Read Angguruk Yali 2 RAJA-RAJA 25 Bible Online

2 RAJA-RAJA 25 - Angguruk Yali bible

2 RAJA-RAJA 25

¹Zedekia ap suwon welatfag li mo sohowen libagma pikalem numon fam hup numenam noholug ap suwon Babel inap inikni Nebukadnezar ino umalikisi sehen senehon obog toho men Yerusalem inap unusuhuk ulug watfag. Watfareg o pumbuk Yerusalem walinggoho o sabo witfareg o pumbukmu kul ulug elehet o Yerusalem walinggoho kilapfahon ino fene pila ruruk latfag.

²Ari roho turuk lit waling enesugmen eneg Zedekia ap suwon welatfag li mo nanggoloben atfag.

³Pikalem uhanehon fam hup sohowenam noholug suburu obok humon lahibareg suburu elehen ap obog toho simbuk lanag uruk latfag.

⁴Ari reg lit weregma Babel inaben elehet ino halog tibagma yet hibareg Israel inap sehen senehon obog toho enekolen hubanggo hirag-hirag ap suwon ibam ambol fil elehet altap toho ohoma sok ele keyen o Yerusalemen wilip atlug Babel inap waling enesuhon seheli keyen ik Yordan fil libag.

⁵Larukmen o Babel inap sehen senehon arimanowen ap suwon Zedekia muko o Yerikho horogma laruk lit Zedekia senetfag. At umalikisi sehen senehon obog toho Zedekia uwan senebuk fugmu at embeselug enekolen linggik-longgo ibag.

⁶Zedekia senetfareg ap suwon Babel inap inikni welatfag ambeg o Ribla walug libagma Nebukadnezar inowen alem angginon ubam imbibag.

⁷Alem angginon ubam imbibareg Nebukadnezar otsiyen Zedekia umalikisi inikni olohotman kong tibisibareg Zedekia ilanggen pirenet sog tibisibag. Ilanggen sog tibisibareg hele ineyon fam pug tibisibagma Nebukadnezar inowen o Babel walug libag.

⁸Ap suwon Babel inap inikni Nebukadnezar welatfag li mo ilig am wirig am turukmu soho fiman 19 atfagma pikalem fuwabon fam hup sabirenam noholug sehen senehon onowe, Nebukadnezar let turukon unuk Nebuzaradan ino o Yerusalem watfag.

⁹Watfareg Allah ibam men ap suwon ibam oho onowesi suwon inibamet o Yerusalem pumbuk obog toho harep pisako siyaha fisibag.

¹⁰Harep pisako siyaha fisibareg Nebuzaradan umalikisi sehen senehon arimanowen elehet o Yerusalem pumbuk walinggoho ohowon obog toho halog toho lin-lan isibag.

¹¹Lin isibareg ap tot o Yerusalem pok atfahon men Babel inap inibil atfahon men obog toho ininggik hele waroho Nebuzaradan inowen hondog eneplug o Babilonia imbisik libag.

¹²Imbisik laruk lit ap ininggikmu elehon pumbuk sel ke welatfahon we tor angge itano eneg suburu yabuk men anggur yabuk men wit taruk lamag ulug Nebuzaradan inowen inibam embeselug libag.

¹³Embeselug laruk lit uwag ineyon Allah ibam olohotma hutuk tibibahon itano men, kou humon men, kou unuk Ik Ahum suwaleg angge men umbagpag turuk angge fam wirihon Allah ibam foroho latfahon arimano halog toho walug libag.

¹⁴Walug laruk lit kubag, ikag, habo, tebuwag, Allah wene uruk sambil wan turukon umbagpag turuk angge fam lalfahon oho,

¹⁵solu ruruk angge, indok anggen kilaboho walug laruk angge arimano fano-fano angge emas perak fam lalfahon obog toho sehen seneg inap onoweyen o Babel hilalug libag.

¹⁶Uwag ineyon piren itano men kou unuk Ik Ahum suwaleg angge ino men kou humon men ap suwon Salomo inowen Allah ibam fahet umbagpag turuk angge angginon leg ha fug tohon fam wiri fibahon arimano obog toho walug libag.

