Read Angguruk Yali 2 RAJA-RAJA 18 Bible Online

2 RAJA-RAJA 18 - Angguruk Yali bible

2 RAJA-RAJA 18

¹Hun Ela amloho Hosea inowen Israel inap fet enesugmen eneg mo hinahan libagma Yehuda inap onowe suwon Ahas amloho Hizkia ap suwon lahibag.

²Hizkia indag atfag sali mo ilig am wirig am turukmen hinahaneg fimahen 25 atfagma ap suwon lahibareg o Yerusalem wereg lit Yehuda inap fet enesugmen eneg mo teng misigmen nubam hilag piren 29 atfag. Hizkia isinga Zakharia ahaloho unuk Abi welatfag.

³Umba Daud inowen turuk latfag hag toho Hizkia inowen oho NINIKNI Allahn fano peruk ane turuk latfag.

⁴Aren usangge fahet hubu lahaptuk ambeg punumu witfahon arimano siyahap tibisil libareg usa ahalep halog tebeseruk lit e usa ahen uwag hutuk tibibahon kong toho hik isibag. Hik isibareg hun Musan pisanggo hag angge tembaga ineyon fam wirim tibahon Israel inaben unuk Nehustan suwalfahon ino indamet olohotma hubu lahaptuk latfag hag toho ketiya an weregma hubu lahaptuk lamuhup fug ulug halog toho hik isibag.

⁵Hizkia inowen Israel inap INIKNI Allah fam tem toho wenggel haruk latfag hag toho at uwanma oho at war atfagma oho Yehuda inap onowesi suwon misihen oho wenggel haruk latfag fug.

⁶Misihim oho NINIKNI Allah embeselug la fug angge At men ininggik ahandip toho wereg lit Allahn ari-ari turuk lamuhup ulug Musa hiyag itfag ane senegman eneg welatfag.

⁷Ari roho turukmu NINIKNI Allah Hizkia men weregma timin peruk ane obog toho fano teko laruk latfag. Hizkia inowen Asyur inap onowe suwon inggikmu welaruhuk fug ulug inggik kobog isibag.

⁸Kobog isibareg Filistin inap men tog abil laruk lit inibam pumbuk suwonet toronet siyahap til laruk latfareg o Gaza kinang walinggoho werehon oho halog toho unusik libag.

⁹Hun Ela amloho Hosea ino Israel inap onowe weregman mo sabiren libag li itano Hizkia inowen oho Yehuda inap sen enesugmen mo uhan atfagma Asyur inap onowe Salmaneser inowen Israel inap unusul ulug o pumbuk Samaria waling enebik watfag.

¹⁰Waling enesugmen eneg mo hinahan libagma Asyur inaben o Samaria pin kibag. Pin kibag li Hosea ino Israel inap onowe weregman mo sohowen atfagma Hizkia inowen oho Yehuda inap sen enesugmen eneg mo falfaliken libag.

¹¹Libagma Asyur inap onowe inowen Israel inap arimano ininggik hele waroho og eneplug o Asyur kinangma watfareg winon o Halah, winon kinang Gozan ik Habor ayegma, winon o pumbuk Madai kinangma werehon fam welamuhup ulug hiyag isil libag.

¹²NINIKNI Allahn an numalikisi Israel inap men mangno roho welamuhuk ulug amingmingangge Musa feneyen komo eneptuk latfag angge famen Israel inaben Allah ele holtuk latfag fuhon fahet Asyur inaben Israel inap ininggik hele waroho o Asyur kinangma imbisik libag.

¹³Hun Hizkia inowen Yehuda inap fet enesugmen eneg mo nunggul huriken atfagma Asyur inap onowe suwon Sanherib ino watfareg o pumbuk elehet walinggoho ohowon Yehuda kinang fam werehon obog toho pin kibag.

