Read Angguruk Yali 1 RAJA-RAJA 22 Bible Online

1 RAJA-RAJA 22 - Angguruk Yali bible

1 RAJA-RAJA 22

¹Siria inap men Israel inap men tog abuk fug angge inindi yuwag toho weregman eneg mo piren libag.

²Mo piren libagma hinahanehon fam Yehuda inap onowe Yosafat ino Israel inap onowe Ahab ino pen ha libag.

³Hun Yosafat ino Ahab ambeg uwan la fugmu Ahab inowen tam otsi unubam ele uruk lit, ”Nori, o pumbuk Ramot Gilead kinang fam werehon ino kinang niren tohon angge famen Siria inap onowe inowen sen taluhen honoluk toho! Nungge fahet at inggikmuwen taluk toho hila fug angge nenele eleg angge welamuhuk?” ulug hiyag isibag.

⁴Hiyag isibareg weregma Yosafat ino Ahab ambeg watfagma Ahab inowen at ubam ele uruk lit, ”Nare, niren Ramot inap men tog abuhuken an men hat men ambiyeg lahuk ano?” ulug kapal hibagma Yosafat inowen, ”Nare, fano ehenma an numalikisi hat humalikisi iniraham, an nambohom kuda hat hambohom iniraham laruk lit an men hat men ambiyeg tog abik lahuk.

⁵Nit uwan la fugmu NINIKNI Allahn komo nenepmisi ane fahet tam kapal hamihin,” ulug hiyag itfag.

⁶Hiyag itfagma Ahab inowen Allah amingmingangge nabi teng nuwal fimahen 400 palu enepfareg kapal isaruk lit, ”Nori, anden Ramot inap men tog abuhuken lahuk ano umbusuhuk ano?” ulug kapal isibagma iren, ”Ramot ino NINIKNI Allahn hat hinggikmu umbuhuwen tog abik lahun,” ulug hiyag itfag.

⁷Hiyag itfagma hun Yosafat inowen, ”NINIKNI Allah amingmingangge misig eke wereg halug aren fuki roho hiyag nisamisiyen kapal hul,” ibag.

⁸Ibagma Ahab inowen, ”Allah amingmingangge misig eke werehon NINIKNI Allahn komo nenepmisi ane hiyag nisawag ulug wol tila angge famen aren an nubam aruhu ane fahet fano ane hiyag num fug angge siyag ane eneg hiyag nutuken at fahet nirim peruk lahi. Ap ino hun Yimla amloho unuk te Mikha wereg,” ulug Yosafat hiyag itfag. Hiyag itfagma Yosafat inowen, ”Nare, ari roho imihin fug,” ulug hiyag itfagma

⁹Ahab inowen ot eke wol tibareg hiyag utuk lit, ”Folo-folo lamihinteg Mikha ino hondoholug watmihin,” ulug monde fibag.

¹⁰Israel inap onowe Ahab men Yehuda inap onowe Yosafat men ap suwonen wan turuk asum wan teg lit o Samaria elehet walinggoho ohowon sok iraham roti anggen lilibug turuk ambeg ap suwon hur atuk angge piren fam heriyeg lit weregma Allah amingmingangge arimano obog tohowen it enelukeman teko lahu ane fahet hiyag isaruk latfag.

¹¹Hiyag isaruk lit hun Kenaana amloho Zedekia inowen ine angge besi fam andimbuk lebeng tohon wiri fibareg Ahab fam hiyag utuk lit, ”NINIKNI Allahn ele ehekon tu: Andimbuk tu fam Siria inap unubam lel haruk lit haren elehap enebuhun,” ulug hiyag itfag.

¹²Allah amingmingangge winon arimanowen oho ari hag toho hiyag utuk lit, ”O Ramot inap men tog abik lahunmu NINIKNI Allahn it arimano hat ap suwon hinggikmu umbuhumu haren apmayap enebuhun,” ulug hiyag itfag.

¹³Hiyag utukmu itano ap Mikha hondohik lamihin ulug monde fibag ahun inowen Mikha hiyag utuk lit, ”Allah amingmingangge winon arimanowen ap suwon fam enele misihon eneg fano ane hiyag erehesa angge re haren oho fano ane hiyag itmihin,” ulug hiyag itfag.

