ane eneg turuk.’

⁵An numalikisi men Allah olohotma welamuhuk. Aren mondabi fano roho welamuhup ulug sali nubam emberisi. Allahn fano roho indimu wenggel harisireg sali emberisi ane ino eleg am fug angge welaruhu. Mun ane man ane anden heng uruk lahiyon Aren holtuk. Aren let naptukon eleg aruhu fug.

⁶Ap Allah ele holtuk eleg inap arimano alog angge aben hik isarukon hag toho wereg. Ininggiken sen enebuk fug tehen

⁷karog olokon fam, fit fam unusuruk lit indokma yale fusuhupmu ul aruhu,” ulug Dauren ele obog-obogma ibag.

⁸Daud otsi enembong se roho turuk inap ununuk tuma hahareg: Hakhmoni ahun Isbaal ino ap hinahan enehako roho turukon onowe welatfag. Isbaal inowen ap seliyon teng-teng angge teng misigmen nubam hilag piren 800 men tog aptuk lit misihim it obog toho fit fam pinggi unusibag.

⁹Daud ot pirenehon ahako roho turukon o Ahohi ahun Dodo amloho Eleazar welatfag. Misihim Filistin inap arimanowen tog abul ulug luhal atug watfagma Israel inaben nit men tog abulen maniyek ulug Filistin inap ininggaliyap eneptukmu Eleazar ino Daud iraham welatfag. O ino sambil Israel inap enekolen tog aptuk ambeg embeselug larukmen

¹⁰Eleazar ino unduhuk lit karog fam Filistin inap anggolo unusurukmen eneg inggik mondabi yinggil atfagma karog ino kobog isa fug teg latfag. O ino sambil NINIKNI Allahn Israel inap windat enepmin pibareg inineyap eneptukmu Israel inap enekolen libahon arimano suhuloho Eleazar ambeg watfareg Filistin inap apmayap eneptuk lit enenggengge huhul hilaruk latfag.

¹¹Daud ot hinahanehon ahako roho turukon o Harari ahun Age amloho Sama welatfag. Weregma Filistin inaben tog abul ulug o Lehi luhal arik watfag. It watfag ambeg ino sinali eneg yatuk ambeg watfag. Watfagma Israel inap enekolen linggik-longgo ul ulug turukmen

¹²hun Sama ino yabuk pulmu in arik libareg yabuk ino ine roho seneg lit Filistin inap arimano waroho apmayap enepfag. Ari tibag ane ino NINIKNI Allahn Israel inap windat enepmin pibareg ine roho let eneptukmu Israel inap palimu atfag.

¹³Misihim roti anggen paltuk li horog tegma Filistin inaben tog abul ulug o Refaim tonggoma luhal arik watfareg o sabo wiroho welatfag. Welatfagma Daud o Adulam owik iraham weregma otsi enembong se roho turukon teng misigmen nubam hilag hinahan enesehelimuwon enebe hinahan Daud ambeg wambik watfag.

¹⁴Watfag sambil ino punumu elehet yaron oho ambeg Daud weregma Filistin inap palu misig o Betlehem welatfag.

¹⁵Welatfag ane fahet Dauren indi ouk toho wenggel hibareg otsi hiyag isaruk lit, ”Ap sa o Betlehem lamisireg sok o pumbukmu kurukon horogma ik fahet habulig ambehen ik hinanggik lamisireg an naminen walug watmisi?” ulug hiyag isibag.

¹⁶Hiyag isibagma Daud otsi hinahan itano o Betlehem libareg Filistin inap o sabo wiroho welatfag ambeg kuruk lit sok horogma ik fahet habulfag ambehen ik hinanggibareg Daud ambeg suhuloho walug watfag angge famen Daud inowen namin fug ibareg NINIKNI Allah olohotma hilili fibag.

¹⁷Hilili feruk lit, ”NINIKNI Allahn anden ik aru na nowen ulug fet nasug lamag! An notsiyen war atuk ane fahet enekol eleg toho hinanggik lahasa angge re ik aru nangginoho namin? Ik aru an notsi enemep naruk hag toho nele,” ulug nibag fug. Ari tibag ane ino Daud otsi enembong se roho turuk inap hinahan itanowen tibag.

¹⁸Zeruya amloho Yoab ot Abisai ino Daud otsi enembong se roho turuk inap teng misigmen nubam hilag hinahan 30 itano onowe welatfag. Abisai inowen ap seliyon teng nanggoloben 300 men tog aptuk lit fit fam pinggi unusibag. Ap teng misigmen nubam hilag hinahan itano enesehelimu

¹⁹at unuk palimu atukmu Abisai ino it onowe atfag angge famen it hinahan itanowen enembong se roho turuk latfag hag toho aren turuk latfag fug.

²⁰Yoyada amloho Benaya o Kabzeel ahun inowen oho tog ahako roho aptuk lit su ane eke hag eke hag turuk latfag. Aren o Moab inap enembong se roho turukon piren itano pinggi unusibag. Misihim osit soho anggen hag toho narukmu olomene singa eke kinang fo reg ambeg mako wambibareg weregma Benaya ino wambibareg ware fisibag.

²¹Wina sambil o Mesir ahun eke ware fisibag. Ap ino uwag yat anggolo reg lit inggikmu fit eke senegma Benaya ino e eneg seneg lit at olohotma libareg fit aren seneg latfahon ino taluk toho wibareg ap ino fit inggarehen tohon fam ware fisibag.

²²Ari obog toho Yoyada amloho Benaya inowen turuk lit Daud otsi teng misigmen nubam hilag hinahan arimano sehelimu at unuk su atfag.

²³It sehelimu at unuk palimu atfag angge famen it hinahan itanowen enehako roho turuk latfag hag toho aren turuk latfag fug. Dauren Benaya ino fam, ”Notsi an fet nasug inap onowe welaruhun,” ulug lahapfag.

²⁴Yoab ot Asael oho Daud otsi teng misigmen nubam hilag hinahan arimano enesehelimu welatfag. It winon ununuk hun Dodo amloho Elhanan o Betlehem ahun ino men,

²⁵o Harod inap Sama men Elika men,

²⁶o Palti ahun Heles men, o Tekoa ahun Ikes amloho Ira men,

²⁷o Anatot ahun Abiezer men, o Husa ahun Mebunai men,

²⁸o Ahohi ahun Zalmon men, o Netofa ahun Maharai men,

²⁹o Netofa ahun Baana amloho Heleb men, hun Ribai amloho Itai o Gibea kinang Benyamin fam welatfahon ino men,

³⁰o Piraton ahun Benaya men, Hidai o Gaas tonggoma welatfahon ino men,

³¹o Bet-Araba ahun Abialbon men, o Bahurim ahun Azmawet men,

³²o Saalbon ahun Elyahba men o Guni ahun Yasyen men, o Harari ahun Sama amloho Yonatan men,

³³o Harari ahun Sarar amloho Ahiam men,

³⁴o Maakha ahun Ahasbai amloho Elifelet men, o Gilo ahun Ahitofel amloho Eliam men,

³⁵o Karmel ahun Hezrai men, o Arbi ahun Paerai men,

³⁶o Zoba ahun Natan amloho Yigal men, Gad ahun Bani men,

³⁷Amon ahun Zelek men, o Beerot ahun Naharai hiyap Zeruya amloho Yoab asehen seneg latfahon ino men,

³⁸o Yetri inap Ira men Gareb men,

³⁹Het ahun Uria men arimano obog toho Daud otsi enembong se roho turukon eneg teng misigmen nubam hilag hinahan 30 welatfag.