Read Angguruk Yali 2 RAJA-RAJA 16 Bible Online

2 RAJA-RAJA 16 - Angguruk Yali bible

2 RAJA-RAJA 16

¹Hun Remalya amloho Pekah inowen Israel inap fet enesugmen mo ilig am wirig am turukmu nanggolop fimahen 17 atfagma ap suwon Yotam amloho Ahas ino Yehuda inap onowe lahibag.

²Ahas indag tibag sali mo ilig am wirig am turukmu likin fimahen 20 atfagma ap suwon lahibareg o Yerusalem wereg lit Yehuda inap fet enesugmen eneg mo ilig am wirig am turukmu nisanggo fimahen 16 atfag. Umba Daud ombolim la fug angge Israel inap onowesi tam welatfahonen turuk latfag ane hikit toho Ahas inowen oho IKNI Allah olohotman siyag ane eneg turuk latfag. NINIKNI Allahn Israel inap enelukeman yanggal enepfag inaben turuk latfag hag toho Ahas inowen oho ap enehummu siyahap eneptuk ane turuk lit amloho yuhon indokma yalfag.

⁴Hebeman oho punumuwen oho e usa ahen alman oho wam waroho hubu lahaptuk latfag.

⁵Ahas inowen Yehuda inap fet enesug latfag li o Edom inap onowe inowen o pumbuk Elat Yehuda inaben ilmig tibahon ino nin hebeloho senerik libareg Yehuda inap o Elat inowen yanggal enepfagma Edom inap kik watfareg ketiya oho yug toho wereg. O itano li Siria inap onowe Rezin men Israel inap onowe hun Remalya amloho Pekah ino menen Yerusalem inap unusuhuk ulug watfareg waling enesug latfag angge famen o pumbukmu kuk fug teg latfag.

⁷Kuk fug tegma Ahas inowen otsi o Asyur inap onowe suwon Tiglat-Pileser ambeg mon enebik libareg hiyag utuk lit, ”Nikni, an hat hamingminganggeyen hi haptuk lahi. An hat hamloho aru o Siria inap onowe men Israel inap onowe menen nuwabuhuk ulug nambeg waharusama haren it ininggikmuwen taluk nabik waruhunen heng habik wahi,” ibag.

⁸Otsi mon eneptuk lit itano Ahas inowen ili ruruk angge perak emas NINIKNI Allah ibam men ap suwon ibam men foroho latfahon arimano wibareg o Asyur inap onowe og irik lalihip ulug hiyag isibag ane hikit toho og irik libag.

⁹Og irik libagma Asyur inap onowe ino Ahasen heng nabehekon hikit toho ili wahuk ulug libareg Siria inap inibam pumbuk suwon Damsyik ilmig toho kuruk lit onowe suwon Rezin ino ware fisibareg umalikisi ininggik hele waroho o Kir imbisik libag.

¹⁰Imbisik libagma Ahas ino o Asyur inap onowe Tiglat-Pileser pen ha lamin ulug o Damsyik libag. Libareg hubu lahaptuk ambeg o Damsyik wirig latfahon ino fano roho kim hibareg wirimangge yaron horohon wirig ane wirim toho suwesingga fam hahare felug Allah amingmingangge imam Uria og irik lalihip ulug otsi mon enepfagma o Yerusalem walug libag.

¹¹Walug libagma ap suwon Ahas suhuloho o Yerusalem wam fugmu Uria inowen suwesingga fam ilit toho imbibag ane hikit toho hubu lahaptuk angge eke wiri fibag.

¹²Ap suwon ino o Yerusalem watfareg yet harukmen hun Urian hubu lahaptuk angge ino obog toho wiri fibagma yet hibareg iraham lalug imam in arik lahalug unduhuk ambeg lahibag.

¹³Lahibareg wam waroho indokma yale felug roti anggen yaloho hubu lahaptuk lit hele anggur ahaluwe hilili felug Allahn wanggi wat nasug lamag ulug wam amep hubu lahaptuk angge fene hilili fibag.

¹⁴Hilili fibareg hubu lahaptuk angge tembaga ineyon fam wirihon ino NINIKNI Allah ibam men hubu lahaptuk ambeg ket witfahon ino men honggolegma welatfag ambehen oko walug hubu lahaptuk ambeg ket witfahon inggik pikit fil imbibag.

¹⁵Imbibareg Ahas inowen imam Uria fam ele uruk lit, ”Hubu lahaptuk angge suwon haren witikinon aru fam likiyanet wam waroho indokma yale feruk lit hupmu roti anggen yaloho hubu lahaptuk laruhun. An fahet oho ap obog toho unubaher oho hundig-hundig wam men roti anggen men yaltuk lit hele anggur ahaluwe hilili feruk laruhun. Wam waroho indokma yaltukon enemep hubu lahaptuk angge fene hilili feruk laruhun. Anden fobik teko lahu ane fahet noluk aruhuwen hubu lahaptuk angge tembaga ineyon fam wirig angge palimu wam waroho imbik lahalug undamangge kim haruk laruhuk,” ulug hiyag itfag.

¹⁶Hiyag itfag ane ari hikit toho imam Uria inowen turuk latfag.

¹⁷Obog toho tibibagma Ahas inowen kereta lisoho walug laruk angge Allah ibam iraham unduhuk latfahon unumbantumu tik hag angge tembaga fam wiroho topno reg angge arimano nonggoloho waruk lit kou kereta palimu imbik lahibahon arimanowet hilibag. Hilibareg kou humon unuk Ik Ahum suwaleg latfahon ino wam sapi hag angge tembaga fam wirihon emberimu imbibahon ino pilabe fik wambibareg helep palimu imbibag.

¹⁸Imbibareg Asyur inap onowe ahiyeg hawag ulug Ahas inowen NINIKNI Allah ibam sok Yehuda inap onowesi kurukon ino men Allah ibam iraham hili ap suwon fahet wirihon unuk Sabat Hili men halog toho hik isibag.

¹⁹Ahas oluk wereg lit turuk latfag ane tuma tor angge haharoho emberuk lahe. At ap suwon wereg lit turuk latfag ane obog toho suwesingga Yehuda inap onowesi suwonen turuk latfag ane fahet haharehon fam paloho imbibag.

²⁰Welatfareg Ahas war atfagma umbasi o pumbuk unuk Daud suwalehon fam sal eneptuk latfag ambeg ar oho salfag. Salfagma amloho Hizkia ikni ubalma ap suwon lahibag.