Read Angguruk Yali 2 RAJA-RAJA 19 Bible Online

2 RAJA-RAJA 19 - Angguruk Yali bible

2 RAJA-RAJA 19

¹Hizkia otsiyen Asyur ahun inowen ibag ane fahet hiyag itfagma hol hibareg Hizkia ino indi siyahen sum wan teg latfahon tararag tibisibareg kinang fesi lahaboho NINIKNI Allah ibam libag.

²Libareg Hizkia inowen at ibam foroho ahun Elyakim men suwesingga hahatuk ahun Sebna men Allah ibam foroho inap imam sabalon arimanowet Allah amingmingangge nabi Yesaya ambeg lalihip ulug mon enepfag. Mon enepfagma it arimanowen oho kinang fesi lahapfareg hun Amos amloho Yesaya ambeg libag.

³Libareg Yesaya fam enele uruk lit, ”Ninikni Hizkia inowen ele ehek ane holeg lamin! O yoho aru alem angginon nit nunubam aha! Ninindi siyahap neneptuk lit apmayap nenebehesa. Nit te hiyap malik endetmin ulug inel-hanel watuk lit ine eleg atlug wereg hag toho welahe.

⁴Asyur inap onoweyen ot unuk palimu rehon eke monde ferisimu aren Allah oluk werehon abug ehek ane hat HIKNI Allah inowen holehek ano. Holehekteg alem angginon it unubam umbuhu ano. Ari fahet nit tor angge nonoluk welaheyon nunubahet Allah fam sembahyang imihin,” ulug hiyag itfag.

⁵Hizkia inowen ibag ane Yesaya hiyag itfagma holfareg

⁶aren hebeloho hiyag isaruk lit, ”NINIKNI Allahn ele uruk ane iminon tu hinikni Hizkia hiyag itlihip, ’Asyur inap onowe amingmingangge toron arimanowen An ninggaliyap naptuk lit eheson ari fahet hakol ha fug!

⁷Anden Asyur inap onowe indi sohuwap tuhukmu aben enele si ane uruk ane holuhureg we tem ehesa ulug suhuloho ibam lahu. Lahureg weregman Anden ap inindi kahal enebuhukmu ibamen ware fusuhup,’ ehek,” ulug hiyag isibag.

⁸Hiyag isibareg weregman Asyur inap onowe suwon Sanherib ino o Lakhis inowen wilip atfareg o Libna inap men tog abul ulug libag. Libag ane ino fahet Sanherib ot unuk palimu rehon o Yerusalem monde fibahon inowen hol hibareg o Libna ikni Sanherib wereg ambeg libag.

⁹Libareg weregma aben enele uruk lit, ”Sudan inap onowe Tirhaka inowen Sanherib watmin ulug wilip atisireg kalemma waharuk,” urukmu hol hibareg Sanherib inowen Yehuda inap onowe Hizkia fahet suwesingga haharoho imbibag.

¹⁰Haharoho imbibag ane aplohok tu, ”Hikni Allah haren wel turuk lahenon inowen hindi ninap haptuk lit, ’O Yerusalem Asyur inap onowe inggikmu aruhu fug,’ ulug hiyag hutukon holuk fug!

¹¹Ap suwon Asyur inap sen enesuhon arimanowen o pumbuk apmayap enebul ulug laruk latusa ambeg obog toho pin lilibug-lalabag toho unusuruk latusa ane haren oho hol harikin anggeyen hat hindimuwen nalongen numbahakup peruk lit welahen?

¹²An numbasiyen o Gozan inap, Haran inap, Rezef inap, Eden inap o Telasar welatfahon arimano oho unusurukmu iren tu Allah hag toho wereg ulug wel eneptukonen inibil atuk lit ap misig oho windat enepfag fug.

¹³O Hamat inap, Arpad inap, o Sefarwaim inap, Hena inap, Iwa inap, it arimano obog toho onowesi suwon kema wereg?” ulug suwesingga fam haharoho imbibag.

¹⁴Haharoho imbibareg Sanherib inowen Hizkia ambeg walug lalihip ulug otsi mon enepfagma walug libareg Hizkia og itfag. Og itfagma Hizkia inowen suwesingga ino kim hibareg Allah ibam walug libareg NINIKNI Allah olohotma wiriloho imbibag.

¹⁵Imbibareg Hizkia inowen Allah fam sembahyang uruk lit, ”Israel ninap NINIKNI Allah, Hat hotsi poholmon eneherabul palimu heriyeg lit welahenon hubam nele uruk lahi. Haren eneg pohol ha kinang ha wal tinareg ap suwon-suwon kinang ngi roho seneg inap oho Haren sen enesug lahen.

¹⁶NIKNI Allah, hilanggen fenggen atmihinteg yet nisamihin. Hisanggo leho femihinteg Sanherib inowen Hat holuk welahenon apmayap haptuk lit haharoho emberisiyon tu hol himin.

¹⁷Asyur inap onowesi arimanowen o pumbuk anggolo pin halog toho unusuruk lit

¹⁸usangge iren tohon indokma hik isalug yaltuk latusa. Usangge arimano Hat Allah hag toho welatusa fug, ap ininggiken e fam, helep fam wituk latuson arimano obog toho siyaha feseruk latusa.

