Read Angguruk Yali 1 RAJA-RAJA 4 Bible Online

1 RAJA-RAJA 4 - Angguruk Yali bible

1 RAJA-RAJA 4

¹Salomo inowen Israel inap obog toho fet enesugmu

²otsi at let turukon ununuk tuma ul: Hun Zadok amloho Azarya ino Allah amingmingangge imam onowe welatfag.

³Hun Sisa umalikisi Elihoref men Ahia men suwesingga hahatuk inap welatfag. Ahilud amloho Yosafat ino ap suwon komo rurukon welatfag.

⁴Yoyada amloho Benaya ino ap sehen senehon onowe welatfag. Zadok men Abyatar men imam welatfag.

⁵Natan amloho Azarya ino kinang wal taneg senehon onowe welatfag. Imam Zabut hun Natan amloho ino ap suwon are welatfag.

⁶Ahisar inowen ap suwon ibam foroho latfag. Hun Abda amloho Adoniram inowen ap ininggik lisoho mingming eneptukon sen enesug latfag.

⁷Salomo inowen Israel kinang minggiri fibareg kinang wal taneg foroho lamuhup ulug ap nisanggowen in enepfag. Ap in enepfahon arimano wal tanehen mo ilig am wirig am turukmu pikalem eke fam eke fam ap suwon men ibam werehon men eneseher angge walug waharuk latfag.

⁸Kinang wal taneg forohowon ununuk tuma ul: Ben-Hur inowen tom Efraim foroho latfag.

⁹Ben-Deker inowen o pumbuk Makas, Saalbim, Bet-Semes, Elon-Bet-Hanan men foroho latfag.

¹⁰Ben-Hesed inowen o pumbuk Arubot men o Sokho men kinang Hefer obog toho men foroho latfag.

¹¹Ben-Abinadab hun Salomo ahaloho Tafat hilibahonen o pumbuk Dor punu walinggoho werehon foroho latfag.

¹²Ahilud amloho Baana inowen o pumbuk Taanakh men Megido men, o pumbuk Bet-Sean o Yizreel ik ambut fil o Sartan horogma kinang walinggoho werehon famen tulug o pumbuk Abel-Mehola men Yokmeam men foroho latfag.

¹³Ben-Geber inowen o Ramot-Gilead men o pumbuk hun Manasye amloho Yair inowen ondohowonen ondohowon inibam pumbuk men o Argob kinang Basan fam werehon ino men foroho latfag. O pumbuk suwon teng pirenman nubam hilag falfaliken 60 foroho latfahon arimano elehet walinggoho ohoma tembaga ineyon fam sok kuruk ambeg wirig latfag.

¹⁴Hun Ido amloho Ahinadab inowen o Mahanaim foroho latfag.

¹⁵Ahimaas hun Salomo ahaloho Basmat hilibahonen Naftali inap enengginang foroho latfag.

¹⁶Husai amloho Baana inowen Asyer inap enengginang men o Alot men foroho latfag.

¹⁷Paruah amloho Yosafat inowen Isakhar inap enengginang foroho latfag.

¹⁸Hun Ela amloho Simei inowen Benyamin inap enengginang foroho latfag.

¹⁹Hun Uri amloho Geber inowen Gilead kinang indam Amori inap onowe Sihon men Basan inap onowe Og menen ngi reg latfag ambeg ino foroho latfag. Ap ekeyen Yehuda kinang foroho latfag.

²⁰Hun Salomo weregma Yehuda inap men Israel inap men enebe ik yinggi saho ahik ayegma werehon mondeg hag toho wereg lit ik men suburu men anggolo naruk lit inindi enehiyeg toho welatfag.

²¹Salomo inowen ik Efrat famen tulug Filistin inap enengginang keyen Mesir kinang hili-hilimu o wal taneg ap suwon welatfag ambeg obog toho seneg latfag. Salomo oluk weregma ap aren sen enesug latfahon arimanowen ap suwonen imbibag ane hikit toho mun angge man angge likiya hupmu walug waharuk latfag.

²²Walug waharuk lit Salomo ibam welatfahon menen hup eke fam eke fam narukon ulug walug waharuk latfag angge tu: roti anggen sum teng obog sehelet obog 10.000 liter men, roti anggen lilibug tohon sum teng-teng angge 5.000 liter men,

²³wam sapi sei werehon numen men, wam sapi anggenma forohowon likin fumahen 20 men, wam domba teng uhan 100 men, wam rusa, kijang, rusa dandi men, suwe sei werehon men hup eke fam eke fam narukon ulug walug waharuk latfag.

²⁴Salomo inowen o pumbuk Tifsah ik Efrat hubula filen tulug o Gaza kinang obog toho seneg lit ap suwon o wal taneg welatfahon ki enesugmu o pumbuk walinggoho werehon men tog abuk fug angge at men mangno roho welatfag.

²⁵Salomo oluk welatfag li Yehuda inap men Israel inap men inindi yuwag toho wereg lit o Dan famen tulug Bersyeba fam ininggareg enengginang fam inibam wal taneg wit talug hele anggur men e ara sawe hag ahen men yag taruk latfag.

²⁶Salomo inowen tog aptukon fahet wam kuda kereta lisoho walug larukon teng obog sehelet obog 40.000 foroho lit otsi sehen senehon wam kuda fam lahalug larukon teng-teng angge 12.000 fet enesug latfag.[2]

²⁷Fet enesugmu kinang wal toho foroho latfag inap arimano wal tanehen pikalem misig-misig fam inikni Salomo men at men ambiyeg suburu naruk latfahon menen likiya hupmu naruk angge walug waharuk lit mun angge man angge enesehet teg angge obog toho og isa waharuk latfag.

²⁸Og isaruk lit it wal taneg hiyag isaruk latfag ane hikit toho wam kuda ap lahalug larukon men kereta lisoho walug larukon men fahet oho roti anggen men hoholangge men enembeg wal toho walug waharuk latfag.

²⁹Ari turuk latfagma Allahn Salomo indi anggarap turukmu mun ane man ane oluk teg lit alem obog toho fahet indimu fano roho wenggeltuk latfag.

³⁰At indi anggat tehon men ap yali fil werehon obog toho men Mesir inap obog toho men wirim teg latfag fug.

³¹Aren alem obog toho wenggeltuk ane men Ezrahi ahun Etan, Mahol umalikisi Heman, Kalkol, Darda men ap winon obog tohowen wenggeltuk ane men wirim teg latfag fugmu at unuk o pumbuk kema-kema walinggoho welatfahon sehelimu su atfag.

³²Salomo inowen fano roho welamuhup ulug komo eneptuk lit alem wal-wal werehon il misig-misig kong heheg hiyag isaruk ane teng-teng angge 3.000 men sini yunggultukon oho teng-teng angge 1.005 men milal enepfag.

³³Milal eneptuk lit e sahi tom Libanon fam werehon men e helep falma wilip atukon men e winon eke hag eke hag werehon men, wam mene suwe pisanggo ikan men fahet hiyag isaruk latfag.

³⁴Ari roho Salomo inowen indi anggat toho hiyag isaruk ane fahet ap suwon kinang atogman atogma welatfahonen hol hibareg Salomoen milal enebukag ulug onotsi mon enepfagma Salomo ambeg laruk latfag.