Read Angguruk Yali 2 RAJA-RAJA 13 Bible Online

2 RAJA-RAJA 13 - Angguruk Yali bible

2 RAJA-RAJA 13

¹Hun Ahazia amloho Yoas inowen Yehuda inap fet enesugmen eneg mo ilig am wirig am turukmu fuwap fimahen 23 atfagma hun Yehu amloho Yoahas ino Israel inap onowe suwon lahibag. Lahibareg o Samaria wereg lit Israel inap fet enesugmen eneg mo nanggolop fimahen 17 libag.

²Indam ap suwon Yerobeam inowen siyag ane til-wil larukmu Israel inap at ombolim laruk lit onolok ane eneg turuk latfag hag toho Yoram inowen oho NINIKNI Allah ambol yig utuk lit siyag ane turukon umbusuk fug angge olok ane eneg turuk latfag.

³Aren turuk latfag ane ariyen NINIKNI Allahn Israel inap unubahet olok hibareg o Siria inap onowe suwon Hazael men amloho Benhadad men ininggikmu emberukmu Yoahas oluk wereg li Hazael men Benhadad menen hundig-hundig Israel inap men tog abik waharuk latfag.

⁴Tog abik waharukmen eneg Yoahas inowen NINIKNI Allah indi yuwahap timin ulug ubam sembahyang ibag. Sembahyang urukmu Allah inowen o Siria inap onowe olok anggolo wereg lit Israel inap siyahap eneptuk ane yet harikikteg Yoahas inowen ele nubam urukon ari holmin pibag.

⁵Holmin pibareg NINIKNI Allahn Israel inap let eneptukon eke monde fik watfagma o Siria inap ininggikmuwen windat eneptukmu Israel inap tam welatfag hag toho nin inindi yuwag toho welatfag.

⁶Yuwag toho welatfag angge famen indam Yerobeam umalikisi men Allah embeselug larukmu Israel inap it onombolim laruk lit siyag ane turuk latfag hag toho iren oho siyag ane umbusuk fug angge ke hareyon laruk lit tu Allah hiyap angge hag toho wereg ulug wel turuk angge Asyera o Samaria welatfahon ino elehap tibag fug.

⁷O Siria inap onowe suwon inowen Israel inap mulangge unusuruk lit ololongge fu isaruk hag toho mondabi elehap enepfagma Yoahas umalikisi wam kuda fam lahalug larukon enebe onoluk welatfahon teng piren men, kereta fam larukon enebe numen men, unuyug fam larukon teng-teng angge 10.000 men welatfag.

⁸Yoahas oluk wereg lit turuk latfag ane tuma tor angge haharoho emberuk lahe. At ap suwon wereg lit ahako roho turuk latfag ane obog toho suwesingga Israel inap onowesi suwonen turuk latfag ane fahet haharehon fam paloho imbibag.

⁹Welatfareg war atfagma Yoahas ino o Samaria kinangma salfag. Salfagma amloho Yoas ikni ubalma ap suwon lahibag.

¹⁰Hun Ahazia amloho Yoas inowen Yehuda inap fet enesugmen eneg mo ilig am wirig am turukmu teng misigmen nubam hilag numen 37 atfagma hun Yoahas amloho Yoas amuwon ino Israel inap onowe suwon lahibag. Lahibareg o Samaria wereg lit Israel inap fet enesugmen eneg mo nisanggo fimahen 16 libag.

¹¹Indam ap suwon Yerobeam inowen siyag ane til-wil larukmu Israel inaben at ombolim laruk lit onolok ane eneg turuk latfag hag toho Yoas inowen oho Allah ambol yig utuk lit siyag ane turukon imbisibag fug.

¹²Yoas oluk wereg lit turuk latfag ane tuma tor angge haharoho emberuk lahe. At ap suwon wereg lit ahako roho turuk latfag ane men Yehuda inap onowe Ahazia men tog aptuk latfag ane ari obog toho suwesingga Israel inap onowesi suwonen turuk latfag ane fahet haharehon fam paloho imbibag.

