Read Angguruk Yali 2 RAJA-RAJA 20 Bible Online

2 RAJA-RAJA 20 - Angguruk Yali bible

2 RAJA-RAJA 20

¹Itano li ap suwon Hizkia ino ouk ubam atfagma war am hag ane turuk latfag. Turukmu Allah amingmingangge nabi hun Amos amloho Yesaya ino Hizkia ambeg watfareg hiyag utuk lit, ”NINIKNI Allahn ele urukon tu holeg lamin: Hat nin fano aruhun fuhen mun angge man angge haren tohon haloho umbuhun. We tot welaruhunteg war aruhun,” ibag.

²Ibagma holfareg Hizkia indi siyag atfagma orohole soluk fil hebel atfareg NINIKNI Allah fam sembahyang uruk lit,

³”NIKNI Allah, an nindi wirik toho Hat hubam eneg wenggel haruk latikik. Nindi piren teg eleg angge Hat hele holtuk lit Haren fano peruk lahen ane turuk latikikon wenggel himin,” ibareg uba anggolo yatuk latfag.

⁴Hun Yesaya ino Hizkia embeselug libareg ap suwon ibam owahalma larukmu itano NINIKNI Allahn Yesaya ubam ele uruk lit,

⁵”Hebeloho lamihinteg An numalikisi fet enesug ahun Hizkia hiyag utuk lit, ’NINIKNI Allah humba Daud inowen wel turuk latfahonen ele urukon tu holeg lamin: Haren An nubam sembahyang ehenon holtuk lit uba yarehenon oho yet hiyihireg Anden hat hihit habuhuk. Hihit habuhukmu hat o ha An HINIKNI nibam lahik waruhun.

⁶Ketiya war atlen angge famen Anden hat hineyap haptukmu mo ilig am wirig am turukmen nuwal fimahen 15 aruhumu eneg war aruhun. Anden let haptuk lit hat men humalikisi Yerusalem inap men Asyur inap onowe suwon inggikmuwen windat henebuhuk. An nunuk siyag am nowen namingmingangge Daud fam nele sali imbiyahon hikit toho o Yerusalem hinap aruma hinibil atuk lit let heneptuk laruhuk,’ ulug hiyag itmihin,” ibag.

⁷Ibag ane ari Yesaya inowen hiyag irik libareg Hizkia amingmingangge unubam, ”E ara anggen wak lalihip,” ulug hiyag isibagma walug watfareg tag toho Hizkia pot yihik latfahon fam tahangge ribibagma fano atfag.

⁸Uwan fano am fug lit Hizkia inowen Yesaya fam, ”NINIKNI Allahn hihit nabuhumu an o ha At ibam lahuk ulug noluk atmisiyen enehane teko lamisi ano?” ulug kapal hibag.

⁹Kapal hibagma Yesaya inowen hiyag utuk lit, ”NINIKNI Allahn ehekon hikir aruhu ulug holuk atmisiyen enehane eke timisi. Enehane Allahn turukmu yet hamihinon ari e uwag hun Ahasen hutuk tibibahon aru ahuhe misihim eneg il numen aluke fil lamisi ano, il numen waha ke suhuloho lamisi ano ulug hiyag nitmihin,” ibag.

¹⁰Ibagma Hizkia inowen, ”Ahuhe ino il numen aluke fil laruk ane se reg. Allahn tuk teg ane yet haminen ahuhe ino il numen waha ke suhuloho lawag,” ulug hiyag itfag.

¹¹Hiyag itfagma Yesaya inowen NINIKNI Allah ubam sembahyang ibagma e uwag ahuhe ino il numen watfag ke suhuloho libag.

¹²Ari roho tibagma Babilonia inap onowe suwon Merodakh-Baladan hun Baladan amloho inowen Hizkia ouk ubam atfahon fahet hol hibareg indiyen suwesingga eke men fano-fano angge men Hizkia ambeg walug lalihip ulug otsi mon enebik watfag.

¹³Mon enebik watfag ane ari fahet Hizkia ino ahiyeg hibareg Babilonia inap mon enepfahon arimanowen nanggengge obog toho yet hawag ulug ili ruruk angge perak emas men amben fano angge men e ahaluwe amben fanowon men fano-fano angge winon men minggin tog men aren foroho latfahon obog toho unug isibag. Mun angge man angge anden tohon fahet onoluk amag ulug eke hag eke hag foroho ambeg at ibam welatfahon men o kema-kema at angginang fam welatfahon men unug isil libag.

¹⁴Libagma nabi Yesaya ino Hizkia ambeg watfareg ele ubam uruk lit, ”Ap arima o keman waharusa? Nungge ane hiyag hutusa?” ulug kapal hibagma Hizkia inowen, ”O yatman, o Babilonia kinangman waharusa,” ibag.

¹⁵Ibagma Yesaya inowen, ”Hat hibam foroho lahen angge nungge yet harusa?” ulug kapal hibagma Hizkia inowen, ”Mun angge man angge nibam foroho lahiyon tor angge oho hirahuk fug angge foroho lahi ambeg arimano obog toho unug isarikik,” ibag.

¹⁶Ibagma Yesaya inowen, ”NINIKNI Allahn ele urukon tu holeg lamin:

¹⁷Welamuhupmu fano-fano angge hat humbasiyen andog toho emberuk latfahon hibam foroho lahen angge arimano obog toho Babilonia inaben huhulangge hilalug inibam lahup. Tor angge oho tuma welaruhu fug ulug NINIKNI Allahn ele uruk.

¹⁸Hat humalikisi indag enebuhunon winon hondog eneplug o Babilonia kinang fam imbisik lahupmu Babilonia inap onowe suwon amingmingangge wereg lit at ibamen let turuk lamuhup,” ibag.

¹⁹Ibagma Hizkia indimuwen wenggel haruk lit, ”An noluk wereg li ap seliyonen nele ying naptuk elegma nindi yuwag toho welaruhuk halug fano,” pibareg Yesaya fam, ”NINIKNI Allahn ele fano roho ehek ane hiyag nerehen,” ibag.

²⁰Ap suwon Hizkia oluk wereg lit turuk latfag ane tuma tor angge haharoho emberuk lahe. Aren ahako roho turuk latfag ane obog toho men o pumbuk sel filen ik sul toho ik yenggeleg ambeg kilabik waharuk ke witfag ane men suwesingga Yehuda inap onowesi suwonen turuk latfag ane fahet haharehon fam paloho imbibag.

²¹Welatfareg war atfagma amloho Manasye ikni ubalma ap suwon lahibag.