Read Angguruk Yali 1 RAJA-RAJA 1 Bible Online

1 RAJA-RAJA 1 - Angguruk Yali bible

1 RAJA-RAJA 1

¹Ap suwon raja Daud ino sabal atfareg wereg lit sum fam ahap hililip toho welatfag angge famen sun eneg turuk latfag.

²Ari roho turukmu otsiyen at ubam enele uruk lit, ”Ninikni hat ap suwon, hiyap tuhumon eke hat men wereg lit let haptuk laruhuwon yami numuhup ulug hiyag nisamihin. Hiyap ino men sebe roho nohoruk lamuhupmu hahap inahan aruhu,” ulug hiyag itfag.

³Ari ulug hiyag itfagma o Israel pumbuk obog toho hiyap tuhumon wereg ano ulug yami ril laruk latfareg hiyap tuhumon misig unuk Abisag o Sunem hiyap hiyahibareg Daud ambeg walug watfag.

⁴Hiyap hiyahibahon orohole fano anggolowon ino Daud amingmingangge wereg lit let turuk latfag angge famen ahun uhe hag toho welatfag fug.

⁵Weregman Daud uhe Hagit amloho Adonia inowen ele uruk lit, ”An ap suwon aruhuk,” ulug inggarehen palimuwap taruk latfag. Palimuwap taruk lit kereta wam kudan lisoho walug laruk angge wibareg ap teng piren 50 at alukema larukon og enepfag.

⁶Adonia ino ebe totman ikniyen at ubam ele uruk lit, ”Nungge fahet hubabut ti roho turuk lahen?” ulug komo ruk fug angge weregman eneg welatfag. At ebe fanowon Absalom ombolimon welatfag.

⁷Adonia an ap suwon welaruhuk peruk latfag ane fahet hiyap Zeruya amloho Yoab men, Allah amingmingangge imam Abyatar men enele sahaltuk latfareg Adonia ibil atuk lit ineyap turuk latfag angge famen

⁸imam Zadok men, Yoyada amloho Benaya men, Allah wene hiyag isaruk ahun nabi Natan men, Simei oho, Rei oho, Daud iraham welatfag inap sehen senehon arimano obog toho Adonia ibil atfag fug.

⁹Ibil atfag fugmu Adonia inowen at otsi Daud umalikisi obog toho men Yehuda inap men Daud let turukon arimano obog toho wol enepfareg ik En-Rogel elerukmu libareg helep unuk Pisanggo iraham wam domba sapi men, wam umalik sei werehon men anggolo Allah olohotma waroho esetuk latfag.

¹⁰Esetfag sambil ino ot Salomo men nabi Natan men Benaya men Daud iraham welatfahon sehen senehon men wol enepfag fug.

¹¹Weregman Natan ino Salomo isinga Batsyeba ambeg libareg hiyag utuk lit, ”Ninikni Daud apelegma uhe Hagit amloho Adonia ap suwon ahayon hat te holehen fug?

¹²Ari fahet hat men hamloho Salomo men honoluk welamuhuben komo hapminon holeg lamin:

¹³Daud ambeg lamihinteg at ubam hiyag itmihin ane tu, ’Nikni ap suwon, haren an hat hamingmingangge nubam Allah unuk fam hele uruk lit, ’We tik tem toho hamloho Salomo an nubalmangge ap suwon aruhu,’ ulug sali nubam emberikin fug? Nungge fahet ketiya Adonia ap suwon aha?’ ulug hiyag irik lamihin.

¹⁴Haren hele ap suwon fam urukmu itano an oho hombolim watminteg hat hele imihin ane let toho hiyag umul,” ulug hiyag itfag.

¹⁵Hiyag itfagma Batsyeba ino libareg Daud nohoruk ambeg kibag. Itano li Daud mondabi sabal angge weregma o Sunem hiyap tuhumon Abisag inowen let turuk latfag.

¹⁶Batsyeba ino kibareg elenggen fam hur atfareg Daud hi ribagma ap suwon inowen, ”Hat nungge fahet wahen?” ulug kapal hibagma

¹⁷Batsyeba inowen, ”Nikni ap suwon, haren HIKNI Allah unuk fam an hat hamingmingangge nubam hele uruk lit, ’Hamloho Salomo an nubalmangge ap suwon aruhu,’ ulug sali nubam emberikin.

¹⁸Ari irikin angge famen ketiya hat hapelegma hamloho Adonia ino ap suwon ahayon fahet hat holuk toho welamin!

