Read Angguruk Yali 2 RAJA-RAJA 2 Bible Online

2 RAJA-RAJA 2 - Angguruk Yali bible

2 RAJA-RAJA 2

¹NINIKNI Allahn hun Elia ino siyelu apmane poholman lisoho wamin pibag li horog atfagma hun Elia men Elisa men o Gilgalen wilip atlug larukmen

²Elia inowen Elisa hiyag utuk lit, ”NINIKNI Allahn o Betel lamihin ulug hiyag nerehekma hat tuma welamin,” ulug hiyag itfag. Hiyag itfagma Elisan hebeloho hiyag utuk lit, ”An tuma weregma hat eneg lamihin fug. NINIKNI Allah men hat men honolohotman we tem toho uruk lahi,” ulug hiyag itfag. Ibareg it enebe pirenet o Betel libag.

³O Betel horogma larukmen Allah amingmingangge nabi o Betel welatfahon arimano o inowen wilip atlug Elisa ambeg watfareg umung haruk lit, ”Hat hikni Elia ino o yoho NINIKNI Allahn poholman lisoho wamisimu hat humbahalug lahamisi ane hat holuk toho welahen?” ulug umung hibagma Elisa inowen, ”An oho noluk teg lahireg henele imbisiyek!” ibag.

⁴Ari ibagma Elia inowen Elisa fam ele uruk lit, ”Elisa nare, NINIKNI Allahn o Yerikho lamihin ulug hiyag nerehekma hat tuma welatmihin,” ibagma Elisa inowen, ”An tuma weregma hat eneg lamihin fug! NINIKNI Allah men hat men honolohotman we tem toho uruk lahi,” ibagma it enebe pirenet o Yerikho libag.

⁵O Yerikho libagma Allah amingmingangge nabi o Yerikho welatfahon arimano Elisa ambeg watfareg hiyag utuk lit, ”Hat hikni Elia ino o yoho NINIKNI Allahn poholman lisoho wamisimu hat humbahalug lahamisi ane hat holuk?” ulug hiyag itfagma Elisa inowen, ”An oho noluk teg lahireg henele imbisiyek!” ibag.

⁶Ibagma Elia inowen Elisa hiyag utuk lit, ”NINIKNI Allahn an ik Yordan ikma lamihin ulug hiyag nerehekma hat tuma welatmihin,” ibagma Elisa inowen, ”An tuma weregma hat eneg lamihin fug! NINIKNI Allah men hat men honolohotman we tem toho uruk lahi,” ibagma it enebe pirenet libag.

⁷Larukmu Allah amingmingangge nabi teng piren 50 it onombolim libag. Libagma Elia men Elisa men tam libareg ik Yordan ayegma unduhukmu it fobik libareg we tot yatman unduhuk lit yet isibag.

⁸Yet isarukmen Elia inowen sum ebemon hog toho wibareg yinggiloho seneg lit ik il watuk latfagma ik ino pul ke minggitfagma it piren itano kinang lilog tegma nindig atfag.

⁹Ik fimag fil nindig atfareg Elia inowen Elisa fam ele uruk lit, ”Allahn hat hirahamen an lisoho og nabuk fugmu anden hat hubam timin ane heng napmihin,” ibagma Elisa inowen, ”An hat hubalmangge welaruhuken hat hine minggiroho og nimin,” ulug hiyag itfag.

¹⁰Hiyag itfagma Elia inowen, ”Haren heng nabehen ane anggin angge famen hat hirahamen an lisoho og napmisi ane ari o yoho yet niyamihin halug heng nabehen ane hikit toho teko lahu. Yet niyamihin fug halug teko lahu fug,” ulug hiyag itfag.

¹¹Enele il larukmen kereta wam kudan lisoho walug laruk angge indok hag toho umbagpag turukon eke it sehelimu waharukmu itano it piren enemu-enemu atfareg Elia ino siyelu apmane poholma lahibag.

