Read Angguruk Yali 1 RAJA-RAJA 7 Bible Online

1 RAJA-RAJA 7 - Angguruk Yali bible

1 RAJA-RAJA 7

¹Hun Salomoen ibam witukmen eneg mo ilig am wirig am turukmu nuwalen 13 atfagma obog toho wiri fibag.

²Wiri fibareg o undama hili suwon eke unuk Libanon Ohi suwalfag. Hili ino yat toho wirim tibahon il teng piren, horog toho wirim tibahon il teng misig, lahabeg wirim tibahon il nuwal fiman wirim toho wiri fibag. Wituk lit hili unda fil e sahi uwag saraban uhan iraroho hutuk tibil libareg e uwag emberimu e sahi ngalu yinggi fik lahibag.

³Ngalu imbik lahibahon palimu e sahi seng tohon teng misigmen nubam hilag num fimahen fam pila palimuwon wiri feruk lit saraban uhan iraroho wiri fil libag.

⁴Hili ino pikit fil hare fil apma oho, pulmu oho, palimu oho keyenteg hinahan-hinahan fo ril libag.

⁵Fo ril libareg hili ino fuma-fuma wal taneg sok hinahan yente fibag. Keyenteg fo ril laruk lir oho sok yente feruk lir oho indit uhan toho wiri fibag.

⁶Libanon Ohi suwalfahon hili ino wiri fibareg o misig eke witfahon unuk E Uwag Pini suwalfag. O ino yat toho wirim tibahon il teng misig, horog toho wirim tibahon il nuwal fiman wirim toho wiri fibag. Wiri fibareg o ino sokolma o sema eke ahandip toho wiri femin ulug e uwag hutuk tebelug yal pog tibibag.

⁷E Uwag Pini ino wiri fibareg Ap Suwon Hur Atuk Ibam suwaleg ambeg wiri fibag. Wiri feruk lit pilaman ungga fam e sahi altap toho wiri fibag. O ino ap suwonen unggum kong turuk ambeg ulug unuk salikap toho Unggum Pini suwaleg latfag.

⁸O itano wiri fibag ane hikit toho Unggum Pini ambol fil silimu at inggareg fahet o eke witfareg Mesir inap onowe ahaloho aren hilibahon fahet humiya wit itfag.

⁹O Salomoen witfahon arimano men elehet walinggoho ohowon men pilaman unggama helep fanowon fima-fima seng tehon fam wirig latfag.

¹⁰O anduli fahet helep fanowon suwon yat toho wirim tibahon il hinahan tohon men uhan tohon men olunmu yaho fibag.

¹¹Yaho fibareg helep fano roho seng tehon uwag witil lahalug emberimu e sahi ngalu yinggi fik lahibag.

¹²Yinggi fil lahibareg o arimano walinggoho elehet waruk lit helep hinahan men e sahi paleg misig men altap heheg witil laharuk latfag. Elehet wibahon ino hag toho Allah ibam sokolma o sema eke ahandip toho wiri fibareg elehet Allah ibam walinggoho wibahon oho ari hag toho waruk latfag.

¹³Welatfareg ap suwon Salomoen hun Hiram o Tirus ahun ino wol tibag.

¹⁴Hiram isinga unggul unuk Naftali hiyap ino yuwog weregma o Tirus ahunen hilibareg amloho Hiram indag tibag. Hiram ino tembaga ineyon fam wituk ahun wereg latfag. At indi anggat teg lit mun angge man angge indimuwen timin perukon hikit toho inggik fano roho wituk latfag. Hiram hun Salomoen wol tibagma ambeg watfareg Salomoen hiyag itfag ane hikit toho mun angge man angge tembaga fam wit utuk latfag.

¹⁵Wit utuk lit uwag piren lahabeg wirim tibahon il likinen wirim toho wiri fibag. Uwag itano walinggoho wirim haruk lit il falfaliken wirim toho witfag.

¹⁶Witfareg uwag ambiyangma tembaga fam inale hutuk tohon lahabeg wirim turukon il piren wirim toho wiri fibag.

¹⁷Inale piren itano walinggoho wal taneg sohomangge sabiren yiko keleg tibibag.

