Read Angguruk Yali 1 RAJA-RAJA 12 Bible Online

1 RAJA-RAJA 12 - Angguruk Yali bible

1 RAJA-RAJA 12

¹Salomo war atfagma Israel inap ik eleruk fil welatfahon obog toho hun Rehabeam ap suwon lahabuhuk ulug o Sikhem watfagma Rehabeam oho watfag.

²Watfag li itano hun Nebat amloho Yerobeam ino ap suwon Salomo inowen waruhuk peruken akol tulug libareg o Mesir wereg lit hol harukmen Salomo amloho Rehabeam ino ap suwon lahabuhuk ulug turuk urukon hol hibareg Yerobeam ino o Mesiren wilip atfareg o Israel suhuloho watfag.

³Watfagma Israel inap ununggul unuk numen ik eleruk fil welatfahon arimanowen Yerobeam hondohik lalihip ulug ap mon enepfagma hondohik libareg watfagma hun Yerobeam ino Israel inap ik eleruk fil welatfahon arimano men ambiyeg Rehabeam ambeg libareg at ubam enele uruk lit,

⁴”Hat hikniyen e paleg angginon nununggulmu ha reberuk latisimu ketiya hikniyen yabuk angginon wit nutuk lamuhup ulug mingming neneptuk latisi ane haren seyap turuk lit e paleg angginon nununggulmu ha reberuk latisiyon ino tot mabenap tuhun halug nit hat hamingmingangge welamuhuk,” ulug Rehabeam hiyag itfag.

⁵Hiyag itfagma aren hebeloho hiyag isaruk lit, ”Lalihipteg hup pirenam welamuhupteg hinahaneg sambil nambeg suhuloho wamuhup,” ulug hiyag isibagma ap arimano libag.

⁶Ap arimano libagma Rehabeam inowen komo nabusa ulug Israel inap onowesi ikni Salomo oluk weregma iraham welatfahon arimano wol enepfareg hiyag isaruk lit, ”Ap arimanowen heng nabehesa ane fahet hebeloho anden hiyag isahuk ane hiyag nitlihip,” ulug heng enepfag.

⁷Heng enepfagma iren te, ”Hat o yoho tu ap arimano enemingmingangge roho apmayap taruk lit hele fano roho hiyag isamihin halug it hebeloho hat hamingmingangge mondabi welamuhup,” ulug hiyag itfag.

⁸Ari ulug hiyag itfag angge famen Rehabeam inowen iren komo ribag ane embeseruk lit ap kabiniyon at min ambi rohon yabuk let toho warukon arimano wol enepfareg hiyag isaruk lit,

⁹”Israel inap arimanowen, ’Hikniyen e paleg angginon nununggulmu emberisiyon seyap timihin,’ urusama anden nangginoho hiyag isahuken hiren hiyag nitlihip,” ulug heng enepfag.

¹⁰Heng enepfagma iren te, ”Haren hebeloho it unubam hiyag isahunon tu, ’Nori, nikni Salomo ino inggik ine reg peruk latikip angge famen an ninggik sehelet toron aru mondabi ine reg.

¹¹An nikniyen e paleg angginon hununggulmu emberisiyon ino tot se regma anden angginon sebe roho hit hunubam umbuhuk. An nikniyen hele paleg fam eneg hunusuruk latisi angge famen anden e paleg ilon fam hunusuruk laruhuk,’ ulug hiyag isahun,” ibag.

¹²Ari ibareg hup pirenam welatfagma hun Yerobeam men Israel inap men Rehabeam inowen hiyag isibag ane hikit toho ambeg watfag.

¹³Ambeg watfagma ap suwon Rehabeam inowen Israel inap onowesiyen komo ribag ane imbisibareg

¹⁴ori at min ambi rohon arimanowen komo ribag ane roho ele ine roho hiyag isaruk lit, ”An nikniyen e paleg angginon hununggulmu emberisiyon ino tot se regma anden angginon sebe roho hit hunubam emberuk laruhuk. An nikniyen hele paleg fam eneg hunusuruk latisi angge famen anden e paleg ilon fam hunusuruk laruhuk,” ulug hiyag isibag.

¹⁵NINIKNI Allahn nele o Silo ahun Ahia feneyen hun Nebat amloho Yerobeam ubam hiyag itikikon ino hikit toho teko lawag pibag ane roho hun Rehabeam inowen Israel inaben heng tibag ane ino hondo rebeseruk lit ele ine roho hiyag isibag.

¹⁶Ap suwonen iren heng tibag ane hondo rebeserukmu Israel inap obog tohowen hol hibareg ap suwon Rehabeam hiyag utuk lit, ”Nit Daud umalikisi fug. Isai amloho Daud inowen nungge-nungge nit fahet nunumbahibag fugmu hat men nininggik ahandip toho welamuhuk fug. Israel hinap nori, ninibam luk ohon, maniyek! Hat Daud umbusag, hibam hamu wit taruk laruhun,” ulug hiyag itfareg Israel inap ununggul unuk numen arimano inibam ik eleruk fil libag.

