Read Angguruk Yali 2 RAJA-RAJA 21 Bible Online

2 RAJA-RAJA 21 - Angguruk Yali bible

2 RAJA-RAJA 21

¹Hun Manasye indag tibag sali mo ilig am wirig am turukmen nisanggowen atfagma ap suwon lahibareg o Yerusalem wereg lit Yehuda inap fet enesugmen eneg mo teng pirenman nubam hilag misig 55 libag. Manasye isinga unuk Hefzibah welatfag.

²NINIKNI Allahn Israel inap onolohotman yanggal enepfag inaben ap enehummu siyahap eneptuk ane turuk latfag hag toho Manasye inowen oho NINIKNI Allahn siyag perukon eneg turuk latfag.

³Nunumbasi wereg perukon fahet hubu lahaptuk ambeg punumu welatfahon ikni Hizkia inowen siyahap tibahon arimano amloho Manasye inowen nin hebeloho wiri fil libag. Usangge Baal fahet wam waroho yaltuk ambeg witil laruk lit Israel inap onowe suwon Ahab inowen turuk latfag hag toho aren oho Allah hiyap angge wereg ulug wirimangge unuk Asyera wiroho unduhuk fibareg suhal poholma mondoko werehon enepma elenggen fam hur atug wel eneptuk latfag.

⁴NINIKNI Allahn An nibam o Yerusalem wirihon inowen An nunuk eneg wel naptuk lamuhup ibag angge famen Manasye inowen ap o winamon unumbasi fahet hubu lahaptuk angge Allah ibam unduhuk fik kibag.

⁵Unduhuk fik kibareg NINIKNI Allah ibam elehet piren huk toho kilabeg ambeg suhal poholma mondoko werehon fahet hubu lahaptuk ambeg wiri fibag.

⁶Usane arimano obog toho turuk lit amloho yuhon indokma yalfag. Aren pamongge fam ap unusuruk lit, fulu ane ruruk lit, ap warehon enehime wol eneptuk lit, teko lahu ane fahet enehangge wereg ano ulug yami ruruk latfag. Ari roho NINIKNI Allahn siyag peruk ane su roho turuk lit At indi olokap turuk latfag.

⁷Usangge unuk Asyera aren witfahon ino Allah ibam unduhuk fibag. Unduhuk fibag ambeg ino fahet NINIKNI Allahn ap suwon Daud men amloho Salomo men unubam ele uruk lit, ”Anden Israel inap ununggul unuk obog toho enesehelimuwen o pumbuk Yerusalem eneko mumal tarikik. Mumal tarikik ambeg ino An nibam wit numuhupteg ketiya famen tulug fobik oho An nunuk wel naptukmen eneg welamuhup.

⁸Israel inap arimanowen An nele holtuk lit namingmingangge Musa inowen aben tuk teg ane fahet komo enepfag ane hikit toho turuk lamuhup halug Anden it fet enesugmen eneg welaruhukmu ap misihen oho kinang unumbasi og isiyag ambehen yanggal enebuhu fug,” ibag.

⁹Ari ibag angge famen Yehuda inap arimanowen holtuk latfag fug. Onowe Manasye inowen inindi kahal eneptukmu umalikisi Yehuda inaben siyag ane su roho turuk latfahon men indam NINIKNI Allahn Israel inap onolohotman elehap enepfag inaben siyag ane turuk latfahon men wirim teg latfag fug.

¹⁰Wirim teg latfag fugmu NINIKNI Allahn amingmingangge nabi feneyen ele uruk lit,

¹¹”Yehuda inap onowe Manasye inowen siyag ane til-wil laruk lit ap enehummu siyahap eneptuk ane su roho turukon palimu regma Amori inap at uwanma kinang tu fam welatfahon arimanowen siyag ane turuk latfahon apma reg. Manasye inowen usangge witukmu Yehuda inaben inikni ombolim laruk lit iren oho usane turuk.

