Read Angguruk Yali 2 SAMUEL 5 Bible Online

2 SAMUEL 5 - Angguruk Yali bible

2 SAMUEL 5

¹Welatfagma Israel inap ununggul unuk obog toho Daud ambeg o Hebron watfareg enele ubam uruk lit, ”Nit nenemep nununu hat men ambi reg laheyon hat holuk.

²Atam Saul inowen fet nenesug latisi li oho Israel ninap tog abul ulug larukmu haren milal neneptuk latikin angge re NINIKNI Allahn hat hubam ele uruk lit, ’An numalikisi Israel inap haren fet enesug laruhunen onowe suwon welaruhun,’ irisi,” ulug Daud hiyag itfag.

³Ari ulug hiyag itfagma Daud inowen Israel inap onowesi obog toho unubam, ”An men hit men yabuk ambiyeg waruk lamuhuk,” ulug NINIKNI Allah olohotman o Hebron ariyen sali imbibag. Sali imbibagma Daud unggul ke ahaluwe amben fanowon are ribareg Israel ninap nonowe suwon raja welaruhun ulug unduhuk fibag.

⁴Daud indag tibag sali mo ilig am wirig am turukmu teng misihen nubam hilag hinahan 30 atfagma ap suwon lahapfag. Lahapfagma ap suwon weregman eneg mo teng misihen nubam hilag nuwalen 40 atfag.

⁵O Hebron wereg lit mo sabiren, pikalem falfaliken Yehuda inap fet enesug latfareg o Yerusalem libareg mo teng misihen nubam hilag falfaliken 33 Israel inap men Yehuda inap men obog toho fet enesug latfag.

⁶Ap suwon Daud umalikisi men o Yerusalem libareg Yebus inap o Yerusalem welatfahon men tog abul ulug turukmen it arimanowen Daud fam enele uruk lit, ”Hat te o Yerusalem kuk fug teg lahen. Nit nenebe fanowon eleg lala halug inil siyahon men enelenggen siyahon menen yanggal haplep,” ibag.

⁷O ino sambil Daud inowen umalikisi unubam ele uruk lit, ”Ap san Yebus inap unusimin peruk halug ik wilip atuk ke kukag. Ap enelenggen siyahon men inil siyahon men fahet an Daud nirim peruk lahi,” ibag. (Ari fahet ap enele uruk ane tu, ”Ap inil siyahon men enelenggen siyahon men Allah ibam kuhup fug,” uruk.) Ari ibareg Dauren elehet yaron walinggoho oho ambeg ap kuk fug tohon unuk Sion ino ilmig tibag. Ilmig tibag ambeg ino Daud yug atfareg unuk o pumbuk Daud suwalfag. O Daud walinggoho o witil lahuk ulug o Milo inowen ak tibareg[4] pulmu wiri fik libag.

¹⁰Ari roho turukmen eneg NINIKNI Allah pohol ha kinang ha senehon inowen let turukmu Daud ine atfag.

¹¹Welatfagma ap suwon Tirus kinang senehon unuk Hiram inowen umalikisi e mut Daud ambeg walug lalihip ulug mon eneptuk lit o e fam wituk inap men helep fam wituk inap men mon enepfag. Mon enepfagma libareg Daud fahet o suwon wituk latfag.

¹²Ari roho turukmu Daud indimuwen wenggel haruk lit NINIKNI Allahn numalikisi Israel inap fano welamuhup ulug an ap suwon unduhuk nubaharisireg nineyap naptisi ulug oluk atfag.

¹³O Hebron embeselug o Yerusalem watfareg Daud inowen uhesi tamon weregma uhesi winon oho og enesug lit ap umalik hilani umalik indag enepfag.

¹⁴Daud umalikisi o Yerusalemen indag enepfahon ununuk te: Syamua, Sobab, Natan, Salomo,

¹⁵Yibhar, Elisua, Nefeg, Yafia,

¹⁶Elisama, Elyada, Elifelet suwal enepfag.

¹⁷Daud ino Israel inap onowe suwon lahaptusa urukon hol hibareg Filistin inap Daud senebul ulug waharuk latfag. Waharuk urukon hol hibareg Daud ino libareg punumu elehet yaron wirig ambeg libareg undama fil kibag.

¹⁸Kibareg weregma Filistin inap arimano palu arik watfareg Refaim tonggoma wiliptukmu itano

¹⁹Daud inowen NINIKNI Allah kapal haruk lit, ”Filistin inap aruma unusik lamin ano? Ap aruma an ninggikmu embemihin?” ulug kapal hibagma NINIKNI Allahn, ”Lamihin! Filistin inap aruma hat hinggikmu embemin,” ibag.

²⁰Ari ibagma Daud o Baal-Perasim libareg Filistin inap mulangge unusibag. Unusibareg aren uruk lit, ”Ik fu waharuk lit mun angge man angge siyahap turuk hag toho NINIKNI Allahn an men seli roho wereg inap aruma siyahap enebehek,” ibag. Ibag ane ari hikit toho aben o ino unuk Baal-Perasim[5] suwalfag.

²¹Filistin inap enekolen linggik-longgo uruk lit usasum iren tohon embeselug libagma Daud men umalikisi menen wibareg libag.

²²Welatfagma Filistin inap nin eke suhuloho kik watfareg o Refaim tonggoma wiliptukmu

²³Daud inowen NINIKNI Allah kapal hibagma Aren hiyag utuk lit, ”Pikit tog pising tik la fug! Filistin inap enembol keyen it walinggoho e palu roho wereg ambeg lamihinteg itan famen tog kilapmihin.

²⁴E ondomi ke ap waharukon unuyug aplohok hag toho holmihin halug An HIKNI Allah hat halukema atminteg Filistin inap sehen senehon arimano Anden mulangge unusik laminon hat holuk atmisimu folo-folo tog kilabik lamihin,” ibag.

²⁵NINIKNI Allahn hiyag itfag ane roho Daud inowen Filistin inap unusuruk lit o Geba keyen unusil-unusil o Gezer imbisik libag.