Read Angguruk Yali 2 RAJA-RAJA 4 Bible Online

2 RAJA-RAJA 4 - Angguruk Yali bible

2 RAJA-RAJA 4

¹Misihim sambil Elisa otsi Allah amingmingangge nabi enesehelimuwon eke uhe hun Elisa ambeg watfareg at ubam ele uruk lit, ”Nikni, an nahun hat hamingmingangge ino war aha. At ino NINIKNI Allah fahet akol toho welatisi ane har oho holuk. Ketiya war ahama ap eke paleg angge fahet an nibam wahareg an numalikisi ap angge piren itano namingmingangge welamuhuben og nimin ehek,” ulug hiyag itfag.

²Hiyag itfagma Elisa inowen at ubam ele uruk lit, ”Anden nungge ane hat hubahet timin? Hat hibam foroho lahen angge eke wereg ano?” ulug kapal hibagma hiyap inowen, ”Nungge-nungge foroho lahi fug, we e zaitun ahaluwe kubag toron misig wereg,” ulug hiyag itfag.

³Hiyag itfagma Elisa inowen, ”Lamihinteg hiyap hat hibam horogma werehon unubam kubag hiren foroho lahebon misig oho umbuk fug angge obog toho og nirik maniyek ulug heng enebik lamihin.

⁴Kubag og humuson walug hibam kimihinteg aben an numalikisi men yet nisahup tohon ulug sok lare felug e ahaluwe foroho lahenon ino kubag og humuson fam hinanggo femihin. Kubag ololop toho hinanggo femihinon arimano amumu embemihin,” ulug hiyag itfag.

⁵Hiyag itfag ane ari hikit toho hiyap yuwohon inowen turuk lit kubag anggolo og itfahon arimano walug ibam kibareg sok lare fibag. Lare fibagma umalikisi piren itanowen kubag walug latfahon senegma hiyap inowen e ahaluwe ino ololop toho hinanggo fibag.

⁶Ololop toho hinanggo fibareg hiyap inowen amloho eke fam, ”Kubag eke og nirik ma!” ulug hiyag itfagma aren te, ”Kubag eke wereg eleg,” ibag. Ibagma e ahaluwe nin sebe roho hinanggukon eleg latfag.

⁷Eleg latfagma hiyap yuwohon inowen teko libag ane ari Allah amingmingangge Elisa hiyag irik libagma aren hiyag utuk lit, ”Lamihinteg e ahaluwe anggolo werehon ari ayeg waroho ap og isamihinteg uang og humuson ino ap anggengge paleg lahen ahun og irik lamihin. E ahaluwe winon obog toho ayeg waroho ap og isamihinmu we tor angge welatmisiyon ino hat humalikisiyen narukmen eneg amusun toho welamuhup,” ibag.

⁸Misihim sambil hun Elisa ino o Sunem libag. O ino tung hiyap eke wereg lit suburu ambiyeg nul ulug Elisa wol tibag. Wol tibagma o ino sambil ak tibareg Elisa ino o Sunem keyen laruk lit hiyap suwon ino ibam suburu nalug laruk latfag.

⁹Ari turuk latfagma hiyap inowen ahun fam, ”Ap hundig-hundig nit ninibam waharuk ahun ino Allah amingmingangge ubabut fanowon ulug an noluk.

¹⁰Ari fahet niren at watlug nohoruk laruhu ambeg hinawimu hili misig ubahat helep fam wiri felug undama nohoruk angge men hur atuk angge men suwesingga emberuk ambeg e tuwalehon men iral men imbik lahakuk,” ibag.

¹¹Ibag ane hikit toho wiri fibareg weregman misihim sambil hun Elisa ino o Sunem watfareg hili hinawimu witfahon ino fam nohomin ulug lahibag.

¹²Lahibareg amingmingangge Gehazi fam hiyag utuk lit, ”Hiyap ino wol tik wambimihin,” ulug hiyag itfagma wol tik wambibagma hiyap ino hili ino selma in arik watfag.

¹³In arik watfagma Elisa inowen Gehazi fam ele uruk lit, ”Hiyap ari fam hele imihinon tu, ’Haren sat toho hili aru nit fahet wit neneptikinmu anden hat hubam hebeloho nungge timin? Anden hat hindimu wenggel haruk lahen ane fahet ap suwon fam ano sehen seneg inap onowe fam ano hiyag isahuk?’ imihin,” ulug hiyag itfag ane hikit toho Gehazi inowen hiyap ino hiyag itfag. Hiyag itfagma hiyap inowen, ”An nori nehebi enesehelimu wereg lit nungge-nungge fahet nasehet toho welahi fug,” ulug Gehazi hiyag itfag.

