Read Angguruk Yali 1 RAJA-RAJA 14 Bible Online

1 RAJA-RAJA 14 - Angguruk Yali bible

1 RAJA-RAJA 14

¹Ari tibag li ap suwon Yerobeam amloho Abia ouk ubam atfag.

²Ouk ubam atfagma Yerobeam inowen uhe fam ele uruk lit, ”Aben hat fahet hiyap winon pukag ulug sum amuwon wan timihinteg Allah amingmingangge nabi Ahia ambeg lamihin. An ap suwon uwan lahuk fugmu Ahia inowen hat Israel inap onowe suwon in aruhun ulug fulu roho hiyag nitisi.

³At ambeg laruk lit roti numen men kin altap kubag misig men kin altap hag angge kue men walug lamihinmu aren nenemloho ubam teko lahu ane hiyag hitmisi,” ulug hiyag itfag.

⁴Hiyag itfagma Yerobeam uhe o Silo libareg hun Ahia ibam kibag. Kibagma Ahia sabal atfareg il siyahen tu at waha ulug yet ha fug teg latfag.

⁵Ari regma hiyap ino ambeg wam fugmu NINIKNI Allahn Ahia fam ele uruk lit, ”Yerobeam uhe ino namloho ouk warukon ubam teko lahu ane hiyag numag ulug hambeg watmisi. Watmisimu ari-ari hiyag itmihin,” ulug hiyag itfag. Hiyag itfag ane ari hikit toho hiyap ino ambeg watfareg hiyap winon pukag ulug sum amuwon wan teg lit Ahia ibam kibag.

⁶Ibam kuruk lit uyug aplohok turukmu hol hibareg Ahia inowen ele uruk lit, ”Nehe, Yerobeam uhe welahenon kik ma! Nungge fahet hiyap winon pukag ulug nambeg wahen? Anden hat fahet wene siyahon eke foroho lahi.

⁷Nin suhuloho hibam lamihinteg Yerobeam hiyag itmihinon tu: Israel inap INIKNI Allahn ele urukon tu holeg lamin: Anden hat Israel inap enesehelimuwen mumal haptikikteg An numalikisi Israel inap onowe suwon aruhun ulug palimuwap haptikik.

⁸Palimuwap haptuk lit Dauren ondohowonen ondohowon ap suwon wereg lit yabuk seneg latuson ininggikmuwen taluk toho hat og hitikik angge famen namingmingangge Daud inowen Anden ari-ari turuk lamuhup ulug imbiyahon obog toho seneg lit indi handuhal teg eleg angge An nombolim laruk lit Anden fano peruk lahiyon eneg turuk latfag hag toho haren turuk lahen fug.

⁹Hat uwanma ap suwon obog tohowen siyag ane we tor angge turuk latfagma haren eneg mondabi holok ane turuk latikin. Haren tu Allah hag toho wereg ulug wel eneptuk angge eke hag eke hag wit taruk lit ine angge fam usangge lale feruk latikinon ariyen An hambol yig nutuk lit nindi siyahap naptikin.

¹⁰Siyahap naptikinmu Anden hat humalikisi men alem angginon hunubam umbuhuk. Hat humalikisiyen endebuhubon ap angge enebe suwonet toronet obog toho Anden elehap enebuhuk. Yog sumako hik isaruk hag toho Anden it obog toho hik isahukmu misig oho welaruhu fug.

¹¹Ap sa-o pumbukmuwen war aruhu halug meneyen nahup. Ap sa anggenman war aruhu halug suwe pohol ke larukonen nahup. Ari obog toho NINIKNI Allahn ele urukon hikit toho teko lahu.

¹²Ketiya hat hibam lamihin. Lamihinteg o pumbukmu kirikim itano hat hamloho war atmisi.

¹³War atmisimu Israel inap obog tohowen fong watuk lit at kinangma saluhup. Israel ninap NINIKNI Allahn Yerobeam umalikisi men kim isarukmen we malik ari ubabut eneg fano regma kim harisi angge re malik ari eneg kinangma saluhup, umalikisi winon war amuhupmu kinangma sal enebuhup fug.

¹⁴NINIKNI Allahn Israel inap onowe welaruhu ulug ap eke mumal tahuwon inowen Yerobeam umalikisiyen endebuhubon obog toho elehap enebuhu. Obog toho elehap enebuhuk peruk ane o yoho inam aha!

¹⁵NINIKNI Allahn Israel inap unusil larukmen eneg hame mulilik la mulilik wam turukon hag toho in am fug teg lamuhup. Iren Allah hiyap angge hag toho wereg ulug wirimangge unuk Asyera wiroho unduhuk feruk lit NINIKNI Allah indi siyahap turusama Aren Israel inap arimano kinang fanowon unumbasi og isibahon famen heneko hik isahumu ik Efrat pisan toho pilili-palala ruruk lamuhup.