¹³Welatfareg Yoas war atfagma o Samaria Israel inap onowesi suwon sal eneptuk latfag ambeg salfag. Salfagma amloho Yerobeam ikni ubalma ap suwon lahibag.

¹⁴Welatfareg hun Elisa ouk anggin toho waruk lit war am hag teg latfagma Israel inap onowe suwon Yoas pen ha watfareg war atmisi ulug uba yatuk lit, ”An nikni, an nikni, Israel ninap hine roho ili og neneptuk lahenon,” ulug hi ribag.

¹⁵Hi ribagma Elisa inowen ap suwon fam ele uruk lit, ”Sehen men minggin tog men wamihin,” ibagma ap suwonen wibag.

¹⁶Wibagma Elisa inowen ap suwon hiyag utuk lit, ”Sehen lisig latmihin,” ibagma lisigmen Elisan ap suwon inggikmu inggik imbibareg

¹⁷hiyag utuk lit, ”Keyenteg Siria kinang fil fo rehon husi femihin,” ibagma keyenteg husi fibagma Elisa inowen, ”Ketiya pising isimin!” ibagma ap suwon inowen tog ino pising isibag. Pising isibagma Elisan te, ”Tog pising esehenon ari onggoken NINIKNI Allahn hat let haptukmu Siria inap apmayap eneptuk laruhun. Fobik Siria inap o Afek wamuhupmu haren unusuhunmu obog toho eleg amuhup,” ulug hiyag itfag.

¹⁸Ari ulug hiyag itfareg nin ele hiyag utuk lit, ”Minggin tog winon wamihin,” ibagma Yoas inowen wibagma Elisan, ”Tog fam kinang ware femihin,” ibagma Yoas inowen tog fam kinang inggik hinahanam eneg ware fibareg imbisibag.

¹⁹Inggik hinahanam ware felug imbisibag ane fahet Elisa ino indimu olok atfareg ubam ele uruk lit, ”Haren tog fam kinang fuwabenam ano falfalikenam ano watlen halug haren Siria inap unusuruk lit mondabi elehap eneplen angge famen ketiya Siria inap we hinggik hinahanam eneg unusuhun,” ulug hiyag itfag.

²⁰Welatfareg Elisa ino war atfagma kinangma sale fisibag. Sale fisibareg weregman Moab inaben Israel inap unusul ulug mo eke fam eke fam Israel kinangma kik waharuk latfag.

²¹O misihim sambil Israel inaben ap warehon eke kinangma saltul ulug turuk lit yet isarukmen Moab inap arimano waharuk latfagma enekolen ap warehon ino Elisa sale fisibag ambeg hik isalug libag. Hik isalug libagman ap warehon ino hun Elisa uwag emberimu wambibareg oluk atug lahik watfag.

²²Ap suwon Yoahas inowen Israel inap fet enesug latfag li o Siria inap onowe suwon Hazael inowen Israel inap apmayap enebuhuk ulug hundig-hundig tog abik waharuk latfag.

²³O itano li NINIKNI Allahn Israel inap nambolmayap eneptuk lit mondabi siyahap enebuhuk pibag ane uwanma Abraham, Ishak, Yakub men unubam sali imbibahon wenggel hibareg Israel inap hebeloho indi enesug lit ili og eneptuk latfag.

²⁴Welatfagma o Siria inap onowe Hazael war atfag. War atfagma amloho Benhadad ikni ubalma ap suwon lahibag.

²⁵Lahibagma Yoahas amloho Yoas inowen Benhadad ino men tog aptukmen eneg inggik hinahanam apmayap tibag. Apmayap turuk lit o pumbuk Benhadad inowen Yoas ikni Yoahas inggikmuwen taluk tibahon arimano suhuloho ilmig taruk latfag.