Read Angguruk Yali 2 RAJA-RAJA 5 Bible Online

2 RAJA-RAJA 5 - Angguruk Yali bible

2 RAJA-RAJA 5

¹ NINIKNI Allahn Siria inap sehen senehon onowe Naaman let turukmu umalikisi sehen senehon arimano milal eneptuk lit ap seliyon apmayap eneptuk latfag. Apmayap eneptuk latfahon fahet ikni Siria inap onowe suwon inowen Naaman fahet fano peruk lit palimuwap turuk latfag. Naaman ino ahako roho turuk ahun welatfag angge famen ahap salukangge reg latfag.

²Misihim Siria inap wilip atfareg Israel inap men tog aptuk lit Israel inap enehaloho eke inggik hele waroho walug watfagma Naaman uhe let turuk laruhu ulug amingmingangge atfag.

³Welatfareg hili inowen isinga fam ele uruk lit, ”Nikni Naaman ino Allah amingmingangge nabi o Samaria werehon ino ambeg lelep halug ahap salukangge rohon fanowap telep,” ibag.

⁴Ari ibahon holfareg hili inowen ari roho irisi ulug Naaman inowen ikni ap suwon hiyag irik libag.

⁵Hiyag itfagma ap suwon inowen, ”Fano lamihin. Anden Israel inap inikni suwon fahet suwesingga eke embemin,” ulug hiyag itfag. Hiyag itfagma Naaman inowen uang perak teng-teng angge 30.000 men uang emas teng-teng angge 6.000 men sum fanowon numen men hihit nabuhuwon fahet onggo og uruhuk ulug walug o Israel libag.

⁶Libareg suwesingga at ikniyen haharoho imbibahon ino Israel inap inikni suwon og itfag. Suwesingga ino undama ele haharoho imbibahon te tu, ”Suwesingga aru an namingmingangge Naaman inowen hambeg walug waharuk. At ahap salukangge rohon haren fanowap tuhunen hambeg monde feruk lahi,” ulug haharoho imbibag.

⁷Haharoho imbibahon ino kim hibareg Israel inap inikni suwon inowen ele uruk lit, ”An Allah hag toho wereg lit ap winon ware feselug winon onolukap eneptukmu yet niyarisireg Siria inap onowe inowen ap ahap salukangge rohon aru fanowap tukag ulug nambeg monde ferisi ano? Naaman ahap fanowap tuhu fugmu an men tog abuhuk ulug haharoho emberisi ane honoluk toho welamek!” ulug indi oloken sum wan teg latfahon ino tararag tibisibag.

⁸Israel inap inikni suwon inowen asum tararag tebesehek urukmu Allah amingmingangge nabi Elisa inowen hol hibareg ot eke hiyag utuk lit, ”Ap suwon ambeg lamihinteg hiyag itmihinon tu, ’Nungge fahet hasum tararag tebesehen? Naaman inowen Israel inap sehelimu nabi wereg puhuwen an nambeg wamag,’ imihin,” ulug monde fibag.

⁹Monde fibagma ot ino hiyag irik libagma Naaman ino kereta wam kudan lisoho walug laruk angge fam lahibareg Elisa ibam sokolma in arik libag.

¹⁰Libagma Elisa inowen amingmingangge eke Naaman ambeg monde fibagma amingmingangge inowen Naaman hiyag utuk lit, ”Ik Yordan ikma lamihinteg ik hurug hinggik sabirenam wambimihinmu hahap salukangge rohon ari eleg atmisimu hahap fanowon inam atmisi,” ulug hiyag itfag.

¹¹Hiyag itfag ane ino holfareg Naaman indimu olok hibareg ele uruk lit, ”An pihiyon te Elisa ebe wilibig watmisireg an niraham unduhuk lit IKNI Allah fam sembahyang imisireg inggiken nahap salukangge rohon palimu wal haruk lit nahap fanowap napmisi pihi.

¹²Ik o Israel kinang fam werehon obog toho siyag tegma ik Abana men Parpar men an nibam o Damsyik kinang fam werehon il mondabi fano rehen an o Damsyik eneg an nahik hurug wambelema nahap fano alep,” ulug ahummu het-pet hibareg Elisa ibam embeselug libag.

¹³Larukmen otsi at iraham watfareg ubam enele uruk lit, ”Ninikni, Allah amingminganggeyen alem angginon timihin ulug hiyag hetlep halug aren elebon hikit toho haren telen angge famen we ik hurug wambik lamihinteg hahap fano atmisi ulug hiyag herehekon ari se regman nungge fahet embeselug lamihin?” ulug hiyag itfag.

