Read Angguruk Yali 1 RAJA-RAJA 17 Bible Online

1 RAJA-RAJA 17 - Angguruk Yali bible

1 RAJA-RAJA 17

¹O misihim sambil o Tisbe kinang Gilead fam welatfag ahun Elia inowen ap suwon Ahab fam ele uruk lit, ”Israel ninap NINIKNI Allah an amingminganggeyap naptisiyon oluk werehon olohotman we tik-tem toho hiyag hitminon tu: Mo piren hinahan ketiya welamuhukon ariya fam osit men hibilil men eleg angge weregman eneg anden heng uhuk sambil eneg osit pilabik waruhu,” ulug hiyag itfag.

²Ari ulug hiyag itfagma NINIKNI Allahn Elia fam ele uruk lit,

³”O aru embeselug yali fil lamihinteg ik Yordan paloho ik toron unuk Kerit ayegma hirag arik lamihin.

⁴Lamihinteg wereg lit hat ik Kerit naruk lit welaruhunmu Anden suwe pibalu hiyag isahukmu suburu naruk laruhunon og hirik waharuk lamuhup,” ulug hiyag itfag.

⁵Allahn hiyag itfag ane hikit toho Elia ino libareg ik Yordan paloho ik Kerit ayegma libareg welatfag.

⁶Weregma likiyat hupmuwet suwe pibalu itanowen suburu men wam unu men Elia ambeg walug waharukmu ik Kerit naruk lit welatfag.

⁷Tot welatfareg kinang ino fam osit pilabik watfag fugmu ik Kerit ino firig atfag.

⁸Ik Kerit ino firig atfagma NINIKNI Allahn Elia fam ele uruk lit,

⁹”Wilip atmihinteg o Sidon horogma o Sarfat lamihinteg welaruhun. Hiyap yuwohon o Sarfat werehon eke fam, ’Elia waruhumu suburu isag utuk laruhun,’ ulug hiyag itikik,” ulug hiyag itfag.

¹⁰Hiyag itfagma Elia ino o Sarfat libag. Libareg o Sarfat walinggoho elehet ohowon sok horogma laruk lit yet harukmen hiyap yuwohon eke e yaltukon witukmu yet hibag. Yet hibareg hiyap ino fam ele uruk lit, ”An ik oboken kubag fam ik tot hinanggoho og nirik ma,” ulug heng tibag.

¹¹Heng tibagma hiyap ino ik hinanggik larukmen Elia inowen nin eke, ”Suburu oho tot kuroho og nirik watmihin,” ulug heng tibag.

¹²Heng tibagma hiyap inowen te, ”HIKNI Allah oluk werehon inowen holeg lit weregma tu hiyag hitmin: We tik-tem toho suburu nibam mondabi eleg, suburu atog eneg sum onggorikmu wereg,[10] wam ahaluwe we tor angge kubag onggorikmu wereg. Ketiya e yaltukon uwag piren hinahan wituk lahiyon ariya walug nibam laminteg suburu tor angge werehon ita esetminon an namloho men nulteg war amul,” ulug hiyag itfag.

¹³Hiyag itfagma Elian hebeloho hiyag utuk lit, ”Hat hakol fug, hibam lamihinteg haren ehen ane hikit toho timihin angge famen an fahet tam suburu tor angge werehon ita kuroho isag nitmihinteg og nirik watmihin. Og nirik watmihinteg eneg hinggareg men hamloho men fahet fobik isag talihip.

¹⁴Israel ninap NINIKNI Allah ele urukon tu, ’Suburu sum fam werehon itano obog toho eleg aruhu fug, wam ahaluwe kubag fam werehon ita oho eleg aruhu fug. Werehon ita weregman eneg An HINIKNI Allahn osit kinangma pilabik waruhuk,’ ehek,” ulug hiyag itfag.

¹⁵Ari ulug hiyag itfagma hiyap ino libareg Elian ibag ane hikit toho tibag. Ari tibareg weregma hiyap ino amloho men Elia men fahet naruk angge eleg am fug angge welatfag.

¹⁶NINIKNI Allah ele hun Elia feneyen hiyag itfag ane hikit toho suburu sum fam welatfahon men wam ahaluwe kubag elma werehon men eleg atfag fug.

¹⁷Ari tibareg weregman hiyap ino amloho ino ouk angginon ubam atfareg sat eleg atfag.

¹⁸Sat eleg atfagma hiyap inowen Elia fam ele uruk lit, ”Hat Allah amingmingangge welahenon, nungge fahet an nambeg waharikin? Anden siyag ane tirikikon inam amag ulug nibam waharikin? Alem ari famen namloho war aha,” ulug pet tibag.

¹⁹Pet tibagma Elia inowen, ”Hamloho aru an og nimin,” ibareg malik ino wareg angge isinga ahoma walinggigmu lisoho wibareg at nohoruk ambeg hinawi walug lahibareg heniyema yinggi fibag.

²⁰Yinggi fibareg Allah fam ele ine roho uruk lit, ”NIKNI Allah, hiyap yuwohon aruwen an pohon waharukmu hondog naptisi angge re nungge fahet alem siyahon tu at ubam embehenma amloho war aha?” ibag.

²¹Ibareg Elia ino malik warehon ino palimu hinahanam ying atuk lit Allah fam ele ine roho, ”NIKNI Allah, malik war ahayon tu ahime suhuloho monde fik watmihin,” ulug heng tibag.

²²Elia inowen heng tibag ane ino NINIKNI Allahn hol hibareg malik ino ahime hebeloho monde fik watfagma malik ino nin oluk atfag.

²³Oluk atfagma Elia inowen malik ino walug hinawiyen wambibareg isinga og utuk lit, ”Hamloho oluk ahayon tu yet himin,” ulug og itfag.

²⁴Og itfagma hiyap inowen Elia fam ele uruk lit, ”Hat Allah amingmingangge wereg lit we tem toho NINIKNI Allahn hat feneyen ele uruk ulug ketiya an noluk aha,” ibag.