Read Angguruk Yali 1 RAJA-RAJA 15 Bible Online

1 RAJA-RAJA 15 - Angguruk Yali bible

1 RAJA-RAJA 15

¹Ap suwon Yerobeam hun Nebat amloho inowen Israel inap fet enesugmen eneg mo ilig am wirig am turukmu num fimahen 18 atfagma hun Abiam ino Yehuda inap onowe suwon lahibag.

²Lahibareg o Yerusalem wereg lit Yehuda inap fet enesugmen eneg mo hinahan libag. At isinga hun Abisalom ahaloho unuk Maakha welatfag.

³Umba Dauren indi piren teg eleg angge NINIKNI Allah fam wenggel haruk latfag hag toho Abiam inowen Ikni Allah fam wenggel ha fug angge ikni Rehabeam inowen siyag ane eneg turuk latfag ane hikit toho aren oho siyag ane eneg turuk latfag.

⁴Ari roho turuk latfag angge famen NINIKNI Allah Dauren wel turuk latfahon inowen Daud umbusag Abiam ino umbusuk fug angge amloho at ubalma ap suwon in aruhuwon eke og uruhuk pibag ane hikit toho Abiam inowen amloho eke indag tibag. Indag tibagma o pumbuk Yerusalem siyag aruhu rohon ulug Allahn foroho latfag.

⁵Abiam umba Daud ino oluk wereg lit misihim eneg Het ahun Uria fam Allahn siyag perukon tibag, winasul NINIKNI Allahn hiyag utuk latfahon pisan tuk fug angge Aren fano perukon eneg turuk latfag. At ubabut fano rehen NINIKNI Allahn indi reg lit at umbusag Abiam fahet oho indi reg latfag.

⁶Ikni Rehabeam inowen Yerobeam men tog aptukmen eneg welatfag hag toho amloho Abiam inowen oho Yerobeam men tog aptuk latfag.

⁷Abiam oluk wereg lit turuk latfag ane tuma tor angge haharoho emberuk lahe. At ap suwon wereg lit turuk latfag ane obog toho suwesingga Yehuda inap onowesi suwonen turuk latfag ane fahet haharehon fam paloho imbibag.

⁸Welatfareg war atfagma Abiam ino umbasi o pumbuk unuk Daud suwalfahon fam sal eneptuk latfag ambeg ar oho salfag. Salfagma amloho Asa ikni ubalma ap suwon lahibag.

⁹Ap suwon Yerobeam inowen Israel inap fet enesugmen eneg mo ilig am wirig am turukmu likin fimahen 20 atfagma hun Asa ino Yehuda inap onowe suwon lahibag.

¹⁰Lahibareg o Yerusalem wereg lit Yehuda inap fet enesugmen eneg mo teng misigmen nubam hilag nunggul huriken 41 libag. At ambiyanga hun Abisalom ahaloho unuk Maakha welatfag.

¹¹Umba Dauren turuk latfag ane hikit toho Asa inowen oho NINIKNI Allahn fano peruk ane eneg turuk latfag.

¹²Ari roho turuk lit Allah hag toho wereg perukon ununuk fam abet hiyabet yaying turukon arimano Asa inowen Israel kinangman yanggal eneptuk lit umbasiyen tu Allah hag toho wereg ulug laltuk latfag angge obog toho siyahap tibisil libag.

¹³Siyahap tibisil laruk lit ambiyanga Maakha inowen e uwag Allah hiyap angge hag toho wereg perukon unuk Asyera fahet hutuk tibibahon ino heneko walug ik Kidron ayegma indok yale fisik libag. Yale fisik libareg ambiyanga Maakha ino fam hiyag utuk lit, ”Haren usangge ap ininggaliyap eneptukon ari hutuk teberikinmu hiyap suwon welaruhun fug,” ulug pilapfag.

¹⁴Asa ap suwon oluk wereg li Israel inaben usangge fahet punumu kema-kema hubu lahaptukmen eneg welatfag angge famen inikni Asa ino indi piren teg eleg lit NINIKNI Allah fam wenggel haruk latfag.

¹⁵Allah fam wenggel haruk lit ikniyen Allah fahet imbibahon perak men emas men Allah wel turuk lit wan teg angge winon men Allah ibam fano-fano angge foroho ambeg imbik kibareg at inggarehen oho Allah fahet perak men emas men imbik kibag.

¹⁶Yehuda inap onowe suwon Asa oluk welatfag li Israel inap onowe suwon Baesa men tog aptukmen eneg welatfag.

¹⁷Weregma Baesa inowen Yehuda inap apmayap enebuhuk ulug ik ambut fil libareg Yehuda kinangman kuk wilip am turukon sap enesug ambeg ulug o Rama pumbuk walinggoho elehet waruk latfag.

¹⁸Waruk latfag ane fahet hol hibareg Yehuda inap onowe Asa inowen fano-fano angge emas perak Allah ibam men at ibam men foroho latfahon huhulangge hilaruk lit imbisibahon arimano obog toho wibareg o Siria inap onowe suwon Benhadad hun Hezion umbusag, Tabrimon amloho og irik lalihip ulug otsi mon enepfagma o Damsyik walug libag.

