Read Angguruk Yali 2 RAJA-RAJA 15 Bible Online

2 RAJA-RAJA 15 - Angguruk Yali bible

2 RAJA-RAJA 15

¹Ap suwon Yerobeam inowen Israel inap fet enesugmen eneg mo ilig am wirig am turukmu teng misig atfagma ap suwon Amazia amloho Azarya ino Yehuda inap onowe suwon lahibag.

²Azarya indag tibag sali mo ilig am wirig am turukmu nisanggo fimahen 16 atfagma ap suwon lahibareg o Yerusalem wereg lit Yehuda inap fet enesugmen eneg mo ilig am wirig am turukmu teng misigmen nubam hilag hinahaneg fimahen 52 atfag. Isinga o Yerusalem hiyap unuk Yekholya welatfag.

³Ikni Amazia inowen turuk latfag hag toho Azarya inowen oho NINIKNI Allahn fano perukon turuk latfag.

⁴Ari roho turuk latfag angge famen Azarya ap suwon wereg lit punumu kema-kema hubu lahaptuk ane elehap tibag fugmu Yehuda inaben tu Allah hag toho wereg ulug wel eneptuk angge fahet wam waroho hubu lahaptuk ane imbisibag fug.

⁵Imbisibag fugmu NINIKNI Allahn ouk alem angginon Azarya ubam monde fik watfagma ahapma salukangge ribag. Ahap salukangge rehen o amumu weregman eneg war atfag. At uwan war am fugmu amloho Yotam inowen ap suwon ibam foroho lit alem Yehuda inap unubam werehon obog toho haloho emberuk latfag.

⁶Azarya oluk wereg lit turuk latfag ane tuma tor angge haharoho emberuk lahe. At ap suwon wereg lit turuk latfag ane obog toho suwesingga Yehuda inap onowesi suwonen turuk latfag ane fahet haharehon fam paloho imbibag.

⁷Welatfareg Azarya war atfagma umbasi o pumbuk unuk Daud suwalehon fam sal eneptuk latfag ambeg ar oho salfag. Salfagma amloho Yotam ikni ubalma ap suwon lahibag.

⁸Ap suwon Azarya inowen Yehuda inap fet enesugmen eneg mo ilig am wirig am turukmu teng misigmen nubam hilag nanggoloben 38 atfagma ap suwon Yerobeam amloho Zakharia ino ap suwon lahibag. Lahibareg o Samaria wereg lit Israel inap fet enesugmen eneg pikalem falfaliken libag.

⁹Umbasiyen siyag ane til-wil laruk latfag hag toho Zakharia inowen oho turuk latfag. Indam ap suwon Yerobeam ino Allah embeselug larukmu Israel inap at ombolim laruk latfag ane hikit toho Zakharia inowen oho Allah ambol yig utuk lit siyag ane turukon imbisibag fug.

¹⁰Imbisibag fugmu hun Yabes amloho Salum inowen ap suwon ino pilabuhuk ulug o Yibleam inowen ware fisibareg Zakharia ubalma ap suwon lahibag.

¹¹Zakharia oluk wereg lit turuk latfag ane tuma tor angge haharoho emberuk lahe. At ap suwon wereg lit turuk latfag ane obog toho suwesingga Israel inap onowesi suwonen turuk latfag ane fahet haharehon fam paloho imbibag.

¹²Indam NINIKNI Allahn ap suwon Yehu fam ele uruk lit, ”Hat humalikisi humbusagsi humbasi men hat hubalmangge Israel inap onowesi suwon laharuk lamuhup,” ulug hiyag itfag ane hikit toho teko libag.

¹³Ap suwon Uzia unuk eke Azarya inowen Yehuda inap fet enesugmen eneg mo ilig am wirig am turukmu teng misigmen nubam hilag nisanggowen 39 atfagma hun Yabes amloho Salum ap suwon lahibag. Lahibareg o Samaria wereg lit Israel inap fet enesugmen pikalem misig eneg libag.

