Read Angguruk Yali 1 RAJA-RAJA 11 Bible Online

1 RAJA-RAJA 11 - Angguruk Yali bible

1 RAJA-RAJA 11

¹Salomoen o pumbuk winama hiyap fahet indimuwen naruk lit Mesir inap onowe ahaloho hilibareg Moab hiyap, Amon hiyap, Edom hiyap, Sidon hiyap, Het hiyap oho og eneptuk latfag.

²Ap hiyap o winamon fahet NINIKNI Allahn Israel inap unubam ele uruk lit, ”Hit men it men og-og atuk lamuhup fug. Og-og atuk lamuhup halug unumbasi iren wel eneptukon hiren oho wel eneptuk lamuhup ulug hinindi ninap heneptuk lamuhup tohon!” ibag angge famen Salomoen o pumbuk winama hiyap fahet indimuwen naruk latfag.

³Indimuwen naruk lit hiyap ap suwonen endetfahon teng pireneg fuman 700 men hiyap winon teng nanggoloben 300 men og enepfag. Og enepfagma hiyap arimanowen Salomo indi ninap turuk latfag.

⁴Salomo sabal atfagma uhesiyen indi kahaltukmu ikni Daud inowen indi wirik toho NINIKNI Allah fam wenggel haruk latfag hag toho Salomoen At ubam wenggel ha fug angge indi piren teg lit ap o winamonen unumbasi wel eneptukon aren oho wel eneptuk latfag.

⁵Wel eneptuk lit Salomoen o Sidon inaben wel turuk angge Astoret men o Amon inaben wel turukon Milkom ap enehummu siyahap eneptuk angge ino men onombolim laruk latfag.

⁶Onombolim laruk lit ikni Dauren indimu ahiyeg toho NINIKNI Allah fam wenggel haruk latfag hag toho amlohowen At ubam wenggel ha fug angge NINIKNI Allahn siyag perukon eneg turuk latfag.

⁷Turuk lit o Moab inaben nunumba ulug wel turukon Kamos men o Amon inaben wel turukon Molokh men ap enehummu siyahap eneptuk angge itano fahet Salomo inowen o Yerusalem yali fil punumu hubu lahaptuk ambeg eke witfag.

⁸Witfareg uhesiyen nunumba ulug wel eneptuk angge fahet wam waroho yaltuk lit amben fano angge yaloho hubu lahaptuk ambeg wal taneg wit isaruk latfag.

⁹Ari turukmu yet hibareg NINIKNI Allahn Salomo fahet olok hibag. Atam Israel inap INIKNI Allah ino inggik pirenam Salomo olohotma inam atuk lit ap winonen wel eneptuk angge fam sembahyang uruk laruhun fug ulug hiyag itfag angge famen Salomo inowen ambol yig utuk lit Aren hiyag itfahon seneg latfag fug.

¹⁰

¹¹Seneg latfag fugmu NINIKNI Allahn Salomo ubam ele uruk lit, ”Haren An nubam sali emberuk lit Hat hele eneg holtuk laruhuk irikinon ino pisan isalug Anden ari-ari turuk laruhun ulug hiyag hitikik ane holtikin fugmu hat ap suwon wereg lit yabuk seneg lahenon ino Anden hat hinggikmuwen taluk toho hamingmingangge eke og uruhuk.

¹²Hat holuk weregma Anden hat humbahale angge famen hikni Daud fahet wenggel haruk lahireg hat hamloho hubalma in aruhureg ap suwon wereg lit yabuk seneg laruhuwon ino inggikmuwen taluk toho hat hamingmingangge eke og uruhuk.

¹³Og utuk lit Israel inap ununggul unuk obog toho inggikmu umbuhuk. We An namingmingangge Daud men o Yerusalem mumal tarikik ambeg men fahet wenggel haruk lit Israel inap enebe we tor angge hat hamloho inowen sen enesug laruhu ulug ununggul unuk misig inap at inggikmuwen taluk enebuhuk fug,” ulug hiyag itfag.

¹⁴Welatfareg NINIKNI Allahn Salomo men hili roho welaruhun ulug o Edom inap onowesi suwonen ondohowonen ondohowon eke unuk Hadad indi kahalfag.

