Read Angguruk Yali 1 RAJA-RAJA 16 Bible Online

1 RAJA-RAJA 16 - Angguruk Yali bible

1 RAJA-RAJA 16

¹Ari turukmu NINIKNI Allahn hun Hanani amloho Yehu fam ele uruk lit, ”Hun Baesa ambeg lamihinteg hiyag itmihinon tu:

²Allah ele urukon iminon tu holeg lamin: Anden hat hilaheg toho wereg lit ulmu heriyeg latikin ambehen hinggik lisoho in haptuk lit Israel inap onowe suwon welaruhun ulug lahap haptikik angge famen Yerobeam ino un ke laruk latfag ane hikit toho har oho ke hareyon larukmu humalikisi Israel inap hat hombolim laruk lit An nele ying naptuk lahep.

³Ari fahet Anden ap suwon Yerobeam umalikisi men unubam tirikik hag toho Anden hat humalikisi menen endebuhubon arimano oho mondabi elehap enebuhuk.

⁴Ap sa-o pumbukmuwen war aruhu halug meneyen nahup. Ap sa anggenman war aruhu halug suwe pohol ke larukonen nahup ehek,” ulug hiyag itfag.

⁵Hun Baesan turuk latfag ane tuma tor angge haharoho emberuk lahe. At ap suwon wereg lit ahako roho turuk latfag ane obog toho suwesingga Israel inap onowesi suwonen turuk latfag ane fahet haharehon fam paloho imbibag.

⁶Welatfareg war atfagma Baesa ino o Tirza kinangma salfag. Salfagma amloho Ela ikni ubalma ap suwon lahibag.

⁷Baesa ino oluk welatfag li indimuwen NINIKNI Allahn siyag perukon eneg wenggel haruk lit inggik fam oho olok ane eneg turuk latfag. Aren olok ane eneg turuk latfahon men Yerobeamen ondohowonen ondohowon obog toho unusibag ane men fahet NINIKNI Allah undama ahe lahibagma amingmingangge nabi Yehu hun Hanani amloho ino feneyen Baesa hiyag utuk lit, ”Yerobeam umalikisi men siyag atusa hag toho hat humalikisi men oho siyag amuhup,” ulug hiyag itfag.

⁸Ap suwon Asa inowen Yehuda inap fet enesugmen eneg mo ilig am wirig am turukmu pireneg fimahen 26 atfagma hun Baesa amloho Ela ino Israel inap onowe suwon lahibag. Lahibareg o Tirza wereg lit Israel inap fet enesugmen eneg mo piren libag.

⁹Mo piren libagma otsi sehen senehon kereta wam kudan lisoho walug laruk angge fam larukon minggiroho winon milal eneptukon Zimri inowen nikni Ela ubalma ap suwon aruhuk peruk latfag. Ari perukmu Ela ino o Tirza ap suwon ibam haltuk ahun unuk Arza men ambiyeg wereg lit ik olokon nalug nenek turuk hag toho turukmen

¹⁰Zimri ambeg watfareg pinggi ware fisibag. Ware fisibareg hun Asa Yehuda inap onowe in atfag sali mo ilig am wirig am turukmen teng misig atfagma Zimri ino Ela ubalma Israel inap onowe suwon in atfag.

¹¹Ap suwon in atfareg Baesa inowen ondohowonen ondohowon ap angge men onori unumbali obog toho men unusibagma ap misig oho oluk welatfag fug.

¹²Ari roho turuk lit NINIKNI Allahn amingmingangge nabi Yehu feneyen hun Baesa hiyag itfag ane hikit toho aren ondohowonen ondohowon Zimri inowen mondabi elehap enepfag.

¹³Baesa amloho Ela menen siyag ane eneg turukmu unumalikisi Israel inap oho it onombolim laruk lit usangge wel turuk latfag ane ino fahet INIKNI Allah indi siyag atfagma Baesa umalikisi men siyahap enebuhuk pibag ane ari o ino sambil hikir atfag.

¹⁴Ap suwon Ela oluk wereg lit turuk latfag ane tuma tor angge haharoho emberuk lahe. Aren yabuk seneg lit turuk latfag ane obog toho suwesingga Israel inap onowesi suwonen turuk latfag ane fahet haharehon fam paloho imbibag.

¹⁵Ap suwon Asa inowen Yehuda inap fet enesugmen eneg mo ilig am wirig am turukmu teng misig atfagma hun Zimri ino Israel inap onowe suwon lahibag. Lahibareg o Tirza wereg lit Israel inap hup sabirenam eneg fet enesug latfag. O itano li Israel inap sehen senehon arimano nin eke Filistin kinangma libareg o sabo wiroho wereg lit Gibeton ilmig tahuk ulug waling enesug latfag.

¹⁶Waling enesug lit hol harukmen hun Zimri inowen Ela ubalma ap suwon aruhuk ulug Ela ino ware feserisi urukmu hol hibareg Israel inap o saboma luhaloho welatfahon obog tohowen siyag pibag. Siyag pibareg o ino sambil eneg it sehen senehon onowe Omri Israel ninap nonowe suwon welaruhun ulug lahapfag.

