Read Angguruk Yali 2 RAJA-RAJA 6 Bible Online

2 RAJA-RAJA 6 - Angguruk Yali bible

2 RAJA-RAJA 6

¹Misihim sambil Allah amingmingangge nabi Elisa inowen milal eneptuk latfahon arimanowen onowe Elisa hiyag utuk lit, ”Nonowe, nit ninibam hat hiraham welahe ambeg mondabi keleg teg.

²Ari fahet nit Yordan ikma lulteg obamangge man-man wulteg o nit welamuhuk ambeg wibuhuk,” ulug hiyag itfag. Hiyag itfagma Elisa inowen, ”Wak lalihip,” ibag.

³Ibagma ap misihen ele uruk lit, ”Nowe, har oho nit hotsi men ambiyeg lul,” ibagma Elisan te, ”Fano, an oho ambiyeg lul,” ibareg

⁴ar oho otsi men ambiyeg Yordan ikma libag. Libareg it arimanowen obamangge mininggul ulug e mutuk latfag.

⁵E mutukmen yaha ap misihen tohon anggen heneko ik Yordan ahummu longgo ik wambibag. Wambibagma ap inowen ele hum toho uruk lit, ”Yahike nikni, yaha aben tohon ikma wambehek,” uruk latfag.

⁶Uruk latfagma Elisa inowen, ”Keya fil wambehek?” ulug kapal hibagma ap inowen, ”Tiya wambehek,” ulug wambibag ambeg itano fuki roho owe hiyag itfag. Hiyag itfagma Elisan e misig yenggeloho wibareg yaha anggen wambibag ambeg itano hik ha wambibagma yaha anggen ino ik ahum emberimu lahik watfag.

⁷Lahik watfagma Elisa inowen, ”Lisoho wimin!” ulug hiyag itfagma ap ino inggiken lisoho wibag.

⁸Welatfareg Siria inap onowe suwon inowen Israel inap men tog abul ulug otsi men enele sahaltuk lit, ”Ap seliyon waharuk ke indi fil ahandi fil kahal enebik lalihip!” ulug hiyag isibag.

⁹Hiyag isibagma Allah amingmingangge nabi Elisa inowen Israel inap onowe ambeg ap misig monde fibagma ap ino libareg ap suwon fam hiyag utuk lit, ”Siria inap kalemma kahalik wahasama hit ke ari fam la fug!” ulug hiyag itfag.

¹⁰Hiyag itfagma Israel inap onowe inowen Elisan ap seliyon kahalik wahasa ulug hiyag itfag ambeg ino aluwat isa lalihip ulug ap mon enepfag. Mon enepfagma Elisa ino winasul oho Siria inap kahalik waharuk ambeg oluk teg lit la fug ulug ele pirenam hinahanam ap suwon fam hiyag utuk latfag.

¹¹Ari roho eneg turuken Siria inap onowe ino indimu yat toho wenggeltuk lit otsi wol enepfareg ele hiyag isaruk lit, ”Nit tumon ap san Israel inap onowe ambeg huruwe larukmu yet haruk lahep halug hiyag nemek!” ulug hinog og isibag.

¹²Hinog og isibagma ot misihen ap suwon fam hiyag utuk lit, ”Nikni, nit Siria ninap te fug, we Allah amingmingangge nabi o Israel werehon Elisa inowen hat hamu hibalma nohoruk lit wenggel halug uruk lahen ane obog toho oluk teg lit aren Israel inap onowe suwon hiyag utuk,” ibag.

¹³Ari ibagma ap suwon inowen, ”Elisa kema wereg ulug pen ha lalihipteg wereg halug an hiyag nirik watlihipmu anden te Elisa senerik lalihip ulug ap mon enepmin,” ibag. Ari ibagma otsiyen, ”Elisa o Dotan wereg,” ulug hiyag itfagma

¹⁴Siria inap onowe suwon inowen otsi sehen seneg inap anggolo mon enepfagma wam kudan lisoho walug laruk angge fam lahibareg hubanggo o Dotan libareg o pumbuk ino walinggig latfag.

¹⁵Walinggigmu Elisa amingmingangge ino hubet in atug sok husoho wilip atfareg yet harukmen Siria inap sehen senehon wam kudan lisoho walug laruk angge fam watfareg o pumbuk ino walinggig lit weregma yet isibareg ikni Elisa fam hiyag utuk lit, ”Eiye nikni, ketiya nit nunusulusan ke roho tul?” ibag.

¹⁶Ibagma Elisa inowen, ”Hakol ha fug, nit let neneptukon anggolo regma it let eneptukon we tor angge wereg,” ulug hiyag itfag.

¹⁷Hiyag itfareg Elisa inowen Allah fam sembahyang uruk lit, ”NIKNI Allah, Haren let neneptukon yet isamisiyen namingmingangge il selehap timihin,” ibagma NINIKNI Allahn amingmingangge ino il selehap tibagma at inowen yet harukmen punu Elisa wereg ambeg ino kereta wam kudan lisoho walug laruk angge indok hag toho umbagpag turukon anggolo roho walinggoho weregma yet hibag.