¹⁵Ari tibag li uwanma Daud inowen o Edom inap apmayap enepfagma otsi sehen senehon onowe Yoab inowen Israel inap tog elman unusuruson kinang habuloho sal enebuhuk ulug Edom kinangma libareg wereg lit Edom inap ap angge obog toho unusil larukmen pikalem falfaliken libagma obog toho unusuruk latfag.

¹⁶

¹⁷Unusurukmu hun Hadad kabinimu ikni otsi men koloweg wilip atfareg o Mesir kinangma lahuk ulug

¹⁸Midian kinang keyen Paran lekma libag. Libagma Paran inaben hondog eneplug Mesir inap onowe suwon ambeg libag. Libagma Mesir inap onowe suwonen Hadad ino o men kinang men hiyag itfareg likiya hupmu suburu og utuk latfag.

¹⁹Mesir inap onowe inowen Hadad indi reg lit uhe unuk Tahpenes ot ino og itfag.

²⁰Og itfagma Tahpenes ot inowen Hadad amloho unuk Genubat indag itfag. Indag itfagma malik ino Mesir inap onowe suwon ibam weregma uhe Tahpenes inowen ap suwon umalikisi men ambiyeg fet enesugmen eneg su atfag.

²¹Su atfagma ap suwon Daud men otsi sehen senehon onowe Yoab men war atusa urukmu hol hibareg Hadad inowen Mesir inap onowe suwon fam ele uruk lit, ”An nibam laminen hiyag nimin!” ulug hiyag itfag.

²²Hiyag itfagma ap suwon inowen Hadad ubam, ”Anden hat haseher angge obog toho og hutuk lahi angge famen nungge fahet nibam lamin ehen?” ibag. Ibagma Hadad inowen, ”We tem, haren mun angge man angge og nutuk lahen angge famen hibam lag imihin ulug heng haptuk lahi,” ibareg ibam o Edom kinangma libag.

²³Welatfagma Allah inowen Salomo men hili roho welaruhun ulug hun Elyada amloho Rezon indi kahalfag. Rezon ino o Zoba inap onowe suwon Hadadezer amingmingangge weregma ap suwon Daud inowen Hadadezer apmayap tik oho lit Siria inap Hadadezer ibil arik watfahon arimano unusik watfag. Unusurukmu Rezon ino koloweg wilip atug ikni embeselug libag. Libareg ap palu enepfareg aben tohon huhulangge hulul ulug milal eneptuk latfag. Milal eneptuk lit o Damsyik ilmig ta libareg weregma otsiyen Siria inap onowe suwon raja welaruhun ulug lahapfag.

²⁴

²⁵Lahapfagma hun Salomo Israel inap onowe suwon lahibag liyen tulug war atfag sambil fam Rezon ino Israel inap men seli roho wereg lit hun Hadad inowen Israel inap siyahap eneptuk latfag hag toho aren oho siyahap eneptukmen eneg welatfag.

²⁶Salomo amingmingangge eke unuk Yerobeam inowen ap suwon Salomo ino pilabuhuk ulug turuk latfag. Yerobeam ino hun Nebat amloho o Zereda ahun unggul unuk Efraim welatfag. Isinga unuk Zerua hiyap yuwohon welatfag.

²⁷Hun Yerobeam inowen ap suwon pilabuhuk peruk latfag ane alem tuma emberuk lahe: Salomo inowen elehet o Yerusalem walinggoho witfahon ino ambiyangma ahandip teg eleg ambeg lare fuhuk ulug helep elehet witil lahibag.

²⁸Witil laharuk lit Salomo inowen yet harukmen Yerobeam ino ebe kabini reg lit ine roho elehet warukmu yet hibareg Manasye inap men Efraim inap menen ap suwon fahet yabuk onggo eleg angge witukon onowe roho welaruhun ulug Yerobeam ino unduhuk fibag.

²⁹Misihim sambil Yerobeam ino o Yerusalemen wilip atfareg larukmen o Silo ahun Ahia Allah amingmingangge nabi ino sum keron wan teg lit Yerobeam men kalemma salkal ibag. It piren enemu eneg anggenman salkal ibareg

³⁰Ahia inowen asum keron ubam wan teg latfahon ino nonggoloho wibareg sum ino penel-penel laha fisibagma nisanggowen atfagma

³¹Yerobeam fam ele uruk lit, ”Sum penelep toho imbihiyon aruma numen hilamihin. Israel ninap NINIKNI Allah ino ele iminon tu, ’Tik-tem toho Anden ap suwon Salomo ino inggikmuwen otsi aren fet enesuhon arimano taluk toho wahukteg ap ununggul unuk numen haren fet enesug laruhunen og huruhuk.

