Read Angguruk Yali 2 RAJA-RAJA 10 Bible Online

2 RAJA-RAJA 10 - Angguruk Yali bible

2 RAJA-RAJA 10

¹O pumbuk suwon Samaria ap suwon Ahab umalikisi men umbusagsi men enebe teng hinahan 70 welatfag. Weregma hun Yehu inowen ap suwon-suwon o Samaria welatfahon men onowesi roho welatfahon men Ahab umalikisi fet enesuhon men wal taneg suwesingga fam hiyag isaruk lit,

²”Hiren hinikni Ahab umalikisi fet enesug lit o pumbuk suwon elehet walinggoho werehon men kereta men wam kuda men minggin tog men obog toho seneg lahep. Ari fahet suwesingga emberuk lahiyon aru hit hininggikmu aruhu halug

³folo-folo Ahab umalikisi umbusagsi men enesehelimuwon indi fanowon eneko ikni ubalma ap suwon aruhuwen lahabuhup. Lahabuhupteg at fahet tog aptuk lamuhup,” ulug suwesingga fam hiyag isibag.

⁴Hiyag isibagma ap suwon-suwon arimanowen enekol anggolo hibareg enele uruk lit, ”Ap suwon raja piren itano inine elehen hun ari apmayap tuk fug teg latusama nangginoho nit toronen at apmayap tuhuk?” ibag.

⁵Ari ibareg ap suwon ibam foroho ahun men o pumbuk seneg latfag ahun men onowesi roho welatfahon men ap suwon umalikisi fet enesuhon menen ap eke Yehu ambeg monde fibagma libareg Yehu hiyag utuk lit, ”Nit hat hamingmingangge welahereg ap suwon eke lahabuhuk fug. Haren hiyag nisaruk laruhunon eneg niren turuk lamuhuk. Haren fano peruk lahen ane eneg turuk laruhun!” ulug hiyag itfag.

⁶Hiyag itfagma Yehu inowen inggik pireneg angge ap suwon-suwon arimano suwesingga fam hiyag isaruk lit, ”Hit an nibil atuk lit nele holtuk lamuhuk peruk lahep halug hinikni umalikisi arimano unusuhupteg ununggul kong toho sono mo tiya hagma an nambeg o Yizreel walug wamuhup,” ulug hiyag isibag. Ahab umbusagsi teng hinahan ap suwon-suwon arimanowen fet enesug latfahon fahet suwesingga fam hiyag isibag.

⁷Hiyag isibagma ap suwon-suwon arimanowen Ahab umbusagsi teng hinahan arimano unusibareg ununggul paloho kou fam imbibareg onotsi unubam hun Yehu ambeg o Yizreel walug lalihip ulug hiyag isibagma walug libag.

⁸Walug libagma ot ekeyen Yehu fam, ”Ap suwon umalikisi ununggul walug wahasa,” ulug hiyag itfagma Yehu inowen otsi unubam, ”Ununggul walug wahason arimano walug lalihipteg aben yet isawag ulug elehet ninibam walinggoho ohowon sok kurukon olohotma palu piren fam lahabil lahalihip. Lahaboho embeselihipmu weregman eneg sono sakan tuhu,” ulug hiyag isibag ane hikit toho tibag.

⁹Tibagma likiyamon Yehu sok ino iraham libareg ap luhal arik watfahon unubam ele uruk lit, ”Hit hinikni ap suwon ino hiren watikip fug, an nikni ubalma ap suwon aruhuk ulug anden ware feserikik angge famen ap anggolo aruma san unusirisi?

¹⁰Ketiya NINIKNI Allahn Ahaben ondohowonen ondohowon fahet ibahon obog toho wirim atisi ulug honoluk toho welamok! Allahn amingmingangge Elia feneyen ibag ane ino il misig oho umbusuk fug angge obog toho hikirap tirisi,” ibag.

¹¹Ari ibareg Yehu inowen Ahaben ondohowonen ondohowon o Yizreel welatfahon obog toho men onowesi roho welatfahon obog toho men ap suwon ori tam at iraham welatfahon men amingmingangge imam men unusibagma misig oho oluk welatfag fug.

