Read Angguruk Yali 2 RAJA-RAJA 24 Bible Online

2 RAJA-RAJA 24 - Angguruk Yali bible

2 RAJA-RAJA 24

¹At ap suwon welatfag li Babilonia inap onowe suwon Nebukadnezar inowen at men tog abul ulug watfareg apmayap tibagma Yoyakim ino Nebukadnezar amingmingangge roho weregman eneg mo hinahan libagma Yoyakim inowen Nebukadnezar inggikmu welaruhuk fug ulug inggik kobog isibag.

²Kobog isibagma NINIKNI Allahn amingmingangge nabi feneyen ibag ane hikit toho Yoyakim ele ying turuk lit Yehuda kinang siyahap turuk lamuhup ulug ap enenggengge huhulangge hilaruk inap o Kasdim inap, Siria inap, Moab inap, Amon inap men mon enebik waharuk latfag.

³NINIKNI Allahn ap suwon Manasye inowen An nolohotman siyag ane anggolo turuk latisiyon fahet umalikisi Yehuda inap arimano An nalukeman hik isahuk ulug wenggel hibareg ap seliyon arimano mon enebik waruhuk ibag ane hikit toho teko libag.

⁴Manasye inowen ap siyag ane turuk elehon anggolo unusil larukmen eneg enemeben o Yerusalem pumbuk atogman atogma keleg atfag ane ari NINIKNI Allahn apeleg latfag fug.

⁵Yoyakim oluk wereg lit turuk latfag ane tuma tor angge haharoho emberuk lahe. At ap suwon wereg lit turuk latfag ane obog toho suwesingga Yehuda inap onowesi suwonen turuk latfag ane fahet haharehon fam paloho imbibag.

⁶Welatfareg war atfagma Yoyakim amloho Yoyakhin ikni ubalma ap suwon lahibag.

⁷Itano li o Mesir inap onowe inowen Mesir kinang hilimuwen tulug ik Efrat fam kinang ilmig tibag ambeg arimano obog toho o Babilonia inap onowe suwon inowen taluk toho hilibagma Mesir inap onowe inowen o kema-kema tog abik laruk ane imbisibag.

⁸Hun Yoyakhin indag atfag sali mo ilig am wirig am turukmen num fimahen libagma ap suwon atfareg o Yerusalem wereg lit Yehuda inap fet enesugmen eneg pikalem hinahan libag. Yoyakhin isinga o Yerusalem hiyap, hun Elnatan ahaloho unuk te Nehusta welatfag.

⁹Yoyakhin ikniyen siyag ane turuk latfag hag toho aren oho NINIKNI Allah olohotman we siyag ane eneg turuk latfag.

¹⁰Ari roho turuk lit weregma Babel inap onowe Nebukadnezar umalikisi sehen senehon arimanowen Yerusalem inap unusul ulug o Yerusalem watfareg waling enesug latfag.

¹¹Babel inaben o Yerusalem waling enesugmu inikni Nebukadnezar ebe enembeg o Yerusalem watfagma

¹²Yehuda inap onowe Yoyakhin ino isinga men otsi men ap suwon-suwon men at ibam foroho inap inim Yerusalemen wilip atlug Nebukadnezar ambeg libagma Nebukadnezar inowen sen enepfag. Nebukadnezar ap suwon weregman eneg mo likinen libagma Yoyakhin ino senetfag.

¹³Senetfareg NINIKNI Allahn tam ibag ane hikit toho Allah ibamen wel turukon fahet ap suwon Salomo inowen emas umbagpag turuk angge fam witfahon arimano obog toho Nebukadnezaren halog tibisibareg Allah ibam foroho latfag angge men ap suwon ibam foroho latfahon obog toho wili fisibareg o Babel walug libag.

¹⁴Walug laruk lit ap suwon Yoyakhin ino men isinga men uhesi men otsi men Yehuda inap sehelimuwon ap suwon-suwon teng-teng angge 7.000 ininggik hele waroho o Babel hondog eneplug libag. Hondog eneplug laruk lit o wituk inap oho besi ine angge laltuk inap oho it arimano sehen senehon enekol eleg toho turuk latfag inap teng-teng angge 1.000 men ap ununuk palimu rehon men tung inap men arimano obog toho o Babel hondog eneplug libag. Hondog eneplug libahon arimano obog toho ap teng-teng angge winag isa fug toho 10.000 o Babel imbisik libag. Yerusalem inap obog toho hondog eneplug laruk lit we olma inap inine elehon eneg o Yerusalem welamag ulug imbisibag.

¹⁷Embeselug libareg Nebukadnezar inowen Yoyakhin ikni ot unuk Matanya Yehuda inap fet enesug laruhun ulug hun Yoyakhin ubalma ap suwon lahaptuk lit unuk keron Zedekia suwalfag.

¹⁸Zedekia indag tibag sambilen mo ilig am wirig am turukmen sabit fiman 21 atfagma ap suwon lahapfag. Lahapfagma o Yerusalem wereg lit Yehuda inap fet enesugmen eneg mo nanggoloben atfag. Zedekia isinga re o Libna hiyap, Yeremia ap amuwon ahaloho unuk te Hamutal welatfag.

¹⁹Ap suwon Yoyakim inowen siyag ane anggolo turuk latfag hag toho Zedekia inowen oho NINIKNI Allah olohotman siyag ane eneg turuk latfag.

²⁰Siyag ane turuk latfagma NINIKNI Allahn olok haruk lit Yerusalem inap men Yehuda inap men At olohotman yanggal enepfag. Yanggal enepfareg weregma Zedekia inowen ap suwon o Babel werehon inggikmu welaruhuk fug ulug inggik kobog isibag.