¹⁷Lahapfagma Omri men Israel inap sehen senehon obog toho men o Gibeton embeselug libareg o Tirza waling enebik libag.

¹⁸Libareg o ino pin kul ulug turukmu hun Zimri inowen yet isibareg ap suwon ibam lalug hili undamon fam kibareg o ino harep pisako inggareg wat tibag.

¹⁹Ap suwon Yerobeam ino un ke laruk latfag hag toho hun Zimri oho ke hareyon laruk lit NINIKNI Allahn siyag peruk ane eneg turukmu Israel inap oho at ombolim laruk lit siyag ane eneg turuk latfag ane ari fahet Zimri ino war atfag.

²⁰Hun Zimri oluk wereg lit turuk latfag ane tuma tor angge haharoho emberuk lahe. Aren ap suwon aruhuk ulug turuk latfag ane men alem winon aren turuk latfahon men suwesingga Israel inap onowesi suwonen turuk latfag ane fahet haharehon fam paloho imbibag.

²¹Ari obog toho teko libagma Israel inap arimano pul ke minggir atfareg winon hun Omri ibil atukmu winon hun Ginat amloho Tibni ibil atfagma at ino ap suwon raja welaruhu pibag.

²²Ari pibag angge famen hun Omri ibil atfahon arimanowen hun Tibni ombolim laruk latfahon apmayap eneptukmu Tibni ino war atfag. War atfagma hun Omri Israel inap obog toho onowe raja lahibag.

²³Ap suwon Asa inowen Yehuda inap fet enesugmen eneg mo ilig am wirig am turukmu teng misigmen nubam hilag uhan 31 atfagma hun Omri ino Israel inap onowe suwon lahibag. Lahibareg ap suwon weregman eneg mo ilig am wirig am turukmu nisanggowen atfag. Ap suwon lahibag sambilen tulug o Tirza weregman eneg mo falfaliken libag.

²⁴Libagma Omri inowen tom Samaria an aruhuk ulug ngi ahun Semer fam onggo anggolo 6.000 perak palfareg tom Samaria ino fam o pumbuk eke witfareg tom ngi ahun Semer hikit toho unuk Samaria suwalfag.

²⁵Omri uwanma ap suwon welatfahon obog tohowen siyag ane tor angge turuk latfag angge famen Omri inowen eneg NINIKNI Allahn siyag perukon su roho turuk latfag.

²⁶Ap suwon Yerobeam un ke laruk latfag hag toho hun Omri oho ke hareyon laruk lit siyag ane eneg turukmu Israel inap oho at ombolim laruk lit usangge wel turuk latfag ane ino fahet Israel inap INIKNI Allah indi siyag atfag.

²⁷Ap suwon Omri oluk wereg lit turuk latfag ane tuma tor angge haharoho emberuk lahe. Aren yabuk seneg lit ahako roho turuk latfag ane obog toho suwesingga Israel inap onowesi suwonen turuk latfag ane fahet haharehon fam paloho imbibag.

²⁸Welatfareg war atfagma Omri ino o Samaria kinangma salfag. Salfagma amloho Ahab ikni ubalma ap suwon lahibag.

²⁹Hun Asa inowen Yehuda inap fet enesugmen eneg mo teng misig nubam hilag nanggoloben 38 atfagma hun Omri amloho Ahab ino Israel inap fet enesug laruhun ulug ap suwon lahapfag. Lahapfagma Ahab ino o Samaria wereg lit Israel inap fet enesugmen eneg mo falfalik fuman 22 atfag.

³⁰Ap suwon tam welatfahon arimanowen Allah olohotma siyag ane turuk latfahon tot apma regma aren siyag ane turuk latfahon eneg mondabi palimu reg latfag.

³¹Hun Yerobeam inowen siyag-siyag ane turuk latfahon fahet indimu hayen pibareg Ahab inowen nin sebe roho siyag ane turuk lit o Sidon inap onowe Etbaal ahaloho Izebel ino hilibareg hiyap inowen Allah hag toho wereg peruk latfahon Baal ino aren oho wel turuk latfag.

³²Ari roho turuk lit Baal fam sembahyang uruk ibam o Samaria witfareg wam waroho hubu lahaptuk ambeg o ino undama wiri fibag.

³³Wiri fibareg Allah hiyap angge hag toho wereg ulug wirimangge unuk Asyera wiroho unduhuk fibag. Ari roho eneg turuk lit Israel inap onowesi tam welatfahon arimanowen siyag ane turuk latfahon apma regma hun Ahab inowen siyag ane hum toho turuk ane fahet Israel inap INIKNI Allah indi siyag atuk latfag.

³⁴Ahab ino ap suwon weregma o Betel ahun Hiel inowen o pumbuk Yerikho pin halog toho unusibag ambeg ino nin suhuloho wiri fibag. NINIKNI Allahn hun Nun amloho Yosua feneyen sali imbibag ane hikit toho hun Hielen o olun wibag sambil ino amloho wandabon unuk Abiram war atfagma o walinggoho elehet wibahon sok witfag sambil ino amloho ilabowon unuk Segub war atfag.