¹⁴Pin kibagma Hizkia inowen otsi Asyur inap onowe o Lakhis weregma lalihip ulug mon enepfagma libareg Asyur inap onowe hiyag utuk lit, ”Ninikni Hizkia inowen irisi ane hiyag humulen holeg lamin, ’Anden siyag ane eneg turuk latikik. Ari fahet tog aptuk laheyon ari umbusuhukteg haren angginon nubam umbuhunon anden ha ruhuk,’ irisi,” ulug hiyag itfag. Hiyag itfagma Asyur inap onowe inowen ele uruk lit, ”Hizkia inowen perak ili ruruk angge anggin leg ha fug tohon 10.000 kilogram men emas umbagpag turuk angge anggin teng-teng angge 1.000 kilogram men og nuruhu,” ibag.

¹⁵Ari ibagma Hizkia inowen perak ili ruruk angge Allah ibam foroho latfahon men at ibam foroho latfahon oho obog toho wibareg Asyur inap onowe suwon og irik libag.

¹⁶Og irik libahon ino emas umbagpag turuk angge Allah ibam kuruk ambeg sok fam lombog teg latfahon men sok uwag fam Hizkia inggarehen lombog toho imbibahon men nonggoloho wibareg obog toho Asyur inap onowe og itfag.

¹⁷Heng tibahon ino og itfag angge famen Asyur inap onowe suwon o Lakhis wereg lit otsi sehen senehon anggolo roho o Yerusalem inap pin unusilihip ulug mon enepfag. Mon enepfag inap arimano sehen seneg inap onowe men, ap suwon ibam foroho ahun men, ik narukon foroho ahun men, it suwon hinahan itanowen milal eneptuk latfag. Milal enepfareg wilip atlug o Yerusalem libareg o Yerusalem pali fil ik sene yenggeleg ambehen sul toho kilabik watfag ambeg itano ap sum urukon wereg ambeg horogma palu arik libag.

¹⁸Palu arik libareg Yehuda inap onowe Hizkia nenembeg ma ulug enele hi roho wol tibag. Wol tibagma Hizkia otsi hinahan, ap suwon ibam foroho ahun Hilkia amloho Elyakim ino men, suwesingga hahatuk ahun Sebna ino men, ap suwon unuk fam ap hiyag isaruk ahun Asaf amloho Yoah ino men wilip atfareg Asyur inap enembeg libag.

¹⁹Libagma ik narukon foroho ahun Asyur inap milal eneptukon inowen it hinahan unubam ele uruk lit, ”Asyur ninap nonowe suwonen ele ehekon hit hinikni Hizkia hiyag irik lalihibon te tu, ’Haren nungge fam wenggel haruk lit hindi yuwag toho welahen?

²⁰Hat hindimuwen, ’Anden fuki roho wenggel halug tog abuk fug angge we nambiliken uruk ane ariyen nine reg lit Asyur inap onowe apmayap tuhuk,’ peruk lahen? Haren ap sa an nibil aruhu peruk lit an nele ying naptuk lahen?

²¹Haren te Mesir inaben let nabuhup peruk lahen angge famen fili si rohon tomuk toho larukmen ininggik hak eneptuk hag toho aben Mesir inap onowe inowen let nenebuhu peruk inap arimano obog toho siyag amuhup.

²²Haren te NINIKNI Allahn let nenebuhu uruk lahen lit teg angge famen hat hinggarehen Yehuda inap men Yerusalem inap unubam hiyag isaruk lit, ’Allah wel turuk ambeg o Yerusalem eneg weregma hit henebe watlug tuman eneg wel turuk lamuhup,’ ulug hiyag isarikinteg o wina ke Allah wel turuk ambeg men hubu lahaptuk ambeg men obog toho elehap tirikin.

²³Ketiya anden Asyur ninap nonowe unuk fam nambong se roho hiyag hitminon tu: Haren hotsi wam kuda fam lahalug laruk ane onolukon teng-teng angge 2.000 hiyag nitmihin halug anden wam kuda ap wereg imihinon wirim toho teng-teng angge 2.000 og huruhuk angge famen ap wereg ulug ehen ha fug teg lahen peruk lahi.

²⁴An nikni amingmingangge siyahon misig werehon inowen hit hunusimin ulug henembeg waharuk halug oho hiren yanggalehep ha fug teg lahep anggeyen hiren Mesir inap arimano kereta wam kudan lisoho walug laruk angge fam lahakupteg waharuk lit windat nenebuhup peruk lahep.

