Read Angguruk Yali 2 RAJA-RAJA 11 Bible Online

2 RAJA-RAJA 11 - Angguruk Yali bible

2 RAJA-RAJA 11

¹Yehuda inap onowe suwon Ahazia war atisi urukmu holfareg isinga Atalia inowen ap suwon ori umalikisi men obog toho unusibag.

²Unusuruk lit Ahazia amloho Yoas ino oho ori sehelimu weregma wabuk oho turuken Ahazia erek Yoseba ap suwon Yoram ahaloho inowen malik ino ori sehelimuwen hondoholug hirag-hirag Allah ibam iraham libareg Atalia inowen malik ino waruhu rohon ulug hiyap at foroho latfahon men ambiyeg hili ap nohoruk ambeg hirag enebik kibag.

³He Atalia inowen Yehuda inap fet enesugmu Yoas men hiyap ino men NINIKNI Allah ibam hiraho lit weregman eneg mo falfaliken libag.

⁴Mo ilig am wirig am turukmen sabiren atfagma Allah amingmingangge imam Yoyada inowen ap suwon foroho inap onowesi men ap suwon ibam foroho inap onowesi men an nambeg Allah ibam watlihip ulug wol enepfareg nit nininggik ahandip toho welamuhuken NINIKNI Allahn holegma sali nubam ilihip ulug hiyag isibag ane hikit toho sali imbibag. Sali imbibagma Yoyada inowen ap suwon amloho Yoas Allah ibam hiraho lit welatfahon ino unug isibag.

⁵Unug isibareg it unubam ele uruk lit, ”Hiren turuk lamuhubon fahet iminon tu: O sabir aruhumu hit hiniyabuk turuk lamuhubon minggiroho winonen ap suwon ibam foroho lamuhup,

⁶hit winonen sok unuk Sur ino foroho lamuhup, winonen sok he Atalia foroho inap inibam ambol fil werehon ino foroho lamuhup. Hit obog tohowen ap misig oho Allah ibam kuhu rohon ulug yet teg lamuhup.

⁷Hit o sabir angge yabuk turuk lahep fuhon palu piren NINIKNI Allah ibam tuma wereg lit ap suwon amloho Yoas ino foroho lamuhup.

⁸Fit hininggikmu seneg lit at walinggoho unduhuk lamuhup. At ino kuk wilip am turukmu hit at walinggoho laruk lamuhup. Ap sa hit horogma wamuhubon arimano unusuhup,” ulug hiyag isibag.

⁹Hiyag isibag ane ari hikit toho onowesi roho welatfahon arimano wal tanehen onotsi yabuk witukon men onotsi o sabir angge kel tarukon men palu enebik libareg it men ambiyeg Yoyada ambeg watfag.

¹⁰Watfagma Yoyada inowen fit men tog piyabangge men ap suwon Dauren tohon Allah ibam foroho latfahon arimano og isibag.

¹¹Og isibagma ap obog tohowen fit ininggikmu seneko ap suwon amloho foroho lamul ulug Allah ibam ilan fuma filen tulug hubu lahaptuk ambeg walinggoho o ino ilan fuma fil in arik libag.

¹²In arik libagma Yoyada inowen ap suwon amloho Yoas ino hirahoman hondoholug wilip atfareg ap suwonen lahaptuk angge unggulmu lahabe fibareg suwesingga Allahn ari-ari turuk lamuhup ulug paloho imbibahon og itfag. Og itfagma ap welatfahonen nit nonowe welaruhun ulug e zaitun ahaluwe unggulmu are ribibareg enehiyehen ininggik tag turuk lit enele hi roho, ”Ninikni, hat ap suwon hi haptuk lahe,” uruk latfag.

¹³Enehiyehen hi rurukmu holfareg Atalia ino ap anggolo NINIKNI Allah ibam luhaloho weregma libag.

¹⁴Libareg yet harukmen ap suwon we ket eneg lahapfahon ino ap suwon lehoma unduhuk ambeg unduhukmu onowesi roho welatfahon men pinggong watuk inap men iraham weregma Yehuda inaben puhuli kong turuk lit enehiyehen enele urukmu yet isibareg Atalia inowen indi oloken sum wan teg latfahon tararag tibisibareg ele hum toho, ”Nuwabul ulug turuk lahep,” ibag.

¹⁵Ibagma imam Yoyada inowen hiyap ari NINIKNI Allah ibam tuman ware fusul fug ulug sehen senehon onowesi unubam ele uruk lit, ”He aru hit honotsi iraroho unduhukon honggoleg keyen hondoholug wilip atihip. Wilip atuk lit ap sa at ombolim lamin perukon arimano unusilihip!” ulug hiyag isibag.

¹⁶Hiyag isibagma iren Atalia ino senetfareg wam kuda ap suwon ibam laruk abunggalem keyen hondoholug libareg ibam kulug ware fisibag.

¹⁷Ware fisibagma Yoyada inowen ap suwon men ap welatfahon obog toho unubam ele uruk lit, ”’We tik-tem toho NINIKNI Allah umalikisi wereg lit Aren peruk ane hikit toho turuk lamuhuk,’ ulug sali embelihip,” ulug hiyag isibag ane hikit toho sali imbibagma Yoyada inowen ap suwon men umalikisi Yehuda inap arimano men nin hiyag isaruk lit, ”Hit mangno roho welamuhup ane fahet sali pal-pal atihip,” ulug hiyag isibagma sali pal-pal atfag.

¹⁸Sali pal-pal atfareg ap arimano obog toho Baal wel turuk ibam libareg o ino halog toho siyaha feselug hubu lahaptuk ambeg men usangge ibam foroho latfahon men lilibug toho hik isibag. Hik isibareg hubu lahaptuk ambeg siyahap tibahon arimano onolohotman Baal amingmingangge Matan ino ware fisibag. Ware fisibagma imam Yoyada inowen mun angge man angge NINIKNI Allah ibam werehon haloho emberuk lamuhup ulug ap in enepfag.

¹⁹Ari obog toho tibibareg Yoyada inowen ap suwon foroho inap onowesi men ap suwon ibam foroho inap onowesi men Yehuda inap obog toho palu enepfareg it men ambiyeg laruk lit ap suwon ino NINIKNI Allah ibamen hondoholug wilip atfareg sok ap suwon foroho inap kuruk keyen lalug ap suwon ibam kibag. Kibareg Yoas ino ap suwon hur atuk ambeg hur arik lahibag.

²⁰Hur arik lahibagma Yehuda inap obog toho inindi enehiyeg toho welatfag angge famen Atalia ino ap suwon ibamen karog fam ware fisibag ane fahet Yerusalem inap arimano enele uk fug angge welatfag.

²¹Yoas indag tibag sali mo ilig am wirig am turukmu sabiren atfagma ap suwon lahibag.