Read Angguruk Yali 1 RAJA-RAJA 10 Bible Online

1 RAJA-RAJA 10 - Angguruk Yali bible

1 RAJA-RAJA 10

¹Hiyap suwon o Syeba kinang seneg latfahon inowen hol harukmen ap obog tohowen Salomo wel turukmu hol hibareg mun ane man ane oluk teg ano ulug wal hamin ulug Salomo ambeg watfag.

²Hiyap ino otsiyet luhaloho o Yerusalem waharuk lit amben fano angge men ili ruruk angge emas anggolo men ilembani umbagpag turukon men wam unta fam imbik lahibareg walug watfag. Salomo ambeg walug watfareg wal hamin ulug indimuwen wenggel hibag ane obog toho Salomo kapal hibag.

³Kapal hibagma Salomo inowen hiyap ino hebeloho hiyag um fug tohon wereg elehen il misig umbusuk fug angge seleg tohon eneg tintiloho hiyag itfag.

⁴Salomo indi anggat teg lit hiyag itfag ane men, o suwon Salomoen witfahon ino men,

⁵ik suburu aren narukon men, otsi ik hinang utukon men, Salomo otsi nohoruk ambeg men, iniyabuk wituk ane men, enesum wan turukon men, Allah ibamen wam yaltuk ane men obog toho arimano yet hibareg yihi uruk lit sat fo ibag.

⁶Sat fo ibareg hiyap suwon inowen Salomo fam ele uruk lit, ”Hat hindi anggat teg lit mun ane man ane turuk lahen ane fahet an nibamen holtikikteg

⁷enele si ane uruk perikik angge famen an nebe hambeg waharikikteg nilen yet haruk lit eneg tem toho urusa peruk lahi. Tam haren turuk ane fahet we tor angge hiyag nutusama holtikikteg ketiya anden hat yet hiyarukmen hat hindi anggat teg lit hanggengge hinggikmu anggolo wereg.

⁸Hat huhesi men hotsi likiya hupmu hat hiraham werehon arimanowen hat hindi anggat teg lit uruk lahen ane hol haruken inindi enehiyeg toho wereg.

⁹HIKNI Allahn hat indi hasug lit Israel inap fet enesug laruhun ulug lahap haptisiyon ino wel turuk lahi. Allahn Israel inap indi enesugmen eneg wereg lit mun ane man ane alem fano roho haltuk laruhun ulug hat ap suwon humbaharisi,” ulug hiyag itfag.

¹⁰Hiyag itfareg hiyap suwon inowen ili ruruk angge emas teng-teng angge 4.000 kilogram men amben fano angge anggolo men ilembani umbagpag turuk angge arimano men Salomo og itfag. Amben fano angge anggolo og itfahon hag toho fobik eke ap misihen oho o Israel walug watfag fug.

¹¹Kou hun Hiram inowen tohon arimano ik ahum pali keyen o Ofir kinangma libareg ili ruruk angge emas men e fanowon anggolo men ilembani umbagpag turukon men Salomo ambeg walug watfag.

¹²Salomo inowen e fanowon walug watfahon arimano fam inggareg ibam men Allah Ibam men walinggoho elehet oho feruk lit[8] sini yunggultuk inap fahet pinggong men waruk men wiri fibag. E fanowon walug watfahon ari hahon fobik o Israel kinangma nin eke walug watfag fugmu ketiya oho kim haruk eleg.

¹³Ap suwon Salomo inowen fano angge og itmin pibag angge hiyap suwon Syeba kinang senehon og itfareg nin eke sebe roho hiyap inowen heng ibag ane hikit toho og itfagma hiyap suwon ino otsi men ambiyeg inibam suhuloho libag.

¹⁴Mo ino fam[9] ili ruruk angge emas Salomo ambeg walug waharuk latfahon arimano anggin wirim tibahon anggin anggolo roho teng-teng angge 23.000 kilogram wirim tibag.

