Read Angguruk Yali 1 RAJA-RAJA 3 Bible Online

1 RAJA-RAJA 3 - Angguruk Yali bible

1 RAJA-RAJA 3

¹Ap suwon Salomo inowen Mesir inap onowe suwon ahaloho hilibareg iyamal atfag. Salomo inowen inggareg ibam men Allah ibam men elehet o Yerusalem walinggoho wahuk pibahon arimano uwanma hiyap ino o pumbuk unuk Daud Ibam hondoko imbik watfag.

²Imbik watfag li Israel inap arimanowen Allah unuk wel turuk ibam wirig elegma saplangge punu keyen Allah fahet wam waroho hubu lahaptuk latfag.

³Salomo inowen NINIKNI Allah fahet indi haruk lit ikni Dauren hiyag itfag ane hikit toho turuk latfag angge famen aren oho saplangge punu keyen wam waroho hubu lahaptuk latfag.

⁴O Gibeon hubu lahaptuk ambeg humon weregma ap suwon Salomo inowen hundig-hundig Allah fahet wam teng-teng angge waroho hubu lahabik laruk latfag. Misihim sambil Salomo inowen Allah fahet hubu lahabuhuk ulug o Gibeon libareg

⁵hubanggo nohoruk lit nei og harukmen NINIKNI Allah ambeg waharukmu yet hibag. Yet harukmen Allahn ele hiyag utuk lit, ”Og nitmisi peruk lahenon ari haren heng napmihinmu Anden og hitmin,” ibag.

⁶Ari ibagma Salomo inowen ele uruk lit, ”An nikni Daud hamingmingangge ino Hat holohotma indi wirik toho wereg lit pikit ane eneg turuk latisimu Haren hindi haruk lit anggoloenam let turuk latikin. Haren hinggik kobog isa fug angge hindi harukmen eneg wereg lit, ’Hat hamloho misig hubalmangge welaruhu,’ ulug hiyag itikinon ino ketiya at ubalma ap suwon an welahi.

⁷Allah NIKNI, an nebe kabini reg lit nindi anggat teg eleg angge famen Haren nikni Daud ubalma an ap suwon lahap naptikin.

⁸Lahap naptikinmu an tu Hat humalikisi mumal eneptikinon anggolo winag isa fug toho werehon enesehelimu welahi.

⁹Ari fahet Hat humalikisi unubam alem weregma fanowon tu, siyahon tu ulug nindi anggat toho wereg lit mun ane man ane haloho emberuk laruhuken nindi wirikap napmihin. Nindi wirikap napmihin fug halug Hat humalikisi hum toho werehon aruma anden fet enesug lam fug teg laruhuk,” ibag.

¹⁰Salomo inowen ibag ane fahet NINIKNI Allahn fano heng nabehek pibareg

¹¹Salomo fam ele uruk lit, ”Haren amusun toho wereg lit mun angge man angge ninggikmu welalep perukon men, ap seliyon unusuruk ane men fahet heng nabuk fug angge alem haloho emberuk laruhuken nindi anggarap napmihin ulug heng nabehenma

¹²Anden heng nabehenon ari hikit toho og hitmin. Hat hindi anggat toho welamag ulug hindi wirikap hapminmu ap winon hat uwanma welatfahon men, fobik in amuhubon men misig oho hat hubabut hag toho welamuhup fug.

¹³Haren heng nabehen fuhon oho Anden sebe roho og huruhukmu hat holuk wereg lit mun angge man angge hinggikmu foroho lit palimu welaruhunon aben wel haptuk lamuhupmu ap suwon winon eke hat hag toho welamuhup fug.

¹⁴Hikni Daud inowen An nele holtuk latfag hag toho haren oho An nawene haharoho imbibahon ino hikit toho turuk lit Anden perukon eneg turuk laruhun halug Anden hineyap haptukmu amusun toho welaruhun,” ulug hiyag itfag.

¹⁵Ari ulug hiyag itfagma Salomo ino in atfareg an nohorukmu nei famen hiyag nerehek ulug oluk atfag. Oluk atfareg suhuloho o Yerusalem watfareg peti elma Allah Wene Numen haharehon kilabeg angge alukema in arik libareg Allahn fanowap nabehek ulug wam waroho hubu lahaptuk lit amingmingangge obog toho fahet seni esetfag.

¹⁶Misihim sambil hiyap yaying turukon piren ap suwon Salomo ambeg kibareg

¹⁷hiyap itano misihen hiyag utuk lit, ”Nikni, an men hiyap aru men ninibam misig wereg lit at o ino weregma anden numalik ap angge indag tarikik.

¹⁸Indag tarikikmu hup pirenam welatukukteg o hinahaneg angge hiyap aruwen oho umalik indag tarisi. Indag tarukuk li ap winon eke elegma nit piren nenemu eneg o ino welatukuk.

¹⁹Indag tarisireg hiyap tuwen hubanggo nohoruk lit hebel atukmen umalik ino amig pereloho war aha.

²⁰War ahama hup humanoho an tu nohorukmen hiyap aru in ahareg an numalik nalukeman hilak wahareg at alukema waling taruk lit at umalik warehon ino an nalukema yinggi fik waha.

²¹Yinggi fik wahama o sakan turukmu numalik ag mon tamin ulug in ahireg kim harukmen malik ino wareg laha. Hubet malik ino fuki roho kim harukmen an numalik indag tarikikon ino orohole hag laha fug,” ulug Salomo hiyag itfag.

²²Hiyag itfagma hiyap eke inowen ele uruk lit, ”Fug, nehe! Hat humalik war aha, an numalik aru oluk wereg,” ibagma hiyap ele tam ibahon inowen, ”Fug, nehe! Hat humalik war aha, an numalik aru oluk wereg,” ibag. Ari uruk lit ap suwon olohotman suwahal uruk latfag.

²³Suwahal urukmu ap suwon inowen ele uruk lit, ”Nangginoho? Ekeyen, ’Numalik oluk werehon aru, hat humalik warehon ari,’ ehekma ekeyen, ’Fug! Hat humalik war aha, an numalik oluk wereg,’ ehek,” ibareg,

²⁴”Karog og nirik maniyek,” ulug otsi hiyag isibagma karog eke ap suwon olohotma imbik watfag.

²⁵Imbik watfagma ap suwon inowen ele uruk lit, ”Malik oluk werehon aru pul ke pilang tilihipteg hiyap eke fimag fil og itlihip, eke fimag fil og itlihip,” ulug otsi hiyag isibag.

²⁶Hiyag isibagma malik oluk welatfahon ino isingan amloho fahet indi hibareg ap suwon fam ele uruk lit, ”Nikni, malik aru watlihip fug. Malik aru oluk angge hiyap tu og itmihin!” ibag. Ari ibagma hiyap eke inowen hiyag utuk lit, ”An namuwen hilamin fug, at amuwen hilamisi fuhen malik aru pul ke pilang tilihip!” ibag.

²⁷Ibagma ap suwon inowen ele uruk lit, ”Malik aru wabuk fug! Hiyap ele tam ehekon tu malik aru isinga werehen malik aru oluk angge og itlihip!” ulug hiyag isibag.

²⁸Ap suwonen alem halfag ane ino fahet Israel inap obog tohowen hol hibareg ap suwon ino fahet enekol hibag. Allahn Salomo indi anggarap turukmu alem ekeyon-ekeyon fano roho hale ferukmu yet haruk latfag.