³²An namingmingangge Daud men o pumbuk Yerusalem Anden Israel inap ununggul unuk obog toho enesehelimuwen eneko mumal tarikikon ino men fahet nindiyen ulug wenggel haruk lahireg ap ununggul unuk misig Yehuda inap eneg Salomo inggikmu welamuhup.

³³Ikni Daud inowen Anden hiyag utuk latikik ane holtuk lit Allahn fano peruk ane eneg turuk laruhuk ulug An nawene tam hiyag isarik iyahon haharoho imbibag ane inggik ine roho seneg latisi hag toho amloho Salomo inowen ari roho seneg latisi fug. An nibil ambol yig nutuk lit Sidon inap inisinga Astoret men Moab inap inikni Kamos men Amon inap inikni Milkom men arimano fahet niknisi ulug wel eneptuk latisi angge famen

³⁴otsi obog toho taluk toho wahuk fug. Salomo oluk wereg li tuhuk ane fahet uruk lahi fug. An namingmingangge Daud Anden mumal tarikikmu at inowen An nawene tam hiyag isarik iyahon hikit toho turuk latisi ane fahet nindiyen ulug wenggel haruk lit amloho Salomo ino ap suwon weregman eneg war aruhu ulug emberuk lahi.

³⁵We Salomo amloho inggikmuwen eneg Anden otsi taluk toho wahukteg Israel inap ununggul unuk numen fet enesug laruhunen hat og huruhuk.

³⁶Ap ununggul unuk Yehuda inap eneg Salomo amlohowen fet enesug laruhun ulug og uruhukmu An namingmingangge Daud umalikisiyen ondohowon arimano fobik oho o Yerusalem An nunuk wel naptuk lamuhup ulug mumal tarikik ambeg wereg lit Yehuda inap fet enesugmen eneg welamuhup.

³⁷Yerobeam nare, haren Israel inap fet enesug lit mun angge man angge seneg lale peruk lahen ane hikit toho seneg laruhun ulug mumal haptuk lahi.

³⁸Namingmingangge Daud inowen Anden numalikisi komo eneptik iyag ane haharoho imbibahon arimano obog toho seneg lit An nolohotman pikir ane eneg turuk latisi hag toho haren oho hiyag hutuk lahiyon obog toho holtuk lit Anden fano peruk ane hikit toho turuk laruhun halug Anden hat let haptuk lit Israel inap fet enesug laruhunen hinggikmu umbuhuk. Anden Daud ubam hiyag utuk lit, ’Hat humalikisiyen endebuhubonen endebuhubon arimano hat hubalmangge ap suwon lahap eneptukmen eneg welamuhup,’ ulug sali emberikik hag toho hat hubam oho emberuk lahi.

³⁹Salomo inowen siyag ane turuk ane fahet Anden Daud umalikisi alem angginon unubam emberuk laruhuk angge famen mondabi apmayap enebuhuk fug,’ ehek,” ulug Ahia inowen Yerobeam hiyag itfag.

⁴⁰Hiyag itfagma welatfareg Salomo inowen Yerobeam ino waruhuk ulug turuken Yerobeam ino wilip atfareg Mesir inap onowe Sisak ambeg o Mesir libareg weregman eneg Salomo ino war atfag.

⁴¹Salomo oluk wereg lit turuk latfag ane tuma tor angge haharoho emberuk lahe. At indi anggat teg lit turuk latfag ane obog toho suwesingga Salomo inowen turuk latfag ane fahet haharehon fam haharoho imbibag.

⁴²Salomo ino o Yerusalem wereg lit Israel inap obog toho fet enesugmen eneg mo teng misigmen nubam hilag nuwalen 40 atfagma

⁴³Salomo war atfag. War atfagma o pumbuk unuk Daud Ibam kinangma sale fisibag. Sale fisibagma amloho Rehabeam ikni ubalma ap suwon lahapfag.