Read Angguruk Yali 2 RAJA-RAJA 23 Bible Online

2 RAJA-RAJA 23 - Angguruk Yali bible

2 RAJA-RAJA 23

¹Hiyag irik libagma Yosia inowen Yehuda inap onowesi men Yerusalem inap onowesi men wol enepfareg

²it men Allah ibam foroho inap imam men, wene hiyag isaruk inap nabi men, Yehuda inap, Yerusalem inap obog toho suwonet toronet Allah ibam libag. Libareg weregma ap arimano iniline Yosia inowen suwesingga Allah ibamen hiyahibahon ino fam hahareg ane obog toho kilap heheg uruk latfag. Suwesingga ino fam Allahn hit An numalikisi welamuhup ulug sali emberuk latfag ane haharoho imbibag.

³Haharoho imbibahon kilap halug uruk latfareg Yosia ino e Allah ibam owahalma pilabehon iraham in atfareg NINIKNI Allah olohotman sali emberuk lit, ”We Hat hombolim eneg laruk lit Haren komo neneptuk lit imbinahon eneg seneg lit ninindiyen oho nenehimeyen oho Haren peruk lahen ane eneg turuk lit suwesingga aru fam haharehon hikit toho welamuhuk,” ulug sali imbibag. Sali imbibagma itano ap welatfahon arimanowen, ”Sali ehenon nit obog tohowen nonoluk teg lit ha reg lamuhuk,” ulug fag toho ibag.

⁴Fag toho ibagma Yosia inowen Allah ibam foroho inap imam onowe Hilkia men, at let turuk inap imam men, sok foroho inap it arimano unubam hiyag isaruk lit, ”Usasum Baal men Asyera men wel eneptuk angge men, suhal alem men Allah ibam werehon arimano selma wili fisik maniyek!” ulug hiyag isibagma obog toho selma wili fisik watfag. Watfagma o Yerusalemen walug libareg ik Kidron ayegma indokma yale fisik libag. Yale fisik libagma indoken nibareg ul atfahon arimano ha roho walug o Betel imbisik libag.

⁵Imbisik libagma Yosia inowen usa inap Yehuda inap onowesiyen lahap enepfahon arimano unubam hiyag isaruk lit, ”O Yehuda pumbuk Yerusalem walinggoho werehon punumuwen hubu lahaptuk lamuhup ulug yabuk hininggikmu emberuson arimano mondabi imbisiyek,” ulug hiyag isibag. Hiyag isibareg Allah hag toho wereg perukon Baal men mo pikalem suhal unubahet hubu lahaptuk inap unubam, ”Hiren oho umbusuhup,” ulug hiyag isibag.

⁶Hiyag isibareg sabalhe Asyera Allah ibam foroho latfahon ino wili fisibareg o Yerusalemen ik Kidron ayegma walug libareg indokma yale feselug lilibug toho ul atfagma olma inap warehon sal eneptuk ambeg hik-hak isa libag.

⁷Libareg Allah hag toho wereg perukon ununuk fam yaying turuk hiyap inibam Allah ibam hili roho wirig latfahon arimano Yosia inowen halog tibisibag. Halog tibisibag ambeg itanowen hiyap arimanowen sabalhe Asyera fahet sum yig utuk ambeg halog tibisibag.

⁸Halog tibisibareg Allah amingmingangge imam o pumbuk Yehuda welatfahon obog toho o Yerusalem watlihip ulug wol enepfareg o Geba inowen ak tibareg wol enepfahon arimanowen punumuwen hubu lahaptuk latfag ambeg arimano siyahap til o Bersyeba libag. Siyahap til laruk lit o Yerusalem elehet walinggoho ohowon sok ele suwon hare fil sok toron misig Yerusalem tam foroho latfag ahun Yosua inowen witfahon ino iraham hubu lahaptuk ambeg welatfahon ino oho siyaha fisibag.

⁹Allah amingmingangge Yosia inowen wol enepfahon arimano unubam hiyag isaruk lit, ”Allah ibam o Yerusalem werehon fam kulug hubu lahabuk fug angge honori sehelimu wereg lit suburu naruk lamuhup,”[7] ulug hiyag isibag.

¹⁰Hiyag isibareg aben Allah hag toho wereg perukon Molokh fahet unumalikisi waroho indokma yaluhup tohon Molokh wel turuk ambeg unuk Tofet o Hinom tonggoma weregma siyaha fisibag.

¹¹Siyaha feseruk lit wam kuda wirim toho witfahon Yehuda inap onowesiyen mo fahet sok Allah ibam kuruk ambeg iraham ap suwon amingmingangge Natan-Melekh welatfag ambeg horogma unduhuk fibahon arimano Yosian heneko hik isibag. Hik isibareg kereta wam kudan lisoho walug laruk angge mo wel turuk lit walug larukon oho indokma yale fisibag.