¹⁴Hiyag itfagma Mikha inowen hebeloho hiyag utuk lit, ”NINIKNI Allahn an hiyag nitmisi ane eneg ap suwon hiyag itmin. At mondabi oluk werehon inowen holeg lit weregma uruk lahi,” ulug hiyag itfag.

¹⁵Hiyag itfareg ap suwon Ahab ambeg libagma Ahab inowen kapal haruk lit, ”Mikha nare, o Ramot inap men tog abik lahuk ano umbusuhuk ano?” ulug kapal hibagma Mikha inowen, ”Tog abik lahunmu NINIKNI Allahn ap arimano hat ap suwon hinggikmu umbuhumu hat palimu aruhun,” ulug hiyag itfag.

¹⁶Hiyag itfagma Ahab inowen hiyag utuk lit, ”NINIKNI Allah unuk fam we tik-tem toho hiyag nitmihin. Anggoloenam anden te we tem toho hiyag nitmihin ulug heng haptuk latikik,” ulug hiyag itfag.

¹⁷Hiyag itfagma Mikha inowen hiyag utuk lit, ”Anden nei waruk hag toho yet harukmen Israel inap obog toho wam domba inikni elehon hag toho tom fene linggik-longgo urukmu yet isarikik. Yet isarukmen NINIKNI Allahn ele uruk lit, ’It arimano inikni elehen inibam man-man fano lawag,’ urukmu hol harikik,” ulug hiyag itfag.

¹⁸Hiyag itfagma hol hibareg Ahab inowen hun Yosafat hiyag utuk lit, ”Hun aruwen an nubam aruhu ane fahet fano ane hiyag num fug angge siyag ane eneg hiyag nutuk ulug hiyag hirihiyon ino hikit toho ketiya ehek ane aru oho holehen,” ulug hiyag itfag.

¹⁹Nin Mikha inowen ele uruk lit, ”Nikni, ketiya NINIKNI Allahn ele irisiyon tu holeg lamin. Anden yet harukmen NINIKNI Allah lehoma heriyeg lit weregma otsi malaikat obog toho arimano At iraham luhaleg lit inggik pikit fil hare fil unduhukmu yet isarikik.

²⁰Yet isarukmen NINIKNI Allahn ele uruk lit, ’Hun Ahab ino tog elman aben ware fusukag pihireg ap san Ahab ambeg lahureg ele hiyag utuk lit, ’O Ramot-Gilead inap men tog abik lahun,’ ulug indi kahaluhu?’ ulug malaikat arimano kapal isarisi. Kapal isarisimu it enele misig ane eneg hiyag utusa fug.

²¹Hiyag utusa fugmu ap enembol fam angge misig At alukema in arik waharisireg hiyag utuk lit, ’An tuwen Ahab indi kahalik lahuk,’ irisimu NINIKNI Allahn kapal haruk lit, ’Nangginoho tuhun?’ ulug kapal harisimu

²²ap enembol fam angge inowen, ’An wilip atlug lahukteg Hat hamingmingangge nabi Ahab olohotman wene hiyag isaruk inap inindi kahal enebuhukmu it arimanowen enele si ane hiyag umuhup,’ ulug hiyag itisi. Hiyag itisimu NINIKNI Allahn te, ’Fano ehenma haren Ahab indi kahalik lahunmu ehen ane hikit toho teko lahu,’ ulug hiyag itisi.

²³NINIKNI Allahn irisi ane hikit toho at inowen hat Ahab hubam alem angginon amag ulug hat hamingmingangge obog toho aruma inindi kahal eneptisimu it aruma enele si ane hat hiyag herehesa,” ulug Mikha inowen Ahab hiyag itfag.

²⁴Ari ulug hiyag itfagma hun Zedekia ino Mikha iraham libareg orohole tag toho watuk lit, ”NINIKNI Allah hime inowen an numbahalug nangginoho hat eneg hiyag hutuk?” ulug pet tibag.

²⁵Pet tibagma Mikha inowen hebeloho hiyag utuk lit, ”Nare, ari ehen angge famen ap seliyonen hunusul ulug waharukmu hat hakolen o undama hirag atmin ulug kuhun sambil ino anden ihi ane fahet tik-tem toho irisi ulug holuk aruhu,” ulug hiyag itfag.

