Read Angguruk Yali 1 RAJA-RAJA 18 Bible Online

1 RAJA-RAJA 18 - Angguruk Yali bible

1 RAJA-RAJA 18

¹O hibi humon weregman eneg mo piren libagma NINIKNI Allahn Elia fam ele uruk lit, ”Anden osit kinangma pilabik waruhuken ap suwon Ahab ambeg lamihin,” ulug hiyag itfag.

²Hiyag itfagma Elia ino Ahab ambeg lamin ulug libag. Libag li itano o Samaria hibi inowen suburu obok humon lahibag.

³Lahibagma Ahab inowen at ibam foroho ahun Obaja ino wol tibag. Obaja ino NINIKNI Allah fahet tik-tem toho akol toho wenggel haruk latfag.

⁴Ari roho wenggel haruk lit weregma hiyap Izebel inowen Allah amingmingangge nabi obog toho unusurukmu Obaja inowen nabi teng uhan ili og eneptuk lit teng piren owik eke elma hirag eneptuk lit teng piren owik eke elma hirag enepfareg likiya hupmu suburu men ik men og isa laruk latfag.

⁵Hun Ahab inowen Obaja ino wol tibareg at ubam ele uruk lit, ”Nenembohom kuda men keledai men naruk angge elehen winon unusuhuk tohon tahe seiyon ik eleruk ke men ik ayeg ke men walinggoho yami rik lul,” ulug hiyag itfag.[11]

⁶Hiyag itfareg hat ke ari lamihin, an ke tu lamin ibareg Ahab men Obaja men itano ke enemu-enemu libag.

⁷Obaja ino kebunggalma larukmen hun Elia men salkal ibag. Salkal ibareg Obaja inowen tu Elia waharuk pibareg elenggen fam hur atfareg, ”Hat nikni Elia ano?” ulug kapal hibag.

⁸Kapal hibagma Elia inowen te, ”Nare, we tem! Lamihinteg hat hikni Ahab fam, ’Hun Elia waha,’ ulug hiyag irik lamihin,” ulug hiyag itfag.

⁹Hiyag itfagma Obaja inowen hiyag utuk lit, ”Siyag ane nungge anden tirikikmu an hat hamingmingangge aru Ahab inowen nuwabukag ulug an nebe at inggikmu numbahamihin?

¹⁰HIKNI Allah oluk werehon inowen holeg lit weregma we tik-tem toho hiyag hitminon tu: Nikni Ahab inowen hat yami habukag ulug o pumbuk munon-manon fam otsi mon eneptisi. Mon eneptisimu larusareg yami haptukmen aben Elia ino tuma wereg eleg uruk latusa halug Ahab inowen it onowesi suwon fam, ’We tik-tem toho neneyeg fam ehe ilihip,’ ulug hiyag isaruk latisi.

¹¹Ketiya haren te, ’Elia waha ulug hikni hiyag irik lamihin,’ ehenma nangginoho hiyag irik lamin?

¹²An hat humbahalug laminmu NINIKNI Allah ahime inowen an napeleg ambeg hondoko humbahik lamisi ano. Lamisimu an nikni Ahab ambeg laminteg Elia ino waha ulug hiyag itminmu aren yami hapmisi angge famen hat hiyag hapmisi fug halug an nebe totman angge NINIKNI Allah fahet nakol toho welahiyon aru nuwatmisi lit teg.

¹³Hiyap Izebel inowen NINIKNI Allah amingmingangge nabi arimano obog toho unusurukmu anden nabi teng uhan ili og eneptuk lit teng piren owik eke elma hirag eneptuk lit teng piren owik eke fam hirag eneptikikteg likiya hupmu suburu men ik men og isa laruk latikik ane aben hiyag hutusa fug ano?

¹⁴Ketiya haren nungge fahet Elia ino waha ulug hikni hiyag irik lamihin ehen? Aren we tem toho nuwatmisi,” ulug hiyag itfag.

¹⁵Ari ulug hiyag itfagma Elia inowen, ”NINIKNI Allah pohol kinang senehon an amingminganggeyap naptisiyon oluk werehon ino olohotma anden we tik-tem toho tu hiyag hitmin: O yoho aru an Ahab ambeg lamin,” ulug hiyag itfag.

¹⁶Hiyag itfagma Obaja ino ap suwon Ahab ambeg libareg Elia ino waha ulug hiyag itfag. Hiyag itfagma Ahab ino Elia ambeg libag.

¹⁷Libareg Ahab inowen hun Elia yet hibareg at ubam ele uruk lit, ”Israel ninap siyahap neneptuk lahen hahun ino wahen?” ibagma

¹⁸Elia inowen hebeloho hiyag utuk lit, ”An fug, hat tu men hinibam werehon menen NINIKNI Allah ele sobir isaruk lit aben wel eneptuk angge Baal onombolim laruk lit Israel inap siyahap eneptuk lahep.