¹⁴Hiyag itfagma Elisa inowen Gehazi kapal haruk lit, ”Anden nungge ane hiyap aru fam tuhuk?” ulug kapal hibagma Gehazi inowen, ”Nikni, hiyap aru umalik indag ta fug angge weregman eneg at ahun mondabi sabal atisi,” ulug hiyag itfag.

¹⁵Hiyag itfagma Elisa inowen, ”Hiyap aru kik watmisiyen wol tin,” ulug hiyag itfagma Gehazi inowen hiyap ino wol tibag. Wol tibagma sokolma in arik watfag.

¹⁶In arik watfagma Elisa inowen hiyap ino fam ele uruk lit, ”Mo fobikon fam o yoho tiya hagma haren malik ap angge eke indag tahunteg hahoma waling tahun,” ulug hiyag itfag. Hiyag itfagma hiyap inowen, ”Nikni, hat Allah amingmingangge welahenonen hele si ane hiyag nitmihin fug!” ulug hiyag itfag angge famen

¹⁷Elisa inowen ubam hiyag itfag ane hikit toho mo misig libagma hiyap ino malik ahummu atfagma malik ap angge indag tibag.

¹⁸Indag tibareg weregman malik ino su atfareg misihim sambil ikni otsi men roti anggen paltuk lit weregma libag.

¹⁹Libareg wereg lit ele hi roho ikni fam, ”Yihi, an nunggul ninaruk,” ibagma ikniyen amingmingangge eke hiyag utuk lit, ”Malik aru yabako isinga ambeg walug lamihin,” ulug hiyag itfag.

²⁰Hiyag itfagma malik ino isinga ambeg walug libagma isingan lisoho wibareg ahoma walinggoho heriye fibareg weregman eneg o unukoho atfagma malik ino war atfag.

²¹War atfagma isingan walug lahibareg Allah amingmingangge Elisa nohoruk ambeg yinggi feselug malik warehon ino amu weregma sok lare fisibag.

²²Ari tibibareg ahun wol tibareg ubam ele uruk lit, ”Hamingmingangge misig wam keledai eke wak lamisiyen monde femihin. An folo-folo Allah amingmingangge Elisa ambeg laminteg watmin,” ulug hiyag itfag.

²³Hiyag itfagma ahunen te, ”O yoho wene uruk sambil ano pikalem keron inam atukmu sembahyang uruk sambil ano welahe fug angge famen nungge fahet Allah amingmingangge ambeg lamin uruk lahen?” ibagma uheyen hebeloho, ”Hindimu anggin toho wenggeluk fug!” ulug hiyag itfag.

²⁴Hiyag itfareg hiyap inowen wam keledai emberimu hur atuk angge ililoho imbik lahibareg amingmingangge fam ele uruk lit, ”Kumbi seneko folo-folo lit ha lamihin. Nit kalemma laruk lit orog-orog lul fug. We anden pok amul imin ambehen eneg pok amul,” ulug hiyag itfag.

²⁵Ari ulug hiyag itfareg hiyap ino wam keledai fam hur arik lahibareg Elisa tom Karmel fam weregma lamin ulug laruk latfag. Larukmen Elisa inowen hiyap ino kalemma larukmu yatman yet hibareg amingmingangge Gehazi fam ele uruk lit, ”Namloho, o Sunem hiyap ino waharuken yet himin!

²⁶Folo-folo at olohotma lamihinteg, ’Hat hahun men hunumalik men fano welahep ano?’ ulug kapal ha lamihin,” ulug hiyag itfag ane hikit toho Gehazi ino libareg hiyap ino fam kapal hibagma hiyap inowen, ”Fano welahe,” ibag.

²⁷Ari ibareg Elisa tom Karmel fam weregma libareg Elisa olohotma elenggen fam hur atlug uyug sen harukmen Gehazi horogma libareg yanggalmin ulug turuk latfag. Turukmen Elisa inowen Gehazi fam, ”Hiyap aru yanggalmihin fug, indimu anggin toho waha. Alem ari NINIKNI Allahn an hiyag num fug angge hiraho ferisi,” ibag.

²⁸Ibagma hiyap inowen Elisa fam hiyag utuk lit, ”Nikni, hat hubam indam malik ap angge og nuruhun ulug heng haptikik fug. Anden te, ’Indimu ahiyeg hawag ulug hele si ane hiyag nitmihin fug,’ ulug hiyag hitikik,” ibag.

²⁹Ibagma Elisan Gehazi fam hiyag utuk lit, ”Wanggun anden tohon hinggikmu seneko folo-folo hiyap aru ibam lamihin. Kalemma laruk lit ap men salkal ilihipteg hi enebuk fug. Iren hat hi haptuk halug oho haren te hi enebuk fug angge lamihinteg wanggun aru malik ino emberimu imbik lamihin,” ulug hiyag itfag.

