Read Angguruk Yali 2 RAJA-RAJA 3 Bible Online

2 RAJA-RAJA 3 - Angguruk Yali bible

2 RAJA-RAJA 3

¹Ap suwon Yosafat inowen Yehuda inap fet enesugmen eneg mo ilig am wirig am turukmu num fimahen atfagma Ahab amloho Yoram ino Israel inap onowe suwon lahibag. Lahibareg o Samaria wereg lit Israel inap fet enesugmen eneg mo nisanggowen libag.

²Yoram inowen NINIKNI Allahn siyag perukon eneg turuk latfag angge famen ikni isinga menen siyag ane su roho turuk latfahon men aren siyag ane tor angge turuk latfahon men wirim teg latfag fug. Wirim teg latfag fugmu ikniyen tu Allah hag toho wereg perukon Baal fahet usa ahalep hutuk tibibahon aren halog toho siyahap tibag.

³Ari tibag angge famen indam ap suwon Yerobeam inowen siyag ane til-wil larukmu Israel inaben at ombolim laruk lit onolok ane eneg turuk latfag hag toho Yoram inowen oho Allah ambol yig utuk lit siyag ane turukon imbisibag fug.

⁴Weregma Moab inap onowe suwon Mesa wam anggolo foroho latfahon ino Israel inap onowe apma wereg lit mo eke fam eke fam wam domba umalik teng-teng angge 100.000 men wam domba yuhambukon oruk yaron teng-teng angge 100.000 men og irik waharuk latfag.

⁵Israel inap onowe Ahab war atfagma ap suwon Mesa inowen Israel inap enepma welaruhuk fug ulug wenggel haruk latfag.

⁶Ari ulug wenggel harukmu Ahab ubalmangge Yoram ino ibam o Samaria embeselug umalikisi Israel inap sehen senehon palu enebil kinang obog toho walinggoho laruk latfag.

⁷Libareg otsi hiyag isaruk lit, ”Yehuda inap onowe Yosafat ambeg lahupteg hiyag umuhubon fahet iminon tu: Moab inap onowe inowen an Yoram napma welaruhuk fug ulug wenggel harukmu niren at men tog abuhuken an men hat men ambiyeg lahuk ano?” ulug hiyag isibag ane hikit toho kapal ha libagma Yosafat inowen, ”Nare, fano ehenma an numalikisi hat humalikisi iniraham, an nambohom kuda hat hambohom iniraham laruk lit andet haret ambiyeg tog abik lahuk,” ibareg,

⁸”Kalem ke keyen lahuk?” ulug kapal hibagma Yoram inowen, ”O Edom lek keyen lahuk,” ulug hiyag itfag.

⁹Hiyag itfag ane ari hikit toho ap suwon piren itano unumalikisi sehen senehon men libareg o Edom inap onowe umalikisi men oho it men ambiyeg laruk latfag. Lekma larukmen eneg o sabirenam atfagma ik ap men wam menen narukon eleg atfag.

¹⁰Eleg atfagma Israel inap onowe suwon inowen ele uruk lit, ”Yihi, NINIKNI Allahn nit ap suwon hinahan welaheyon aruma mangno roho o Moab inap ininggikmu umbusuhuk ulug tuma hondog neneplug waha,” ibag.

¹¹Ibagma ap suwon Yosafat inowen, ”NINIKNI Allahn ele hiyag nisamisi ane kapal hulen amingmingangge nabi eke tuma wereg ano?” ulug kapal hibagma Israel inap onowe amingmingangge ekeyen, ”Hun Safat amloho Elisa indam hun Elia let turuk latisiyon ino tuma wereg,” ulug hiyag itfag.

¹²Hiyag itfagma Yosafat inowen, ”Fano, hun ariyen tem toho NINIKNI Allahn peruk ane hiyag nisamisi,” ibag. Ari ibareg ap suwon hinahan itano Elisa ambeg libag.

¹³Libagma Elisa inowen Israel inap onowe suwon fam ele uruk lit, ”Nungge fahet an nambeg wahen? Hikni hisingan usa inap nabi kapal isa laruk latfahon enembeg lamihin!” ulug pet tibagma ap suwon inowen, ”It enembeg lamin fug. NINIKNI Allahn nit ap suwon hinahan welaheyon aruma o Moab inap ininggikmu umbusuhuk ulug tuma hondog neneplug waha angge re hat hambeg wahi,” ibag.