¹²Ari tibareg Yehu ino o Samaria lamin ulug wam foroho inap wereg ambeg o Bet-Eked libareg

¹³Yehuda inap onowe Ahazia ori men salkal ibag. Salkal ibareg it unubam, ”Hit sa wahep?” ulug kapal isibagma iren, ”Nit Ahazia ori wereg lit ap suwon umalikisi men Izebel ambiyangasi men pen isa lahuk ulug wahe,” ulug hiyag itfag.

¹⁴Hiyag itfagma Yehu inowen otsi unubam, ”Sen enebiyek!” ulug hiyag isibag ane hikit toho sen enepfareg ik fahet kinang habulig ambeg o Bet-Eked werehon irahamen unusibag. Ahazia ori enebe teng misigmen nubam hilag nuwal fimahen 42 unusuruk lit misig oho umbusuk fug angge obog toho unusibag.

¹⁵Unusibareg Yehu ino o Samaria lamin ulug kalemma larukmen hun Rekhab amloho Yonadab men salkal ibag. Salkal ibareg at ubam, ”Anden hat nindi hasug lahi hag toho haren oho we tem toho hindi nasug lahen ano?” ulug kapal hibagma Yonadab inowen, ”Tem toho,” ibag. Ibagma Yehu inowen, ”Tem toho hindi nasug lahen halug nininggik sen-sen amulen ma!” ibagma ininggik sen-sen atfareg Yehu ino kereta palimu heriyeg lit Yonadab fam, ”Lahik ma!” ulug hiyag itfagma lahibag.

¹⁶Lahibagma Yehu inowen Yonadab fam ele uruk lit, ”Anden NINIKNI Allah fahet nindiyen nine roho timin ane yet hamihinen nit men lul,” ibareg ambiyeg o Samaria libag.

¹⁷Libareg Yehu inowen Ahaben ondohowonen ondohowon o Samaria welatfahon obog toho unusibagma NINIKNI Allahn amingmingangge Elia feneyen ibag ane hikit toho Ahaben ondohowonen ondohowon misig oho oluk welatfag fug.

¹⁸Ari tibareg Yehu inowen o Samaria inap obog toho palu arik maniyek ulug wol enepfareg it unubam ele uruk lit, ”Hun Ahab inowen nunumba ulug wel turuk laheyon Baal irim toho wel turuk latfagma anden nahiyeg toho wel turuk laruhuk.

¹⁹Ari fahet Baal amingmingangge nabi imam obog toho men at wel turuk inap obog toho men an nambeg wamuhuben wol enebik lalihip. Anden Baal fahet wam anggolo waroho hubu lahabuhuken ap misig oho pok aruhu fug. Pok amuhubon arimano onoluk welamuhup fug,” ulug hiyag isibag. Hiyag isibag ane ari Yehu inowen usangge Baal wel turuk inap obog toho unusuhuk ulug ele indit toho ibag.

²⁰Ari ibareg Yehu inowen nin ele uruk lit, ”Baal wel tuhuk ulug hinindi puhun toho wereg lit palu arik wamuhubon fahet kong toho embelihip,” ulug hiyag isibag ane hikit toho kong toho imbibag.

²¹Kong toho embehesa ane ari hiyag isa lalihip ulug Yehu inowen otsi mon enepfagma Israel inap obog toho hiyag isa libag. Libagma Israel inap Baal wel turuk latfahon obog toho o Samaria waharukmu ap misig oho pok atfag fug. Baal wel turuk inap mondoko watfareg Baal wel turuk ibam kibareg o ino indit fiman fima keleg atfag.

²²Keleg atfagma Yehu inowen Baal wel turuk lit wan teg asum foroho ibam seneg ahun fam ele hiyag utuk lit, ”Ap palu arik wahason aruma wal tanehen wan teg lamag ulug sum og isamihin,” ulug hiyag isibagma ap wal taneg sum og isibag.