¹⁸Yet hibagma Siria inap arimano Elisa ambeg waharukmu Elisa inowen Allah fam sembahyang uruk lit, ”Ap waharukon aruma inil hupni fisin!” ibagma NINIKNI Allahn ap seliyon arimano Elisan sembahyang ibag ane hikit toho inil hupni fisibag.

¹⁹Inil hupni fisibagma hun Elisa ino ap seliyon enembeg libareg hiyag isaruk lit, ”Nori, tuma re hiren o pumbuk yami rik wahebon ino fug. An nombolim watlihipmu ap yami ril wahebon ino ebe tu ulug anden hiyag hisamin,” ulug hiyag isibareg Siria inap arimano o Samaria hondog eneplug libag.

²⁰O Samaria libareg Elisa inowen Allah fam uruk lit, ”NIKNI Allah, Haren ap aruman inilanggen fenggen enepmihinmu yet halusa,” ibagma NINIKNI Allahn Siria inap arimano inilanggen fenggen enepfagma iren yet harukmen o Samaria pumbukmu welahe ulug onoluk atfag.

²¹Israel inap onowe inowen Siria inap o Samaria pumbukmu weregma yet isibareg Elisa fam kapal haruk lit, ”Nikni, ap aruma unusimin ano?” ulug kapal hibagma

²²Elisa inowen, ”Unusimihin fug! Haren tog elman sen eneplug waharuk lahenon oho unusuruk lahen fug angge re enemu wahason aruma unusuk fug angge suburu men ik men og isamihinmu nalusareg onowe wereg ambeg inibam suhuloho lalusa,” ulug hiyag itfag.

²³Hiyag itfagma Israel inap onowe suwon inowen it fahet seni humon isag enepfahon nibareg inikni wereg ambeg inibam suhuloho libag. Libag sul ino ak tibareg Siria inap arimanowen Israel inap men tog abul ulug Israel kinang fam waharuk latfag fug.

²⁴Welatfareg Siria inap onowe suwon Benhadad inowen Israel inap men tog abul ulug otsi sehen seneg inap obog toho wol enepfareg o pumbuk Samaria waling enebik libag.

²⁵Waling enebik libareg weregman o Samaria pumbuk fam suburu obok humon lahibagma wam keledai unggul fahet onggo uang perak teng hinahan 80 fam, suwe al witukon we tor angge 200 gram fahet uang perak fuwaben fam imbik lahibag.

²⁶Ari roho turuk lit weregma Israel inap onowe suwon ino elehet o Samaria pumbuk walinggoho ohowon pali ke larukmen hiyap misig ap suwon fil ele hi roho uruk lit, ”Nikni ap suwon, haren let nabin!” uruk latfag.

²⁷Uruk latfagma ap suwon inowen, ”NINIKNI Allahn hat let haptuk eleg halug anden oho ke roho let habihi ha reg. Suburu men ik men an ninggikmu eleg,” ibareg

²⁸nin eke kapal haruk lit, ”Alem nungge hubam weregma ehen?” ulug kapal hibagma hiyap inowen hiyag utuk lit, ”An nehe tuwen an hiyag nutuk lit, ’Hat hamloho o yoho waroho esebulteg nulen og nitmihin. Sono halug an namloho esebuhukteg nahuk,’ ulug hiyag nitisi.

²⁹Hiyag nitisimu an namloho waroho esetukukteg narukuk. Narukukteg likiyamon anden te, ’Hat hamloho nulen og nirik ma,’ ulug heng tirikik angge famen hiyap inowen at amloho ino hiraho fat tarisi,” ulug ap suwon hiyag itfag.

³⁰Hiyap inowen hiyag itfag ane ino holfareg ap suwon ino ahummu siyahen sum wan teg latfahon tararag tibisibag. Tararag tibisibagma ap anggolo elehet iraham unduhuk latfahon arimanowen yet harukmen hun ino amigmu kinang fesi lahabegma yet hibag.

³¹Yet hibagma ap suwon inowen ele uruk lit, ”O yoho tu fam Elisa hun Safat amloho ino unggul kong toho hik isamin. Watmin fug halug Allahn alem angginon nubam fano umbukag!” ibag.

³²Ari ibareg ap suwonen ot eke hiyag utuk lit, ”Hat tam Elisa ambeg lamihinmu an hombolim watmin,” ulug monde fibag. Monde fibag li itano Elisa men ap suwon-suwon inim ambiyeg Elisa ibam heriyeg latfag. Ap suwonen monde fibahon ino Elisa ambeg uwan wam fugmu Elisa inowen ap suwon-suwon arimano hiyag isaruk lit, ”Ap unusuruk ahun inowen an nunggul kong toho hik isamin ulug ap nambeg monde fik waharuken honoluk toho welatihip. Ap monde fehekon ino waharuk halug sok lare felihipteg ap ino olma kik waruhu rohon senetlihip! At watmisiyon ombolim ap suwon monde fehek ahun ino inggareg waharuk lit uyug aplohok urukmu hol haruk lahi,” ulug hiyag isibag.

³³Hiyag isarikim itano Israel inap onowe ino Elisa ambeg watfareg Elisa fam hiyag utuk lit, ”Alem angginon nit nunubam atisiyon aru NINIKNI Allahn monde ferisimu anden nungge fahet Allah, Haren let nenebin ulug hiyag uruhuk?” ulug hiyag itfag.