Read Angguruk Yali 1 RAJA-RAJA 21 Bible Online

1 RAJA-RAJA 21 - Angguruk Yali bible

1 RAJA-RAJA 21

¹Israel inap onowe Ahab ino ibam o Yizreel welatfahon horogma o Yizreel ahun Nabot angginang hele anggur yag taruk ambeg welatfag.

²Weregma hun Ahab inowen Nabot fam ele uruk lit, ”Yabuk haren anggur yag taruk lahen ambeg an nibam horog toho werehen an og nuruhunmu hu men mulun men yag taruk laruhuk. Og nuruhunmu hat hangginang aru we tot siyag tegma anden ubalma og huruhuk ambeg mondabi fanoma hiyag huruhuk. Hat hindimuwen yabuk winama og num fug angge uang og netep peruk lahen halug anden uang su roho og huruhuk,” ulug hiyag itfag.

³Ari ulug hiyag itfagma Nabot inowen, ”Nangginang aru nikni umbasiyen seneg latfareg an fahet imbibagma NINIKNI Allahn nindi ineyap naptukmu anden og huruhuk fug,” ibag.

⁴Ibag ane ino fahet Ahab indi siyag atfagma al ke het-pet hibareg ibam kibareg nohoruk ambeg aluke pilabeg ying atfareg suburu na fug angge welatfag.

⁵Weregma Ahab uhe Izebel ino ambeg watfareg kapal haruk lit, ”Nungge fahet hat hindi siyag ahama suburu na fug angge welahen?” ulug kapal hibag.

⁶Kapal hibagma Ahab inowen, ”Anden Nabot fam hiyag utuk lit, ’Yabuk haren anggur yag taruk lahen ambeg hiyag nuruhunmu uang onggo og huruhuk. Haren hindimuwen yabuk winama og netep peruk lahen halug anden og huruhuk,’ ulug hiyag irihi angge famen aren te, ’Yabuk anden tohon aru og huruhuk fug,’ ehek,” ulug Ahab inowen Izebel hiyag itfag.

⁷Hiyag itfagma Izebel inowen hiyag utuk lit, ”Israel inap onowe suwon hat welahenma re hindi hahiyeg toho in atmihinteg suburu namihin. Nabot iyabuk anden hat og huruhuk,” ulug hiyag itfag.

⁸Hiyag itfareg Izebel inowen suwesingga piren hinahan Ahab unuk fam hahatuk lit enehangge emberuk angge ap suwonen tohon ino fam enehangge imbibag. Imbibareg suwesingga aruma o Yizreel inap iniknisi men onowesi men og isa lalihip ulug ap mon enepfag.

⁹Suwesingga itano fam haharoho imbibahon tu, ”Nori, hunumalikisi unubam suburu na fug angge hunik welatihip ulug hiyag isaruk lit palu arik watlihip ulug wol enebuhup. Hunumalikisi wamuhupmu hun Nabot ino ap obog toho onolohotma hur arik ma ulug hiyag umuhup.

¹⁰Hiyag umuhupteg ap piren onolok inap hun Nabot olohotma heriye fusuhupmu it piren itanowen, ’We tik-tem toho Allah men ap suwon men huluwap eneptuk latikin,’ ulug at ubam un ane lombog tuhup. Lombog tuhupmu o pumbukmuwen walug wilip amuhupteg helep fam ware fusuhupmu war aruhu,” ulug Izebel inowen suwesingga fam haharoho imbibag.

¹¹Suwesingga arimano o Yizreel inap iniknisi men onowesi men enembeg walug watfagma iren kim hibareg suwesingga fam hiyag isibag ane hikit toho turuk latfag.

¹²Ap suwon-suwon arimanowen unumalikisi unubam suburu hunik welatihip ulug hiyag isaruk lit palu arik maniyek ulug wol enepfag. It obog toho watfagma hun Nabot ap obog toho onolohotma heriye fibag.

¹³Heriye fibagma ap piren onolok inap watfareg Nabot olohotma hur atfag. Hur atfareg ap obog toho iniline uruk lit, ”Hun tuwen we tik-tem toho Allah men ap suwon men huluwap eneptuk latisi,” ulug un ane lombohap tibag. Lombohap tibag ane fahet we tem toho ehesa ulug ap arimanowen hun Nabot ino o pumbukmuwen lisoho walug wilip atfareg helep fam ware fisibagma war atfag.