²⁵Hat hindimuwen te NINIKNI Allahn let turuk elegma Asyur inap onowe inowen pin halog toho unusimin ulug nenembeg waharisi peruk lahen? Hit HINIKNI Allah inowen an nubam hiyag nutuk lit, ’Lamihinteg Israel kinang fam werehon arimano pin unusik lamihin,’ ulug mon naptisi,” ulug hiyag isibag.

²⁶Hiyag isibagma Hizkia otsi hun Elyakim men Sebna men Yoah menen Asyur inap onowe ot ino fam hiyag utuk lit, ”Ap elehet emberim ke werehon arimanowen holuhup tohon nit Yehuda ninap nenele fam hiyag nisamihin fug. We Aram enele roho hiyag nisamihinmu niren holtul,” ulug hiyag itfag.

²⁷Hiyag itfagma o Asyur ahun inowen te, ”An nikniyen hit henebe hinahan ariya men hinikni men fahet eneg hiyag isahun ulug mon naptisi fug. Ap elehet pali ke heriyehon aruma eneyog enemiye hit men ambiyeg naruk lamuhubon iren oho holukag ulug it unubam oho hiyag isaruk lahi,” ulug hiyag isibag.

²⁸Hiyag isibareg Asyur ahun ino in atfareg ap obog tohowen holukag ulug Yehuda inap enele fam ele ine roho hiyag isaruk lit, ”Asyur ninap nonowe suwonen ele irisiyon holeg lamok!

²⁹Hun Hizkia inowen hiyag hisaruk ane fahet tem toho hiyag nisaruk puk fug! Aren an ninggikmuwen windat henebuk fug teg.

³⁰Hizkia inowen hit hinindi yuwahap heneptuk lit, ’NINIKNI Allah fam wenggel haruk lamuhup halug Aren nit windat neneptukmu o pumbuk suwon aru Asyur inap onowe inggikmu aruhu fug,’ ulug hiyag hisarukmu

³¹holuhup fug! An Asyur inap onowe welahiyonen hit hunubam hiyag hisaminon holeg lamok: O Yerusalemen wilip atlug an nambeg watlihipteg hat hapma welamuhuk ulug sali embelihip. Ari roho sali embelihipteg hit henebe wal tanehen hiniyabuk wit tahupteg suburu men hali men mun angge man angge yag tahubon men[4] ik hininggarehen habul tahup ambeg naruk lamuhup.

³²Ari hag toho weregman eneg anden hit henengginang ari hag ambeg hondoko hunumbahakuk. Hondoko hunumbahakuk ambeg ino el hom suburu hali sawe sak kin altap mun angge man angge fano wilip atuk ambeg hunumbahakukmu[5] hiren naruk lit henebe war am fug angge honoluk welamuhup. Ari fahet Hizkia inowen hinindi waruk lit, ’NINIKNI Allahn windat nenebuhu,’ ulug hiyag hisarukmu hol hahup fug!

³³Ap o pumbuk winonen tu Allah hag toho wereg perukon arimanowen it wel eneptuk inap enengginang an Asyur inap onowe ninggikmuwen taluk naptusa ano? Eleg-o, nori.

³⁴O Hamat inap men Arpad inap menen ninikni ulug wel eneptukon kema wereg? O Sefarwaim inap men Hena inap men Iwa inap menen tohon kema wereg? Allah hag toho wereg perukon enesehelimuwon misihen o Samaria inap an ninggikmuwen taluk enebik waharisi ano?

³⁵Nunumba ulug wel eneptukon obog toho enesehelimuwon misihen umalikisi an ninggikmuwen windat eneptisi ano? Nangginoho hit HINIKNI Allah inowen hit Yerusalem hinap an ninggikmuwen windat henebuhu?” ulug hiyag isibag.

³⁶Hiyag isibag ane ino Yerusalem inap arimanowen holfareg Hizkia inowen hebeloho uk fug ulug komo enepfag ane roho enele eleg angge wereg lit hebeloho hiyag itfag fug.

³⁷Asyur ahun inowen hiyag isibag ane fahet inindi siyag atfareg Elyakim men Sebna men Yoah menen enesum wan teg latfahon tararag tibisibareg inikni Hizkia ambeg iren holfag ane hikit toho hiyag irik libag.