²⁶Hiyag itfagma Ahab inowen otsi hiyag isaruk lit, ”Hun Mikha aru senetihipteg o pumbuk Samaria tu seneg ahun Amon men namloho Yoas men enembeg hondoholug lalihipteg

²⁷henele hiyag isaruk lit, ’Ap suwon inowen ehekon tu: Hun aru inggik hele waroho ap siyag ane turukon kilap eneptuk ibam kila feselihipteg suburu men ik men we tor angge og utukmen eneg an tog abik lahukteg fano nibam waruhuk ehek,’ ulug hiyag isa lalihip,” ulug otsi hiyag isibag.

²⁸Ari ibagma Mikha inowen hiyag utuk lit, ”Nikni, ehen ane hikit toho tog abik lahunteg fano hibam waruhun halug anden hiyag hirihi ane fahet NINIKNI Allahn hiyag nitisi fug ane irikik ulug nonoluk aruhu,” ulug hiyag itfareg nin eke uruk lit, ”Anden ihiyon aru ap o pumbuk obog tohowen holeg lamok,” ibag.

²⁹Ari ibareg welatfagma Israel inap onowe Ahab men Yehuda inap onowe Yosafat men it piren itano o Ramot inap men tog abuhuk ulug wilip atfareg Gilead kinangma libag.

³⁰Libareg Ahab inowen hun Yosafat hiyag utuk lit, ”Ap seliyonen an fahet ap amuwon pukag ulug an sum winon wan timinteg tog silimu laminmu hat ap suwonen wan turuk asum wan toho lamihin,” ulug hiyag itfareg Ahab ino sum ap winonen tohon wan tibareg tog silimu libag.

³¹Tog uwan abuk fugmu Siria inap onowe suwon inowen sehen senehon wam kudan lisoho walug laruk angge kereta fam unduhuk inap onowesi teng misigmen nubam hilag fuwaben 32 hiyag isaruk lit, ”Tog aptuk lit yuhun inap unusuk fug, we Israel inap onowe ino fuki roho tog pising toho ware fisiyok!” ulug milal enepfag.

³²Milal enepfagma tog silimu libareg onowesi arimanowen hun Yosafat ino yet hibareg, ”Israel inap onowe ino ari wereg,” ulug enele uruk lit at wabul ulug horog-horog larukmen Yosafat ino akolen ele hum toho nga ruruk latfag.

³³Nga rurukmu sehen seneg inap onowesi arimanowen hun aru Israel inap onowe fug ulug onoluk atfagma at wabul pibag angge famen embeselug ap winon men tog aptuk latfag.

³⁴Tog aptuk lit Siria ahun misihen tog amu ke pising turuk latfagma Israel inap onowe Ahab ino sing wan teg latfahon honggoleg keyen tog kibag. Kibagma Ahab inowen kereta pikit lawag ulug haltuk ahun fam hiyag utuk lit, ”Tog nuwarehesama tog silimu embeselug hebeloho og naplug lamihin,” ulug hiyag itfag.

³⁵Ari ibag angge famen o ari sambil tog pale fuk fug angge aptukmen eneg werehen ap suwon Ahab ino kereta palimuwen mako wambuhu rohon ulug ap winonen senegma Siria inap onolohotma kereta fam unduhukmen eneg hupmu itano hun ino war atfag. War atuk lit amep tog kibag ke inowen wilip atukmen eneg kou kereta ubam ililigmu ap elma unduhuk latfahon ino fam mep keleg ibag.

³⁶Mo ubuk ik ohoma Israel inap onowesi arimanowen unumalikisi sehen senehon unubam enele hi roho, ”Hinibam wal taneg lalihip,” ulug hiyag isibag.

³⁷Hiyag isibagma ap suwon Ahab wareg angge ino o Samaria walug libareg kinangma salfag.

³⁸Salfareg kereta hun Ahaben tohon ino o Samaria ik yenggelehon fam umatukmu NINIKNI Allahn tam ibag ane hikit toho Ahab amep kereta fam tag atfahon ino meneyen milang heheg narukmu ik sene mep umatfag ambeg ino hiyap yaying turukonen enehap umatuk latfag.