¹²Ari fahet Israel hinap HINIKNI Allahn ele urukon tu holeg lamek: O pumbuk Yerusalem men Yehuda hinap men hunubam alem angginon umbuhuk. Umbuhukon fahet ap obog tohowen holuhupteg inisanggo fuma-fuma tale nge ruhu.

¹³O Yerusalem hinap aruma elehet hare roho ohowon hag toho wereg ulug eneg aruhuwen o wituk inaben hele fam wirim turuk hag toho Anden oho hit wirim hisahuk. Wirim hisahukteg o Samaria inap men onowe suwon Ahab uhe umalikisi men alem angginon unubam imbiyag hag toho hir oho alem angginon hunubam umbuhuk. Kubag elma alinlan werehon aben ho roho hik isalug ele han pilabe feruk hag toho Anden oho o Yerusalem hinap obog toho hililoho hik hisahuk.

¹⁴An numalikisi hik isarukmu onoluk welamuhubon arimano An nambol yig isalug ap seliyon ininggikmu umbuhukmu enenggengge obog toho huhulangge hilak waharuk lit enebe ininggik lisoho hondog eneplug lahup.

¹⁵It unumbasi o Mesiren wilip atfag sambilen tulug ketiya oho Anden siyag peruk lahiyon til-wil laruk lit nindi nolokap naptuk ane fahet alem angginon ari unubam umbuhuk,” ibag.

¹⁶Ari ibag angge famen ap suwon Manasye inowen siyag-siyag ane eneg turukmu umalikisi Yehuda inap arimano inikni ombolim laruk lit NINIKNI Allahn siyag perukon eneg turuk latfag. Manasyeyen nin sebe roho olok ane turuk lit ap siyag ane turuk elehon anggolo unusil larukmen eneg enemeben o Yerusalem pumbuk atogman atogma keleg atfag.

¹⁷Manasye oluk wereg lit turuk latfag ane tuma tor angge haharoho emberuk lahe. Aren turuk latfag ane obog toho men siyag ane til-wil laruk latfag ane men suwesingga Yehuda inap onowesi suwonen turuk latfag ane fahet haharehon fam paloho imbibag.

¹⁸Welatfareg war atfagma Manasye ino ibam owahalma kinang indam hun Uza inowen ngi reg latfahon fam salfag. Salfagma amloho Amon ikni ubalma ap suwon lahibag.

¹⁹Hun Amon indag tibag sali mo ilig am wirig am turukmen falfalik fimahen 22 atfagma ap suwon lahibareg o Yerusalem wereg lit Yehuda inap fet enesugmen eneg mo piren libag. Amon isinga o Yotba ahun Harus ahaloho unuk Mesulemet welatfag.

²⁰Ikni Manasye inowen turuk latfag hag toho amloho Amon inowen oho NINIKNI Allahn siyag perukon eneg turuk latfag.

²¹Ikni ombolim laruk lit aren oho usangge onolohotma elenggen fam hur atug sembahyang uruk latfag.

²²NINIKNI Allah umbasiyen wel turuk latfahon ino ambol yig itfareg Allahn fano perukon turuk latfag fug.

²³Turuk latfag fugmu Amon otsiyen ninikni pilabul ulug enele sahalfareg ap suwon ibamen ware fisibag.

²⁴Ware fisibagma Yehuda inaben ap suwon watfag inap arimano obog toho unusibareg Amon amloho Yosia ikni ubalma ap suwon lahapfag.

²⁵Amon oluk wereg lit turuk latfag ane tuma tor angge haharoho emberuk lahe. At ap suwon wereg lit turuk latfag ane obog toho suwesingga Yehuda inap onowesi suwonen turuk latfag ane fahet haharehon fam paloho imbibag.

²⁶Amon ware fisibagma kinang indam hun Uza inowen ngi reg latfahon fam salfag. Salfagma amloho Yosia ikni ubalma ap suwon lahibag.