Read Angguruk Yali 1 RAJA-RAJA 8 Bible Online

1 RAJA-RAJA 8 - Angguruk Yali bible

1 RAJA-RAJA 8

¹Salomo inowen Allah ibam obog toho wiri fibareg Allah Wene Numen haharehon peti elma kilabeg angge o pumbuk Daud Ibam tom Sion fam werehon ino wak lulteg Allah ibam fam imbik lulen o Yerusalem nambeg watlihip ulug Israel inap onowesi ap suwon-suwon men o wal taneg fet enesug inap men obog toho wol enepfag.

²Wol enepfagma pikalem sabiron unuk Etanim[6] fam Allah wel turuk sambil it obog toho Salomo ambeg palu arik watfag.

³Israel inap onowesi obog toho palu arik watfagma imam Allah ibam foroho inap arimanowen peti ino paya roho walug watfag.

⁴Imam arimano men Lewi inap menen peti inowet o sabo Allah fahet wirihonet fano-fano angge o saboma foroho latfahon arimano obog toho Allah ibam imbik lul ulug walug watfag.

⁵Walug watfagma ap suwon Salomo men Israel inap obog toho men peti ino alukema unduhuk lit wam domba men sapi men teng-teng angge winag ha fug toho Allah olohotma waroho yalfag.

⁶Yalfareg imam arimanowen peti ino Allah ibam walug kibareg o hili undamon Mondabi Fanoma suwalfag ambeg ino malaikat piren unduhuk fibahon itano eneherabul apma imbik kibag.

⁷Peti ino e payahen itanowet angge apma weregma malaikat itano eneherabul peti ino palimu wiriloho hondo reg latfag.

⁸E payahen itano hili Mondabi Fanoma suwalfag ambeg weregma ap hili ino sel fil unduhuk lit yet harukmen e payahen itano ambiyang yat tehen inam teg latfag. Ari reg latfag ambeg ino ketiya oho wereg.

⁹Peti ino elma nungge-nungge winon elegma Allah Wene Numen helep piren fam hahatfahon itano Musan tom Sinai alman peti elma kilabe fibahon itano eneg wereg latfag. Helep piren itano fam hahatfag ane Israel inap o Mesiren wilip atukmu NINIKNI Allahn it unubam An numalikisi welamuhup ulug sali imbibahon ino hikit toho haharehon welatfag.

¹⁰Imam arimano NINIKNI Allah ibamen wilip atukmu itano hina kik watfareg Allah ibam o ele ke keleg teg latfag.

¹¹NINIKNI Allah hina sehelimu wambik watfareg umbagpag turukmu o ino ele ke mondabi seleg teg latfagma imam arimano Allah ibam kuk fug tehen yabuk wituk latfag fug.

¹²Ari sambil Salomo inowen ele uruk lit, ”Allahn mo poholma mondabi imbibareg An hik tegma welaruhuk pibag ane hikit toho hirahoma wereg.

¹³Ketiya anden Hat mondabi welaruhun ambeg ulug o fanowon aru wiri ferikik,” ibag.

¹⁴Ari ibareg Salomo ino aluke hebel atfareg Israel inap obog toho unduhukmu Allah unuk fam hi enepfag.

¹⁵Hi enepfareg ele uruk lit, ”Israel ninap NINIKNI Allah wel turuk lamul. Aren nikni Daud fam hiyag utuk lit, ’Anden numalikisi Israel inap o Mesiren hondog eneplug wilip atik iyag liyen weregman eneg An nunuk wel naptuk ibam eke wibuhup ulug Israel kinang walinggoho werehon fam o pumbuk misig fam oho hiyag isarikik fug. We numalikisi Israel inap fet enesug laruhun ulug Anden hat Daud mumal haptikik,’ ulug sali imbibag. Allahn ibag ane ari hikit toho tirisi,” ibag.

¹⁶

¹⁷Ibareg nin eke hiyag isaruk lit, ”Nikni Daud indimuwen Israel ninap NINIKNI Allah unuk wel turuk ibam wiruhuk pibag angge famen

¹⁸Allah at ubam ele uruk lit, ’Haren peruk lahen ane ari fano wenggel haruk lahen angge famen

¹⁹haren wiruhun fug. Hamloho haren enderuhunon inowen An nunuk wel naptuk ibam wiruhu,’ ulug Daud fam sali imbibag.

