Read Angguruk Yali 2 SAMUEL 8 Bible Online

2 SAMUEL 8 - Angguruk Yali bible

2 SAMUEL 8

¹Welatfareg Daud inowen Filistin inap waroho apmayap enepfareg kinang iren seneg latfahon ino ilmig tibag.

²Ilmig tibareg Moab inap arimano oho apmayap enepfag. Apmayap enepfahon arimano kinangma yinggig latlihip ulug hiyag isibagma it yinggigmu hele piren fam wirim tibahon unusuruk lit misig famon unusibag fug. Ari tibagma Moab inap arimano Daud amingmingangge atfareg hundig-hundig fano-fano angge ambeg walug waharuk latfag.

³Ari roho turukmu o Zoba inap onowe Hadadezer hun Rehob amloho inowen kinang ik Efrat ilanma werehon ino nin hebeloho seneruhuken lamin ulug turukmen Daud inowen at men tog abik laruk lit o Hamat horogman apmayap tibag.

⁴Apmayap tibareg Daud inowen ap wam kuda fam lahalug larukon teng-teng angge 1.700 men unuyug fam larukon teng-teng angge 20.000 men sen enepfag. Sen enepfareg walug laruk angge kereta lisuruk ambohom kuda arimano lahup fug ulug enendeng kong eneptuk lit wam kuda teng uhan 100 enendeng kong enepfag fug.

⁵Siria inap o Damsyik welatfahon arimanowen o Zoba inap onowe Hadadezer ibil amul ulug waharukmu Daud inowen it sehelimuwon teng-teng angge 22.000 unusibag.

⁶Unusibareg Daud inowen otsi o Siria pumbuk sen enesug lamuhup ulug mon enebik watfagma Siria inap arimano Daud amingmingangge atfareg hundig-hundig fano-fano angge ambeg walug waharuk latfag. Ari roho turuk lit Dauren tog abuhuk ulug laruk ambeg arimanowen NINIKNI Allahn let turukmen eneg Daud palimu atuk latfag.

⁷Palimu atfareg tog piyabangge ili ruruk angge emas fam witfahon Hadadezer otsiyen wan turuk latfahon arimano Dauren hilalug o Yerusalem watfag.

⁸Hun Hadadezeren seneg latfag ambeg o Betah men Berotai menen ine angge tembaga anggolo foroho latfahon arimano oho ap suwon Daud inowen hilalug o Yerusalem watfag.

⁹Tam o Hamat inap onowe Tou inowen Hadadezer men anggoloenam tog aptukmen eneg welatfag. Welatfagma Daud inowen Hadadezer otsi obog toho mulangge unusirisi urukmu Tou inowen hol hibareg Hadadezer ino fano ware feserikin ulug hi ruhunen lamihin ulug amloho Yoram ap suwon Daud ambeg monde fik watfag. Monde fik waharuk lit foroho angge ili rurukon perak emas tembaga men fam witfahon Daud og irik watfag.

¹¹Og irik watfag angge arimano men Zoba inap onowe Hadadezer, Siria inap, Moab inap, Amon inap, Filistin inap, Amalek inap obog toho Dauren apmayap eneptuk lit ininggikmuwen taluk enepfag angge ili rurukon perak emas men oho ap suwon Daud inowen NINIKNI Allah fahet imbibag.

¹³Misihim eke Daud inowen o Saho tonggoman Edom inap teng-teng angge 18.000 unusibareg ibam watfagma unuk su atfag.

¹⁴Su atfagma Daud inowen otsi o Edom kinang atogman atogma sen enesug lamuhup ulug mon enebik watfagma Edom inap obog toho Daud amingmingangge atfag. Ari roho turukmu Dauren tog abuhuk ulug laruk ambeg arimanowen NINIKNI Allahn let turukmen eneg Daud palimu atuk latfag.

¹⁵Daud inowen Israel inap obog toho fet enesug lit mun ane man ane alem fano roho haltuk latfag.

¹⁶Zeruya amloho Yoab ino sehen seneg inap onowe welatfag. Ahilud amloho Yosafat ino ap suwon komo rurukon onowe welatfag.

¹⁷Ahitub amloho Zadok men Abyatar amloho Ahimelekh men Allah amingmingangge imam welatfag. Hun Seraya ino suwesingga hahatuk ahun welatfag.

¹⁸Yoyada amloho Benaya ino Daud ebe foroho latfag inap onowe welatfag. Daud umalikisi yuhon Allah amingmingangge imam welatfag.