Read Angguruk Yali 1 RAJA-RAJA 19 Bible Online

1 RAJA-RAJA 19 - Angguruk Yali bible

1 RAJA-RAJA 19

¹Elia inowen Baal amingmingangge arimano unusuruk lit tibag ane obog toho fahet hun Ahab inowen uhe Izebel hiyag itfagma

²Izebel inowen amingmingangge misig hun Elia ambeg monde fibagma libareg hiyag utuk lit, ”Nisinga Izebel inowen hiyag itmihin ehek ane iminon tu, ’Haren Baal amingmingangge unusirikin hag toho o sono mo tiya haham anden huwaruhuk fug halug an Allah hag toho wereg ulug wel eneptuk lahiyonen alem angginon nubam umbuhup,’ ehek,” ulug hiyag itfag.

³Hiyag itfagma Elia ino hol hibareg akolen in atfareg an nuwaruhu rohon ulug o Bersyeba kinang Yehuda fam welatfahon ino libag. Libareg Elia ino amingmingangge o Bersyeba embeselug

⁴amu eneg lekma larukmen eneg hup misig atfag. Hup misig atfagma walahen alma hur atfareg war ale fano ulug ele uruk lit, ”NIKNI Allah, angginon anggolowon nubam atukmen eneg welahireg ketiya an welam fug teg lahi. An numbasi welatfag hag toho an oho siyag nahun welahimu nahime lisoho wamihin,” ibag.

⁵Ari ibareg Elia ino walahen alma itano ying atfareg nohoruk latfag. Nohorukmen malaikat misig Elia iraham watfareg sen haruk lit, ”In atmihinteg suburu namihin,” ulug hiyag itfag.

⁶Hiyag itfagma Elia inowen kim harukmen unggul fil suburu wirahowon men ik kubag fam hinanggohon men weregma yet hibareg lisoho nibareg nin nohoruk latfag.

⁷Nohorukmu nin pireneg angge malaikat ino Elia iraham watfareg sen haruk lit, ”In atmihinteg suburu amin! Suburu namihin fug halug hat lahun abunggalem yat tehen la fug teg laruhun,” ulug hiyag itfag.

⁸Hiyag itfagma Elia ino in atfareg suburu men ik men nibareg ine atfagma hup hunduhuk ilingge hunduhuk larukmen eneg hup teng misig nubam hilag nuwalen 40 atfagma Allah atam inam atfag ambeg tom Sinai ino alma libag.

⁹Tom Sinai alma libareg owikmu kibareg hup atfagma nohibag. Nohorukmen NINIKNI Allahn at ubam ele uruk lit, ”Elia nare, hat tuma nungge timin ulug waharikin?” ulug kapal hibag.

¹⁰Kapal hibagma aren te, ”NIKNI Allah, pohol ha kinang ha seneg lahenon, Haren Israel inap unubam numalikisi welamuhup ulug sali imbinahon ino iren pisan isaruk lit Hat fahet hubu lahaptuk ambeg halog tebeseruk lit Hat hamingmingangge nabi arimano unusuruk latusa. We an eneg Hat hibil atuk lit hiyabuk sat toho wituk latikik. Ari turuk lit an namu eneg noluk werehen nil elehap nabul ulug turuken waharikik,” ulug hiyag itfag.

¹¹Hiyag itfagma NINIKNI Allahn Elia fam uruk lit, ”Wilip atmihinteg tom atelma lahamihinteg An nolohotma unduhuk latmihin,” ulug hiyag itfag. Hiyag itfareg NINIKNI Allah owik ino iraham keyen pisan isalug lamin ulug tam siyelu humon monde fik waharuk lit tom ino halog toho ilkal isarukmu helep masahen hog toho wamburuk latfag. Ari turuk latfag angge famen siyelu ino sehelimu NINIKNI Allah watfag fug. Siyelu ino palfagma o mek turuk latfag angge famen Allah o mek sehelimu watfag fug.