¹⁹Adonia inowen hat humalikisi obog toho men imam Abyatar men sehen senehon onowe Yoab ino men wol enebehekteg wam domba sapi men, wam umalik sei werehon men anggolo Allah olohotma waroho eserehek. Ari roho esetuk lit hamloho Salomo eneg wol tehek fug.

²⁰Nikni, haren ap tu an nubalmangge ap suwon welaruhu ulug hiyag isamihinon fahet Israel inap obog tohowen hat nangno haptuk.

²¹Hat ap suwonen seleg toho hiyag nisa fug angge war aruhunmu itano iren nungge fahet Salomo ap suwon welaruhuk peruk ulug an men namloho Salomo men nunusuhup tohon!” ulug hiyag itfag.

²²Batsyeba inowen ari ulug Daud hiyag utukmu Natan ino watfag.

²³Watfagma aben Daud hiyag utuk lit, ”Natan ino waha,” ibagma Natan ino kibareg orohole han kinangma samaleg lit Daud hi ribareg

²⁴ele uruk lit, ”Nikni ap suwon, haren we tem toho namloho Adonia ino an nubalmangge ap suwon aruhu irikin ano?

²⁵O yoho re Adonia inowen hat humalikisi obog toho men sehen senehon onowesi men[1] imam Abyatar men wol enebehekteg wam domba sapi men wam umalik sei werehon men anggolo Allah olohotma waroho eserehekma Adonia menen naruk lit enele ine roho, ’Adonia, hat ap suwon, hine roho welaruhun,’ ulug hi ruruk.

²⁶We an hat hamingmingangge welahiyon aru men imam Zadok men Benaya men hamloho Salomo men nit eneg wol nenebehek fug.

²⁷Ap tu an nubalmangge ap suwon aruhu ulug nit hat hamingmingangge welaheyon fag toho hiyag nisa fug angge we Adonia eneg hirako hiyag itikin ane hikit toho tehek ano?” ulug hiyag itfag.

²⁸Ari ulug hiyag itfagma Daud inowen, ”Batsyeba wol tiyek,” ibagma Batsyeba nin ambeg kibareg Daud olohotma unduhukmu

²⁹Daud inowen at ubam ele uruk lit, ”NINIKNI Allah oluk werehon inowen angginon nubam weregma windat naptisi ahun olohotman nele uruk lahi.

³⁰Israel ninap NINIKNI Allahn holeg lit weregma hat hubam nele uruk lit, ’Hamloho Salomo an nubalmangge ap suwon aruhu,’ ulug sali hubam emberikikon ino hikit toho o yoho aru fam timin,” ulug hiyag itfag.

³¹Ari ibagma Batsyeba ino elenggen fam hur atfareg ap suwon hi ruruk lit, ”Nikni Daud, hat ap suwon mondabi holuk eneg welaruhun!” ulug wel tibag.

³²Wel tibagma Daud inowen, ”Zadok men Natan men Benaya men wol enebik aliyek!” ulug otsi mon enepfag. Mon enepfagma wol enepfahon arimano watfareg Daud ambeg kibagma

³³Daud inowen it unubam ele uruk lit, ”An namingmingangge hondog eneplug lalihipteg namloho Salomo ino wam kuda anden tohon palimu heriye fik lahalihipteg ik Gihon elerukmu hondoholug lalihip.

³⁴Hondoholug lalihipteg imam Zadok men nabi Natan menen Israel inap fet enesug laruhun ulug Salomo ap suwon lahaplihip. Lahaplihipteg waruk tung-tang isaruk lit henele hi roho, ’Ap suwon Salomo hine roho, hine roho welaruhun,’ ilihip.

³⁵Ari roho tilihipteg Salomo men suhuloho watlihip. Watlihipmu Salomo an nambeg kik watmisireg nubalma hur arik lahamisi. At an nubalmangge ap suwon atmisi uruk lahi. Israel inap men Yehuda inap men inikni welaruhu,” ulug hiyag isibag.

³⁶Ibag ane ari hol hibareg Benaya inowen Daud fam ele uruk lit, ”We tik tem toho ehen! Ehenon ari hat HIKNI Allahn ineyap timisi.

³⁷Aren hat ap suwon let haptuk latisi hag toho Salomo oho let turuk laruhu. Hat Daud nikniyen ap fet enesug latikin ane we apma regma Salomo inowen ap fet enesug laruhuwon palimu reg laruhu,” ibag.

