Read Angguruk Yali 2 RAJA-RAJA 14 Bible Online

2 RAJA-RAJA 14 - Angguruk Yali bible

2 RAJA-RAJA 14

¹Hun Yoahas amloho Yoas inowen Israel inap fet enesugmen eneg mo piren libagma Yoas amuwon amloho Amazia ino Yehuda inap onowe suwon lahibag.

²Amazia indag atfag sali mo ilig am wirig am turukmen hinahaneg fimahen 25 atfagma ap suwon lahibareg o Yerusalem wereg lit Yehuda inap fet enesugmen eneg mo ilig am wirig am turukmu teng misigmen nubam hilag piren 29 atfag. Amazia isinga o Yerusalem hiyap unuk Yoadan welatfag.

³Ikni Yoas inowen NINIKNI Allahn fano perukon turuk latfag hag toho Amazia inowen oho turuk latfag angge famen umba Daud ubabut fanowon ino men ambi reg latfag fug.

⁴At men ambi reg eleg lit punumu kema-kema hubu lahaptuk ane elehap tibag fugmu Yehuda inaben tu Allah hag toho wereg ulug wel eneptuk angge fahet wam waroho hubu lahaptuk ane imbisibag fug.

⁵Ap suwon Amazia ino ine atfareg amingmingangge at ikni Yoas ware fisibahon arimano unusibag.

⁶Unusuruk lit Musa wene fam paloho imbibag ane hikit toho it unumalikisi oho unusibag fug. Musa wene fam NINIKNI Allahn ibag ane haharehon tu, ”Amlohowen siyag ane turukon fahet ikni ware fusuhup fug. Ikniyen oho siyag ane turukon fahet amloho ware fusuhup fug. Ap eke inggarehen siyag ane turukon ari famen eneg war aruhu,” ulug paloho imbibahon ari hikit toho unumalikisi unusibag fug.

⁷Amazia inowen o Saho tonggoman Edom inap enebe teng obog sehelet obog 10.000 men tog aptuk lit mulangge unusibareg o pumbuk Sela ino ilmig tibag. O Sela ino unuk keron Yokteel suwalfag ambeg ino ketiya oho wereg.

⁸Edom inap apmayap enepfareg Amazia inowen Israel inap onowe Yoas hun Yehu inowen indag tibahon Yoahas amloho ino ambeg lalihip ulug otsi mon enepfagma libareg inikniyen ibag ane hiyag utuk lit, ”Sa ine wereg ulug wal hahuken an men hat men tog abuhuk ehek,” ibag.

⁹Ibagma Yoas inowen Amazia hiyag utuk lit, ”Misihim sambil alog ahen tom Libanon fam welatisiyon ekeyen e sahi tom ino fam werehon hiyag utuk lit, ’Hat hahaloho an namlohowen hilamisiyen og itmihin,’ irisi. Og itmihin irisi angge famen wam eli ambeg waharuk lit alog ahen ino unuyuhen sobir-sabar isarusa,” ulug ele indit toho ibareg,

¹⁰”Haren Edom inap mulangge unusirikik ulug hinggareg wel taruk lahen. Ketiya aben wel nabukag ulug nin wilip aruhuk peruk lahen angge famen o kema-kema la fug angge hibam welaruhun! Nungge fahet haren siyag aruhuk peruk lahen? Haret humalikisiyet siyag amuhup tohon!” ibag.

¹¹Ari ulug hiyag itfag angge famen Amazia inowen holfag fug. Holfag fugmu Israel inap onowe Yoas ino Yehuda kinangma watfareg at umalikisi men Amazia umalikisi menen o Bet-Semes irahamen tog aptuk latfag.

¹²Israel inap arimanowen Yehuda inap mulangge unusurukmu linggik-longgo ibareg inibam wal taneg libag.

¹³Larukmu Israel inap onowe Yoas inowen Yehuda inap onowe Amazia ino o Bet-Semes horogman senetfag. Senetfareg Yoas ino o Yerusalem libareg elehet walinggoho ohowon sok unuk Efraim famen tulug sok unuk Indit tehon fam halog toho siyahap til libag. Elehet halog tibag ambeg wirimangge yat toho wirim tibahon il teng sabiren 200 meter wirim toho siyahap tibag.

¹⁴Siyahap tibareg ili ruruk angge emas perak men Allah wel turuk lit wan turuk angge men NINIKNI Allah ibam oho ap suwon ibam oho foroho latfahon arimano obog toho huhulangge hilalug suhuloho ibam o Samaria libag. Laruk lit Yehuda inap winon ininggik hele waroho hondog eneplug libag.