¹⁸Keleg tibibareg e owil hag toho welaruhu ulug sohomangge itano fam pali filet apma filet yanggila anggen hahon tembaga fam wirihon teng sabiren 200 aliliyangge iraroho lahabil libag. Ari obog toho tibibareg uwag piren itano Allah ibam sokolma o sema eke ahandip toho witfahon alukema hutuk tibibag. Hutuk tibibagma uwag inggik pikit fil hutuk tibahon ino unuk Yakhin,[4] hare fil hutuk tibahon ino unuk Boas[5] ulug suwalfag.

²³Ari tibagma Hiram inowen tembaga fam kou walu warehon humon eke lale fibareg unuk Ik Ahum suwalfag. Kou ino atog fuman fuma wirim tibahon il fuwaben, walinggoho wirim tibahon il nuwal fimahen, lahabeg wirim tibahon il piren wirim toho lale fibag.

²⁴Kou ino umbangguwag walinggoho aliliyangge hubut hahon iraroho topno ribil libag. Topno ribil laruk lit il misig-misig fam hubut hahon numen topno reberuk lit tot apma oho ari hag toho hubut hahon iraroho topno ribil libag. Hubut hag angge arimano men kou ino men amu-amu laluk fug angge misigmu mangno roho lale fibag.

²⁵Lale fibareg wam sapi hag angge tembaga fam witfahon nisanggowen unduhuk fibareg enemberimu kou humon ino imbibag. Wam sapi onorohole yali fil hinahan, hubula fil hinahan, ik eleruk fil hinahan, ik ambut fil hinahan yet teg latfag.

²⁶Kou ino ine amag ulug onggorik men umbantu men ambi roho wirimangge inggik misig wirim toho wiri feruk lit e owil hag toho welaruhu ulug inggapkap sel fil simbuk toho lale fibag. Kou ino ik ololop toho hinangguruk lit kubag teng-teng angge 40.000 liter hinangguk teg latfag.

²⁷Kou ino wiri fibareg Hiram inowen tembaga fam kereta lisoho walug laruk angge numen wiri fibag. Kereta arimano yat toho wirim tibahon men horog toho wirim tibahon men ambi roho il piren, lahabeg wirim tibahon il misig wirim toho wiri fibag.

²⁸Kereta arimano umbantumu tembaga ineyon keleben angge hag toho topno ribil libag.

²⁹Keleben angge fene hesenggengge olomene hahon men wam sapi hahon men malaikat eneherabul werehon men ilit toho oho fibag. Ilit toho oho fibahon apma oho emberimu oho sohomangge teltuk angge fam teloho topno ribibag.

³⁰Kereta numen arimano wal taneg unuyug imbiloho laruk angge uhanet tembaga fam wiri fibag. Unuyug piren-piren tembaga paleg misihen ahandip teg latfag. Kereta arimano indit fuma-fuma uwag horohon tembaga fam wirihon fene hesenggengge paloho hutuk tibibareg kou timi roho wiri fik lahibag.

³¹Kou timi roho emberuk ambeg ulug sohomangge humon yiko kereta emberimu mase ribik lahibag. Sohomangge arimano lahabeg wirim tibahon il misig wirim toho yihik fibareg enebene hesenggengge pale fibag. Sohomangge arimano kereta enemberimu yinggig lit inggapkap apma filon eneg kereta fam kilabeg latfag. Sohomangge arimano yinggig ambeg indit uhan welatfag.

³²Kereta unuyug uhan itano kereta tog aptuk ane fahet lisoho walug larukon hag toho wirig lit unuyug fam wereg anggeyet unuyug piren wal toho ahandip turuk anggeyet tembaga fam wirig latfag. Unuyug arimano lahabeg wirim turukon il misig pul ke minggiroho wirim toho wirigmu unuyug wal taneg piren ahandip turuk angge kereta apmane topno reg latfag.

³³

³⁴Kou kereta emberimu walug larukon timi roho unduhuk ambeg ulug uwag horohon tembaga fam wirihon kereta indit fuma-fuma pilabehon arimano kereta men misigmu mangno roho wiri fibag.

³⁵Kereta emberimu sohomangge lahabeg wirim turukon inggik piren wirim tibahon walinggoho yinggi feruk lit sohomangge topno reg ambeg men senetuk angge eke hag eke hag kereta fam ahandip tibibag.