¹⁷Uwag piren itano wirim haruk lit lahabeg wirim turukon il likinen wirim toho, uwag ambiyangma inale tomuk tohon wirim turukon il misig wereg lit inale walinggoho sohomangge keleg toho yanggila anggen hahon atogma ililoho aliliyangge lahapfag angge arimano umbagpag turuk angge fam lalfahon obog toho hilibag.

¹⁸Babel inap sehen senehon onowe Nebuzaradan inowen Allah olohotma unduhuk inap imam onowe Seraya men, hun Zefanya at iraham werehon ino men, sok Allah ibam kurukon foroho inap hinahan itano men sen enepfareg

¹⁹Yerusalem inap sehelimuwen ap suwonen sehen senehon onowe lahapfahon ino men, ap suwon iraham welatfahon fuwaben o pumbuk ino pok atfahon men, tog abul ulug ap wol eneptuk latfag ahun men, pumbuk sel filen kik watfareg Yerusalem welatfag inap teng piren 60 arimano obog toho

²⁰sehen senehon onowe Nebuzaradan inowen sen enepfareg hondog eneplug ap suwon Babel inap inikni welatfag ambeg o Ribla kinang Hamat fam imbisik libagma

²¹Nebukadnezar inowen otsi hiyag isibagma yik waroho pinggi unusibag. Ari roho turuk lit Yehuda inap enengginang famen ininggik hele waroho imbisik libag.

²²Babel inap onowe Nebukadnezar inowen Yehuda inap o Babel hondog eneplug laruk lit nin minggiroho Yehuda kinang fam embeselug libahon arimano fet enesug laruhun ulug Safan umbusag, Ahikam amloho Gedalya lahapfag.

²³Gedalya ap suwon lahabehek urukmu Yehuda inap sehen senehon Babel inaben sen enesug latfag fuhon men onowesi menen hol hibareg hun Gedalya o Mizpa weregma libag. Libahon arimano ununuk te hun Netanya amloho Ismael, Kareah amloho Yohanan, o Netofa ahun Tanhumet amloho unuk Seraya ino, o Maakha ahun Yazanya, it arimano unumalikisi inim o Mizpa libag.

²⁴Mizpa libagma Gedalya inowen it arimano unubam hiyag isaruk lit, ”Babel inap onoweyen Yehuda inap fet enesug lamuhup ulug lahap eneptisiyon arimano fahet henekol ha fug! Kinang tu fam yuwag toho wereg lit Babel inap onowe ele urukon holtuk lamuhup halug hit henebe fano welamuhuben tem toho uruk lahi,” ulug fag toho hiyag isibag.

²⁵Ari ulug fag toho hiyag isibag angge famen mo ino fam pikalem sabiron larukmu hun Elisama umbusag, Netanya amloho Ismael ap suwonen ondohowon inowen ap numen hondog eneplug watfareg Gedalya men, Yehuda inap men, Babel inap men at iraham o Mizpa welatfahon arimano obog toho unusibag.

²⁶Unusibagma Yehuda inap obog toho suwonet toronet sehen seneg inap onowesi inim Babel inaben hebeloho nunusuhup ulug enekolen o Mesir hirag arik libag.

²⁷Ap suwon Yehuda inap inikni Yoyakhin ino o Babel imbisik libagma mo ilig am wirig am turukmu teng misig nubam hilag numen 37 atfagma hun Ewil-Merodakh Babel inap fahet ap suwon lahapfahon pikalem nisanggowon fam hup teng misig noholug Ewil-Merodakh inowen nindiyen ulug ap suwon Yoyakhin ino inggik hele loloho o penjara inowen wili fisibag.

²⁸Wili fisibareg Ewil-Merodakh inowen at ubam ele fano roho uruk lit ap suwon raja ininggik hele waroho og eneplug waharuk latikikon obog toho palimu hat welaruhun ulug palimuwap tibag.

²⁹Palimuwap tibareg Yoyakhin ino sum hele waroho wereg lit wan teg latikinon embesemihinteg sum fanowon wan toho likiya hupmu an men suburu ambiyeg naruk lamuhuk ulug hiyag itfagma amusun toho welatfag.

³⁰Asehet teg angge winon hilarukon fahet likiya hupmu uang og utukmen eneg Yoyakhin war atfag.