¹²O mek ino palfagma indok ambulpul inam atfag angge famen indok ambulpul ino sehelimu NINIKNI Allah eleg latfag. Indok ino eleg atfagma homhomo aplohok toron fu ruruk latfag.

¹³Homhomo ino fu rurukmu hol hibareg Elia inowen orohole asum fam hililip toho owikmuwen wilip atfareg owik ambilikmu unduhuk latfag. Unduhukmu ap ele hag angge Elia fam uruk lit, ”Nare, hat tuma nungge timin ulug waharikin?” ulug kapal hibag.

¹⁴Kapal hibagma hun Elia inowen, ”NIKNI Allah, pohol ha kinang ha seneg lahenon, Haren Israel inap unubam numalikisi welamuhup ulug sali imbinahon ino iren pisan isaruk lit Hat fahet hubu lahaptuk ambeg halog tebeseruk lit Hat hamingmingangge arimano unusuruk latusa. We an eneg Hat hibil atuk lit hiyabuk sat toho wituk latikik. Ari turuk lit an namu eneg noluk werehen nil elehap nabul ulug turuken waharikik,” ulug hiyag itfag.

¹⁵Hiyag itfagma NINIKNI Allahn Elia fam ele uruk lit, ”Lek ke waharikin abunggalem nin suhuloho lamihinteg o Damsyik lamihin. Lamihinteg hun Hazael ino Siria inap fet enesug laruhuwen ap suwon lahabuhun.

¹⁶Lahabuhunteg hun Nimsi amloho Yehu ino Israel inap fet enesug laruhuwen ap suwon lahabuhun. Lahabuhunteg hun Safat amloho Elisa o Abel-Mehola ahun ino hat hubalmangge An namingmingangge nabi welaruhuwen lahabuhun.

¹⁷Ap sa hun Hazael inowen unusurukmu winon nonoluk welamuhuk ulug longgo uhubon arimano hun Yehu inowen unusurukmu longgo uhubon arimano hun Elisa inowen unusuruk laruhu.

¹⁸It arimano obog toho unuselep angge famen Anden ap Baal fam sembahyang uruk lit mako pug toho hi rurusa fuhon teng-teng angge 7.000 werehon arimano onoluk welamag ulug umbusuhuk,” ulug hiyag itfag.

¹⁹Allahn ari ulug hiyag itfagma Elia ino tom Sinai famen suhuloho watfareg hun Safat amloho Elisa inowen yabuk witukmu watfag. Watfareg kim harukmen hun Elisa otsi nanggoloben itano menen enebe wal taneg wanggun kinang fabultuk angge angginon wam sapi piren heheg ilili fibareg lisoho walug laruk latfag. Otsi tam larukmu Elisa ino onombolim laruk latfag. Larukmu hun Elia ino Elisa iraham keyen laruk lit asum nonggoloho wibareg Elisa umaloma hik isibagma tuhul atfag.

²⁰Tuhul atfagma Elisa inowen wam sapi yabuk wituk latfahon arimano lin isalug folo-folo Elia ombolim libareg at ubam ele uruk lit, ”Nikni, an nikni men nisinga men hi enebik laminen hiyag nitmihinmu laminteg hat hambeg watminmu eneg ambiyeg laruk lamuhuk,” ulug hiyag itfag. Hiyag itfagma Elia inowen, ”Fano ehenma hibam lamihinteg anden hat hubam tihi ane fahet hapeleg am fug angge nambeg suhuloho watmihin,” ulug hiyag itfag.

²¹Hiyag itfagma Elia ino embeselug libareg Elisa inowen wam sapi yabuk wituk latfahon piren itano wibareg waroho wanggun yabuk wituk latfahon ino e wiroho esetfag. Esetfareg ap welatfahon arimano pal isibagma naruk latfag. Nibagma Elisa ino nikni Elia men ambiyeg noruk lamuhuk ulug ambeg watfareg amingmingangge roho welatfag.