²⁰Allahn sali imbibahon ino hikit toho tirisimu an nikni Daud ubalma Israel inap fet enesug laruhuken ap suwon laharikikteg Israel ninap NINIKNI Allah wel turuk ibam tu witikik.

²¹O tu wituk lit peti elma Allah Wene Numen haharehon kilabeg angge ino undama foroho lamuhuk ulug hili eke wiri ferikik. NINIKNI Allahn nunumbasi o Mesiren hondog eneplug wilip atuk lit sali imbibag ane ino hahatfahon peti ino undama kila fibahon wereg,” ulug hiyag isibag.

²²Hiyag isibareg Israel inap obog toho iniline Salomo ino Allah fahet hubu lahaptuk ambeg alukema in arik libareg sembahyang imin ulug inggik pohol fil leho lit,

²³”Israel ninap NINIKNI Allah, Hat hahon poholma oho kinangma oho misig wereg eleg. Hat hamingmingangge inindi piren teg eleg angge hele holtukon arimano hindi enesug lit sali unubam emberikinon hikit toho turukmen eneg welahen.

²⁴An nikni Daud fam hiyag itikin ane ino hine roho seneg lit Hat hambilik famen irikinon hikit toho tirikin ane o yoho inam aha.

²⁵Israel ninap NINIKNI Allah, Haren nikni Daud fam nin hiyag utuk lit, ’Haren An nele holtuk lahen hag toho hat humalikisiyen oho An nele holtuk lit welamuhup halug Anden hat humalikisi welamuhubon arimano ninggik kobog isa fug angge welaruhukmu iren Israel inap fet enesugmen eneg welamuhup,’ ulug nikni Daud hiyag itikin.

²⁶Ari ulug Hat hamingmingangge an nikni Daud hiyag itikin ane ino ketiya inamap timihin.

²⁷Allah Haren we tik-tem toho kinangma welaruhuk peruk lahen? Pohol obog tohowen Hat hebe waling hasug lam fug tegma o anden wiri ferikikon toron tuwen oho waling hasug lam fug teg.

²⁸NIKNI Allah, an hamingmingangge tuwen Hat hubam sembahyang uruk lit heng haptuk lahiyon hebeloho yet niya ma! An nele ine roho o yoho Hat holohotma uruk lahiyon tu hol hamihin.

²⁹An nunuk wel naptuk lamuhup ulug hiyag nisarikin ibam tu Haren likiya hupmu foroho lit welaruhun ulug heng haptuk lahi. An Hat hamingmingangge aru men humalikisi Israel inap menen o aruwen Hat hubam sembahyang uruk lamuhukmu[7] Hat poholma welahenonen nenele holtuk lit niren siyag ane turukon elehap turuk laruhun.

³⁰

³¹Ap ekeyen ap eke fam siyag ane tehek urukon ino Hat fahet hubu lahaptuk ambeg o tu werehon alukema hondoholug wamuhupmu ap inowen siyag ane nubam uruk lahebon tik-tem toho tirikik fug ulug Hat holohotman fag turuk laruhu halug

³²Hat poholma welahenonen at ele uhuwon holtuk lit Hat hamingmingangge alem unubam werehon haloho emberuk laruhun. Siyag ane turuk inap arimano Haren hebeloho alem siyahon unubam emberuk laruhun. Fano ane turuk inap arimano Haren enehap siye eneptuk lit hebeloho fano ane unubam emberuk laruhun.

³³Hat humalikisi Israel inap arimanowen Hat holohotman siyag ane turukon ari famen ap seliyonen mulangge unusuruk lamuhupmu suhuloho Hat hambeg waharuk lamuhupteg Hat hunuk wel habul ulug o aruwen sembahyang uruk lamuhup halug

³⁴Hat poholma welahenonen it enele holtuk laruhun. Holtuk laruhunteg Hat humalikisi Israel inaben siyag ane turukon elehap turuk lit suhuloho kinang unumbasi og isarik inahon ino fam hondog eneplug waruhun.

