Read Angguruk Yali 2 SAMUEL 24 Bible Online

2 SAMUEL 24 - Angguruk Yali bible

2 SAMUEL 24

¹Welatfagma NINIKNI Allahn Israel inap fahet nin eke olok haruk lit Dauren umalikisi asengsengap enebuhuwen indi kahalmin pibareg at ubam ele uruk lit, ”Israel inap men Yehuda inap men winag isa lamihin,” ibag.

²Ibagma Dauren Yoab men otsi sehen senehon milal eneptukon at iraham welatfahon men hiyag isaruk lit, ”Israel inap enebe nowen wereg ulug an noluk aruhuwen it ununggul unuk obog toho winag isil laruk lit o Dan famen tulug o Bersyeba lahup,” ulug hiyag isibag.

³Hiyag isibagma Yoaben hebeloho ap suwon hiyag utuk lit, ”HIKNI Allahn Israel inap anggolo werehon arimano nin sebe roho anggolowap enebuhumu enebe winag isa fug toho welamuhubon hat nikni ap suwon hilen yet isahun ulug sembahyang uruk lahi. Nungge fahet it enebe nowen wereg ulug noluk teg lale peruk lahen?” ulug hiyag itfag.

⁴Ari ulug hiyag itfag angge famen ap suwon inowen winag isa lalihip ibag ane ino imbisibag fugmu Yoab men otsi sehen senehon onowesi menen Israel inap winag isil lahuk ulug wilip atfag.

⁵Wilip atfareg Yoab otsi men ik Yordan paloho nindig atlug laruk lit o Aroer men o pumbuk ik Arnon tonggo pulmu werehon famen tulug o Gad men Yaezer men fil lahibag.

⁶Lahibareg o Gilead kinang keyen o Kades o Het inap enengginangma lalug o Dan keyen Sidon horogma libag.

⁷Libareg o Tirus elehet yaron walinggoho oho keyen Hewi inap men Kanaan inap inibam pumbuk ke ap obog toho enebe winag isil laruk lit o Bersyeba Yehuda kinangma ik ambut fil wambibag.

⁸Ari roho Israel kinang obog toho walinggoho larukmen eneg pikalem sohowen, hup likin fumahen atfagma suhuloho o Yerusalem kik watfag.

⁹Watfareg Yoab inowen Israel inap enebe winag isil libahon fahet ap suwon Daud hiyag itfag. Hiyag itfag ane ari Israel inap sehen senehon teng-teng angge 800.000 men Yehuda inap teng-teng angge 500.000 men winag isil libahon fahet ap suwon hiyag itfag.

¹⁰Hiyag itfagma Dauren Israel inap enebe winag isibag ane fahet wenggel haruk lit indi pong-pong angge tirikim NINIKNI Allah ubam ele uruk lit, ”Anden siyag ane hum toho tirikik. Ketiya an nindimuwen wenggeluk fug angge tirikikon ino Hat NIKNI Allahn elehap timihin,” ibag.

¹¹Ari ibareg likiyamon Daud in atukmu NINIKNI Allahn Daud amingmingangge fulu ane yet halug ap hiyag isaruk ahun Gad fam ele uruk lit,

¹²”Daud hiyag irik lamihinon tu: NINIKNI Allahn ele hiyag hutukon holeg lamin! Alem angginon hinahan hiyag hitminmu misig tu nubam timihin ulug hiyag nitmihin ik lamihin,” ibag.

¹³Ibag ane ari hikit toho Gad ino Daud ambeg libareg hiyag utuk lit, ”Hat hangginangma suburu obok toho weregman eneg mo hinahan lahu ano, ap seliyonen huwabul ulug mug haplug larukmu hakolen larukmen eneg pikalem hinahan lahu ano, humalikisi ouk alem suwonen war atukmen eneg hup hinahan aruhu ano? Ketiya fano wenggel hamihinteg alem tu nubam aruhu ulug hiyag nitmihin ane an mon nabehek ahun hiyag irik lamin,” ulug hiyag itfag.