¹⁵Yoas oluk wereg lit turuk latfag ane tuma tor angge haharoho emberuk lahe. At ap suwon wereg lit ahako roho turuk latfag ane men Yehuda inap onowe Ahazia men tog aptuk latfag ane ari obog toho suwesingga Israel inap onowesi suwonen turuk latfag ane fahet haharehon fam paloho imbibag.

¹⁶Welatfareg Yoas war atfagma o Samaria Israel inap onowesi suwon sal eneptuk latfag ambeg ar oho salfag. Salfagma amloho Yerobeam ikni ubalma ap suwon lahibag.

¹⁷Israel inap onowe suwon Yoas war atfagma mo ilig am wirig am turukmu nuwal fimahen 15 atfagma Yehuda inap onowe suwon Amazia ino war atfag.

¹⁸Amazia oluk wereg lit turuk latfag ane tuma tor angge haharoho emberuk lahe. At ap suwon wereg lit turuk latfag ane obog toho suwesingga Yehuda inap onowesi suwonen turuk latfag ane fahet haharehon fam paloho imbibag.

¹⁹Amazia uwan war am fugmu aben ap suwon ino pilabuhuk ulug enele sahalehesa urukmu holfareg Amazia ino o Yerusalem embeselug hirag-hirag o Lakhis libag. Libagma at pilabuhuk pibahon arimanowen at muko lalihip ulug ap mon enepfagma muko libareg o Lakhis inowen ware fisik libag.

²⁰Ware fisik libagma Amazia wareg angge wam kuda fam imbik lahalug o Yerusalem libareg umbasi o pumbuk unuk Daud suwalehon fam sal eneptuk latfag ambeg ar oho salfag.

²¹Salfagma Yehuda inap obog tohowen Amazia amloho Azarya ikni ubalma nit nonowe suwon welaruhu ulug unduhuk fibag. Azarya indag tibag sali mo ilig am wirig am turukmu nisanggo fimahen 16 atfagma ap suwon lahibag.

²²Ikni Amazia ino war atfagma Azarya inowen o pumbuk Elat tam Yehuda inaben ngi reg latfag ambeg ino nin suhuloho ilmig ta libareg ine amag ulug haltuk latfag.

²³Hun Yoas amloho Amazia inowen Yehuda inap fet enesugmen eneg mo ilig am wirig am turukmu nuwal fimahen 15 atfagma Yoas winon eke amloho Yerobeam ino ap suwon lahibag. Lahibareg o Samaria wereg lit Israel inap fet enesugmen eneg mo ilig am wirig am turukmu teng misigmen nubam hilag nunggul huriken 41 libag.

²⁴Indam hun Nebat amloho Yerobeam inowen siyag ane til-wil larukmu Israel inaben at ombolim laruk lit onolok ane eneg turuk latfag hag toho Yerobeam amuwon inowen oho Allah ambol yig utuk lit siyag ane turukon imbisibag fug.

²⁵Israel inap INIKNI Allahn amingmingangge o Gat-Hefer ahun Amitai amloho Yunus feneyen ibag ane hikit toho Yerobeam inowen o Hamat fil laruk abunggalem famen tulug ik Il Warehon ayegma Israel inaben tam ngi reg latfag ambeg arimano obog toho hebeloho ilmig til libag.

²⁶Yerobeam uwanma NINIKNI Allahn yet isarukmen Israel inap asengseng-pasengseng haruk lit weregma let eneptukon elehen ap suwonet toronet obog toho inine eleg atukmu yet isibag.

²⁷Yet isibareg NINIKNI Allahn Israel inap ununuk kinang tu famen elehap tuhuk ulug kong toho imbibag ane uwanma Yoas amloho Yerobeam monde fik watfareg at feneyen Israel inap arimano let eneptuk latfag.

²⁸Yerobeam oluk wereg lit turuk latfag ane tuma tor angge haharoho emberuk lahe. At ap suwon wereg lit ahako roho turuk latfag ane men, tog aptuk latfag ane men, o Damsyik men Hamat men indam hun Dauren seneg latfag ambeg arimano hebeloho Israel ninap amuhuk ulug ilmig ta libag ane ari obog toho suwesingga Israel inap onowesi suwonen turuk latfag ane fahet haharehon fam paloho imbibag.

²⁹Welatfareg Yerobeam war atfagma o Samaria Israel inap onowesi suwon sal eneptuk latfag ambeg ar oho salfag. Salfagma amloho Zakharia ikni ubalma ap suwon lahibag.