²³Og isibagma Yehu men hun Rekhab amloho Yonadab men o ino kibareg Yehu inowen Baal wel turuk inap hiyag isaruk lit, ”We Baal wel turuk ninap o tu fam wereg lit nunumba wel tul. Ari fahet NINIKNI Allah ulug wel eneptuk inap misig oho nit sehelimu welamuhup tohon ulug ap wal taneg fuki roho kim isalihip,” ulug hiyag isibag.

²⁴Hiyag isibagma Baal amingmingangge arimano Baal fahet wam waroho yaltuk lit hubu lahabul ulug hili undama wirihon fam kibag. Kurukmu Yehu inowen otsi teng hinahan 80 owahalma welamek ulug hiyag isibahon unubam ele uruk lit, ”Baal wel turuk inap arima obog toho unusilihip. Ap misig oho o tuwen wilip aruhu rohon ulug yet enesug lamok! Hit ap san yet enesug lamisi fugmu ap eke wilip atmisi halug at ino war aruhu,” ibag.

²⁵Ari ibareg Baal amingminganggeyen hubu lahabuk oho regma Yehu inowen at ebe foroho inap men otsi sehen senehon winon men hiyag isaruk lit, ”Ap arima obog toho unusilihiben olma kiyek! Ap misig oho wilip atmisi fug!” ibag. Ibagma olma kulug ap obog toho unusibareg it wareg angge selma hik isa libag. Hik isa libareg Baal wel turuk ibam undama hili wirihon fam kibag.

²⁶Kibareg usa ahen olma hutuk tibibahon ino heneko walug indokma yale fisibag.

²⁷Yale fisibareg usa ahalep Baal fahet hutuk tibibahon fele roho siyahap tibareg Baal wel turuk ibam obog toho halog tibag. Halog tibag ambeg inowen aben yog wituk lamuhup ulug imbibag ane hikit toho ketiya oho turuk.

²⁸Ari roho turuk lit Yehu inowen Israel kinangman Baal wel turuk ane ino mondabi elehap tibag.

²⁹Ari roho turukmu NINIKNI Allahn Yehu fam ele uruk lit, ”Haren Allahn fano perukon timin ulug An nindimuwen wenggel harikik ane hikit toho hun Ahab inowen ondohowonen ondohowon obog toho elehap eneptikinmu hat humalikisi humbusagsi humbasi men hat hubalmangge Israel inap onowesi suwon laharuk lamuhup,” ibag. Ari ibag angge famen Yehu inowen indi piren teg lit Israel inap INIKNI Allahn ari-ari turuk lamuhup ulug imbibag ane ino seneg latfag fug. Indam ap suwon Yerobeam ino Allah embeselug larukmu Israel inap obog tohowen Allah enembol yig utuk latfag hag toho Yehu ino oho Yerobeam ombolim laruk lit Yerobeamen o Betel men Dan menen tu Allah hag toho wereg ulug wam sapi emas fam wirihon unduhuk fibahon piren itano aren oho wel eneptuk latfag.

³⁰

³¹

³²O itano li NINIKNI Allahn Israel kinang tor amag ulug torap turuk ane ak tibag. Ak turuk lit Allahn pibag ane hikit toho o Siria inap onowe suwon Hazael inowen Israel kinang atogman atogma tog abil waharuk latfag.

³³Tog abil waharuk lit Gad inap, Ruben inap, Manasye inap menen ngi reg latfag angginang ik Yordan yali fil werehon obog toho o pumbuk Aroer ik Arnon ayegma werehon famen tulug tom Gilead keyen kinang Basan fam hun Hazael inowen ilmig tibag.

³⁴Yehu oluk wereg lit turuk latfag ane tuma tor angge haharoho emberuk lahe. At ap suwon wereg lit ahako roho turuk latfag ane obog toho suwesingga Israel inap onowesi suwonen turuk latfag ane fahet haharehon fam paloho imbibag.

³⁵Welatfareg war atfagma Yehu ino o Samaria inowen kinangma salfag. Salfagma amloho Yoahas ikni ubalma ap suwon lahibag.

³⁶Yehu ino o Samaria wereg lit Israel inap fet enesugmen eneg mo ilig am wirig am turukmu teng misigmen nubam hilag misig 28 atfag.