¹⁴Hiyag itfagma Dauren Gad fam ele uruk lit, ”An nakol anggolo haruk lahi. NINIKNI Allahn indi nisaruk lit werehen At inggikmu eneg amuhuk, ap ininggikmu amuhuk fug,” ibag.

¹⁵Ari ibag li itano NINIKNI Allahn ouk alem suwon monde fik watfagma likiya ak tibareg Israel inap o Dan famen tulug o Bersyeba fam unusil larukmen eneg Allahn ibag li imbisibagma Israel inap teng-teng angge 70.000 war atfag.

¹⁶War atfagma Allah ot malaikat ekeyen Yerusalem inap unusimin ulug inggik leho lit weregma NINIKNI Allahn yet hibareg, ”Yihi, Yerusalem aru siyag am nowen!” ulug malaikat ino fam ele uruk lit, ”Imbisin! Hinggik imbik wambin!” ibag. Ari ibagma itano malaikat ino o Yebus ahun Arauna inowen roti anggen waruk ambeg iraham unduhuk latfag.

¹⁷Malaikat inowen ap unusimin ulug turukmu Dauren yet hibareg NINIKNI Allah fam ele uruk lit, ”Nambohom Israel inap aruman siyag ane turusa fug. An namuwen eneg siyag ane anggolo tirikik. Ari fahet Hat hinggiken an numalikisi men eneg nunusimihin,” ibag.

¹⁸Ari tibag sambil ino hun Gad ino Daud ambeg watfareg ubam ele uruk lit, ”NINIKNI Allah olohotma hubu lahaptukon fahet o Yebus ahun Arauna inowen roti anggen waruk ambeg helep sengget warik lahamihin,” ulug hiyag itfag.

¹⁹NINIKNI Allahn ibag ane ino Gad inowen Daud hiyag itfagma Daud ino lahibag.

²⁰Laharukmu hun Araunan yet harukmen ap suwon otsi men ambeg waharukmu yet isibareg Daud olohotma lalug orohole han kinangma sahung atfag.

²¹Samaleg lit Arauna inowen Daud fam, ”Nikni, hat ap suwon, nungge fahet an hamingmingangge nambeg wahen?” ulug kapal hibagma Daud inowen hebeloho hiyag utuk lit, ”Ouk alem suwonen Israel ninap nunusurukon ino eleg aruhu ulug NINIKNI Allah fahet hubu lahaptuk ambeg eke wiruhuk perikikteg roti anggen waruk ambeg tu ayeg waroho og nitmihinen hambeg lahik wahi,” ulug hiyag itfag.

²²Hiyag itfagma Arauna inowen Daud fam ele uruk lit, ”Nikni, hat ap suwon, kinang aru hilamihinteg Allah og itmin pehen ane roho embemihin. Wam sapi aruma men e yaltukon roti anggen waruk angge tu men e wam sapi anduhunmu emberukon tu men Allah fahet yalmihinen

²³anden hat ap suwon og hutuk lahi,” ibareg, ”Hat HIKNI Allahn indi hasug laruhu,” ibag.

²⁴Ibagma ap suwon inowen Arauna fam ele uruk lit, ”Ayeg wabuk fug angge kinang aru hilaminteg NIKNI Allah fahet hubu lahaptuk laruhuk fug pihireg haren hiyag nitmihin ane hikit toho onggo palminteg eneg kinang aru anden tohon atmisi,” ulug hiyag itfag. Hiyag itfag ane hikit toho Dauren roti anggen waruk ambeg ino men wam sapi men onggo uang perak teng piren 50 Arauna og itfag.

²⁵Og itfareg kinang ino fam helep sengget watfareg NINIKNI Allah wel timin ulug wam eke yalfareg eke Allah olohotman nul ulug esetuk lit umalikisi Israel inap fahet NINIKNI Allah fam sembahyang ibagma Allahn hol hibareg ouk alem suwon Israel inap unusuruk latfahon ino elehap tibag.