Read Angguruk Yali 1 RAJA-RAJA 13 Bible Online

1 RAJA-RAJA 13 - Angguruk Yali bible

1 RAJA-RAJA 13

¹Ap suwon Yerobeam inowen wam waroho yalmin ulug hubu lahaptuk ambeg aren o Betel inowen witfahon iraham unduhukmu itano NINIKNI Allahn amingmingangge Yehuda ahun eke ambeg monde fik watfag.

²Watfareg NINIKNI Allahn hiyag itfag ane hikit toho at inowen ap fam nele uruk lahi hag toho imin ulug hubu lahaptuk angge fam ele hi roho uruk lit, ”Hubu lahaptuk ambeg, hubu lahaptuk ambeg! NINIKNI Allahn ele urukon tu holeg lamin: Dauren ondohowonen ondohowon malik eke indag aruhumu unuk Yosia suwaluhup. At inowen imam inap hat hubamen hubu lahaptukon arimano hemberimu imbik lahalug unusuhureg ap unuwag oho hat hemberimu indokma yale fusuhu,” ibareg,

³nin ele uruk lit, ”Hiren we tik tem toho NINIKNI Allahn ele ehek ulug honoluk atmisiyen Allahn enehangge timisiyon tu: Hubu lahaptuk ambeg aru pul ke pilang toho ilkal imisimu ul fene wam sei anggolo werehon ino kinang ke hililoho lin-lan imisi,” ibag.

⁴Ari urukmu ap suwon Yerobeam inowen hol hibareg hubu lahaptuk angge iraham unduhuk ambehen inggik leho lit otsi unubam, ”Hun aru seneg lamek!” urukmu itano inggik lehowon ino war atfagma lebe ruk fug teg latfag.

⁵Ari turukmu Allah amingmingangge inowen NINIKNI Allahn hiyag itfagma ibag ane hikit toho hubu lahaptuk ambeg ino pul ke pilang toho ilkal ibagma ul fene wam sei welatfahon ino kinang ke hililoho lin-lan ibag.

⁶Lin-lan ibagma ap suwon inowen Allah amingmingangge ino fam ele uruk lit, ”HIKNI Allah haren wel turuk lahenonen an indi nasug latmisi ulug haren sembahyang ubam uruk lit indi yuwahap timihinmu an ninggik fano atmisi,” ulug hiyag itfagma Allah amingmingangge inowen NINIKNI Allah fam sembahyang ibagma Yerobeam inggik nin fano atfag.

⁷Nin fano atfagma ap suwonen Allah amingmingangge hiyag utuk lit, ”An nibam ambiyeg lulen ma! Lulteg suburu nulmu fano angge eke og hitmin,” ibag.

⁸Ibagma ap inowen Yerobeam fam ele uruk lit, ”Hat hanggengge pul ke minggiroho og netlen halug oho hat men ambiyeg laruk lit o Betel tuwen suburu men ik men nele fug.

⁹NINIKNI Allahn an hambeg mon naptuk lit, ’Lamihin ambehen suburu men ik men na fug angge suhuloho waharuk lit lamihin keyen watmihin fug,’ ulug hiyag nerehekma hat men lul fug,” ibag.

¹⁰Ari ibareg suhuloho laruk lit watfag keyen la fug angge kebunggalem amu keyen nibam lamin ulug libag.

¹¹Ari tibag li o Betel ino Allah amingmingangge nabi sabalon eke welatfag. At umalikisi ambeg watfareg Allah amingmingangge inowen o Betelen ap suwon fam ele uruk lit turuk latfag ane obog toho inikni hiyag itfag.

¹²Hiyag itfagma inikni inowen, ”Ke keyen ibam laha?” ulug kapal isibagma iren Allah amingmingangge Yehuda ahun ino ibam libag ke hiyag itfag.

¹³Hiyag itfagma inikni inowen, ”An wam keledai fam lahalug laminen wak aliyek!” ulug umalikisi hiyag isibag ane roho walug watfagma nabi sabalon ino wam ino fam lahalug

¹⁴Allah amingmingangge ino muko libareg ap ino e suwon eke alma heriyegma libag. Libareg at ubam ele uruk lit, ”Hat Allah amingmingangge o Yehuda kinangman wahenon ano?” ulug kapal hibagma aren te, ”Yu, wahi,” ibag.

¹⁵Ibagma nabi sabalonen Allah amingmingangge ino fam, ”An nibam lulteg suburu nulen ma!” ulug hiyag itfag.

¹⁶Hiyag itfagma Allah amingmingangge inowen at ubam ele uruk lit, ”O tuwen suburu men ik men na fug teg lahireg hat men ambiyeg lul fug.