¹⁹Ari fahet ketiya Israel inap obog toho tom Karmel fam palu arik wamuhuben hiyag isahun. Baal amingmingangge nabi teng nanggolop fiman 450 werehon men Allah hiyap angge hag toho wereg peruk lahebon Asyera amingmingangge huhe Izebel inowen naruk angge og isarukon arimano teng nuwal fiman 400 werehon men wamuhup,” ulug hiyag itfag.

²⁰Hiyag itfagma hun Ahab inowen otsi mon enepfagma Israel inap obog toho men Baal amingmingangge men tom Karmel fam palu arik wamuhup ulug hiyag isa libag.

²¹Ap arimano tom Karmel fam palu arik watfagma Elia ino enembeg libareg ele hiyag isaruk lit, ”O noenam welamuhupmu hinindi handuhal teg lit mulilik la mulilik wam turuk lahebon eleg aruhu? Allah fahet we tik-tem toho NINIKNI wereg peruk lahep halug At eneg wel turuk lamuhup. Baal fahet ninikni peruk lahep halug Baal eneg wel turuk lamuhup!” ulug hiyag isibagma Israel inap arimano misihen oho ele tor angge ibag fug.

²²Enele ibag fugmu Elia inowen ap arimano nin eke hiyag isaruk lit, ”It winon obog tohowen NINIKNI Allah enembol yig utusama an misig namu eneg At amingmingangge nabi welahi angge famen Baal amingmingangge teng nuwal fimahen 450 wereg.

²³Weregma wam sapi hunon piren og nisa wamusama Baal amingmingangge arimanowen nit tu amul ulug sapi misig hilalusareg waroho senggele felusareg indok hundubuk fug angge e yaharehon palimu embelusa. Embelusama anden oho wam sapi eke waroho senggelminteg indok hundubuk fug angge e yaharehon palimu imbik lahamin.

²⁴Ari tubulteg iren oho inikni Baal fam indok pilabik watmihin ulug heng tulusama anden oho NIKNI Allah fam heng timin. Nit nenebe wal taneg heng tulmu san indok pilabik watmisiyon ino yet hulteg at ino fahet tem toho Allah wereg ulug ninindi anggar atmisi,” ulug Elia inowen hiyag isibag. Hiyag isibagma it obog tohowen fano ehen ulug hebeloho hiyag itfag.

²⁵Hiyag itfagma Elia inowen Baal amingmingangge arimano unubam hiyag isaruk lit, ”Hit henebe anggolo welahepma hiren tam wam sapi misig hulul pehebon hilalihipteg waroho senggeltihip. Senggeltihipteg indok hundubuk fug angge e yaharehon palimu embelihipteg hinikni Baal fam indok pilabik watmihin ulug heng tilihip,” ulug hiyag isibag.

²⁶Hiyag isibagma wam sapi og isibahon ino wibareg waroho senggelfareg inikni Baal fam, ”Haren nenele urukmu hol nisimin,” ulug likiya ak tibag angge urukmen eneg unukoho atfag angge famen ele uk fug angge iren heng tibag ane ino hebeloho hiyag isibag fug. Inikni Baal ele uruk elehen it arimano e yaharehon ino walinggoho mase ruruk lit hik tombo lahaptuk latfag.

²⁷Hik tombo lahaptukmen eneg unukoho atfagma hun Elia inowen inda yag eneptuk lit, ”At ino Allah hag toho wereg angge re henele hum toho wol tiyek! Aren alem eke fahet wenggeltuk lit henele holtuk eleg ano? Miyema laha ano, yatma laha ano? Nohoruk lit werehen in amag ulug wol tiyek!” ulug ininggaliyap eneptuk lit hiyag isibag.

²⁸Hiyag isibagma Baal amingmingangge arimanowen enele hum toho inikni Baal fam heng uruk lit iren turuk ane hikit toho karog men fit men fam enehap ke kiriring til larukmu enemep wilip atuk latfag.

²⁹Ari turuk lit nenek turuk hag toho turukmen eneg o hupmu atfag angge famen Baal inowen enele holuk fug angge hebeloho hiyag isibag fug.

³⁰Hiyag isibag fugmu hun Elia inowen Israel inap arimano unubam nambeg maniyek ulug wol enepfag. Wol enepfagma Elia horogma watfagma Elia inowen NINIKNI Allah fahet hubu lahaptuk ambeg halog tibisibahon ino halmin ulug

³¹hun Yakub NINIKNI Allahn unuk Israel suwalfahon ino umalikisi ununggul unuk nisanggowen hikit toho helep nisanggowen wibareg

³²hubu lahaptuk ambeg siyahap tibisibahon ino nin suhuloho wiri fibag. Wiri fibareg hubu lahaptuk ambeg ino walinggoho samaling ik kubag nuwal fimahen 14 liter hinang atukon yenggel amag ulug pale fibag.