¹⁴War atfagma ap arimanowen Izebel ambeg lalihip ulug ap mon enepfagma libareg hiyag utuk lit, ”Hun Nabot ino helep fam warehesama pinggi war aha,” ulug Izebel ino hiyag itfag.

¹⁵Hiyag itfagma hol hibareg Izebel inowen folo-folo Ahab ambeg libareg hiyag utuk lit, ”Hun Nabot ino uang onggo og nuruhun halug oho an niyabuk og huruhuk fug ulug hiyag hitisi ahun ino oluk atmisi fug, mondabi war aha. War ahama in atmihinteg at iyabuk ino hat ngi aruhunen lamihin,” ulug hiyag itfag.

¹⁶Hiyag itfagma Ahab ino in atlug Nabot iyabuk anggur yag taruk ambeg ino libareg ilmig tamin ulug turuk latfag.

¹⁷Turukmu NINIKNI Allahn o Tisbe ahun Elia fam ele hiyag utuk lit,

¹⁸”Israel inap onowe hun Ahab o Samaria werehon ino hun Nabot iyabuk ilmig tamin ulug lahareg werehen ambeg lamihin.

¹⁹Lamihinteg Ahab hiyag itmihinon tu: NINIKNI Allahn ele ehekon aru holeg lamin! Hun Nabot ino ware feserikinteg iyabuk oho ilmig taruk lahen ane ari fahet Nabot amep meneyen milang heheg narusa ambeg hat hamep oho meneyen milang heheg nahup ulug hiyag irik lamihin,” ulug Allahn hiyag itfag ane hikit toho Elia ino Ahab ambeg libag.

²⁰Libagma Ahab inowen Elia yet hibareg at ubam ele uruk lit, ”Hat an men seli roho welahe hahun aru ketiya an hiyag nabik wahen?” ulug pet tibagma Elia inowen, ”NINIKNI Allah olohotman siyag ane turuk lit hinggarehen siyahap tarikin ane ari fahet hiyag habik wahi.

²¹Wahireg NINIKNI Allahn ehekon aru holeg lamin, ’Anden alem angginon hat hubam emberuk lit hil elehap habuhukteg hat humalikisi ap umalik oho suwonet toronet waroho elehap eneptuk laruhuk.

²²Israel inaben siyag ane turuk lamag ulug haren inindi kahal eneptuk lit An nindi siyahap naptuk lahen ane ari fahet Anden hun Nebat amloho Yerobeam uhe malikisi men Ahia amloho Baesa uhe malikisi men unubam alem angginon emberikik hag toho hat huhe malik oho hunubam alem angginon umbuhuk,’ ehek.

²³Huhe Izebel fahet oho NINIKNI Allahn ehek ane aru holeg lamin: At ino meneyen o Yizreel elehet walinggoho wirihon irahamen kiyal heheg nahup.

²⁴Hat hori winon o pumbukmuwen war amuhubon meneyen narukmu winon anggenma war arik laruk lamuhubon suwe pohol ke larukonen naruk lamuhup,” ulug hiyag itfag.

²⁵Uhe Izebel inowen ahun indi kahaltukmu Ahab inowen NINIKNI Allah olohotman siyag ane eneg turuk lit inggareg siyahap taruk latfag hag toho ap winon eke wereg eleg.

²⁶Aben tu Allah hag toho wereg perukon aren oho wel eneptuk latfag. Amori inap arimano o Kanaan weregma Israel inap kurukmu NINIKNI Allahn yanggal enepfahon arimanowen turuk latfag hag toho Ahab inowen oho mondabi amben siyahon turuk latfag.

²⁷Elia inowen hiyag itfag ane obog toho hun Ahab inowen hol hibareg asum wan tohon tararag isibareg sum pulalon langguk tibareg suburu na fug angge hunik welatfag. Ari roho wereg lit indi siyahen orohole kunuk toho orog-orog laruk latfag. Nohoruk lir oho sum pulalon langguk toho nohoruk latfag.

²⁸Ari roho weregma NINIKNI Allahn Elia fam ele uruk lit,

²⁹”Elia nare, Ahab ino nambiken turuk latikik ulug An nolohotman inggareg apmayap tarisiyon ino yet hehen? Inggareg apmayap tarisi ane ari fahet at oluk weregma Anden siyahap tuhuk fug. At amloho ap suwon welaruhu li eneg alem angginon ubam umbuhuk,” ulug Elia hiyag itfag.