¹⁵Nin eke ayeg waroho hilaruk inaben ili ruruk angge emas og utuk latfag. Onggo paloho hilaruk inap men ap suwon o Arab kinang seneg inap men Israel inap onowesi menen oho hundig-hundig ap suwon ili ruruk angge emas og utuk lamuhup ulug hiyag isibagma anggolo roho emberuk latfag.

¹⁶Salomo inowen sing suwon teng likinen 200 ili ruruk angge emas fam wiri fibag. Emas fam witfahon arimano wal taneg anggin wirim tibahon sabit fam 7 kilogram atfag.

¹⁷Nin toron eke emas fam witfahon arimano teng nanggoloben 300 witfag. Toron witfahon arimano anggin wirim tibahon piren fam atfag. Witfahon arimano obog toho Salomo inowen o unuk Libanon Ohi suwalfag ibam imbik kibag.

¹⁸Nin eke Salomo inowen ap suwon hur atuk angge yaron eke wiri fibareg melei men ili ruruk angge emas mondabi fanowon men fam lombog toho witfag.

¹⁹Witfareg yal il falfaliken witil lahibareg hur atuk angge ino palimu imbik lahibag. Hur atuk angge ambol fil wam sapi unggul hag angge wiroho lombog tibag. Inggik sabit timi roho hur atuk ambeg fumag-fumag witfahon iraham olomene hag toho piren wiroho unduhuk fibag.

²⁰Yal il falfaliken witfahon itano fumag-fumag olomene hag toho nisanggowen wiroho unduhuk fibag. Ap suwon hur atuk angge Salomo inowen witfahon ino hag toho o kema-kema ap suwon wereg ambeg oho wereg eleg.

²¹Kubag ik naruk angge Salomo inowen tohon obog toho men o unuk Libanon Ohi suwalfag ibam foroho latfag angge arimano obog toho men emas mondabi fanowon fam wiri fibag. Salomo welatfag li itano aben fano angge perak fahet siyag ulug wibag fugmu perak fam witfahon eke welatfag fug.

²²Kou humon ik ahum pali ke larukon Salomo inowen tohon arimano men Sidon inap onowe Hiramen tohon men ambiyeg laruk lit mo hinahan fam misihim emas men perak men melei men pak su hahon men suwe puwali men walug waharuk latfag.

²³Ap suwon Salomo ino indi anggat teg lit inggikmu anggengge anggolo werehen ap suwon winon kinangma werehon obog toho men wirim teg latfag fug.

²⁴Ap kinang atogman atogma welatfahon obog toho arimanowen Salomo ino Allahn indi anggarap turukmu ele fano roho uruk ane hol hahuken ambeg lahuk peruk latfag.

²⁵Ap arimano mo eke fam eke fam Salomo ambeg waharuk lit enebe wal tanehen perak emas fam witfag angge men sum men sehen men amben fano angge men wam kuda men keledai men Salomo onggo og utuk latfag.

²⁶Salomo inowen tog aptuk ane fahet wamen lisoho walug laruk angge teng-teng angge 1.400 men ap wam kuda fam lahalug larukon teng-teng angge 12.000 men andog enepfareg it winon unubam o pumbuk kereta foroho ambeg wal taneg welamuhup ulug hiyag isibareg winon unubam an horogma o Yerusalem welamuhup ulug hiyag isibag.

²⁷Salomo welatfag li itano o Yerusalem ili ruruk angge perak arimano helep ik pilikmu mondeg hag toho mondeg latfag. E sahi ineyon tom Libanon famen walug watfahon oho farema e anggolo wereg hag toho mondeg latfag.

²⁸Ap suwon otsi arimanowen onowe Salomo fahet wam kuda o Mesir men o Kilikia men onggo paloho wak laruk lit

²⁹wamen lisoho walug laruk angge kereta o Mesir onggo palik laruk latfag. Wam kuda arimano fahet onggo uang perak teng falfaliken 150 fam paltuk latfag, kereta misig fahet onggo uang perak teng falfalik fuman 600 fam paltuk latfag. Onggo paloho wak laruk latfahon arimano Salomo otsiyen minggiroho Het inap onowesi men Siria inap onowesi men unubam ayeg watuk latfag.