Read Angguruk Yali 1 RAJA-RAJA 6 Bible Online

1 RAJA-RAJA 6 - Angguruk Yali bible

1 RAJA-RAJA 6

¹Israel inap o Mesir kinang famen wilip atfareg weregman mo ilig am wirig am turukmu teng num fimahen 480 atfagma pikalem pirenehon unuk Ziw fam Salomo inowen Allah ibam wituk ane ak tibag. Ak tibag li Salomo Israel inap onowe suwon lahapfahon mo uhan atfag.

²Allah ibam Salomo inowen witfahon ino wirimangge ilihig wirim tibahon il teng misig 27 meter, nunggulig wirim tibahon il sohowen 9 meter, lahabeg wirim tibahon il nunggul huriken 14 wirim tibag.

³Allah ibam sokolma o toron eke witfahon wirimangge ilihig wirim tibahon il fuwaben, nunggulig wirim tibahon Allah ibam wirim tibahon hikit toho il sohowen wirim tibag.

⁴Allah ibam ino ubahat fene keyenteg fo ribag ke e abiron fam wiri fil libag.

⁵O suwon witfahon ino fuma fil eke, fuma fil eke, ambol fil oho o toron ahandip heheg wiri fibag. O toron wiri fibahon ino altap toho witil lahibag. Altap toho witfahon arimano wal taneg wirimangge lahabeg wirim tibahon il piren wirim tibag.

⁶Altap apmon wirimangge nunggulig wirim tibahon il piren, altap pulmuwon il piren abirangge misig minggiroho, altap palimuwon il hinahan wirim tibag. O toron ino wituk lit pila o suwon fam keyenteg teg laruhu rohon fano roho ahandip teg lamag ulug ubahat sel ke humbat ware fibag.

⁷Pila arimano e sahi fam eneg wiri fibag. O toron witfahon ino altap apmon fam sok ele ik ambut fil yende fibag. Altap pulmuwon men palimuwon men laharukon fahet yal wiri fil lahibag. O suwon ino ungga apmane e sahi kahalfahon fam altap toho wiri fil libag. Allah ibam ari roho wituk lit helep fele ribag ambehen ayuhuk fano roho fele ribareg walug watfagma o ino wituk ambeg inowen helep simbuk men, kik turuk angge winon ine angge besi fam wirihon men fam kik turuk elehen aplohok hum toho turuk latfag fug. Ari roho wituk lit Salomo inowen Allah ibam ino obog toho wiri fibag.

¹¹Wiri fibagma NINIKNI Allahn Salomo hiyag utuk lit,

¹²”O aru wituk lahen ane fahet An nele tot hiyag hitmin: Anden numalikisi hiyag isarukmu haharoho imbibahon hikit toho haren turuk lit Anden hat hiyag huruhuk ane embesemin puk fug angge holtuk laruhun halug Anden hikni Daud fam sali emberikikon hikit toho hubam turuk laruhuk.

¹³Ari turuk lit An numalikisi Israel inap ninggik kobog isa fug angge it sehelimu welaruhuk,” ibag.

¹⁴Salomo inowen Allah ibam ino ebe obog toho wiri fibareg

¹⁵o ino ubahat undamale ke obog toho pila famen tulug e sahi fam altap toho witil ungga apma imbik lahibag. We pila eneg e mur fam altap toho wiri fibag.

¹⁶O ino ambiyang fil pila famen tulug ungga fam e sahi ubahat fam hili waroho wiri fibag. Hili ino undama fil unuk Mondabi Fanoma suwalfag. Mondabi Fanoma suwalfag ambeg ino wirimangge ilihig il sohowen wirim tibag.

¹⁷Hili ino sel fil unuk te Hili Suwon suwalfag ambeg ino wirimangge ilihig il num fimahen 18 meter wirim tibag.