³⁹Hun Ahab ino oluk wereg lit turuk latfag ane tuma we tor angge haharoho emberuk lahe. Ahaben o humon ubahat fam melei anggolo lombog tibil libahon ino men o pumbuk anggolo wituk lit turuk latfag ane obog toho suwesingga Israel inap onowesi welatfag ane fahet haharehon ino fam hahareg lit wereg.

⁴⁰Ahab war atfagma amloho Ahazia ikni ubalma ap suwon lahibag.

⁴¹Hun Ahab ino Israel inap onowe suwon lahibagma mo uhanehon fam hun Asa amloho Yosafat ino Yehuda inap onowe suwon lahibag.

⁴²Yosafat indag atfag sali mo ilig am wirig am turukmen teng misigmen nubam hilag likinen 35 atfagma ap suwon lahibareg o Yerusalem wereg lit Yehuda inap fet enesugmen eneg mo hinahaneg fimahen 25 libag. At isinga hun Silhi ahaloho unuk Azuba welatfag.

⁴³Ikni Asa inowen fano ane eneg turuk latfag hag toho amloho Yosafat ino ke hareyon la fug angge ikni ombolim laruk lit NINIKNI Allahn fano perukon eneg turuk latfag.

⁴⁴Yosafat ap suwon wereg lit punumu kema-kema hubu lahaptuk ane elehap tibag fugmu Yehuda inaben tu Allah hag toho wereg ulug wel eneptuk angge fahet wam waroho hubu lahaptuk ane imbisibag fug.

⁴⁵Yosafat inowen tog fanowap tibareg Israel inap onowe suwon men ininggik ahandip toho welatfag.

⁴⁶Ap suwon Yosafat oluk wereg lit turuk latfag ane tuma tor angge haharoho emberuk lahe. Aren yabuk seneg lit ahako roho turuk latfag ane men tog aptuk latfag ane men obog toho suwesingga Yehuda inap onowesi suwonen turuk latfag ane fahet haharehon fam paloho imbibag.

⁴⁷Yosafat ikni Asa inowen tu Allah hag toho wereg perukon ununuk fam abet hiyabet yaying turukon arimano Israel kinangman yanggal eneptuk lit tor angge imbisibahon arimano amloho Yosafat inowen yanggal enepfag.

⁴⁸Yosafat ap suwon weregma o Edom inap onowe suwon raja eleg latfag. Eleg latfagma at ubalma Yehuda inap onowe amingmingangge ekeyen o Edom kinang seneg latfag.

⁴⁹Seneg lit weregma Yosafat inowen kou humon ik ahum pali ke larukon wiri fibag. Wiri fibagma umbagpag turuk angge emas ayeg waroho wahuken o Ofir kinangma lahuk ulug ik ahum pali keyen o Ezion-Geber horogma larukmen kou humon arimano ik haglabut watuk lit lilibug toho siyag atfag.

⁵⁰Siyag atfagma Israel inap onowe Ahazia hun Ahab amloho inowen Yosafat fam ele uruk lit, ”An notsi men hat hotsi men ambiyeg kou fam ik ahum pali ke laruk lamuhup,” ulug hiyag itfag angge famen Yosafat inowen fano ehek pibag fug.

⁵¹Welatfareg war atfagma Yosafat ino umbasi o pumbuk unuk Daud suwalfahon fam sal eneptuk latfag ambeg ar oho salfag. Salfagma amloho Yoram ikni ubalma ap suwon lahibag.

⁵²Ap suwon Yosafat inowen Yehuda inap fet enesugmen eneg mo ilig am wirig am turukmu nanggolop fimahen 17 atfagma hun Ahab amloho Ahazia ino Israel inap onowe suwon lahibag. Lahibareg o Samaria wereg lit Israel inap fet enesugmen eneg mo piren libag.

⁵³At ikni isinga men ap suwon Yerobeam menen siyag ane eneg til-wil laruk latfag hag toho Ahazia inowen oho NINIKNI Allahn siyag perukon eneg turukmu at umalikisi Israel inap oho at ombolim laruk lit siyag ane eneg turuk latfag.

⁵⁴Ikniyen turuk latfag hag toho amloho Ahazia inowen oho usangge Baal alukema orohole han kinangma sahung teg lit wel turuk latfag ane ino fahet Israel INIKNI Allah indi siyag atfag.