¹⁴Libagma hun Gadi amloho Menahem o Tirza inowen wilip atug o Samaria libareg hun Salum ino ware fisibag. Ware fisibareg at ubalma ap suwon lahibag.

¹⁵Salum oluk wereg lit turuk latfag ane tuma tor angge haharoho emberuk lahe. Aren ap suwon aruhuk ulug turuk latfag ane men mun ane man ane turuk latfahon men obog toho suwesingga Israel inap onowesi suwonen turuk latfag ane fahet haharehon fam paloho imbibag.

¹⁶O itano li o Tifsah inaben hun Menahem apma welamuhuk fug ulug at fahet elehet ninibam walinggoho ohowon sok ino husuhuk fug ibag. Ari ibagma Menahem o Tirza inowen wilip atug libareg o ino pin halog toho kulug o pumbuk ino welatfahonet walinggoho welatfahonet unusibag. Unusuruk lit hiyap malik forohowon enehum pilang heheg unusil libag.

¹⁷Ap suwon Azarya inowen Yehuda inap fet enesugmen eneg mo ilig am wirig am turukmu teng misigmen nubam hilag nisanggowen 39 atfagma hun Gadi amloho Menahem ino ap suwon lahibag. Lahibareg o Samaria wereg lit Israel inap fet enesugmen eneg mo numen libag.

¹⁸Menahem oluk wereg lit NINIKNI Allahn siyag perukon turuk latfag. Indam ap suwon Yerobeam ino Allah embeselug siyag ane turukmu Israel inap at ombolim laruk latfag ane hikit toho Menahem ino oho ke hareyon laruk lit siyag ane til-wil laruk latfag.

¹⁹Misihim sambil o Asyur inap onowe suwon Pul unuk eke Tiglat-Pileser inowen Israel inap apmayap enebuhuk ulug Israel kinang fam watfagma Menahem inowen ili ruruk angge perak anggin wirim tibahon anggin anggolo roho teng-teng angge 34.000 kilogram wirim toho og itfag. Og itfagma Pul ino Menahem ibil atuk lit umalikisi Israel inap arimanowen ele fano holukag ulug Menahem ino ineyap turuk latfag.

²⁰Menahem inowen onggo perak anggolo roho Pul og utukon fahet tung inap o Israel werehon wal tanehen uang anggen perak fam wirihon teng piren kilabik wamuhup ulug imbibag. Uang kilabik watfahon arimano obog toho o Asyur inap onowe suwon Pul og itfagma Israel kinang embeselug ibam libag.

²¹Menahem oluk wereg lit turuk latfag ane tuma tor angge haharoho emberuk lahe. At ap suwon wereg lit turuk latfag ane obog toho suwesingga Israel inap onowesi suwonen turuk latfag ane fahet haharehon fam paloho imbibag.

²²Welatfareg Menahem war atfagma amloho Pekahya ikni ubalma ap suwon lahibag.

²³Ap suwon Azarya inowen Yehuda inap fet enesugmen eneg mo ilig am wirig am turukmu teng misigmen nubam hilag fuwap fimahen 50 atfagma hun Menahem amloho Pekahya ap suwon lahibag. Lahibareg o Samaria wereg lit Israel inap fet enesugmen eneg mo piren libag.

²⁴Indam hun Nebat amloho Yerobeam inowen siyag ane til-wil larukmu Israel inaben at ombolim laruk lit onolok ane eneg turuk latfag hag toho Pekahya inowen oho Allah ambol yig utuk lit siyag ane eneg turuk latfag.

²⁵Ari roho turukmu at let turukon Pekah hun Remalya amloho ino men o Gilead inap teng piren menen ap suwon pilabuhuk ulug enele sahalfareg Pekahya o Samaria welatfag ibam hili undamon fam weregman ware fisibag. Ware fisibareg ori ununuk Argob men Arye men oho unusibag. Unusibareg Pekah hun Pekahya ubalma ap suwon lahibag.