¹²Yale fisibareg Yehuda inap onowesiyen ap suwon Ahas nohoruk latfag ibam ungga emberim ke hubu lahaptuk ambeg witfahon men, ap suwon Manasye inowen Allah ibam fima-fima witfahon men Yosia inowen halog tibisibareg lilibug toho Kidron ikma hik isa libag.

¹³Hik isa libareg sabalhe Astoret o Sidon inaben wel turukon men, Kamos o Moab inaben wel turukon men, Milkom o Amon inaben wel turukon men, ap enehum altowap eneptuk angge arimano fahet ap suwon Salomo inowen o Yerusalem yali fil tom Zaitun amben siyag turuk ambeg ik ambut fil hubu lahaptuk ambeg witfahon arimano Yosian siyaha fisibag.

¹⁴Siyaha fisibareg usa ahalep men sabalhe men fele roho lin ibag ambeg ino ap war atfahon unuwag emberim ke imbil libag.

¹⁵Imbil libareg ap suwon Nebat amloho Yerobeam inowen o Betel hubu lahaptuk ambeg witfagma Israel inaben Allah embeselug we siyag ane turuk latfag ambeg ino oho Yosian halog tebeseruk lit helep uwag witil lahibahon arimano oho fele ribareg lilibug toho ul hag atfag. Ul hag atfagma sabalhe Asyera indokma yalfag.

¹⁶Yalfareg Yosian hebeloho ambol fil yet harukmen ap sal enepfag ambeg punumu weregma yet hibareg ap kinangma sal enepfahon arimano unuwag wak lalihipteg walug watug hubu lahaptuk ambeg halog tibisihiyon aru siyengge hag toho emberim ke yale feselihip ulug otsi hiyag isibag. Hiyag isibagma Allah amingmingangge nabi tam o Betel watfahon inowen ap suwon Yerobeam hiyag itfag ane hikit toho hubu lahaptuk ambeg o Betel welatfahon ino siye roho yale fisibag.[8]

¹⁷Yale fisibagma Yosia inowen Betel inap kapal isaruk lit, ”Enehangge punumu yet haruk lahiyon lendi nungge wereg?” ulug kapal isibagma Betel inap arimanowen te, ”Allah amingmingangge tam o Yehuda kinang famen watfareg haren o Betel tuwen hubu lahaptuk ambeg siyahap tehen ane uwan teko la fugmu ari roho tuhu ulug hiyag isibag ahun ino salfag ambeg yet haruk lahen,” ulug hiyag itfag.

¹⁸Hiyag itfagma Yosia inowen, ”Ap ino uwag fano welamag, wak la fug!” ibagma ap ino uwag men Allah amingmingangge tam o Samarian watfareg war atfahon ino uwag men elel ha libag fug.

¹⁹Elel ha libag fugmu Israel inap onowesiyen Allah indi siyahap turuk lit o pumbuk Samaria walinggoho werehon fam Allah hag toho wereg ulug wel eneptuk ambeg witfahon arimano obog toho Yosia inowen o Betelen tibag hag toho siyahap tibisil libag.

²⁰Siyahap tibisil laruk lit hubu lahaptuk ambeg foroho inap arimano obog toho hubu lahaptuk ambeg imbisik lahibareg unusuruk latfag. Unusuruk latfareg ap warehon unuwag hubu lahaptuk ambeg emberim ke yale fisil libareg Yosia ino o Yerusalem watfag.

²¹O Yerusalem watfareg Yosia inowen umalikisi obog toho hiyag isaruk lit, ”Allahn An numalikisi welamuhup ulug sali imbibahon fahet suwesingga Musan haharoho imbibahon hikit toho NINIKNI Allah wel tul ulug seni Paskah esetuk lamuhup,” ulug hiyag isibag.

²²Israel inap fet enesug lamuhup ulug Allahn tam mumal enepfahon hakim men ap suwon raja Israel inap Yehuda inap sen enesug latfahon arimano welatfag li seni Paskah ari hahon eke esetuk latfag fug angge famen

²³Yosia ap suwon weregman eneg mo num fimahen libagma we ari sambil eneg o Yerusalemen NINIKNI Allah olohotman seni Paskah esetfag.