³⁵Iren Hat holohotman siyag ane turukon ari fahet Haren osit poholman pilabik waharuk laruhun fugmu it arimano Allahn apmayap neneptisimu niren siyag ane turukukon embesehe ulug eneluke Hat hibam tu fil hebel atuk lit hubam sembahyang uruk lamuhup halug

³⁶Hat poholma welahenonen it enele holtuk lit it men onowesi suwon menen siyag ane turukon elehap turuk laruhun. Haren pikir ane turuk lamuhup ulug komo eneptuk lit kinang Haren humalikisi ngi amuhup ulug og isarikinon ino fam osit pilabik waruhun.

³⁷O pumbuk tu fam suburu obok men, hom inggila watuk ane men, suburu inggila puglengge urukon men, heren sunggabi ayeg olokon men, sobolim men, ap seliyonen o pumbuk walinggoho kilap eneptukon men, ouk alem siyahon nungge-nungge it unubam atukmu

³⁸ap misihen ano Hat humalikisi Israel inap obog toho aruman ano inindi man-man anggin toho wenggeltuk ane Allah fag toho hiyag umul ulug ininggik o aru fil leho lit Hat hubam sembahyang uruk lamuhup halug

³⁹Hat poholma welahenonen it enele holtuk lit let enepmin ulug iren siyag ane turukon elehap turuk laruhun. We Haren eneg ap obog toho inindimu wenggeltuk ane holuk teg lit iren siyag ane fano ane turukon Haren lisoho unubam lombohap eneptuk laruhun.

⁴⁰Ari roho tuhun ane fahet kinang nunumbasi og isarikinon ino fam it arimano onoluk wereg lit Hat fahet enekol toho welamuhup.

⁴¹Ap pohon eke Hat humalikisi Israel inap fuhon famen Hat suwonen fano ane hinggik hine roho turuk lahen ane fahet holuhureg Hat hunuk wel habuhuk ulug ibam yatman waruhureg o aruwen Hat hubam sembahyang uruk laruhu halug

⁴²

⁴³Hat poholma welahenonen at ele uhuwon hol hahunteg ap pohon inowen Hat hubam heng habuhu ane hikit toho turuk laruhunmu ap kinangma werehon obog tohowen Hat hunuk onoluk toho wereg lit humalikisi Israel inap Hat fahet enekol toho wereg hag toho ir oho enekol toho welamuhup. It arimanowen o anden witikikon aru Hat hunuk wel haptuk ambeg wereg ulug inindi anggat toho welamuhup.

⁴⁴Haren humalikisi unubam ap seliyon unusik lahup ulug hiyag isaruk laruhunmu wilip amuhupteg o kema-kema wereg lit o pumbuk Haren mumal tarikinon men o anden Hat hunuk wel haptuk ibam witikikon aru fil hebeloho yet haruk lit Hat hubam sembahyang uruk lamuhup halug

⁴⁵Hat poholma welahenonen iren sembahyang uruk lit heng haptuk ane holtuk lit it inibil atuk laruhun.

⁴⁶Ap obog tohowen siyag ane eneg turuk angge re humalikisiyen Hat holohotman siyag ane turuk lamuhupmu Haren it unubahet holok toho wenggel haruk lit ap seliyon ininggikmu hik isaruk laruhunmu it arimano ininggik hele waroho ap seliyon wereg ambeg yatma horogma og eneptuk lamuhup.

⁴⁷Ininggik hele waroho welamuhup ambeg arimanowen inindi yuwag aruhumu niren Hat hele ying haptuk lit siyag ane eneg turukuk ulug hebeloho Hat hubam sembahyang uruk lamuhup.

⁴⁸Inindi men enebe obog tohowen Hat halukema wamuhupteg kinang nunumbasi og isarikinon men o pumbuk Haren mumal tarikinon men o Hat hunuk wel haptuk ibam witikikon aru fil yet haruk lit Hat hubam sembahyang uruk lamuhup halug

⁴⁹Hat poholma welahenonen iren sembahyang uruk lit heng habuhup ane holtuk lit let eneptuk laruhun.

⁵⁰Iren siyag ane turukon Haren elehap turuk lit Hat hele ying haptukon hambolmayap turuk laruhunteg ap seliyon inindi kahal eneptuk laruhunmu humalikisi Israel inap arimano inindi enesug lamuhup.

⁵¹Haren Israel inap o Mesir siyahap enepfag ambehen hondog eneplug wilip atik inag angge re it arimano humalikisi Haren tohon wereg.