¹⁶Ap suwon Yerobeam inowen siyag ane til-wil larukmu Israel inap at ombolim laruk lit siyag ane turuk latusama Allahn it obog toho siyag amag ulug inggik kobog isahu,” ibag.

¹⁷Ari ibagma Yerobeam uhe ino ibam o Tirza libag. Libareg ibam sok kembilikmu uyug soptukmu itano amloho war atfag.

¹⁸War atfagma malik ino kinangma salfareg Israel inap obog tohowen at fahet fong watuk latfag. Ari obog toho NINIKNI Allahn amingmingangge nabi Ahia feneyen ibag ane hikit toho teko libag.

¹⁹Yerobeam oluk wereg lit turuk latfag ane tuma tor angge haharoho emberuk lahe. At ap suwon wereg lit ap seliyon men tog aptuk latfag ane obog toho suwesingga Israel inap onowesi suwonen turuk latfag ane fahet haharehon fam paloho imbibag.

²⁰Yerobeam ino Israel inap onowe suwon weregman eneg mo ilig am wirig am turukmu falfalik fimahen 22 atfagma war atfag. War atfagma amloho Nadab ikni ubalma ap suwon lahibag.

²¹Salomo amloho Rehabeam indag tibag sali mo ilig am wirig am turukmu teng misigmen nubam hilag nunggul huriken 41 atfagma Yehuda inap onowe suwon lahibag. Lahibareg o Yerusalem NINIKNI Allahn nunuk wel naptuk ambeg ulug Israel inap ununggul unuk obog toho enesehelimuwen eneko mumal tibag ambeg wereg lit umalikisi fet enesugmen eneg mo nanggolop fimahen 17 atfag. Rehabeam isinga o Amon hiyap unuk Naama welatfag.

²²Rehabeam ino ap suwon weregma Yehuda inap arimanowen NINIKNI Allahn siyag perukon eneg turuk lit ele ying turuk latfag. It unumbasiyen siyag ane we tor angge turuk latfag angge famen iren onolok ane su roho turuk latfag.

²³Israel inaben turuk latfag hag toho iren oho punumuwen oho e usa ahen alman oho usa ahalep men usa ahen uwag men hutuk tebelug hubu lahaptuk ambeg wituk latfag.

²⁴Ari roho turuk lit Allah hag toho wereg perukon ununuk fam yaying turuk inabet yaying turuk hiyabet Israel kinangma wereg latfag. Weregma ap o Kanaan kinangma welatfahon NINIKNI Allahn Israel inap onolohotman yanggal enepfahon arimanowen turuk latfag hag toho Israel inaben oho ap enehummu siyahap eneptuk ane eneg turuk latfag.

²⁵Rehabeam ino ap suwon weregman eneg mo fuwaben libagma Mesir inap onowe suwon Sisak ino o Yerusalem inap men tog abul ulug watfag.

²⁶Watfareg Allah ibam men ap suwon ibam men fano-fano angge foroho latfahon obog toho huhulangge hilaruk lit tog piyabangge hun Salomoen emas umbagpag turukon fam witfahon oho hilalug libag.

²⁷Tog piyabangge hilibahon ubalma ap suwon Rehabeam inowen tembaga ineyon fam tog piyabangge keron witfag. Witfareg tog piyabangge aruma foroho lamuhup ulug ap suwon ibam sok foroho inap og isibag.

²⁸Og isibareg Rehabeam ino hundig-hundig NINIKNI Allah ibam kurukmu ap suwon ibam sok foroho inap at hondoholug larukonen tog piyabangge arimano oko walug senegman eneg ap suwon Allah ibamen wilip atug larukmu sok foroho inaben tog piyabangge arimano nin hebeloho hili it wit isibag ambeg imbik laruk latfag.

²⁹Rehabeam oluk wereg lit turuk latfag ane tuma tor angge haharoho emberuk lahe. At ap suwon wereg lit turuk latfag ane obog toho suwesingga Yehuda inap onowesi suwonen turuk latfag ane fahet haharehon fam paloho imbibag.

³⁰Rehabeam ino ap suwon lahibag sambilen tulug war atfag sambil fam Israel inap onowe suwon Yerobeam men tog aptukmen eneg welatfag.

³¹Welatfareg war atfagma Rehabeam ino umbasi o pumbuk unuk Daud suwalfahon fam sal eneptuk latfag ambeg ar oho salfag. Salfagma amloho Abiam ikni ubalma ap suwon lahibag.