³⁰Hiyag itfagma malik war atfahon ino isingan ele uruk lit, ”An hat humbahalug lamin fug. NINIKNI Allah men hat men hiniline we tem toho uruk lahi,” ibagma Elisa in atlug hiyap ino men ambiyeg libag.

³¹Gehazi tam libareg wanggun ino malik war atfahon emberimu imbibag angge famen ele uk fug angge wereg lit lebe ruruk latfag fug. Lebe ruruk latfag fugmu Gehazi suhuloho Elisa ambeg libareg, ”Malik ino in aha fug,” ulug hiyag itfag.

³²Hiyag itfagma Elisa olma kibareg kim harukmen malik ino mondabi wareg angge nohoruk ambeg yinggigmu kim hibag.

³³Kim hibareg sok undama filen lare fibareg NINIKNI Allah fam sembahyang ibag.

³⁴Sembahyang ibareg malik warehon ino emberimu ying atuk lit ambilik malik ino ambilikmu, il malik ino ilmu, inggik malik ino inggikmu imbibag. Ari roho at hondo roho malik ino emberimu ying atfagma malik warehon ino ebe inahan atfag.

³⁵Inahan atukmu Elisa ino in atfareg o le ke la wam tibareg nin eke malik ino emberimu ying arik lahibag. Lahibareg yinggigmen malik ino hasig sabirenam tibareg il ili atfag.

³⁶Il ili atfagma hun Elisa inowen Gehazi wol tibareg, ”Hiyap ino wol tik lamihin,” ulug hiyag itfagma Gehazi inowen hiyap ino wol tibagma Elisa ambeg watfag. Watfagma Elisa inowen hiyap ino fam, ”Humalik tu hilak ma!” ulug hiyag itfag.

³⁷Hiyag itfagma hiyap ino Elisa ambeg kibareg uyug apma elenggen fam hur atlug orohole han kinangma sahung teg lit Elisa hi ribareg umalik hilalug wilip atfag.

³⁸Welatfagma Elisa suhuloho o Gilgal watfag. Watfag li itano Israel kinang fam suburu obok lahibagma welatfag. Weregma o misihim sambil otsi Allah amingmingangge nabi arimano inikni Elisa alukema heriyegma Elisa inowen amingmingangge fam ele uruk lit, ”Kou humon fam nabi aruma fahet hou isag isimin,” ulug hiyag itfag.

³⁹Hiyag itfagma ot ekeyen hou yami rik lamin ulug suburu walikmu libareg yami rurukmen kuluk hag angge hiyahibareg tahanoho sum ololop toho olma walug watfag. Walug watfagma yet harukmen ap olma welatfahon misihen oho kuluk hahon arimano indam oho yet hibag fug angge famen amingmingangge inowen pal-pal kou humon fam kilapfareg esetfag.

⁴⁰Esetfareg ori fibir isibagma nul ulug unduk nek harukmen na fug tehen enele hum toho, ”Nikni Allah amingmingangge welahenon, kou ari fam nunusuruk angge isag nesehek,” ulug enele ya nga uruk latfag.

⁴¹Ari urukmu Elisa inowen, ”Roti anggen lilibug tehon wak aliyek!” ibagma og irik watfag. Og irik watfagma Elisan roti anggen ino kuluk hahon kou fam esetfahon sehelimu hinanggo fibareg amingmingangge fam, ”Ketiya nalusan fibir isimin,” ulug hiyag itfagma ap arimanowen nek harukmen kuluk hahon arimano siyag teg eleg ulug nibag.

⁴²Welatfagma o misihim sambil o Baal-Salisa ahun ekeyen roti anggen atam palfahon sum misig men roti anggen tag toho wirahowon likin fimahen 20 men Allah amingmingangge Elisa og itmin ulug walug watfag. Walug watfagma Elisa inowen amingmingangge hiyag utuk lit, ”An notsi nalusan fibir isimin,” ibag.

⁴³Ibagma amingmingangge inowen, ”We tor angge werehon ari nangginoho ap teng uhan aruman kut-kut nalusa?” ibagma Elisa inowen nin eke ele uruk lit, ”Notsiyen nalusan fibir isimin! NINIKNI Allahn ele uruk lit, ’Nalusareg enehum ouk atmisimu roti anggen minggiroho embelusa,’ ehek,” ibag.

⁴⁴Ari ibagma amingmingangge inowen roti anggen arimano kut-kut og isibagma NINIKNI Allahn ibag ane hikit toho nibareg enehum ouk atfagma roti anggen minggiroho imbibag.