Read Angguruk Yali 2 SAMUEL 7 Bible Online

2 SAMUEL 7 - Angguruk Yali bible

2 SAMUEL 7

¹NINIKNI Allahn Daud let turukmu ap seliyon walinggoho welatfahon arimano at wereg ambeg kuk fug teg latfagma Daud ino ibam yug toho welatfag.

²Wereg lit ap suwon Daud inowen Allah amingmingangge nabi Natan fam ele uruk lit, ”Nare, an aru o fanowon e mur fam wirig ibam welahimu peti elma Allah wene haharehon kilabeg angge ino o saboma wereg,” ulug hiyag itfag.

³Hiyag itfagma Natan inowen ap suwon ino fam, ”Fano, hat hindimu wenggeltuk lahenon ari hikit toho turuk laruhunmu NINIKNI Allahn let haptuk laruhu,” ibag.

⁴Ibagma hup ino sambil NINIKNI Allahn Natan hiyag utuk lit,

⁵”Lamihinteg An namingmingangge Daud ino fam hiyag irik lamihinon tu: NINIKNI Allahn ele ti roho ehek, ’Nungge fahet An yug toho welaruhu ulug o fanowon wiruhuk peruk lahen?

⁶Atam Israel inap o Mesiren Anden hondog eneplug wilip atik iyag ambehen o fanowon fam welatikik fureg ketiya oho welahi. An o saboma eneg wereg lit o eke la eke la turuk lahi.

⁷Israel inap arimano o kema-kema larukmu An oho it men ambiyeg laruk lit Anden misihim oho Israel inap onowesi[9] Anden lahap eneptikikon fam nele uruk lit, ’Nungge fahet An nubahet o e mur fam wituk lahep fug?’ ulug hiyag isaruk latikik ano? Eleg-o.

⁸Ari fahet An namingmingangge Daud fam Anden imin ane tu hiyag itmihin: NINIKNI Allah pohol ha kinang ha senehon inowen ele tu uruk, ’Hat wam domba anggenma forohoman An numalikisi Israel inap fet enesug laruhun ulug hondog haptikik.

⁹Hat o kema-kema larukmu Anden fet hasug lit hat holohotman ap seliyon obog toho elehap eneptikik. Elehap eneptikikteg ap suwon kinangma werehon winon hag toho hat hunuk Anden palimuwap tuhuk.

¹⁰An numalikisi Israel inap unubam, ’Kinang aru fam welamuhup,’ ulug hiyag isaruk lit unumanggen yag eneptik iyagma enengginang yuhon fam weregma indam siyahap eneptuk latfag hag toho ap siyahonen siyahap enebuhup fugmu inindi yuwag toho welamuhup.

¹¹Atam An numalikisi Israel inap fahet ap suwon hakim lahap eneptik iyag liyen Anden let eneptuk lit ap seliyon obog toho elehap eneptikik hag toho fobik oho turuk laruhukmu hat yuwag toho welaruhun. Nin An HIKNI Allahn hat hiyag hutuk lahiyon tu: Anden humalikisi anggolo og huruhuk.

¹²War aruhunon horog aruhumu humbusagsi sal eneptusa ambeg sal habuhupmu hamloho yuhon misig hat hubalmangge unduhuk fuhukteg Israel inap fet enesug laruhun ulug ineyap tuhuk.

¹³Aren fobik o fanowon misig An nubahet wiri fuhumu Anden at umalikisiyen endebuhubonen endebuhubon kinang aru senegman eneg mondabi welamuhuben in eneptuk laruhuk.

¹⁴An at Ikni aruhuk, at An namloho aruhu. Aren siyag ane turuk halug aben sabiyap alem fam watuk hag toho Anden oho at ino watuk laruhuk.

¹⁵Anden Saul fahet nindi reg latikik angge famen fobik nambolmaya feserikikteg ubalma hat lahap haptikik hag toho hat hubalmangge fam tuhuk fug. Anden nindi reg laruhuk ane eleg aruhu fug.

¹⁶Haren ondohowonen endebuhubon arimanowen kinang aru seneg lit yuk tuk fug angge welamuhup ulug Anden inineyap eneptukmen eneg mondabi welamuhup,” ulug hiyag itfag.

¹⁷Allahn Natan fam seleg toho ibahon ino hikit toho Natan inowen Daud hiyag irik libag.

¹⁸Natan inowen hiyag irik libagma ap suwon Daud NINIKNI Allah wereg ambeg o saboma kibareg kinangma hur atfareg ele uruk lit, ”Allah NIKNI suwon, an men numalikisi men siyag ninap famen anggoloenam let neneptuk latikin.

¹⁹Let neneptuk latikinon fahet Hat hindimuwen we tot peruk lit an hamingminganggeyen endetuk lahiyonen endebuhubon fahet yat toho wenggel haruk lit hiyag nerehen. Nubalmangge eke indag am eke indag am turuk lamuhubon fahet Allah NIKNI suwon Haren selehap tehen.

²⁰Anden Hat hubam nungge nin hiyag hitmin? Mun ane man ane an hamingmingangge aruwen nindimu wenggel haruk lahi ane, NIKNI Allah, Hat holuk.

²¹Hat hindimu wenggel harikinteg hele irikin ane hikit toho alem suwon aru tuhuk ulug an Hat hamingmingangge hiyag nerehen.

²²NIKNI Allah Hat eneg palimu welahen. Haren turuk lahen hag toho ap winonen oho turuk urukmu indam oho holtuk latukuk fug. Hat Allah misig eneg welahen.

²³Israel inap Haren hele loloho windat eneptikinmu Hat humalikisi atusa hag toho o pumbuk winon wereg eleg. Aben tuk fug teg ane alem suwon Hat humalikisi unubam turuk latikinon ari fahet kinang atogman atogma Hat hunuk wel haptuk. Humalikisi o Mesiren hondog eneplug wilip atuk lit o kema-kema ap o pumbuk winon men, iren Allah hag toho wereg perukon men Hat humalikisi onolohotman yanggal eneptuk latikin.

²⁴Israel inap An numalikisi mondabi welamuhup ulug mumal tarikinteg Hat Allah it Inikni atikin.

²⁵NINIKNI, ketiya Haren an men numaliki men fahet hiyag nutuk lahenon aru mondabi wenggel haruk lit sali ehenon wirim toho turuk laruhun.

²⁶Ari roho turukmu Hat hunuk su atuken ap obog tohowen enele uruk lit, ’Allah pohol ha kinang ha senehon ino Israel inap INIKNI wereg,’ ulug wel haptukmen eneg welamuhup. An Daud hamingminganggeyen endetuk lahiyonen endebuhubon mondabi welamuhuben ninineyap neneptuk laruhun.

²⁷Hat Allah pohol ha kinang ha senehon Israel ninap NINIKNIYEN an hamingmingangge nubam seleg toho hiyag nutuk lit, ’Anden humaliki anggolo og huruhuk,’ ehen. Ari fahet anden nambong se roho Hat fam sembahyang ihi.

²⁸Allah NIKNI suwon, Hat hamu eneg Allah wereg lit uruk lahen ane ari obog toho tem peruk lahi. Haren alem fanowon tu hiyag nerehen.

²⁹Ketiya an hamingmingangge men numalikisi men Hat holohotma mondabi welamuhuken hi nenepmihin ulug heng haptuk lahi. Allah NIKNI suwon, Hat hinggarehen sali ehenon hikit toho Haren an numalikisi men ninineyap neneptukmu mondabi fano welamuhuk,” ulug Daud inowen sembahyang ibag.