Read Angguruk Yali 2 SAMUEL 4 Bible Online

2 SAMUEL 4 - Angguruk Yali bible

2 SAMUEL 4

¹Hun Abner ino o Hebron inowen ware feserusa urukmu holfareg Daud amloho Isboset ine eleg atfagma Israel inap obog toho enekol toho welatfag.

²Enekol toho welatfag li Isboset otsi piren aben tohon huhulangge hilarukon milal eneptuk inap ununuk Baana men Rekhab men welatfag. It inikni o Beerot ahun Rimon welatfag. O pumbuk Beerot ino Benyamin kinang fam wereg.

³Indam Benyamin inaben o Beerot ino ilmig tik watfagma yug inap arimano o Gitaim kinangma linggik-longgo ibareg ketiya oho wereg.

⁴Saul amloho eke unuk Yonatan inowen indag tibahon unuk Mefiboset welatfag. Mefiboset indag tibag sambilen mo ilig am wirig am turukmen fuwaben atfagma ikni Yonatan men umbusag Saul men o Yizreel inowen war atfag ane fahet hiyag isa watfagma Mefiboset foroho hiyap inowen holfareg linggik-longgo ul ulug malik ino ha roho folo-folo larukmen Mefiboset ino mako wamburuk lit uyug siyag atfag.

⁵Welatfagma misihim sambil unukoho mo oloken Isboset ino nohoruk ambeg kel tarukmu otsi Rimon umalikisi Rekhab men Baana men at ibam watfag.

⁶Watfagma hiyap sok forohowon ino roti anggen siyahon puhun turuk lit noho ilen nohibagma Rekhab men Baana men hirako olma kibag.[3]

⁷Kibareg inikni Isboset ino nohoruk ambeg kel tarukmu otsiyen ware fisibareg unggul kong toho walug Yordan tonggo keyen hubanggo larukmen eneg o Hebron libag.

⁸Isboset unggul walug hun Daud ambeg o Hebron libareg at ubam enele uruk lit, ”Saul amloho Isboset hat men seli roho wereg lit Daud waruhuk ulug yami haptuk latisiyon ino niren ware feserukukteg unggul aru kong toho walug wahe. Saul umalikisi menen hat nit ninikni welahenon hubam siyag ane turuk latuson fahet o yoho NINIKNI Allahn ayeg waroho alem angginon ari unubam embehek,” ulug hiyag itfag.

⁹Hiyag itfagma Daud inowen Rekhab are Baana men hiyag isaruk lit, ”NINIKNI Allah oluk wereg lit an asengseng toho weregma windat naptuk latisiyon inowen holegma anden tem toho iminon tu holeg lamek:

¹⁰Indam Saul war atisi ane fahet an hiyag nirik waharisiyon inowen fano ane hiyag itminmu onggo og nitmisi perisi angge famen nindi siyahap nabehek ulug anden ap ino senetikikteg o Ziklag inowen ware feserikik.

¹¹Ele fanowon walug waharisiyon fahet ware feserikik ane ari tot se regma ap unubabut onolokonen ap siyag ane turuk elehon ibam nohorukmu ware feseruk ane ari mondabi anggin tehen anden alem angginon hunubam emberuk lit kinang tu famen elehap henepmin,” ulug hiyag isibag.

¹²Hiyag isibareg it piren aruma unusilihip ulug otsi hiyag isibag. Hiyag isibagma Baana men Rekhab men unusibareg ininggik unuyug kong toho hik isalug enebe walug ik o Hebron yenggelehon ayegma e fam song unubahik lahibag. Ari tibareg Isboset unggul ino walug o Hebron hun Abner salfag ambeg ino at unggul oho kinang habuloho salfag.