¹⁴Hiyag itfagma ik Yordan ikma libareg Elisa inowen hiyag itfag ane hikit toho Naaman ik hurug sabirenam wambibagma ebe mondabi fano atfareg ahap malik ket indag atukon ahap hag toho atfag.

¹⁵Ahap fano atfagma Naaman ino men otsi men Elisa ambeg suhuloho libareg Elisa fam hiyag utuk lit, ”O winama Allah wereg eleg, we Israel inap eneg Inikni Allah wereg ulug an ketiya noluk aha. Ari fahet an hat hamingminganggeyen onggo og hitminon hilamihin,” ibag.

¹⁶Ibagma Elisan te, ”NIKNI Allah oluk werehon olohotma amingmingangge an welahireg anden At olohotma tem toho onggo nungge-nungge hilamin fug uruk lahi,” ibag. Ibagma Naaman inowen hilamihin ulug ele ine roho uruk latfag angge famen Elisa inowen mondabi imbisibag.

¹⁷Imbisibagma Naaman inowen ele uruk lit, ”Ari ehen halug kinang wam keledai pirenen walug la hag toho og nitmihinmu an nibam walug lahukteg[2] Allah hag toho wereg perukon winon fahet wam waroho hubu lahabuk fug angge we NINIKNI Allah fahet hubu lahaptuk laruhuk.

¹⁸An nikni ap suwon ino Siria inaben tu Allah hag toho wereg perukon Rimon wel timin ulug Rimon ibam kurukmu an oho at iraham wereg lit Rimon ino wel turuk laruhuk halug anden siyag ane turuk laruhukon ari NINIKNI Allahn ambolmaya fusuhu,” ibag.

¹⁹Ibagma Elisa inowen, ”Hindi se roho lamihin,” ibag. Ibagma Naaman ino nibam lamin ulug at embeselug il misig larukmen

²⁰Elisa amingmingangge Gehazi indimuwen wenggel haruk lit, ”Nungge fahet an nikniyen Naaman Siria ahun ino fanowap tehekteg onggo walug waharisiyon ino hilalug lamihin ehekma nin suhuloho walug laruk? Ari fahet NINIKNI Allah oluk werehon olohotma an welahireg pupu angge Naaman muko laminteg heng timinmu winon minggiroho og nitmisi,” pibag.

²¹Ari pibareg Gehazi ino Naaman ombolim muko libag. Naaman inowen ap misig pupu angge muko waharukmu yet hibareg kereta wam kudan lisoho walug larukon famen hik toho wambulug Gehazi ambeg libareg, ”Nare, fano welahep?” ulug hi ribag.

²²Hi ribagma Gehazi inowen, ”Fano welahe,” ibareg, ”We ketiya eneg Allah amingmingangge nabi tom Efraim fam werehon arimano enesehelimuwon kabiniyon piren an nikni Elisa ambeg wahasama Naaman inowen uang perak teng-teng angge 3.000 men sum fanowon piren men it fahet og hitmisimu walug watmihinen ombolim muko lag ulug an nikni Elisan hiyag nerehekma wahi,” ulug Naaman hiyag itfag.

²³Hiyag itfagma Naaman inowen, ”Fano, perak ili rurukon tor angge heng nabehenma anden nin sebe roho uang perak teng-teng angge 6.000 og hitminmu walug lamihin,” ulug ele ine roho Gehazi hiyag itfareg perak men sum wan turukon fanowon piren men sum piren fam fani roho at amingmingangge piren og isibagma it piren itano Gehazi olohotma laruk lit Naaman inowen og itfag angge obog toho Elisa ambeg walug watfag.

²⁴Elisa wereg ambeg punu fam walug libagma Gehazi inowen sum piren itano it ininggikmuwen oko wibareg olma imbik kulug ap itano unubam lalihip ulug hiyag isibagma suhuloho libag.

²⁵It itano libagma Gehazi ino kibareg ikni olohotma libagma Elisa inowen, ”Gehazi, namloho, kema lahenteg wahen?” ulug kapal hibagma Gehazi inowen, ”An hat hamingmingangge kema lahi fug,” ibag angge famen

²⁶Elisa inowen hiyag utuk lit, ”Hun Naaman kereta famen hik toho wambehekteg hat hiraham lahama an nahime lahareg yet heyehek. O yoho perak men, sum fanowon men, e zaitun yatuk ambeg men, anggur yatuk ambeg men, wam sapi men domba men, namingmingangge ap men hiyap men hilamin puk fug!

²⁷Naaman ubam salukangge welatisiyon ino hat hubam aruhumu hat humalikisi humbusagsi unubam oho weregman eneg mondabi welaruhu,” ibagma Gehazi ino ahap salukanggeyen kinang puwa yanggowon hag teg lit wilip atfag.