²⁶Pekahya oluk wereg lit turuk latfag ane tuma tor angge haharoho emberuk lahe. At ap suwon wereg lit turuk latfag ane obog toho suwesingga Israel inap onowesi suwonen turuk latfag ane fahet haharehon fam paloho imbibag.

²⁷Ap suwon Azarya inowen Yehuda inap fet enesugmen eneg mo ilig am wirig am turukmu teng misigmen nubam hilag hinahaneg fimahen 52 atfagma hun Remalya amloho Pekah ino ap suwon lahibag. Lahibareg o Samaria wereg lit Israel inap fet enesugmen eneg mo likin fimahen 20 libag.

²⁸Indam hun Nebat amloho Yerobeam inowen siyag ane til-wil larukmu Israel inaben at ombolim laruk lit onolok ane eneg turuk latfag hag toho Pekah inowen oho NINIKNI Allahn siyag perukon eneg turuk latfag.

²⁹Pekah inowen Israel inap fet enesug latfag li o Asyur inap onowe suwon Tiglat-Pileser watfareg o pumbuk Iyon, Abel-Bet-Maakha, Yanoah, Kedes, Hazor men, kinang Gilead men Galilea men, ununggul unuk Naftali inap enengginang obog toho ilmig til watfareg kinang ilmig tibag ambeg welatfag inap arimano ininggik hele waroho o Asyur imbisik libag.

³⁰Azarya unuk eke Uzia amloho Yotam inowen Yehuda inap fet enesugmen eneg mo likin fimahen 20 libagma hun Ela amloho Hosea inowen ap suwon Pekah ino pilabuhuk ulug ware fisibag. Ware fisibareg Hosea ino Pekah ubalma ap suwon lahibag.

³¹Pekah oluk wereg lit turuk latfag ane tuma tor angge haharoho emberuk lahe. At ap suwon wereg lit turuk latfag ane obog toho suwesingga Israel inap onowesi suwonen turuk latfag ane fahet haharehon fam paloho imbibag.

³²Hun Remalya amloho Pekah inowen Israel inap fet enesugmen eneg mo piren libagma Azarya unuk eke Uzia amloho Yotam ino Yehuda inap onowe suwon lahibag.

³³Yotam indag tibag sali mo ilig am wirig am turukmu hinahaneg fimahen 25 atfagma ap suwon lahibareg o Yerusalem wereg lit Yehuda inap fet enesugmen eneg mo nisanggo fimahen 16 libag. Isinga unuk Yerusa hun Zadok ahaloho welatfag.

³⁴Ikni Uzia inowen turuk latfag hag toho Yotam inowen oho NINIKNI Allahn fano perukon turuk latfag.

³⁵Ari roho turuk latfag angge famen Yotam ap suwon wereg lit punumu kema-kema hubu lahaptuk ane elehap tibag fugmu Yehuda inaben tu Allah hag toho wereg ulug wel eneptuk angge fahet wam waroho hubu lahaptuk ane imbisibag fug. Yotam inowen NINIKNI Allah ibam elehet walinggoho ohowon sok ik eleruk filon ino wiri fibag.

³⁶Yotam oluk wereg lit turuk latfag ane tuma tor angge haharoho emberuk lahe. At ap suwon wereg lit turuk latfag ane obog toho suwesingga Yehuda inap onowesi suwonen turuk latfag ane fahet haharehon fam paloho imbibag.

³⁷O itano li ak tibareg NINIKNI Allahn o Siria inap onowe Rezin men Israel inap onowe Pekah menen Yehuda inap men tog abik lahup ulug mon eneptuk latfag.

³⁸Ari turuk latfag li Yotam ino war atfagma umbasi o pumbuk unuk Daud suwalehon fam sal eneptuk latfag ambeg ar oho salfag. Salfagma amloho Ahas ikni ubalma ap suwon lahibag.