⁵²Haren an hamingmingangge men humalikisi Israel inap men kim nisaruk lit niren nenele ine roho heng haptuk lamuhukon Haren likiya hupmu holtuk laruhun.

⁵³NIKNI suwon Allah, Haren nunumbasi o Mesiren hondog eneplug wilip atuk lit hamingmingangge Musa feneyen hiyag isinahon hikit toho o pumbuk obog toho kinangma werehon enesehelimuwen Israel inap eneg An numalikisi welamag ulug eneko imbinag,” ulug Salomo inowen sembahyang Allah fam ibag.

⁵⁴Salomo ino Allah fahet hubu lahaptuk ambeg alukema elenggen fam hur atfareg inggik pohol fil leho lit Allah fam sembahyang obog toho ibareg in atfag.

⁵⁵In atfareg ele ine roho Israel inap arimano obog toho Allah unuk fam hi eneptuk lit,

⁵⁶”NINIKNI Allahn amingmingangge Musa feneyen sali imbibahon hikit toho umalikisi Israel inap kel taruk ambeg hiyag isibag ane fahet At wel turuk lahe. Aren fano ane fahet sali imbibahon hikit toho il misig umbusuk fug angge obog toho teko larisi.

⁵⁷NINIKNI Allahn nunumbasi let enepfag hag toho nir oho inggik kobog nisa fug angge let neneptuk laruhu.

⁵⁸Aren ninindi og neneptuk laruhumu Aren peruk ane roho likiya hupmu turuk lit nunumbasi unubam hiyag isibag ane haharoho imbibahon arimano hikit toho turuk lamuhuk.

⁵⁹NINIKNI Allah fam heng tihi ane Aren hundig-hundig wenggel haruk lit an At amingmingangge men umalikisi Israel hinap men niren likiya hupmu nenesehet teg angge hikit toho let neneptuk laruhu.

⁶⁰Let neneptuk laruhumu o pumbuk obog toho kinangma werehon arimanowen we Allah eneg NINIKNI weregma At hahon winon eke wereg eleg ulug onoluk toho welamuhup.

⁶¹O yoho tu turuk lahep hag toho fobik oho hinindi piren teg eleg angge NINIKNI Allah men mangno roho welamuhup. At awene holtuk lit hunumbasi komo enepfag ane roho hikit toho eneg turuk lamuhup,” ulug Salomo inowen Israel inap hi enepfag.

⁶²Israel inap hi enepfareg ap suwon Salomo men Israel inap obog toho arimanowen NINIKNI Allah olohotma wam waroho esetuk latfag.

⁶³Allahn let neneptisi ulug Salomo inowen wam sapi teng-teng angge 22.000 men wam domba teng obog sehelet obog 120.000 men waroho esetfag. Esetfareg Salomo ino men Israel inap obog toho menen Allah ibam ino sok husibag.

⁶⁴Allah fahet hubu lahaptuk ambeg Allah ibam alukema ine angge fam witfahon ino tot tehen wam anggolo esetuk ane wirim teg latfag fugmu Salomo inowen o ino owahalma ap luhal atuk ambeg pulmuwen wam indokma yaltukon men suburu men wam sei men Allahn let neneptisi ulug At fahet emberuk latfag. Ari roho turuk lit Salomo inowen owahalma ap luhal atuk ambeg ino Allahn ngi reg lamag ulug puhunap tibag.

⁶⁵Allah ibam sok husibag sambil ino Salomo men Israel inap obog toho o Hamat larukon funggalma wereg inap famen tulug o Mesir hili-hilimu wereg inap kinang atogman atogma werehon obog toho palu atfag. Ap anggolo palu atfahon arimanowen nunumbasi lekma laruk lit o saboma nohorukmu Allahn fet enesug latfahon ino wel tul ulug Allah ibamen enehiyeg toho yunggultukmen eneg hup sabirenam atfag.

⁶⁶O likin angge Salomo inowen ap arimano hinibam lalihip ulug hiyag isibagma ap arimanowen Allahn fet hasug laruhu ulug Salomo hi ribareg inindi enehiyeg toho inibam wal taneg libag. Inibam laruk lit NINIKNI Allahn amingmingangge Daud men umalikisi Israel ninap men nunubam fano ane anggolo tirisi ulug enehiyehen yunggultil laruk latfag.