¹⁴Ibagma Elisa inowen, ”NINIKNI Allah olukon pohol ha kinang ha senehon amingmingangge welahi ahun inowen holeg lit weregma anden nele tem toho iminon tu: Yehuda inap onowe Yosafat tu fahet nakol toho welale fug halug an nilen hat yet hiya fug angge humbahale.

¹⁵Ketiya ap pinggong ele watukon eke hondohik aliyek,” ibagma hondoholug watfag. Watfagma ap inowen pinggong ele watukmu itano NINIKNI Allah ine Elisa ubam wambik watfag.

¹⁶Wambik watfagma Elisa inowen ele uruk lit, ”NINIKNI Allahn ele urukon tu: Tonggo ik firig atisi ambeg tu fam ik foroho ambeg ulug kema-kema kinang fabultil lahup.

¹⁷Kinang fabuluhupteg yet harukmen homhomo fu ruruk lit osit narukmu yet hahup fug angge famen tonggo tu obog toho iken hondo reg laruhumu hiret henembohomet ik naruk lamuhup.

¹⁸Teko lahu ane ihiyon ari fahet NINIKNI Allahn anggin eleg peruk lit Moab inap arimano oho hit hininggikmu umbuhu.

¹⁹Umbuhumu hiren it inibam pumbuk suwon elehet walinggoho ohowon obog toho halog toho siyahap tibisil e anggen narukon obog toho mutil ik eleruk obog toho latil kinang fanowon obog toho palimu helep hik-hak isaruk lit siyahap til laruk lamuhup,” ulug hiyag isibag.

²⁰Likiyamon Allah ibamen suburu yaloho hubu lahaptuk li tom Edom famen ik fu wamburukmen eneg kinang obog toho iken hondo reg latfag.

²¹Ari tibagma Moab inaben hol harukmen ap suwon hinahan itano nit men tog abuhuk ulug waharuk urukmu hol hibareg ap obog toho kabiniyonet sabalonet sehen senebuk tehon palu enepfareg Moab kinang hilimu in arik libag.

²²Likiyamon hubet mo lahik waharuk lit ik pali ke yatukmu Moab inap we tot yat toho welatfahonen yet harukmen ik il mebon inam atukmu yet hibareg

²³enele hi roho uruk lit, ”Mep ari yet hemek! Ap suwon hinahan itano wat-wat atuk lit unumalikisi oho ekeyen eke unusehesama ketiya Moab ninap nori, it enengge hilak lulen maniyek!” uruk latfag.

²⁴Ari ibareg Israel inap o sabo wiroho welatfag ambeg horogma larukmen Israel inap wilip atfareg unusurukmu Moab inap arimano linggik-longgo ul ulug suhuloho enengginang fam libagma Israel inap mug eneplug laruk lit mulangge unusuruk latfag.

²⁵Unusibareg Moab inap inibam pumbuk halog toho siyahap tibisil laruk lit ap wal tanehen kinang fanowon obog toho pali ke helep hik-hak isil larukmen eneg heleben hondo regma ik eleruk obog toho latil e anggen narukon obog toho muhuk fisil libareg we elehet o Kir-Hareset walinggoho ohowon halog toho siyahap tuk fug teg latfagma ap helep hik isarukon o ino waling enesug lit helep elehet pisan toho o ino undama hik turuk latfag.

²⁶Ari turukmu o Moab inap onowe suwon inowen yet isarukmen ap seliyon arimanowen inine roho tog aptuk lit nit apmayap nenebuk oho reg ulug oluk atfareg ap karog senehon teng pireneg fimahen 700 hondog eneplug o Edom inap onowe suwon unduhukmu libareg tog aptuk lit at umalikisi men miyal eneptug wilip amul ulug turuk latfag angge famen wilip am fug teg latfag.

²⁷Wilip am fug tehen Moab inap onowe inowen amloho atamon fobik an nubalma ap suwon lahaku peruk latfahon ino walug elehet o pumbuk ino walinggoho ohowon palimu imbik lahibareg tu Allah hag toho wereg ulug wel turukon fahet waroho indok yalfag. Indok yaltukmu yet hibareg Israel inap onoloken enehummu het-pet haruk lit o ino pin kul pibag ane imbisibareg inibam libag.