²⁴Welatfareg Allahn komo enepfag ane Musan haharoho imbibahon hun Hilkia inowen Allah ibamen hiyaharisiyon wirim toho tuhuk ulug ap suwon Yosia inowen ap warehon enehime wol eneptuk inap men fulu roho hiyag isaruk inap men yanggal enepfareg sabalhe men usasum ap enehum altowap eneptuk angge o Yerusalem inap men Yehuda inap menen foroho latfahon arimano obog toho elehap tibag.

²⁵Yosia ino uwanma ap suwon tam welatfahon arimanowen siyag ane turuk latfahon embeselug hebeloho NINIKNI Allah fam wenggel haruk latfag fugmu we Yosia inowen Musan haharoho imbibag ane ine roho seneg lit indimuwen oho ebeyen oho ubabut fam oho NINIKNI Allah fam wenggel haruk latfag. At ino war atfagma ap misig oho at hahon eke welatfag fug angge famen

²⁶ap suwon Manasye tam welatfahon inowen NINIKNI Allah indi siyahap turuk latfahon fahet Aren nolok peruk ane indok ambulpul hahon Yehuda inap unubam umbuhuk peruk latfag ane ino imbisibag fug.

²⁷Imbisibag fureg NINIKNI Allah indimuwen peruk lit, ”Israel inap yatma hik isarikik hag toho Yehuda inap oho An nolohotman hik isahuk. O Yerusalem Anden mumal tarikikon oho An nunuk wel naptuk lamuhup iyag ibam aru oho siyaha fusuhuk,” peruk latfag.

²⁸Welatfagma Mesir inap onowe Nekho inowen Asyur inap onowe ibil aruhuken ik Efrat ayegma lamin ulug o Megido keyen larukmen Yosia inowen Mesir inap yanggal enebuhuk ulug enembeg libagma Mesir inap onowe inowen tam yet hibareg itano Yosia ware fisibag. Yosia ware fisibagma otsiyen wam kudan lisoho walug laruk angge fam imbik lahibareg o Yerusalem walug watfareg ap suwon sal eneptuk ambeg sale fisibag. Sale fisibagma Yehuda inap arimanowen Yosia amloho Yoahas Yehuda ninap fet nenesug laruhun ulug ikni ubalma ap suwon lahapfag. Hun Yosia oluk wereg lit turuk latfag ane fahet tot tuma haharoho emberuk lahe. Turuk latfag ane obog toho suwesingga Yehuda inap onowesi fahet haharoho imbibahon fam hahareg lit wereg.

²⁹

³⁰

³¹Hun Yoahas indag tibag sali mo ilig am wirig am turukmen fuwap fimahen 23 atfagma ap suwon lahibareg o Yerusalem wereg lit Yehuda inap fet enesugmen pikalem hinahan libag. Yoahas isinga o Libna ahun Yeremia ahaloho unuk Hamutal welatfag.

³²Umbasiyen turuk latfag hag toho Yoahas inowen oho NINIKNI Allahn siyag perukon eneg turuk latfag.

³³Turuk latfagma Mesir inap onowe suwon Nekho inowen Yoahas senetfareg inggik hele waroho Hamat kinangma o pumbuk Ribla walug libareg ap kilap eneptuk ambeg kila fisibag. Kila fisibareg Nekho inowen Yehuda inap alem unubam emberuk lit onggo ili ruruk angge perak anggin wirim turukon 3.400 kilogram men emas anggin wirim turukon 34 kilogram men og numuhup ulug hiyag isibag.

³⁴Hiyag isibareg Mesir inap onowe Nekho inowen Yosia amloho eke unuk Elyakim ikni ubalma ap suwon welaruhu ulug unduhuk fibag. Unduhuk feruk lit unuk keron Yoyakim suwalfag. Ari obog toho tibareg Yoahas ino hondoholug o Mesir imbisik libag. Imbisik libagma welatfareg Yoahas ino o Mesiren war atfag.

³⁵Nekho inowen onggo og numuhup ulug heng enepfagma ap suwon Yoyakim inowen umalikisi Yehuda inap hiyag isaruk lit, ”Hit wal tanehen henenggengge foroho lahep ane wirim toho perak men emas men walug wamuhup,” ulug hiyag isibag. Hiyag isibag ane ari hikit toho perak men emas men walug watfahon arimano Yoyakimen Nekho og itfag.

³⁶Hun Yoyakim indag tibag sali mo ilig am wirig am turukmen hinahaneg fimahen 25 atfagma ap suwon lahibareg o Yerusalem wereg lit Yehuda inap fet enesugmen eneg mo nanggoloben libag. Yoyakim isinga o Ruma ahun Pedaya ahaloho unuk Zebuda welatfag.

³⁷Umbasiyen turuk latfag hag toho Yoyakim inowen oho NINIKNI Allahn siyag perukon eneg turuk latfag.