Read Angguruk Yali 2 RAJA-RAJA 22 Bible Online

2 RAJA-RAJA 22 - Angguruk Yali bible

2 RAJA-RAJA 22

¹Hun Yosia indag atfag sali mo ilig am wirig am turukmen likinen atfagma ap suwon lahapfag. Lahapfagma o Yerusalem wereg lit Yehuda inap fet enesugmen eneg mo teng misigmen nubam hilag uhan 31 atfag. Yosia isinga o Bozkat hiyap unuk te Yedida, hun Adaya ahaloho welatfag.

²Umba Dauren turuk latfag hag toho Yosia inowen oho Allah olohotma fano roho wereg lit ke hareyon la fug angge pikir ane eneg turuk latfag.

³Yosia ino ap suwon weregman mo nanggolop fimag atfagma Yosia inowen suwesingga hahatukon, hun Mesulam umbusag, Azalya amloho Safan ino fam Allah ibam lamihin ulug monde feruk lit,

⁴”Allah ibam foroho inap onowe imam Hilkia ambeg lamihinteg hiyag itmihinon tu, ’Uang ap Allah ibam kuruk lit sok foroho inap ininggikmu emberukon arimano wep toho embemihin.

⁵Uang wep toho embemihinon arimano Allah ibam wituk inap onowesi ininggikmu og isamihin. Og isamihinon onowesi arimanowen enemingmingangge o Allah ibam siyag atukmu haltuk inap

⁶e witukon men helep warukon men o mininggurukon men og isahup. O ino siyag atisiyon haltukon fahet obamangge aben walug waharukon arimano oho onggo paltuk lamuhup.

⁷Uang wilibuhubon fahet inindi pikit toho turuken hebeloho an hiyag numuhup fug,’ imihin,” ulug Yosia inowen hun Safan monde fibag.

⁸Monde fibagma Safan ino Allah ibam foroho inap onowe Hilkia ambeg libareg Yosian ibag ane hikit toho hiyag itfagma Hilkian hebeloho Safan hiyag utuk lit, ”Allahn umalikisi komo enepfag ane hun Musa inowen haharoho imbibahon ino Allah ibam hirako weregma hiyaharikik,” ibareg suwesingga hiyahibahon ino Safan og itfagma wiriloho seneg lit kim hibag.

⁹Kim hibareg suwesingga ino walug ap suwon Yosia ambeg libareg hiyag utuk lit, ”Hat hotsiyen uang Allah ibam andog toho emberukon arimano wehesareg Allah ibam wituk inap onowesi ininggikmu embehesa,” ulug hiyag itfag.

¹⁰Hiyag itfareg Safan inowen nin eke hiyag utuk lit, ”Imam Hilkia inowen suwesingga aru og nerehek,” ulug Yosia olohotma wiriloho seneg lit hahareg ane uruk latfag.

¹¹Ari urukmu hol hibareg indi siyag atfagma Yosia inowen sum wan teg latfahon tararag tibisibag.

¹²Tararag tibisibareg imam Hilkia, Safan amloho Ahikam, Mikha amloho Akhbor, suwesingga hahatuk ahun Safan, at let turuk ahun Asaya, it arimano unubam hiyag isaruk lit,

¹³”Suwesingga aru fam hahareg ane nit nunumbasiyen fano roho kim hibag fureg Allahn komo enepfag ane hikit toho turuk latfag fugmu NINIKNI Allahn ahummu het-pet haruk lit olok peruk ane indok ambulpul hag toho nunubam atuk. Ari fahet lalihipteg suwesingga hiyaharisiyon fam hahareg ane fahet NINIKNI Allahn an men Yehuda inap obog toho nunubam hiyag nisamisi ane kapal ha lalihip,” ulug hiyag isibag.

¹⁴Hiyag isibagma hun Hilkia, Ahikam, Akhbor, Safan, Asaya, it arimano o Yerusalem o keron arimano witfag ambeg Allah amingmingangge nabi hiyap angge Hulda weregma libag. (Hulda ahun unuk Salum ino sum Allah ibam forohowon arimano haloho emberuk ahun welatfag. Salum ikni Tikwa, Tikwa ikni Harhas welatfag.) Hulda ambeg libareg Yosian mon enepfahon arimanowen suwesingga hiyahibahon fahet Hulda hiyag itfag.

¹⁵Hiyag itfagma Hulda inowen hiyag isaruk lit, ”Israel ninap NINIKNI Allahn uruk ane iminon tu Yosia fam hiyag irik lalihip,

¹⁶’Suwesingga fam hahareg ane Yehuda inap onowe Yosia inowen kim hehekon hikit toho An Allahn o Yerusalem inap unubam alem angginon umbuhuk.

¹⁷Iren An enembol yig nutuk lit ap winonen Allah hag toho wereg perukon unubahet wam waroho hubu lahaptuk latusa. Iren siyag ane eneg turuken An nindimu nolok haruk lahi ane indok ambulpul war atuk elehon hahon o pumbuk aru fam aruhu.

¹⁸Yosia nare, hat hinggareg fahet An Israel hinap HINIKNI Allahn nele tu uruk lahi: Suwesingga ino fam hahareg ane holehenteg

¹⁹hinggarehen An nolohotman apmayap taruk lit hindimuwen nambiken tirikik peruk lahen. ’Anden o Yerusalem aru fam alem angginon umbuhukmu o pumbuk aru humali alem wereg ambeg hag aruhumu o pumbuk winonen holuhupteg enekol hahup,’ uruk latikik ane ari fahet hindi siyag ahama hasum tararag tebeseruk lit An nolohotman uba yarehen. Ari fahet haren An nubam sembahyang uruk lahenon Anden holtuk lahi.

²⁰Anden hat let haptukmu hebe fano weregman eneg war aruhun. War aruhunmu eneg Anden o pumbuk aru fam alem angginon umbuhuk,’ ehek,” ulug Hulda inowen hiyag isibagma Yosian mon enepfahon arimanowen onowe hiyag irik libag.