³⁶Kereta umbantumu oho unuwag timi roho unduhukon enebene oho aliliyangge malaikat eneherabul werehon men olomene men palem ahen men ilit toho wiri fibareg walinggoho sohomangge hahon topno ribibag.

³⁷Ari roho hun Hiram inowen kereta numen arimano eke suwon eke toron wiri fuk fug angge we ambi roho wiri fibag.

³⁸Ari obog toho tibibareg Hiram inowen kereta numen arimano wal taneg fahet tembaga fam kou ik hinanggoho foroho angge wiri fibag. Kou arimano atog fuman fuma il piren wirim toho wirigmu ik ololop toho hinangguruk lit kubag teng-teng angge 800 liter hinangguk teg latfag.

³⁹Kou arimano oho wiri felug kereta wal taneg enemberimu imbik lahibareg Allah ibam ik ambut fil fuwaben, ik eleruk fil fuwaben imbibag. Imbibareg Ik Ahum suwalfahon ino Allah ibam kurukon wiriko fil unduhuk fibag.

⁴⁰Unduhuk fibareg Hiram inowen tembaga fam tebuwag men kou mep hinangguruk angge men fa men lalfag. Hiram inowen ap suwon Salomoen hiyag itfag ane hikit toho NINIKNI Allah ibam iraham emberuk angge obog toho wiri fibag.

⁴¹Wiri fibag angge arimano obog toho tuma ul: Uwag piren men, inale pumangon piren men, sohomangge inale walinggoho keleg toho yihikon piren men,

⁴²yanggila anggen hahon sohomangge itano fam apma fil oho pali fil oho iraroho aliliyangge lahabil libahon teng nuwal fimahen 400 men,

⁴³kereta lisoho walug laruk angge numen men, kou ik hinanggoho foroho angge kereta itano fam emberukon numen men,

⁴⁴kou humon unuk Ik Ahum suwalfahon men, kou emberuk angge wam sapi nisanggowen men,

⁴⁵kou mep hinangguruk angge men, tebuwag, fa men wiri fibag. Wiri fibag angge arimano obog toho Hiramen tembaga fam wiri felug orohole umbagpag turuk laruhu ulug fano roho umaho fibag.

⁴⁶Ap suwon Salomo inowen ibag ane hikit toho Allah ibam iraham emberuk angge arimano wiri fuhuk ulug ik Yordan ayegma kinang huluwon wereg ambeg o Sukot men Sartan men honggolegma libareg ine angge tembaga ino indokma wiratfagma ik hag atfahon arimano emberuk angge unubabut wal-wal amag ulug kinang fam kubag wirim toho lalfahon elma hilili ferukmu ine atfareg emberuk angge eke hag eke hag atfag.

⁴⁷Allah ibam iraham imbibag angge tembaga fam witfahon arimano anggolo mondoko werehen Salomo inowen anggin wirim haruk angge fam wirim tibag fugmu ap obog toho enepeleg teg.

⁴⁸Ap suwon Salomoen ibag ane hikit toho NINIKNI Allah ibam foroho angge emas umbagpag turukon fam wiri fibag. Wiri fibag angge arimano obog toho tuma ul: Hubu lahaptuk angge men, e tuwalehon Allah olohotma roti emberuk ambeg men,

⁴⁹iral emberuk angge hili alukema Mondabi Fanoma suwaleg ambeg unduhukon pikit fil fuwaben, hare fil fuwaben, hesenggengge e owil hahon iral emberuk angge uwag fam topno rehon men, iral men, fa indok anggen hambo rurukon men,

⁵⁰kou mep hinangguruk angge, habo, ikag, tebuwag, indok anggen kilaboho walug laruk angge men, sok Mondabi Fanoma kurukon umbangguwagma ahandip turuk angge men, sok Allah ibam kurukon umbangguwagma ahandip turuk angge men arimano obog toho emas umbagpag turukon fam wiri fibag.

⁵¹Ari roho witukmen eneg Salomoen NINIKNI Allah ibam obog toho wiri fibag. Wiri fibareg ikni Dauren Allah fahet imbibahon umbagpag turuk angge perak men emas men Allah wel turuk lit wan teg angge winon men Allah ibam fano-fano angge foroho ambeg imbik kibag.