Read Angguruk Yali 2 SAMUEL 6 Bible Online

2 SAMUEL 6 - Angguruk Yali bible

2 SAMUEL 6

¹Welatfareg Daud inowen Israel inap enesehelimuwen inineyon eneg og enepfahon arimano ap teng-teng angge 30.000 andog enepfag.

²Andog enepfareg Daud men ap hondog enepfahon arimano menen peti elma Allah Wene Numen haharehon kilabeg angge ino wak lul ulug o Baale-Yehuda laruk latfag. Peti ino NINIKNI Allah pohol ha kinang ha senehon otsi malaikat[6] palimu heriyehon ino unuk fam wirig latfag.

³Libareg peti ino hun Abinadab ibam punumu werehon inowen wilibi fibareg kereta wam kudan lisoho walug laruk angge keron eke palimu imbik lahibag. Lahibareg Abinadab umalikisi Uza men Ahio menen kereta ino walug laruk latfag.

⁴Laruk lit Uza ino peti iraham larukmu Ahio ino alukema laruk latfag.

⁵Daud men Israel inap obog toho menen sini fam NINIKNI Allah wel tul ulug pinggong, puhuli, waruk men teltuk lit inine roho yunggultil laruk latfag.

⁶Laruk lit hun Nakhonen tohon roti anggen waruk ambeg larukmen wam sapi unuyug kebunggalman pi roho wamburukmu Uza inowen yet hibareg peti aru mako wambuhu rohon ulug inggiken peti ino sene fibag.

⁷Sene ferikim itano NINIKNI Allahn Uza fahet olok hibareg nungge fahet peti Anden tohon senerehek ulug Uza ware fisibagma peti iraham itano war atfag.

⁸Ari roho tibag ambeg ino aben unuk Peres-Uza suwalfagma ketiya oho uruk.[7] NINIKNI Allahn olok haruk lit Uza ino ware fisibag ane fahet Daud indi siyag atfag.

⁹NINIKNI Allah fahet akol hibareg, ”Nangginoho peti ari anden an nibam walug lamin?” ibag.

¹⁰Ari fahet Daud inowen o Yerusalem walug lamin fug ulug peti ino o Gat ahun Obed-Edom ibam imbik libag.

¹¹Pikalem hinahan peti ino Obed-Edom ibam weregma NINIKNI Allahn Obed-Edom uhe umalikisi men indi enesug latfag.

¹²Peti ino forohoma Obed-Edom uhe umalik men mun angge man angge aren tohon NINIKNI Allahn fanowap eneptuk ulug ap suwon Daud hiyag itfagma Daud ino Obed-Edom ibam libareg peti ino wibareg ahiyeg toho ibam o Yerusalem walug watfag.

¹³Walug waharuk lit ap peti ino walug libahon il falfalikenam-falfalikenam sobil larikim Daud inowen wam sapi misig men umalik sei werehon misig men Allah fahet waroho imbil-imbil laruk latfag.

¹⁴Ari til laruk lit Daud inowen NINIKNI Allah wel turuk lit peti alukema ele ine roho yunggultil laruk latfag. Allah amingmingangge imamen wan turuk asum horohon eneg wan teg lit laruk latfag.

¹⁵Daud men Israel inap obog toho menen pinggong ele uruk lit enehiyeg toho yunggultil peti ino walug libag.

¹⁶O pumbukmu peti ino walug larukmu Saul ahaloho Mikhal inowen sok ele keyen yet harukmen ap suwon Daud peti ino alukema ahiyeg toho holog-holog angge til waharukmu yet hibareg Daud fahet me napeyen peruk latfag.

¹⁷Peti ino Dauren imbik kuhuk ulug o sabo wiri fibag ambeg ino imbik kibag. Imbik kibareg Daud inowen nit men NINIKNI Allah men mangno roho welamul ulug wam waroho esetuk lit winon indokma yalfag.

¹⁸Wam waroho yalfareg Daud inowen ap obog toho o pumbuk aru werehon Allahn indi henesug laruhu ulug NINIKNI Allah pohol ha kinang ha senehon unuk fam hi enepfag.

¹⁹Hi enepfareg roti wirahowon men wam unu men kue kin altap hahon men o pumbuk ino welatfahon obog toho abet hiyabet fibir enepfag. Og isibagma inibam wal taneg laruk latfag.

²⁰Daud ino nuhesi numalikisi hi enepmin ulug ibam larukmen uhe Mikhal ino olman wilip atlug ambi atfareg at ubam ele uruk lit, ”Hat Israel inap onowe suwon welahen angge famen yoho ap inindi anggat teg elehonen turuk hag toho hinggali eleg toho sum hog tebesehenteg habiye hotsi eneholani onorohole ke waharuk lahen. Yoho aben wel nabukag pehenteg hahiyeg toho waharuk lahen ano?” ulug Daud pet tibag.

²¹Pet tibagma Dauren Mikhal fam ele uruk lit, ”NINIKNI Allahn hat hikni men hori men ambolmaya feselug an At umalikisi Israel inap fet enesug laruhun ulug mumal naptisi ahun olohotma nindi se roho yunggultuk lahi.

²²Yoho tihi ane ari we hayen, fobik tuhukon ari fam halug mondabi apmayap tahuk. Haren an yet niyahunteg an fahet apma reg peruk laruhun angge famen[8] notsi eneholani haren ehenon arimanowen an wel nabuhup,” ulug Mikhal hiyag itfag.

²³Welatfareg Saul ahaloho Mikhal ino malik indag ta fug angge weregman eneg war atfag.