¹²Laharukmu hun Elisa inowen yet hibareg ele ine roho uruk lit, ”An nikni, an nikni, nit Israel ninap hine roho ili og neneptuk latikinon ino yoho mondabi longgo ehen,” ibareg Elia mondabi longgo ibagma yet ha fug tehen sum ebemon inggiken tararag toho pirena fisibag.

¹³Pirena fisibareg sum Elian tohon wambik watfahon ino lisoho wibareg nibam lamin ulug laruk lit ik Yordan ayegma unduhuk latfag.

¹⁴Unduhuk lit sum Elian tohon seneg lit ele ine roho, ”Elia IKNI Allah kema welahen?” ulug sum ino fam ik il watuk latfag. Ik il watukmen ik ino pul ke minggitfagma hun Elisa ino ik fimag fil nindig atfag.

¹⁵Nindig atfareg larukmen Allah amingmingangge nabi Yerikho inap arimano horogma unduhuk lit yet hibareg enele uruk lit, ”Hun Elia ine ino Elisa ubam aha,” ulug iraham watfareg enelenggen fam kinangma hur atfareg

¹⁶Elisa hiyag utuk lit, ”Nit hat hamingmingangge ap teng piren 50 ninineyon eneg wilip amulteg hikni Elia yami rik lul. NINIKNI Allah hime inowen hondoholug lahareg tom fam ano fanggongma ano hik esehek lam nowen,” ulug hiyag itfagma Elisa inowen, ”Yami ruk fug, imbisiyek!” ibag.

¹⁷Ari ibagma iren enele ine roho uruk lit inggaliyap turuk latfagma Elisa inowen, ”Yami rik lalihip,” ibag. Ibagma Allah amingmingangge teng piren welatfahon arimano wilip atfareg yami rurukmen hup hinahan atfag angge famen Elia ino hibag fug.

¹⁸Hibag fureg it suhuloho Elisa o Yerikho wereg ambeg watfagma Elisa inowen ele hiyag isaruk lit, ”Anden yami rik lalihip fug ulug hiyag hisarikik ane nungge fahet holtikip fug?” ulug hiyag isibag.

¹⁹Yerikho inap arimanowen Elisa fam hiyag utuk lit, ”Ninikni, o pumbuk aru fano wirigmu yet haruk lahen angge famen ik eneg te siyag. Ik siyahon ariyen malik winon indag am fugmen inisingasi enehummuwen war atuk,” ibag.

²⁰Ibagma Elisa inowen hebeloho hiyag isaruk lit, ”Kubag keron misig saho undama kilabe felihipteg an nambeg walug watlihip,” ulug hiyag isibagma iren kubag ino Elisa og irik watfag.

²¹Og irik watfagma Elisa ik narukon ino elerukmu libareg ele uruk lit, ”NINIKNI Allah ele urukon tu, ’Ik aru Anden fanowap turuk lahi angge re fobik nin ik aruwen malik inisingasi enehummuwen war atukon men indag atukmu war atukon men mondabi eleg laruhu,’ ehek,” ulug saho kubag famon ino ik elma hik isibag.

²²Elisa inowen ele ibag ane hikit toho ik fano atfahon ino ketiya oho wereg.

²³Hun Elisa ino o Yerikhowen wilip atfareg o Betel lahamin ulug laharukmen malik toron-toron o pumbuk inowen wilip atfareg hi ruruk lit, ”Tilag teg hahun, tilag teg hahun, lahik ma, lahik ma!” ulug inggaliyap turuk latfag.

²⁴Inggaliyap turukmen Elisa inowen hebeloho yet isibareg NINIKNI Allah unuk fam malik arimano huluwap enepfag. Huluwap eneptukmen wam onolokon[1] piren fareman wilip atfareg malik teng misigmen nubam hilag nuwal fimahen 42 senggel enepfag.

²⁵Senggel enepfagma Elisa ino tom Karmel fam libareg nin suhuloho o Samaria libag.