¹⁹Ari fahet ketiya Allah NINIKNI, Haren Sanherib inggikmuwen windat nenepmihin. Windat nenepmihinmu ap kinang atogman atogma werehon obog tohowen NINIKNI Allah we misig wereg ulug onoluk aruhu,” ulug sembahyang ibag.

²⁰Hizkia inowen Allah fam ibareg weregman Yesaya inowen Hizkia ambeg lamihin ulug ap eke monde fibagma libareg Hizkia hiyag utuk lit, ”Israel ninap NINIKNI Allahn ele uruk ane tu holeg lamin, ’Haren Asyur inap onowe Sanherib ino fahet sembahyang An nubam ehenon ino holihi.

²¹An HINIKNI Allahn Sanherib fahet uruk lahiyon tu, Yerusalem inap tom Sion fam werehon arimanowen hat inda yag haptuk lit hinggaliyap haptuk.

²²Haren te ap sa apmayap turuk lit indi siyahap turuk lahi ulug holuk teg lit irikin ano? Sa olohotman nele ine roho uruk lit hemet taruk lahi ulug holuk? An Allah Israel inap Inikni nebe usa fuluwon nolohotman hinggali eleg toho turuk latikin.

²³Haren An Allah nabug irikin ane ap anggolowen holukag ulug hotsi mon eneptikinmu iren ap hiyag isaruk lit, ’Anden kereta wam kudan lisoho walug laruk angge anggolo seneg lahiyon tom yaron fam oho laharuk latikik. Tom Libanon fam yatma oho lalug anden e sahi yaron men e mur ineyon men mutuk latikik. Ohi suwon hup-hup angge nohil larukmen eneg mondabi atogma larikik.

²⁴O yitmi-yatma larikikteg kinang habuli ferikik ambeg arimano ik yenggel atisimu naruk latikik. Ik o Mesir kinangma werehon obog toho an nuyuhen sobit-sabar isaruk latikikmu firig atusa,’ ulug hinggarehen hawelwel taruk lahen.

²⁵Haren turuk latikinon obog toho Anden amukasi piyag ane hikit toho eneg turuk latikin. Anden indam piyag ane ketiya hikir amag ulug Anden hat hineyap haptukmu haren o pumbuk suwon elehet walinggoho ohowon harep pisako olunap tebeseruk latikin.

²⁶O pumbuk haren unusuruk latikin inap inine elehen yuk lagmag uruk lit ininggali atuk latusa. It arimano hoholangge helep falma wilibihon men[6] o unggama wilip atukon men halo atuk hag toho welatusa.

²⁷Haren in am hur am turuk lit kuk wilip am turuk lahenon obog toho An noluk. Haren nele ying naptuk lahenon oho Anden yet hiyaruk lahi.

²⁸Haren nele ying naptuk lit hele hemet toho urukmu holtikikteg Anden hat hambiyang elma hele ililoho waharikin ke suhuloho hibam lit haplug humbahik lahuk.

²⁹Hizkia namloho, fano amuhup ane fahet enehangge yet hahunon tu: Mo ketiya larukon men fobik waruhuwon men fam naruk angge kinangman amu wilip atukon naruk lamuhupteg mo hinahanon fam suburu men anggur anggen men hiren yag tahubon arimano naruk lamuhup.

³⁰Yehuda inap enesehelimuwon onoluk werehon arimano e umanggen kinangma wambulug anggen anggolo yihik ferukon hag toho amuhup.

³¹O Yerusalem tom Sion fam ap tor angge werehon arimano fobik fano roho welamuhup. Alem ihiyon ari teko lawag ulug An HINIKNI Allah pohol kinang seneg lahiyonen yet teg laruhuk.

³²An HINIKNI Allahn Asyur inap onowe Sanherib fahet uruk lahiyon tu: Aren o pumbuk aru fam tog misig oho pising ha waruhu fureg ebe oho o Yerusalem kik waruhu fug. At otsi oho sing wan tulug Yerusalem hinap hunusul ulug waling henebik wamuhup fug.

³³O pumbuk aru fam kik wam fug angge Sanherib ino waharisi keyen ibam suhuloho lahu ulug An HINIKNI Allahn nele uruk lahi.

³⁴An nunuk siyag am nowen namingmingangge Daud fam nele sali imbiyahon hikit toho o Yerusalem hinap aruma hinibil atuk lit let heneptuk laruhuk,’ ehek,” ulug Yesayan ibag ane ot inowen Hizkia hiyag itfag.

³⁵Hiyag itfag sambil ino hubanggo NINIKNI Allah ot malaikat ino Asyur inaben o sabo wirig ambeg watfareg ap teng-teng angge 185.000 unusibag. Unusibagma likiyamon Asyur inap onoluk welatfahon arimano in atfareg yet harukmen ap winag isa fug toho waroho hik-hak isibahon arimano yet isibag.

³⁶Yet isibareg onowe Sanherib o Niniwe libareg inibam welatfag.

³⁷Welatfareg o misihim sambil Sanherib ino an numba Nisrokh fam sembahyang imin ulug Nisrokh ibam libagma at umalikisi Adramelekh men Sarezer menen karog fam inikni ware feselug kinang Ararat fam longgo ik libag. Libagma Sanherib amloho eke unuk Esarhadon ino ubalma ap suwon lahibag.