¹⁸O ubahat helep fam witfahon obog toho ino undama fil e sahi fam helep mapmu roho wiri fibahon arimano fene e walahen owil fanowon wirim toho hesengge oho fibag.

¹⁹Hili unuk Mondabi Fanoma suwalfag ambeg ino peti elma Allah Wene Numen haharehon kilabehon ino undama foroho lamuhuk ulug wiri fibag.

²⁰Hili ino undama fil wirimangge ilihig wirim tibahon men nunggulig wirim tibahon men lahabeg wirim tibahon men ambi roho il sohowen wirim tibag. Hili ino aluke fil Allah fahet hubu lahaptuk ambeg e sahi fam wiri fibag. Sok hili ino fam kuruk ambeg hele ili ruruk angge sok fimahen fimag ilili fibag. Allah ibam undamale ke obog toho men hili unuk Mondabi Fanoma suwalfag ambeg ino men hubu lahaptuk ambeg men arimano ili ruruk angge emas fam obog toho hililip toho lombog tibibag.

²³Hili ino undama fil e pibe fam malaikat[3] piren ilit toho witfag. Malaikat piren ilit toho witfahon itano enebe ambi roho wiri fibareg wirimangge lahabeg wirim tibahon il uhan wirim tibag. Malaikat itano wal taneg eneherabul piren wirimangge yat toho wirim tibahon il piren, atog fuman fuma wirim tibahon il uhan wirim tibag.

²⁷Malaikat itano hili undamon ino pik-pulmu unduhuk fibag. Pulmu unduhuk feruk lit eneherabul wiriligmu malaikat misig aherabul fimahen ubahat fimag filon fam tung tegma malaikat pirenehon aherabul fimahen ubahat fimag filon fam tung teg latfag. Ari roho tung tegma eneherabul atog fimag-fimag o ilonggo fil ambimu tung teg latfag.

²⁸Malaikat piren itano ili ruruk angge fam enebene hililip toho lombog tibibag.

²⁹Hili ino undama filet sel filet ubahat fene walinggoho malaikat eneherabul wilibihon men uluwa men e walahen owil fanowon men wirim toho hesengge oho fibag.

³⁰O ino pila fene obog toho ili ruruk angge emas fam hililip toho lombog tibibag.

³¹Hili unuk Mondabi Fanoma suwalfag ambeg kurukon sok ino e pibe fam wiri fibag. Sok ino kembilik fima-fima horog toho wiri fibareg pulmu yat toho wiri fibag. Sok ele misihon famen piren wiri fibahon itano fene malaikat eneherabul wilibihon men uluwa men e walahen owil fanowon men wirim toho hesengge oho fibareg ili ruruk angge fam sok fene obog toho hililip toho lombog tibibag.

³³Allah ibam kurukon sok sel filon oho kembilik e pibe fam wiri fibag.

³⁴Sok sel filon ino oho ele misihon famen piren wiri fibahon itano e mur fam wituk lit aben husurukmu yinggil atuk lamag ulug pul ke ahandip toho wiri fibag.

³⁵Sok itano fene oho malaikat men uluwa men e walahen owil fanowon men wirim toho hesengge oho fibareg ili ruruk angge fam hililip toho lombog tibibag.

³⁶Allah ibam ino owahalma ap palu atuk lamuhup ambeg ulug helep wirimangge lahabeg wirim turukon il hinahan men e mur uwag yinggihon men fam altap toho witil-witil laharuk lit o ino elehet walinggoho kila fibag.

³⁷Salomo ap suwon lahapfag liyen mo uhan libagma pikalem pirenehon unuk Ziw fam Allah ibam wituk ambeg olun ak tibibag.

³⁸O ino witukmen eneg mo sabiren libagma o ino wiruhuk pibag ane hikit toho obog toho wiri fibag. Salomo ap suwon lahapfag liyen mo nanggoloben libagma pikalem likinon unuk Bul fam o ino feteng toho wiri fibag.