³⁸Ari ibareg Zadok men Natan men Benaya men ap suwon iraham welatfahon sehen senehon arimano inim libareg Salomo wam kuda Dauren tohon palimu imbik lahibareg hondoholug ik Gihon elerukmu libag.

³⁹Libareg imam Zadok inowen kubag undama ahaluwe amben fanowon hinanggoho forohowon o sabo Allah fahet wirihon elman wilibig watfahon ino oko wibareg Salomo ap suwon welaruhu ulug unggulmu hilili fibag. Hilili fibagma waruk ele tung-tang isarukmu ap obog tohowen enele hi roho uruk lit, ”Ap suwon Salomo hine roho welaruhun,” uruk latfag.

⁴⁰Ari ibareg ap obog toho suhuloho lul ulug Salomo ombolim laruk lit pinggong fam sini yunggultil enehiyeg anggolo roho larukmu eneleyen kinang yuk-yuk angge turuk latfag.

⁴¹Adonia men aren wol enepfahon arimano menen suburu nibareg itano aben enele hum toho irikim hol isibag. Hun Yoaben oho hol isarukmen waruk tung-tang isarukon ino hol hibareg, ”O pumbuk ari nungge fahet enele hum toho uruk?” ibag.

⁴²Yoab inowen ele urukmu itano imam Abyatar amloho Yonatan watfagma Adonia inowen at ubam ele uruk lit, ”Kik ma, hat hambong se roho turuk hahun angge re hele fanowon walug wahen peruk lahi,” ibag.

⁴³Ari ibagma Yonatan inowen, ”Eleg, ninikni Daud inowen amloho Salomo ap suwon lahabehek.

⁴⁴Aren Zadok men Natan men Benaya men sehen senehon at iraham werehon arimano men unubam hiyag esehekma Salomo hondoholug lul ulug wam kuda Dauren tohon palimu imbik lahabehesareg

⁴⁵ik Gihon elerukmu lahasa. Lahasareg Zadok men Natan menen Salomo ap suwon lahabehesa. Lahabeheson fahet enehiyeg toho yunggultil waharukmu ap o pumbuk ino famonen oho enele anggolo uruk lahasa. Enele hum toho urukmu hol esehebon ari alem ari roho turuk lit uruk lahasa.

⁴⁶Ketiya Salomo ap suwon ahama

⁴⁷Daud amingmingangge arimano Daud ambeg lahasareg at hi ruruk lit, ’Hat hunuk apma regma Salomo unuk Allahn suwap turuk laruhu. Haren ap fet enesug latikin ane apma regma Salomo inowen ap fet enesug laruhuwon Allahn palimuwap tuhu,’ ulug hi rehesa. Ap suwon Daud inowen oho nohoruk ambehen elenggen fam hur ahareg

⁴⁸ele uruk lit, ’Israel ninap NINIKNI Allah inowen o yoho aru an nubalmangge ap suwon eke lahabehekon ino nilen hihireg Allah wel turuk lahi,’ ehek,” ulug Yonatan inowen Adonia hiyag itfag.

⁴⁹Hiyag itfag ane ari Adonia inowen wol enepfahon arimano obog tohowen hol hibareg yuk lagmag ibareg in atlug ke wal taneg enemu-enemu libag.

⁵⁰Libagma Adonia ino Salomo fahet akolen o sabo Allah fahet wirig ibam ino libareg an nuwabuhup tohon ulug hubu lahaptuk ambeg wog atog senerik libag.

⁵¹Libagma ap winonen Salomo hiyag utuk lit, ”Adonia ino hat ap suwon Salomo fahet akolen hubu lahaptuk ambeg wog atog seneg lit, ’Salomo inowen Allah unuk fam an at amingmingangge nubahet waruhuk fug uk fugmu an tuman wilip aruhuk fug,’ ehek,” ulug hiyag itfag.

⁵²Hiyag itfagma Salomo inowen ele uruk lit, ”Aren fano ane eneg tuhu halug oruk misig oho kong toho kinangma wambuhu fug. Aren olok ane indimu wenggel harukmu yet hahuk halug pinggi ware fusuhuk,” ibag.

⁵³Ari ibareg ap suwon Salomo inowen amingmingangge mon enepfagma Adonia ino hubu lahaptuk ambeg weregma hondohik libag. Hondohik libagma watfareg Adonia ino Salomo olohotma elenggen fam hur atfareg nikni ulug hi ribagma Salomo inowen, ”Hibam lamihin,” ulug hiyag itfag.