¹⁹Walug libareg Asa otsiyen Benhadad hiyag utuk lit, ”Ninikni Asa inowen irisiyon tu holeg lamin: Hat hikni men an nikni menen mangno roho welamuhuk ulug sali imbibag hag toho an men hat men oho nininggik ahandip toho welamuhuken sali umbul. Sali umbulen fano-fano angge emas perak notsiyen walug wahason aruma og hutuk lahi. Og hitminmu haren Israel inap onowe Baesa men mangno roho welamuhuk irikin ane apmayap tuhunmu Baesa ino holuhureg ine eleg atuk lit an men tog abuhuk peruk ane embeselug suhuloho ibam lahu irisi,” ulug hiyag itfag.

²⁰Hiyag itfagma Benhadad inowen fano pibareg otsi sehen senehon onowesi unubam o pumbuk Israel kinangma werehon men tog abik lalihip ulug hiyag isibagma libareg o Iyon, Dan, Abel-Bet-Maakha, Kinerot men o pumbuk kinang Naftali fam werehon obog toho halog tibisil libag.

²¹Halog tibisil libag ane fahet hol hibareg Baesa inowen o Rama walinggoho elehet waruk ane embeselug ibam o Tirza libareg welatfag.

²²Weregma ap suwon Asa inowen umalikisi Yehuda inap obog toho hiyag isaruk lit e helep hun Baesa inowen o Rama walinggoho elehet wahuk ulug emberisiyon arimano wak lalihiben ap misig oho ibam pok atmisi fug ulug hiyag isibag ane hikit toho e helep hun Baesa inowen imbibahon wak libareg walug watfag. E helep walug watfahon arimano hun Asa inowen wibareg Benyamin kinangma o pumbuk Geba men Mizpa men werehon walinggoho elehet wak libag.

²³Ap suwon Asa oluk wereg lit turuk latfag ane tuma tor angge haharoho emberuk lahe. Aren yabuk seneg lit ine roho turuk latfag ane men o pumbuk anggolo wiri feruk latfag ane suwesingga Yehuda inap onowesi suwonen turuk latfag ane fahet haharehon fam paloho imbibag. Hun Asa sabal atfareg at uyug piren siyag atfag.

²⁴Welatfareg war atfagma Asa ino umbasi o pumbuk unuk Daud suwalfahon fam sal eneptuk latfag ambeg ar oho salfag. Salfagma amloho Yosafat ikni ubalma ap suwon lahibag.

²⁵Ap suwon Asa inowen Yehuda inap fet enesugmen eneg mo ilig am wirig am turukmu piren atfagma hun Yerobeam amloho Nadab ino Israel inap onowe suwon lahibag.

²⁶Ikni Yerobeamen siyag ane eneg til-wil laruk latfag hag toho amlohowen oho siyag ane eneg turukmu at umalikisi Israel inap at ombolim laruk lit siyag ane eneg turuk latfag.

²⁷Ari turukmu unggul unuk Isakhar ahun Ahia amloho Baesa inowen Nadab ubalma ap suwon aruhuken ware fusuhuk pibareg Nadab umalikisi Israel inap obog toho menen Filistin inap inibam pumbuk Gibeton ilmig tahuk ulug waling enesug lit weregma libareg ap suwon Nadab ino pinggi ware fisibag.

²⁸Hun Asa inowen Yehuda inap fet enesugmen eneg mo ilig am wirig am turukmu hinahan atfagma Baesa inowen Nadab ware fisibareg at ubalma Israel inap onowe suwon lahibag.

²⁹Ap suwon lahibareg Yerobeamen ondohowonen ondohowon obog toho unusibagma NINIKNI Allahn amingmingangge Ahia o Silo ahun ino feneyen ibag ane hikit toho Yerobeamen ondohowonen ondohowon ap misig oho oluk welatfag fug.

³⁰Indam Yerobeam inowen siyag ane eneg turukmu umalikisi Israel inap at ombolim laruk lit siyag ane eneg turuk latfag ane fahet Israel inap INIKNI Allah indi siyag atfareg Yerobeamen ondohowonen ondohowon elehap enebuhuk pibag ane hikit toho hun Baesa inowen it obog toho unusibag.

³¹Ap suwon Nadab oluk wereg lit turuk latfag ane tuma tor angge haharoho emberuk lahe. At ap suwon wereg lit turuk latfag ane obog toho suwesingga Israel inap onowesi suwonen turuk latfag ane fahet haharehon fam paloho imbibag.

³²Israel inap onowe Baesa oluk welatfag li Yehuda inap onowe Asa men tog aptukmen eneg welatfag.

³³Ap suwon Asa inowen Yehuda inap fet enesugmen eneg mo ilig am wirig am turukmu hinahan atfagma hun Ahia amloho Baesa ino Israel inap onowe suwon lahibag. Lahibareg o Tirza wereg lit Israel inap fet enesugmen eneg mo uhaneg fimahen 24 libag.

³⁴Indam ap suwon Yerobeam inowen siyag ane eneg turukmu umalikisi Israel inap at ombolim laruk lit siyag ane eneg turuk latfag hag toho Baesa inowen oho NINIKNI Allahn siyag perukon eneg turuk latfag.