³³Ari tibibareg e yahare fibareg wam sapi ino watfareg senggeloho e yahare fibahon ino palimu imbik lahibag.

³⁴Imbik lahibareg ap arimano hiyag isaruk lit, ”Ik kubag uhan fam hinanggoho wam sapi senggelehon men e yaharehon men pali ke hilil isalihip,” ulug hiyag isibareg nin eke hiyag isaruk lit, ”Ari hag toho hininggik pireneg angge tilihip,” ulug hiyag isibagma nin eke ik hilil isibagma Elia inowen, ”Pirenam tehep hag toho nin eke tilihip,” ulug hiyag isibagma ininggik hinahanam ik hililik lahibag.

³⁵Hililik lahibagma ik ino hubu lahaptuk ambeg ino fene wamburuk lit samaling palfahon ino fam yenggel atfag.

³⁶Yenggel atfagma hupmu Israel inaben eke sambil eke sambil hubu lahaptuk li horog atfagma Elia ino hubu lahaptuk ambeg ino horogma libareg ele uruk lit, ”Abraham, Ishak, Yakub Inikni Allah, anden oho Hat wel haptuk lahi. O yoho aru ap obog tohowen Hat we tik-tem toho Israel ninap Ninikni wereg ulug onoluk atmisi. An fahet Allah amingmingangge wereg lit Aren hiyag itisi ane hikit toho tehek ulug inindi anggar atmisi.

³⁷Ap aruman Allah we tik-tem toho NINIKNI wereg lit Aren ninindi hebeloho og nenebehek ulug inindi seleg atmisiyen nikni Haren an nele hol himin,” ulug Allah fam sembahyang ibag.

³⁸Sembahyang ibagma NINIKNI Allahn poholman indok ambulpul pilabik watfagma wam sapi senggeleg ino men e yaharehon men helep men kinang men ik samalingmu yenggel atfahon arimano obog toho nibag.

³⁹Indok inowen obog toho narukmu ap arimanowen yet hibareg enelenggen fam hur atuk lit, ”At ino Allah NINIKNI wereg, we tik-tem toho NINIKNI wereg,” uruk latfag.

⁴⁰Ari uruk latfagma Elia inowen ap arimano fam ele uruk lit, ”Baal amingmingangge aruma sen enebiyek! Misig oho noluk welaruhuk ulug longgo imisi fug,” ulug hiyag isibag. Hiyag isibagma obog toho sen enepfagma Elia inowen og eneplug ik Kison ayegma libareg obog toho pinggi unusibag.

⁴¹Ari tibareg Elia inowen hun Ahab fam hiyag utuk lit, ”Osit nik oho lit aplohok turukmu holtuk lahireg suburu men ik men na lamihin!” ulug hiyag itfag.

⁴²Hun Ahab ino suburu na libagma Elia ino tom Karmel atelma lahibareg hur atfareg elenggen pirenet honggolegma orohole kunuk arik wambibareg

⁴³amingmingangge fam ele uruk lit, ”Lahamihinteg ik saho ahik fil yet hamihin,” ibagma amingmingangge ino tom fam lahibareg ik saho ahik fil yet hibareg ikni Elia fam hiyag utuk lit, ”Nungge-nungge wereg eleg,” ibagma Elia inowen, ”Nin eke lamihin,” ulug hiyag utukmen eneg inggik sabirenam lahibag.

⁴⁴Inggik sabirenam lahibareg amingmingangge inowen Elia fam hiyag utuk lit, ”Hina ap inggik hahon tor angge ik ahummuwen laharukmu yet haruk lahi,” ulug hiyag itfagma Elia inowen amingmingangge ino fam, ”Wambimihinteg Ahab fam hiyag utuk lit, ’Osiren siyahap hapmisiyen wam kudan lisoho walug laruk angge kereta fam lahamihinteg folo-folo hibam lamihin,’ ulug hiyag irik lamihin,” ibag.

⁴⁵Ibagma we il misig welatfareg hinan pohol amug turukmu siyelu fu ruruk lit osit humon wambik watfag. Osit wambik waharukmu itano hun Ahab ino kereta fam lahibareg o Yizreel fil libag.

⁴⁶Larukmu NINIKNI Allahn Elia ino ineyap tibagma Elia inowen asum yat tehen lisoho alunggu ke pug tibik lahibareg pupu angge laruk lit hun Ahab ino pisan isalug Yizreel tam kibag.