¹⁷NINIKNI Allahn an tuma mon naptuk lit, ’Lamihin ambehen suburu men ik men na fug angge suhuloho waharuk lit lamihin keyen watmihin fug,’ ulug hiyag nerehekma hat men lul fug,” ibag.

¹⁸Ibagma nabi sabalon inowen ele uruk lit, ”Hat welahen hag toho an oho Allah amingmingangge nabi welahi. Welahireg NINIKNI Allahn ot malaikat eke an nambeg monde fik wahareg an nubam ele uruk lit, ’Ap ino hondoholug hibam watmihinteg suburu men ik men nalihip,’ ulug hiyag nerehekma hambeg wahi,” ibag. Ibahon ari ele si ane ibag angge famen

¹⁹Allah amingmingangge Yehuda ahun inowen we tem ehek pibareg at men ambiyeg ibam libareg suburu men ik men nibag.

²⁰Narukmu NINIKNI Allahn nabi sabalon ubam ele hiyag itfag.

²¹Hiyag itfagma nabi sabalonen Allah amingmingangge Yehuda ahun ubam ele hi roho uruk lit, ”NINIKNI Allahn ele ehekon tu holeg lamin: An HIKNI Allah nele sobir isalug Anden hiyag hirihiyon hikit toho tuk fug angge

²²o Betel suhuloho lahenteg Anden suburu namihin fug ihi ambehen suburu men ik men nenggenma hat huwabuhupmu hebe wareg angge hiknisi kinangma sal eneptuk latfag ambehen sal habuhup fug,” ulug hiyag itfag.

²³Hiyag itfagma suburu men ik men obog toho nibareg wam keledai fam lahalug nibam lamin ulug libag.

²⁴Funggalma larukmen olomene ekeyen ware fisik watfag. Ware fisibagma Yehuda ahun wareg angge ino kinangma yinggig lit weregma ambohom keledai men olomene ino men iraham unduhuk latfag.

²⁵Unduhukmu ap funggalma laruk lit yet harukmen ebe wareg angge kinangma yinggig lit weregma olomene ino iraham unduhukmu yet hibareg nabi sabalon ino o Betel weregma hiyag irik libag.

²⁶Hiyag itfag ane ino holfareg nabi sabalon inowen ele uruk lit, ”Ap ino Allah amingmingangge famen NINIKNI Allah ele sobir esehekma NINIKNI Allahn hiyag erehek ane hikit toho olomeneyen warehekteg senggelehek,” ibag.

²⁷Ari ibareg umalikisi unubam, ”An laminen nambohom keledai og nirik maniyek!” ulug hiyag isibagma walug watfag.

²⁸Walug watfagma ap sabalon ino wam keledai fam lahalug Yehuda ahun wareg angge funggalma yinggigmu libareg yet harukmen olomeneyen ebe wareg angge ino naruk lit wam keledai oho watep angge famen olomeneyet wam keledai inowet ebe wareg angge iraham unduhukmu yet isibag.

²⁹Yet isibareg nabi sabalonen Allah amingmingangge wareg angge ino oko walug at ambohom keledai fam imbik lahalug ibam o Betel libareg Yehuda ahun watfahon fahet piya sini yiko kinangma salfag.

³⁰Nabi sabalonen war aruhukmu sal nabuhup pibag ambeg ap wareg angge ino saltuk lit aben, ”Yihi, nenere, ninindiyen-e,” ulug hunu sini uruk latfag.

³¹Salfareg nabi sabalon inowen umalikisi hiyag isaruk lit, ”An war aruhukmu Allah amingmingangge salehe ambeg an oho sal nabuhup. Sal nabuhupmu at uwahet an nuwahet nikema welamuhup.

³²Welamuhupmu NINIKNI Allahn hun aru hiyag itisi ane hikit toho hubu lahaptuk ambeg o Betel tuma werehon men o Samaria pumbuk obog toho fam werehon fahet irisiyon we tik-tem toho hikir aruhu,” ibag.

³³Ari teko libag ane yet hibag angge famen ap suwon Yerobeam inowen siyag ane til-wil laruk lit tam turuk latfag ane hikit toho hubu lahaptuk ambeg punumu werehon arimano foroho lamuhup ulug Israel inap enesehelimuwon imam in eneptuk lit ap sa-o sa-o indimuwen imam welale perukon obog toho lahap eneptuk latfag.

³⁴Ari roho siyag ane eneg turuk lit alem angginon ubamap taruk latfag ane ariyen fobik Yerobeamen ondohowonen ondohowon obog toho mondabi siyag atfareg kinangman eleg atfag.