¹⁷Libagma wereg lit hun Rehabeam ino Israel inap kinang Yehuda fam welatfahon fahet eneg ap suwon atfag.

¹⁸Ari roho wereg lit ap suwon Rehabeam inowen hun Adoniram yabuk onggo eleg angge wituk inap fahet kim isaruk laruhun ulug lahapfahon ino Israel inap inindi yuwahap enebik lamihin ulug monde fibagma libagma Israel inap obog tohowen helep wibareg watukmen war atfag. Ari turukmu yet isibareg ap suwon Rehabeam ino akolen folo-folo wamen lisoho walug laruk angge kereta ino fam lahuk fug ane tibag angge famen lahibareg o Yerusalem fil longgo ik watfag.

¹⁹O ari sambilen ak tibareg Israel inap ununggul unuk numen ik eleruk fil welatfahon arimano men Daud umalikisi men seli roho welatfag hag toho ketiya oho seli roho wereg.

²⁰Hun Yerobeam o Mesiren suhuloho watfagma Israel inap ik eleruk fil welatfahon arimanowen hol hibareg nenele uhuken at hondohik lalihip ulug ap mon enepfagma hondoholug watfagma Israel inaben Yerobeam ino Israel ninap nununggul unuk numen fahet ap suwon welaruhun ulug lahapfag. Ununggul unuk Yehuda inap eneg Daud umalikisiyen nit fet nenesug lamuhup uruk latfag.

²¹Salomo amloho Rehabeam ino o Yerusalem watfareg Israel inap ik eleruk fil werehon arimano anden sen enesug laruhuken suhuloho an ninggikmu amag ulug tog abuhuk pibareg Yehuda inap men Benyamin inap men enesehelimuwen sehen seneg inap tog aptuk ane inindi anggat tohon teng-teng angge 180.000 andog enepfag.

²²Ari turukmu itano Allahn amingmingangge nabi Semaya fam ele hiyag utuk lit,

²³”Rehabeam men umalikisi Yehuda inap men Benyamin inap men hiyag isamihinon tu:

²⁴NINIKNI Allahn ele uruk lit, ’Honori Israel inap men tog abul ulug wilip amuhup fug. Hinibam man-man lalihip. Honori minggiroho enemu atuson Anden perikik ane hikit toho teko larisi,’ ehek imihin,” ulug hiyag itfag ane ino hun Semaya inowen hiyag isibagma it arimanowen NINIKNI Allahn tem toho hiyag nesehek ulug inibam libag.

²⁵Hun Yerobeam inowen o pumbuk Sikhem tom Efraim fam welatfahon ino walinggoho elehet ineyon oho fibareg o Sikhem ino welatfag. Welatfareg wilip atlug libareg o pumbuk Pnuel eke walinggoho elehet ineyon oko kilaptuk latfag.

²⁶Kilapfareg Yerobeam inowen indimu wenggel haruk lit, ”An numalikisi Allah ibamen NINIKNI Allah fahet wam esebuhuk ulug o Yerusalem laruk lit Yehuda inap onowe Rehabeam suhuloho apma amuhuk ulug inindimu wenggel hahupteg an pinggi nuwabuhup tohon!” ulug wenggel haruk latfag.

²⁸Nangginuhuk ulug yat toho wenggel haruk latfareg Yerobeam inowen wam sapi hunon piren hahon ili ruruk angge emas fam wiri fibareg umalikisi Israel inap unubam hiyag isaruk lit, ”Israel hinap nori, o Yerusalem asengseng toho la wam turuk latikibon ketiya umbusuhup. Allah hag toho werehon nit o Mesiren hondog neneplug wilip atuson arimano enebe piren tu werehen yet esemek!” ulug hiyag isibag.

²⁹Hiyag isibareg wam sapi itano misig o Betel unduhuk fibareg eke misig o Dan unduhuk fik libag.

³⁰Unduhuk fik libagma Israel inap arimano wam sapi hahon o Betel men o Dan men unduhuk fibahon itano unubam sembahyang ik laruk lit siyag ane anggolo turuk latfag.

³¹Hun Yerobeam inowen punu ke Allah wel turuk ibam witil laruk lit Israel inap enesehelimuwen Lewi inap fuhon o itano foroho lamuhup ulug imam in enepfag.

³²In enepfareg hiren Allah wel turuk ibam o Betel werehon ino foroho lamuhup ulug hiyag isibareg at inggarehen oho wam sapi hahon at inggiken emas fam witfahon itano wel turuk lit hubu lahaptuk angge fam wam waroho yaltuk latfag. Ari turuk lit Yehuda inaben Allah wel turuk ane fahet sali imbibahon hikit toho aren oho mo eke fam eke fam ari sambil eneg Allah wel turuk lamuhuk ulug pikalem likinon o nuwal fimahen fam sali imbibag. Ari roho imbibag sambil ino hun Yerobeam ino nindimu wenggel harikik ane ino hikirap timin ulug o Betel libareg hubu lahaptuk angge fam wam waroho yaltuk latfag.